Apostolmi 6
6
Timi Tsünì Kishelu keu
1Tipau ghuloki lo kughou küpülümiqo alau shi iko wove keno, Greek tsa kipími Jewmiqo#6:1 Greek tsa kipími Jewmiqo ye Greekmi tsa eno küxü ghola xüwuve kemiqo ke no Hebrew tsa kipimí Jewmiqo ye tsalà kipetsü achuqupu kijé tsü akeu lo panonguw chimemiqo juzüve tsü anike ipi muchho ipeghive. 2Tighenguno pano Chighikini no küpülümiqo kümtsü aqoshi kukütsü no pi, “Ningu ye akibepu lo chuqu-kushoqo kijé tsü nikeu ghenguno Alhou tsa pichebekümlà kughuchove akeu ye achipi kumoe. 3Athiküzümi eno achelimiqo, nongu dolo timi tsünì Aghungu no chhitoi kemi eno alokütsümi kishephe lo. Ningu no bemakho hipau panoqo pichebeve 4no ningu ye akighini eno Alhou tsa pichebekümlà lo amlo tsünie.”
5Akükümsü hipau kümtsü no puloluve. Panongu no aküpülü eno Aghungu Kimthe no chhitoi akeu Stephen kishelu; eno Philip Procorus, Nicanor, Timon, Parmenas eno Antioch lono ighi keu Jewmi chineye luve kemi Nicolas noqo ghí kishelu. 6Panongu no timi hipaqo sasü apostolmiqo lau ighi eno apostolmiqo no panoqo shou au be no inikhu tsü.
7Ikehu Alhou tsa ye veküpha wove. Jerusalem lo paikhavi lono küpülümi kikihi alau shi iko wove, eno Jewmi achinemi kutomo no atsakiviu gholuve no küpülümi shiluve.
Stephen Küghaluve
8Tishi akelo, Stephen ye Alhou’w küpükini eno aküka no chhitoi shi püzü akümzapu eno amichipu kümlà kijè timiqo gholo mülà ae. 9Ikemu ghochile keu ipeghive, tiye synagog lo kuqhopheve kemiqo (ishi panongu jeku cheke) Jewmi Cyrene, Alexandria eno Cilicia, Asia bocho lono ighi kemiqo no Stephen sasü kütsala thuve. 10Ikemu panongu ye pa no Aghungu no alokütsü pa tsü no piakeu lo puthugho no ghechile mülave.
11Ikehu panongu no tuqhou no timi khami züluve no tipaqo pelo ishi pipe, “Stephen no Moses pipütha eno Alhou pipütha keu tsa pi aghí keu ningu no chilue.”
12Panongu no timiqo, kichimiqo eno ayeza kükütsümiqo xukuthove. Panongu no Stephen küghaluve no Jewmi Hoho zülo sasü ighi. 13Panongu no kichileu thopimi sasü ighi, eno ishi pipe, “Timi hipau ye tamo no akimthe-a hipau pipüsa keu eno ayeza lachile keu tsa khilemu tavemo no pi achenie. 14Kughengu pa no Nazareth nó ghami Jisü no a-a hipau kütsave nani eno Moses no akukhuaye ningu tsü no pekishe ighi keu kilive tsü nani ipikeu ningu no chilue.”
15Jewmi Hoho ki lo iqa akemi kümtsü agi süküqümo no Stephen gi lo jupuku, eno panongu no kungumi gi toi pa gi ithulue.
Currently Selected:
Apostolmi 6: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
