Apostolmi 22
22
1“Athiküzümiqo eno apùnoqo, itehi ye iw sükusho tsa iniju lo.”
2Kughou pa no Arameami tsau no panoqo pütsa keu chilu keno panongu ye shishe iqünheive.
Tile no Paul no pi: 3“Ni ye Jewmi ke, Cilicia lo Tarsus phughi lono punú kemi, ikemu aphughi hipau lono saputhu ke. Ni ye Gamaliel qholo no phi kemi eno tsaqütsalei ni pù-asüqo yeza lo qokipheluve kemi. Ishí nongu no shi akeu toi ni ghí Alhou ghenguno ighono minemighei chekemi ke. 4Alaghi hipau pape chekemiqo no thimo ke kutólo I no pishi-puju ke, kipitimi ngò totimi kinikujo kügha pesü akughuki lo vesüve ke. 5Achinetou ngò Jewmi Hoho lo akemi kümtsü no hipau shepe shi tsülu nani. Damascus lo panongu mülà küqha chekemi lau yèsü yè keu kutólo ni ye panongu lau no khulue, eno timi tipaqo akughumi shi sasü Jerusalem lo ighino ghimeqhi niye tilau wuche ke.
6“I no Damascus kupunú ighi kelo, puchomghü ghuloki lo, paikhavi atsütsǘ lono vüqai keu küvü lakhi no I sümxa pe yeluve. 7Ni ye ayeghi lo ikiqive eno asütsa lakhi no I vilo ishi pikeu chilu, ‘Saul! Saul! no ye kushiye ni pishi-puju cheni kea?’
8“ ‘Ampeu no ye khuu kea?’ ipi I no iniju.
“Pa no khochile, ‘Ni ye nono pishi-puju akeu Nazareth nó ghami Jisü ke.’ 9I gholo chekemiqo ye aküvü ithulue, ikemu panongu ye I pütsa akeu sütsa hu ye vethalumoe.
10“ ‘Ampeu, ni ye kiu shini kea?’ ipi I no iniju.
“Ampeu no pi, ‘Ithulo,’ eno ‘Damascus lo ilolo. Tilau no O pichepüa keu kümtsü pesü O vilo pitsü nani ke.’ 11I gholo chekemiqo no au no I sünhe pesü Damascus lo ilo, kughengu aküvü küká hu no I nhethi kighicheve tsüke.
12“Timi lakhi Ananias ipikeu no I sasü kusho nike ighi. Pa ye amlokütsü shi ayeza pelu chekemi eno Jewmi tile xüküami kümtsü no akiqheu lono gihu chekemi ke. 13Pa no I phivilo puthugho no pi, ‘Athiküzüu Saul, O nhethi xukholu lo!’ Tipa mtsa no ni ye pa ithulu.
14“Tishi no pa no pi: ‘Ningu pù-asüqo Lhou no O kishelu keu ye pa pulou ithilu eno Amikuchou hu ithulu eno pa kichí lono pikeu tsaqo chilu peniye ke. 15Nono ithulu eno chilu keu pesü no timi kümtsü lau paw thopi shitsü nani. 16No ye itehi kiu ngokhe ani kea? Ithulo eno pa jeku ghi baptiz shive no O xinéqo qhukimthevelo.’
17“Kughou I no Jerusalem lo ideighi no achineki lo inikhu akeno, ni ye atsüu-asamou mthave 18eno Ampeu ithulu no pa no I vilo pi ‘Papashi lo! Mtazü Jerusalem qhivelo, kughengu timi hile akemiqo ye nono I shepe shikeu ikhilutsümo nani ke.’
19“I no ishi khochile, ‘Ampeu, I no synagog lakhi lono lakhi lo wu no O pülü chekemiqo heqhi eno akughu shive chekeu timi hipaqo no ithi anike. 20Eno kughou Stephen no O pülü keu ghenguno pìthíve keu jì pele akeno, ni ye tile puthugho no puloküqha tsü ake eno pa heqhipithí akemiqo tiphimini jukuto tsü ake.’
21“Tishi no Ampeu no I vilo, ‘Chevelo; I no aghache lo Jewkumomiqo lau O puwu nani ke,’ ipi.”
Paul, Rommi Aghakütsami
22Paul no hi pi ake kutólo timiqo ye pa tsa ini ae. Tisheno panongu no ighamuku kuloghu no pi, “Pa heqhipithíve lo! Pa ye xü apeni keu àküzǘ kumoe!”
23Panongu no ighamuku püzü panoqo phimini kuthó pìye no ayeghimukhu epe kunguu vepuku akelo 24zatsüu no Paul sasü ghüshimi kungoki lo wuve penike azah tsüve. Akighí kipili pesü pa heqhi no timiqo ye kushiye hitoi pa lau ighamuku akeno kideküdai iniju no phupheluve penike zatsüu no kichevetsü. 25Panongu no pa heqhi niye tshü akelo Paul no aqhe shou zatsüu tile puthugho akeu vilo pi, “Rommi aghakütsami khuu akipimímu phuphe müla keno pa heqhi nikeu hiye O ghenguno ayeza lo achipi keshea?”
26Kughou aqhe shou zatsüu no hi chilu keno, pa no zatsüu lau wu no hitoi pìthive. “No ye kíshivenia kea? Timi hipau ye Rommi aghakütsamie.”
27Zatsüu no Paul lau wu no iniju, “I vilo pilo, no ye Rommi aghakütsami keshea?”
“Iyei, ni ye Rommi aghakütsami ke,” ipi pa no khochile.
28Ikelo zatsüu no pi, “Ni ye Rommi aghakütsami shini ke ghenguno ghüka kutomo tsüke.”
“Ikemu ni ye aghakütsami lakhi shi punúe,” ipi Paul no khochile.
29Khunoqo no chixechilei pa iniju niye kutò akeno züikhavi tsüghüve. Paul ye Rommi aghakütsami lakhi keghi ayikichhe no tshüve keu vethaluve no zatsüu ghí aloqhi msàve.
Paul no Jewmi Hoho Zülo wu
30Jewmi ye kughengu no Paul nguku ani keno zatsüu ye mütsüqhei phupheju nishive. Ikehu tishiwo thoghiu pa no Paul kuqhopheve no achinetou ngò Jewmi Hoho lo kihiküsümi kümtsü kumqo penike azah tsüve. Tisheno pa no Paul sasü ighino panongu zülo puthugho pe.
Currently Selected:
Apostolmi 22: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
