Apostolmi 25
25
Festus Zülo Paul tsa Kügha
1Pa no aye pe nikeu bocho lo ighive keu atsala küthü shive kethiu, Festus ye Caesarea lono Jerusalem lo iqho, 2tilehi achinetou eno Jewmi sakiphemiqo no Paul shou ngukube akeu pesü pa lau ighi. 3Panongu no Festus qhüiniju ghi Paul pesü Jerusalem lo hakiqhe puwu tsülo ipi, kughengu panongu ye alà lono Paul pìthíve niye kughu pesü ake. 4Festus no khochile, “Paul ye Caesarea lo akughu shipe püani, eno ni ampi no Jerusalem lo kighithe wuni cheni. 5Nonguw sakiphemi khami pelo I gholo ighi pelo, eno tsalá pa no kiuala shipimi keu aghí aye panongu no tilau no pa nguku pelo.”
6Atsala tache ngò chighí kutólo panongu gholo ngove kethiu Festus ye Caesarea lo iqive. Tishiwo thoghiu pa no küghaki lo kukütsü no Paul sasü pa zülo ighi penike azah tsü. 7Kughou Paul sasü iloghi keno, Jerusalem lono ikighi kemi Jewmiqo no Paul sümxa pe puthugho ngo. Panongu no pa shou zapuzaghi nguku keu kutomo peighi, ikemu tipaqo lakhimu kuchou kepi panongu ye kimchitsü mülave.
8Ikelo Paul no pa likhi pa shokhalu keu tsa pi: “Ni ye Jewmi yeza shou shipimi keu momu achineki shou shipimi keu momu Caesar shou shipimive keu kiumu kühae.”
9Festus no Jewmiqo lopu shitsü niye Paul vilo pi, “No ye Jerusalem lo iqho no O nguku akeu hipaqo ghenguno I gizülo puthugho no küghatha tsüpe nishi anima?”
10Paul no khochile: “Ni ye itehi Caesar küghaki lo puthugho ani, hile no I shou küghatha küzüpu ke. Ni ye Jewmiqo lau kiumu shipimi püamoe, eno tiye no ampi no akivishi ithi anie. 11Tsalá, tishimu, I pìthíve küzüpu kipimí kiu-kiumu aghí aye, ni ye thiveni ke lachile keu kühae. Ikemu tsalá Jewmi hipaqo no lachile ghi I shou ngukube akeqo no kuchou shi aghimo aye, timi khiumu I kügha pesü panongu u lo sǘve kepu chipiu kühae. I no Caesar lau qhüiniju anie!”
12Festus no akükümsü pa tsü chekemiqo sasü küptsave kethiu, pa no hitoi khochile: “Nono Caesar lau no xathani ke qhüiniju ani. Ikehu Caesar lau O puwuveni!”
Festus no Akükau Agrippa Kükümsü Iniju
13Atsala khami thiu Akükau Agrippa ngò Bernice pama ye Festus agigihu tsü niye Caesarea lo ighi. 14Pama ye atsala kushuwa tilehi ngoa kehu, Festus no Paul vehu pesü akükau sasü küptsae. Festus no pi: “Timi lakhi Felix no akughumi shi qhipe püanie. 15Ike kughou I no Jerusalem lo wu keno, achinetou eno Jewmi kichimiqo no pa nguku keu I lau peighi eno pa shou küghathabeve tsülo ipi inijue.
16“I no panongu vilo pikeu ye, Rommi kukhuaye lo timi lakhi ye pa nguku akemiqo zülo pa lachile akeu shokhalu kepu dokivi tsü no küghatha ju moke züu ye pa pesü kütami lau phesüve chemoe ipi. 17Panongu no kughou I lau ighi keno, ni ye hipau tsa kumunuve tsümoe, ikemu tishiwo thoghiu küghaki lo pa sasü iloghi penike azah shi no kusüe. 18Ike kughou pa nguku akemiqo no puthugho no pi kelo ni ye kiuala ayeza hexave keu kipimí pa tsü nani küghashi kümsü akemu kiumu pa nguku keu shimoe. 19Tike kumo no panongu ye Paul sasü pano likhi pa no chineye lo eno akhotoshi timi lakhi Jisü ipikeu ye thive, ikemu xüchile ithughive ipikeu ghenguno akükümsü küqhalumo no ake. 20Ni ye kiu gholau no hikithipu vehuqo phujumo no ake; ikehu I no pa ye Jerusalem lo wu no pa tsa küghatha tsüpe nikeu pulo ani keo mokeno iniju ke. 21Ikemu kughou Paul no pa tsa ye Qhasükükau pelo xathatsü penike qhüiniju keno, I no Caesar lau pa puwu moke kutólo aghükhemiqo pelo khe aghí penike azah tsüve ke.”
22Tisheno Agrippa no Festus vilo pi, “Ni ampi no timi hipau tsa iniju nishi ani.”
Pa no khochile, “Thoghiu no O pelo pa tsa ini peni.”
Agrippa Zülo Paul
23Tishiwo thoghiu Agrippa ngò Bernice pama ye tiphimini qhivütsüni pepusü ghüshimi atomi hiyampemiqo eno mishighüna lo sakiphemiqo gholo no timi kutomo akeu chebo lo iloghi. Festus no azah tsü keu kiqi lono Paul sasü alou iloghi. 24Festus no pi: “Akükau Agrippa eno hilehi ningu gholo ighi akemiqo kümtsü timi hipau julo! Jerusalem ngò Caesarea lo Jewmi xüküami jeli kümtsü no pa ghili pesü I lau jemichi kiyé pesü ighi ani eno pa ye xü akepu aküzüpu kumoe ipi asheshu ani. 25Ikemu ni ye pa pìthíve moayesa kepu akiqi kiumu phulumoe, eno pa no Qhasükükau pelo pa tsa xatha tsü penike qhüiniju kehu I no Rome lo pa puwu nikeu shi. 26Ikehu ni ye Ni Kükau lau pa ghili kiumu hipau ke ipi yètsü kepu kühae. Tighenguno ni ye pa sasü nongu kümtsü zülo eno akhotoshi ni Kükau Agrippa zülo sasü ighi ani, tishianguno hipau phukuju vechewo ni ye kiula yèpeqhilu kepu shi niye ke. 27Kughengu I no kümsü akeu ye akughumi lakhi shou nguku keu kiumu küha püzü pa pesü Rome lo puwu keu ye achipi kumoe.”
Currently Selected:
Apostolmi 25: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
