Apostolmi 23
23
1Paul no anhesüküqümo no Jewmi Hoho lo akemi ju no pi, “I thiküzümiqo, ni ye I kükümsü kiumu pünamo no ishí kutólo Alhou lau I kümlapù shikupuluvae.” 2Tishi pi kelo achinetou Ananias no Paul phivilo puthugho akemiqo vilo pa kichí ghatsü lo ipi azah tsü. 3Tile no Paul no pa vilo pi, “Alhou no O heqhi nani, no ashou likhi miyetsüghoi nudapusü akeu atozü! No ye ayeza kiqi lono I shou küghathabe niye tile iqa akeghi, no ampi no ayeza hexa ghi I he lo pi azah tsü anie!”
4Paul phivilo puthugho akeqo no, “No ye kíshi püzü Alhou’w achinetou thaigha ani kea?” ipi.
5Paul no khochile, “Athiküzümiqo, pa ye achinetou kepi ni ye kümsü mülae; kughengu ishi yèpüani: ‘Now timiqo shou ayekipemi ghili lhoküsa tsa pi kepu kumoe.’#23:5 Ipe 22:28”
6Tisheno Paul no panongu khami no Sadduceemiqo eno kütami no Phariseemiqo ishi keu ithi akehu, Jewmi Hoho lo asheshu thuve, “I thiküzümiqo, ni ye Phariseemi, Phariseemi lagha lono ighi kemi ke. I no atsa kükügha-a lo puthugho akeu ye kithimi ye xülethuve nani ipi lajupu akeu ghenguno ke.” 7Kughou pa no hi pi keno, Phariseemi ngò Sadduceemiqo dolo kütsala keu ipeghive, eno Jewmi Hoho ye kijethave. 8(Sadduceemi no xülethumo nani eno kungumi momu aghawu kühae ipi cheni, ikemu Phariseemi ye hipaqo kümtsü ani kepi pülü cheni.)
9Ikehu tilehi mtomushu keu kijè ipeghive, eno ayeza kükütsümi khunoqo no Phariseemiqo keno panongu no puthugho püzü akumto shi kütsalae. Panongu no pi, “Ningu ye timi hipau shou akipimí kiumu phumlae. Ishi ake aghawu momu kungumi no pa pütsa püaghiluvie.” 10Alau shi müghachhoi kütsala kithe auve kehu zatsüu ye panongu no Paul süthapiniyive nosa keu msàve. Ikehu pa no ghüshimiqo vilo iqi no angukamu sǘ no panongu lau no Paul sasü ghüshimi kungoki lo saighive lo pi azah tsü.
11Tipa jì Ampeu no Paul phivilo puthugho no pi, “Amlo kumto shilo! Jerusalem lo nono I shepe shitsü ketoi, Rome lo ghí no ye I shepe shitsü moayesae.”
Paul Pìthíve nike Kümqü
12Tishiwo thoghiu inaqhe Jewmi khami no kumqo no kuchughu püzü panongu kutoshi Paul heqhipithívemo ke kutólo chu-shomo nikeu shoqhi shie. 13Timi lhobidi shou no hipau lo chhosü no kuchughu ke. 14Panongu no achinetomi eno kichimiqo lau wu no pi, “Ningu ye Paul heqhipithímo ke kutólo kumu chu-shomo nike akumto shi ashoqhi shivae. 15Ike itehi ye nongu eno Jewmi Hoho no zatsüu lau nongu zülo Paul sasü ighi pe no pa vehu lo mütsümishei kiu keno ithiküpha moayesa kepu anike ipikeu jeku shi ghi akiyé tsülo. Pa no hilau ighi mphi lono heqhipithíve nike ningu ye kutò pesü anie.”
16Ikemu kughou Paul chepu nopu no hipau kuchughu akeu chiluve keno, pa no ghüshimi kungoki lo wu no Paul vilo pive.
17Ikelo Paul no aqhe shou zatsüu lakhi ku no pi, “Apumi hipau sasü zatsüu lau wulo; pa ye kiu kela pa vilo pi kepu anie.” 18Ikehu pa no pa sasü zatsüu lau wue.
Aqhe shou zatsüu no pi, “Paul, akughu shi akeu no I ku no I vilo apumi hipau sasü O lau wulo pi iniju ke, kughengu pa ye kiu kela O vilo pi kepu shi ani pike.”
19Zatsüu no apumi au lono tsüqüluve no, kughosü wu püzü iniju, “No ye kiu I vilo pinishi ani kea?”
20Pa no pi, “Jewmi khami no pulokileluve no O vilo thoghiu Paul sasü Jewmi Hoho zülo ighi penike iniju nikeu shi ani eno tiye pa ghili alau ithi moayesa kepu ani ipikeu jeku lono tishi niye anike. 21Panoqo gholo süküqha kevilo, kughengu pano lhobidi shou no itshü no pa ngokhe aghíni keu shi ani. Panongu ye Paul heqhipithívemo ke kutólo chu-shomo nikeu shoqhi shivae. Itehi panongu ye kutokughoiluvea eno O qhüiniju akeu lo nono kiu pìní keno ti ngokhe anie.”
22Zatsüu no apumi vilo ishi pikichive no puwuve: “Timi khuu vilomu nono hipau vehu I vilo pive keu pi kevilo.”
Paul ye Caesarea lo Kiqhe Puwuve
23Tisheno zatsüu no aqhe shou zatsüu mikini ku no pama vilo azah tsü, “Itiji ayì tokú kihe lo Caesarea lo wu kepu shi ghüshimi 200 kütashi eno khurshi kipemi lhotsüni ngò angu kipemi 200 ishi kutò lo. 24Paul ghenguno khurshiqo kutotsülo, tishianguno akivishi pa khesawo Angh Felix tolu kepu shini ke.”
25Zatsüu no hitoi yekili yè:
26Claudius Lysias,
Akiqheu Angh Felix lau
Petha tsü ani.
27Timi hipau ye Jewmiqo no tsüqüluve püzü panongu no pa heqhipithíveni cheghi ke, ikemu pa ye Rommi aghakütsami kepi I no phulue, tighenguno I no ghüshimiqo sasü ighino pa xaphelu ke. 28Panongu ye kiu ghenguno pa nguku ani keno ithinishi kehu, I no pa sasü Jewmi Hoho lo wuke. 29I no phuphelu keu ye pano yeza lo ngukube keu vehu ke thono pa pìthíve küzüpu momu akughu shive kepu kipimí kiumu kühae. 30Timi hipau pìthíve nikeu kuchughu ani pikeu sütsa I pìthi khavi I no pa pesü O lau puwu ke. I no pa nguku akemiqo vilo ghí O gizü lono pa shou pi kepu aghí keu vehu pivelo pi azah tsüvae.
31Ikehu ghüshimiqo no, azah panongu tsüpüa keu toi putho lono Paul sasü panongu gholo no Antipatris kutólo ighi. 32Tishiwo thoghiu ye khurshi lo kichemi pelo Paul sasü wupe nikeu shive, eno kütamiqo ye ghüshimi kungoki lo kighide puwove. 33Kughou khurshi lo kichemi no Caesarea lo ighi keno panongu no yekili pesü angh tsüve eno Paul pesü pa u lo phesüve tsü. 34Angh no yekili phijua no pa ye khipau ghakhu bocho lono ighi keno iniju. Paul ye Cilicia lono ighi kemi ipi ithive kelo, 35pa no pi, “O nguku akeqo no hilau ighi kethiu no I no O vehu iniju tsünie.” Tisheno pa no Paul ye Herod kükaki lo aghükhemi pelo khepe nikeu shi azah tsüve.
Currently Selected:
Apostolmi 23: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
