Apostolmi 26
26
1Tisheno Agrippa no Paul vilo ishi pi, “O likhi O ghenguno pilu kepu azah O tsü ani.”
Ike Paul no pa u kihí pìye no pa likhi pa shokha keu tsa pithu: 2“O Akükau Agrippa! Ni ye Jewmiqo no I nguku akeu jeli kümtsü lono I likhi I shokhalu kepu ghenguno ishí tsalà lo O zülo puthugholu akeu ye angukivi shilu ani kepi kümsülu anie, 3eno akhotoshi Jewmiqo kukhuaye eno panongu dolo kütsala achekeqo kümtsü nono akivishi ithi akeu ghenguno ke. Tighenguno, kutuu no I tsa ini tsü penike I no O qhüiniju ani.
4“Jewmiqo kümtsü no I no itimi lakhi shi aphi lono, I küxü huthu keu lono, I likhi I ghakhu lo eno Jerusalem kutólo ghí kíshi xü ighi keno ithi ani. 5Panongu ye ado kushuwa lono ni ithi ighivea eno panongu no pulo aghí aye ni ye achineye lo puloniqhiyi eno mükamüghai keu Phariseemi lakhi shi xü acheni ipi I shepe shi tsülu nani. 6Eno itehi ye Alhou no ni pù-asüqo lau kiu tushoqhi keno I no tipau shou lajube keu ghenguno ishí ye I shou atsa kügha anie. 7Ashoqhi hipau shikupu keu ithulu niye lajupu akeu lo ningu ashiaye chighikini ye putho-pucho amlotsüqhiyi Alhou qe acheni ke. O Akükau Agrippa! Hipau lajupu ghenguno Jewmi hipaqo no akipimí I tsü anie. 8Alhou no kithimi xüputhu ke ipi kushiye nongu khami ye pülü müla no acheni kea?
9“Ni ampi ghí Jisü ipikeu Nazareth nó ghami lachile nike ghenguno tokulupu laghi kümtsü shiju ke. 10Eno tihutoi Jerusalem lo I no hitoi shike. Achinetou kükagha lono, I no Ampeu’w timi kutomo akughuki lo khathave, eno kughou panongu pìthíve nikeu shi keno I no panongu lachile keu shi iw pulobe sǘtsü cheke. 11Ghuthu kutomo ni ye panongu ghimeqhi nike ghenguno synagog lakhi lono lakhi lo wuche, eno anguka lono pano likhi pano chine pipüthave peniye shiche ke. Ni ye panongu pishi-puju nikeu no kütakihi acheke, ikehu inami mishighünaqo lo ghí I no panongu hawu niye wuche ke.
12“Hitoi kicheghüzü shi chekeu tsalà lakhi lo ni ye achinetou no kükagha eno aküka I tsü keu pesü Damascus lo wuche ke. 13O Akükau, puchomghü lo I no alà lo che kelo, ni ye atsütsǘ lono aküvü lakhi ithulue, tiye khetsünhe küvü nguno vüqalei shi püzü ni eno I gholo chekemiqo veholuve ke. 14Tishi kelo ningu kümtsü ayeghi lo ilu iqive eno Arameami tsau no I vilo ishi pikeu sütsa chilue, ‘Saul, Saul, no ye kushiye ni pishi-puju cheni kea? Ashu lo püsüpuku nikeu ye O ghenguno kümsapue.’
15“Tile I no iniju, ‘Ampeu, no ye khuu kea?’
“ ‘Ni ye nono pishi-puju akeu Jisü ke,’ ipi Ampeu no khochile. 16‘Itehi ithulo eno puthughove lo. I no O gizülo ipeghi akeu ye O pelo I qeu shipe niye eno nono ni ithuluve keu eno ithulu niye kutò akeu thopi shipe nike O süküsü shi niye ke. 17I no O likhi ow timiqo lau no eno Jewkumomiqo lau no O xapheluve nani. I no panongu lau O puwu ani 18eno tiye panongu nhethi àküzǘ lono aküvü ithulu peniye ke, eno Satan küká lono Alhou küká lo ighive no axinéqo qhikütsü ithuluve pe no I shou pülübe no mitheluve kemiqo gholo ngolu peniye ke.’
19“Ike tishikehu, Akükau Agrippa, ni ye kungu lono ighi keu nhetsü hebidevemoe. 20Ikehu I no kütsü chekeu ye atüghishi Damascus lo akemiqo, tithiu no Jerusalem lo eno Judea qha kümtsü lo akemi eno tithiu no Jewkumomiqo pelo amlo pebideve no Alhou lau xaideghive püzü panongu no xaideghive keu hu akümlàqo lono pephe-piye peniye ke. 21Tighenguno Jewmi khami no achineki khala lono I küghaluve eno I pìthíve niye pükapütsa ke. 22Ikemu Alhou no ishí tsalà kutólo I kuphutsü ke; tishikehu ni ye hilehi puthugho no kijemi ngò kitilami kümtsü lau I shepe tsülu ani. Ni ye tungkupumiqo ngò Moses no kiu shi nani keno pitsü keu nguno alau ye kiumu alá piamoe, tiye— 23Messiah ye aghime shi moayesa nani eno akithí lono xüithuve kemi dolo atüghiu shi nani, aküvü kükütsü sütsa pesü no paw timiqo eno Jewkumomiqo lau süghitsü nani.”
24Paul no pa shokha keu tsa pi akelo Festus no pa tsa vekha ghi müghachhoi shi pi, “No ye izüuvae, nono kutomo ithi akeu no O saküghüzü anie.”
25Paul no khochile, “Akiqheu Festus, ni ye izü amoe. I no kiu piani keno tiye kuchou eno aghibiu ke. 26Akükau ye thime hipaqo kuchopu ithi ani, eno ni ye ighümo no pa vilo pilu ani. I no pülübeyi akeu ye hipaqo kuchopu pa zülo küsüve müla nani, kughengu hiye cheku-cheghu lono shipe püamoe. 27Akükau Agrippa, no ye tungkupumiqo pülü chenima? No ye pülü cheni kepi I no ithi ani.”
28Tile no Agrippa no Paul vilo pi, “No ye hi ikhonhei dolo no I pütsaqhiluve püzü I pelo Khristomi shiluve nani küghashi kümsü ani keshea?”
29Paul no khochile, “Ado ikhonhei shi aghina kushuwa shi aghí namu I no Alhou vilo inikhu akeu ye O likhi kumo no ishí hilehi I tsa ini akemi kümtsü pelo I toiluve penishi ani, ikemu I toi ayikichhe lo ngove penishi amoe.”
30Akükau no puthughove eno pa gholo angh ngò Bernice eno tilehi panongu gholo iqa akemiqo kümtsü puthughove. 31Panongu no achebo lono wuve kethiu, tilehi akemiqo no lakhi no lakhi vilo ishi pia, “Timi hipau ye shipimi keu kiumu kühae eno pìthíve kepu momu akughu shive kepu aküzüpu kumoe.”
32Agrippa no Festus vilo pi, “Tsalá timi hipau no Caesar lau qhüiniju moke aye vejoi phe puwuve kepu shiae.”
Currently Selected:
Apostolmi 26: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
