Apostolmi 7
7
Jewmi Hoho Zülo Stephen Tsapi
1Tisheno achinetou no Stephen vilo iniju, “Hi nguku akeqo ye kuchou keshea?”
2Stephen no khochile, “Athiküzümi eno apùnoqo, I tsa inilo! Ningu papù Abraham no Harran lo wo xü mphi züu Mesopotamia lo ngo aphi lono ajuküvü Lhou no pa lau ipeghi pìye ke. 3Eno Alhou no pa vilo, ‘O ghakhu eno ow timiqo qhivelo eno I no O pìye niye akeu yeghi lo wuvelo,’#7:3 Bothu 12:1 ipi ke.
4“Ike pa no Chaldeami yeghi qhive no Harran lo küghüna auve. Papù thive kethiu, Alhou no itehi nongu no küghüna akeu yeghi lo pa puwu ke. 5Alhou ye hilehi amheghi kiumu pa tsümoe, pa pukhu nesükulupu qhemi ayeghimu tsümoe. Ikemu Alhou no Abraham no anu küha aphi lonomu pa thikhau pa tikughukomiqo pelo ayeghi hu qhasüluve penike ipi tushokiqhi shike. 6Alhou no hipau gholau no pa vilo pi: ‘Ampe aqhe bidí kutólo O tikughukoqo ye kütami ghakhu lo inami shi nani, eno panongu ye aqüaxemi shive nani eno panongu peithapüsa nani. 7Ikemu I no panongu no aqüaxe shi qe achekeu shiye ghimeqhi nani eno kutou panongu no aghakhu tipau lono ipeghive nani eno hipau-a lono I mülá nani.’#7:7 Bothu 15:13,14 8Tisheno Alhou no aphighüyiko-küghá shoqhi Abraham tsüke. Eno Abraham ye Isaac papù shilu eno pa punú keu atsala tache thiu aphighüyiko-küghá shilu. Kutou ye Isaac no Jacob papù shilu, eno Jacob no apù-asü chighikini papù shilu.
9“Kughengu apù-asüqo no Joseph ju anheshuve ke ghenguno pa pesü Egypt lo aqüaxemi lakhi toi jesüve. Ikemu Alhou no Joseph gholo ae#7:9 Bothu 37 10eno aküküpüna jeli kümtsü lono pa xaphelue. Alhou no alokütsü Joseph tsü no pa pelo Egypt kükau Pharaoh mlo chulu pe. Tighenguno Pharaoh no Joseph pelo Egypt eno pa kükaki kümtsü shou ayekipeu shipeke.
11“Tipathiu püqümiye lakhi no Egypt eno Canaan qha kümtsü lo ighi, tino aghime kijè süghi, eno ningu pù-asüqo ye achuqupu phumlave. 12Kughou Jacob no Egypt yeghi lo athì ani ipi chilu keno, pa no atüghiu xukuju lo ningu pù-asüqo puwu. 13Panongu no akiniù xuju wu kelo Joseph no pa thiküzümiqo vilo pa ye khuu keno pive, eno Pharaoh no Joseph kibolomi ghili ithive. 14Hipathiu Joseph no papù Jacob eno pa kibolomi kümtsü kuwu pe. Akibolomi aqó lo pano lhotsüni pungu ake. 15Tipathiu Jacob ye Egypt lo iqi, tilau no pa eno ningu pù-asüqo ye thive ke. 16Panongu sükumoqo ye Shechem lo pechile ighive püzü Abraham no Shechem lo Hamor nopuqo lau pisa hami tsü no qhü keu kumoki lo qhove.
17“Kughou Alhou no Abraham lau tushoqhi püakeu shikupu nikeu do kupunú ighive keno, Egypt lo ni timi kutomo iko wove. 18Tipathiu ‘Egypt lo Joseph ghili mtha kemi akükau akithé lakhi no aküka lakhü lo ikughi.’#7:18 Ipe 1:8 19Pa no niw timiqo pishikiqhipu shi peitha no ningu pù-asüqo qhasü eno anguka lono panongu ngá kughunuqo thive peniye ikhipeve pe ke.
20“Tipau ghuloki lo Moses punú, eno pa ye paküta keu nu lakhi ke. Aqhi küthü kutólo pa pù-aza no pa tucho-mjoe. 21Kughou pa pesü khalacheu qhive keno, Pharaoh ngá no pa saluve eno panu toi Moses saputhu. 22Moses ye Egyptmi kighithi lokütsü kümtsü pe pa shika puthu eno pa ye atsapi eno akümlà lo ighono akumto shiluve.
23“Kughou Moses no ampe lhobidi shi akeno, pa ye pa likhi paw timi Israelmiqo xuju wuni ke xathalu. 24Pa no Egyptmi lakhi no Israelmi lakhi ghimeqhi aghí keu ithulu, ike pa no ghimeqhi akeu süsho niye wu eno amkhü lu niye Egyptmi hu heqhipithíve ke. 25Moses no kümsü keu no Israelmiqo ye Alhou no panongu xaphelu nike ghenguno pa peitha ani kepi kümsülu nani küghashi, ikemu panongu ye tishi kümsümoe. 26Tishiwo thoghiu Moses no Israelmi kini kichighi aghí keu ithulu. Pa no pükapütsa no pama külakishi shive tsü niye ishi pi, ‘Timi ghí lai! Nokujo ye athiküzümi ke; nokujo ye kushiye lakhi no lakhi ghüza nishi ani kea?’
27“Ikemu timi lakhiu kijipüsa akeu hu no Moses tuha peve no pi, ‘Khuu no O pelo ni shou ayekipeu eno küghaküthau shipe kea? 28No ye ighina Egyptmi hu pìthíve ketoi I pìthíve niye kümsü ani keshea?’# 7:28 Ipe 1:8 29Kughou Moses no hi chilu keno pa ye Midia lo pove, tilehi inami toi küghüna ache püzü anu kini shie.
30“Ampe lhobidi wove kethiu, kungumi lakhi no Sinai Naghuto phivilo asayeli lo asüminipho lono ami iqü akeu mili lono pa lau ipeghi pìye. 31Kughou pa no hi ithulu keno, pa ye ti jupe akümzave. Pa no tipau ju niye aphivilo wu kelo Ampeu no ishi pikeu chilu: 32‘Ni ye O pù noqo Lhou hu ke, Abraham, Isaac eno Jacob noqo Lhou ke.’#7:32 Ipe 3:6 Moses ye akümsa no khokho shive no tile jupuku nikeu ighüve.
33“Tile Ampeu no pa vilo pi, ‘O pukhukuqho xavelo, kughengu nono khile puthugho ani keno tiye akimthe-a ke. 34iw timi Egypt lo ghimeqhi akeu I no kuchou no ithuluvea. Panongu ghime ghügha I no chiluvea eno ni ye panongu kuqhophe nike iqighivae. Ikehu ighilo, I no Egypt lo O kighide puwu nike.’#7:34 Ipe 3:5,7,8,10
35“Moses hipau ye timiqo no, ‘Khuu no O pelo ayekipeu eno küghaküthau shipe kea?’ ipi no milive keu ke. Pa ye kungumi asüminipho lono ipeghi keu vechewo Alhou no pa pelo Israelmiqo yekipeu eno kuqhokipheu shipe nike puwu keu ke. 36Pa no panoqo sasü Egypt lono ipeghino Egypt yeghi lo akümzapu eno amichipu kümlàqo shike, tiye Akuhu Züghi lo ngò küghünamokeu-a lo ishi ampe lhobidi kutólo tishi ke.
37“Moses hipau ye Israelmiqo vilo, ‘Alhou no nongu ghenguno tungkupu I toi keu lakhi nonguw timiqo dolo no ipeghi pe nani’#7:37 Zaki 18:15 ipikeu ke. 38Pa ye Sinai Naghuto lo kungumi pa pütsa keu eno ni pù-asüqo gholo küghünamokeu-a lo kuhokumqo keu lo ake; eno pa no ningu lau pekishe kepu aküxüpu tsaqo saighike.
39“Ikemu ni pù-asüqo no pa gholu nikeu lo milive ke. Tishini ke züqhulo panongu no Moses milive eno panongu mlo tuqhou lono Egypt lo idewove nikeu kümsüve. 40Panongu no Aaron vilo ishi pi, ‘Ningu züu wu penike alhouqo mülà tsülo. Kughengu Moses, khuu ningu sasü Egypt lono ipeghi keno pa ye kiu shivea keno ningu ye mthae!’#7:40 Ipe 32:1 41Tipau dolo no panongu no ajulho lakhi amishiti ghola lono mülà ke. Panongu no aghakishi jeli süghi no pa mülá eno panongu u no mülaqhilu keu pesü nibonilei keu ghulhu shike. 42Ikemu Alhou ye panongu lau no kughosü wuve eno panongu pesü khetsünhe, aqhi, eno ayepuqo mülá apenike tsüve. Hiye tungkupumiqo no kaku lo ishi yèpüa keu shikupu ke:
“ ‘Israel timiqo, nongu ye küghünamokeu-a lo ampe lhobidi itsüche kelo
aghakishi eno akümlaghoqo pesü I lau süghi keshea?
43Nongu ye Molek lo puloshoqhi-chebo
eno nongu lhou Rephan yepu,
nongu no mülá nike ghenguno ajulho jeli mülà keqo pekisheke.
Tighenguno I no nongu pesü Babylon nguno huküdau haphe puwuve nani.’#7:43 Amos 5:25-27
44“Ni pù-asüqo ye küghünamokeu-a lo puloshoqhi-chebo lo tushokiqhi yeza hu panongu gholo acheke. Tiye Alhou no Moses vilo mijetsü keu ngò aghola pa pìyeve keu kiqi lono mülàe. 45Puloshoqhi-chebo tipau ithuluve kethiu ni pù-asüqo no Joshua sakiphe qholo no Alhou no panoqo zülo no shiye kütamiqo hapheve tsü keu yeghi lo saighi. Puloshoqhi-chebo ye ayeghi tipau lo David ghuloki kutólo ache, 46pa ye Alhou’w kikimiye qholo ache eno pa ye Jacob Lhou pelo ngolu penike aki lakhi kutò tsüpe nikeu ghenguno khue. 47Ikemu Solomon no Alhou ki shiqhepuku tsüe.
48“Tishimu, Alhou Akiqheu ye timi u no mülà keu kiqo lo ngo chemoe. Tungkupumi no pike toi:
49“ ‘Kungugha ye I küká lakhü
eno ayeghi ye I pukhu kibepu ke.
Nongu ye I ghenguno kiutoi keu ki shi tsüní kea?
ipi Ampeu no pi.
Momu khile no I kulhokiqhi-a shini kea?
50Thime hipaqo kümtsü I u no mülà ke kumo keshea?’#7:50 Isa 66:1,2
51“Nongu amlo kuthovi kemiqo! Nongu mlo eno kìníqo ye kili mphie. Nongu ye nongu pù-asüqo toi pülhapuju Aghungu Kimthe mjochile cheni! 52Nongu pù-asüqo no pishi-pujumo keu tungkupumi lakhimu akeshea? Panongu ye khunoqo no Amikuchomi Lakhi ighi nani ipi pichho keno tipaqo ghí heqhipithíve ke. Eno itehi ye nongu no pa jechuve eno ghiqhi pithivae— 53nongu ye kungumiqo vechewo ayeza tsü keu ikhilue ikemu tipau gholumoe.”
Atu Pesü Stephen Veqhi keu
54Kughou Jewmi Hoho lo kihimpemiqo no Stephen no pikeu chilu keno, panongu ye pa shou muqhumüzai eno ahu tsüghü-bubu shike. 55Ikemu Stephen ye Aghungu Kimthe no chhitoi shi püzü atsütsǘ lo jupuku no Alhou juküvü ngò Jisü no Alhou u ajeu puthugho akeu ithulu. 56Stephen no pi, “Julo, ni ye atsütsǘ khaqhi akeu eno Timi Nu no Alhou u ajeu puthugho akeu ithulu ani.”
57Hipau chilu kelo panongu no panoqo kìní kujukhaluve no asütsa kuloghi lono igha ghi Stephen küdau kuhasü ighi, 58eno panongu no mishighüna lono Stephen sünhepheve no atu pesü pa veqhi thuve. Tishi akelo ju akemiqo no panonguw ubephi xapesü apumi lakhi Saul ipikeu pukhuphi lo qhive.
59Panongu no atu pe Stephen veqhi akelo Stephen no ishi inikhu, “Ampeu Jisü, I küxü ikhilu tsülo.” 60Tisheno pa ye qhoqhünheluve no ighamuku pi, “Ampeu, hipau xiné panoqo shou betsü kevilo.” Pa ye hi pive kethiu thive.
Currently Selected:
Apostolmi 7: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
