ɛMacu 18
18
ɛHay Ɛbhɛ Phyin ne iGbom Bee?
(ɛMar 9.33-37; ɛLuk 9.46-48)
1Nten nɛdee nggyɛ wo, ninɔn ne icwam ma ne yɛɛs ɛlɔ ɛYɛso gha, nibhɛ phom ɛbhɛ nibhɛ yaak ɛbhɛ, “ɛHay ɛbhɛ phyin ne igbom ndɔ ne iGbɔm ɛdaa ne irywa daa?”
2ɛYɛso gha ne yel-le ɛngɔn ɛshɛɛrɛng, ne ɛ yɛk ɛbhɛ nɛ ɛ kyinak ɛnu ɛyisɛ nibhɛ, 3ne ɛ ji yɔngɔ, “Nzi tɔng nyini itin nɛ, wu ɛ kɛ sang hyere nyini ɛ te ɛn tɛ ninɔn nishɛɛrɛng, sɔng ɛ sɛ ne bhɛ lel ɛn ne iGbɔm ɛdaa ne irywa ba nang. 4ɛHiha ɛnyi ne ɛ kɛ laasek ito ɛbhɛ te ɛngɔn nɛghaa bɛ, ɛbhɛ ne ɛ phyin ne igbom be ne igbɔm ɛdaa ne irywa da.
5“ɛHiha ɛnyi gha ne ɛ kɛ ne say ɛngɔn ɛshɛɛrɛng nga tɛ ɛsaa bɛ gha lenɛ ne irywɛɛk nge wo, mee nɛ kɛ ne say me.”
Nikɔn na nɛ nibhɛ te ɛNyi gha Kyibhɛ Wo
(ɛMar 9.42-48; ɛLuk 17.1-2)
6“ɛHiha ɛnyi ne ɛ kɛ ne te ɛdɛ ɛngɔn ɛshɛɛrɛng ngɛgha wo nɛ ɛ kɛ nang ne itin nɛ ne mee wo ɛ mɔn ɛfɔt, iphɛ sɛ ma yung so ɛbhɛ phyongka i bo ɛgbaang ne ikɛɛ ne hɔng nkpana i rop ɛbhɛ nɛ ne ntsuuntsɔ, i cwaak ɛbhɛ ndɔ ɛta ɛling.”
7“ɛKɔn ne ɛnik daa ninaa ɛzay ya daa nikɔn na nɛ nibhɛ te ninyi na mɔn ɛfɔt to! iPhɛ ku so nggbinggbing nikɔn ne ɛfɔt ta yɛɛset, ne so ɛhaa ɛkawɛy yaa nggyɛy ne ɛbhɛ ɛ kɛ yɛɛset nɛ nibhɛ!”
8Wu iwɔ mo, hang icwa mo yɔɔ, ifɛ yaa teyɛ ɛ mɔn ɛfɔt to, ne ɛ hyɛ ifɛ ɛ hana. iPhɛ phyin nɛ nɛ ɛbhɛ lel ɛlɔ ne iken ne inat de tang iwɔ, hang icwa yɔɔ, ne aa boos ibɔ de, ne ita mo de gbik ko, i ji bhɛ cwaak kɛ ne igboo ne sang kuuy yo. 9Wu irisɛ mo iphɛ ne teyɛ ɛ mɔn ɛfɔt to, tul iphɛ te ɛ hana. iPhɛ phyin nɛ nɛ ɛbhɛ lel ɛlɔ ne iken inat de ne irisɛ idaan, ne aa boos irwisɛ mo da gbik ko i ji bhɛ cwaak kɛ ndɔ ne ijwee ne igboo wo.
iBol nTsabhak ne iHywɛ kɛ Birit
10“Wɛɛ ɛn nyini, sɔng ɛ bɛɛs ɛn ɛdɛng ndɔ ne ninɔn nishɛɛrɛng ngɛnaa wo nang. Nzi tɔng nyini, nimalɛka nibhɛ na i shɛɛ ɛlɔ ɛKyɛɛ nge daa ne irywa wo.”#18.10: iDɛ iWee ne ile da kaa haal ikɛn 11 ɛlɛ: Daa ɛli ne ɛNgɔn ɛNyi gha kɛ yɛɛs, te ɛ phɔt ninyi na nɛ nibhɛ kɛ biisit.
12“Ɛ yaang ɛn ɛli? ɛNyi gha sɛɛ bok ᐩigyol ntsabhak ikɔl idaan, ìzɛng ne ji birit, ikyee ne aa mɔn ne? Nzi bo aa tek ihywɛ nzuwubɔ ɛnduwujɛng ne ihywɛ ɛnduwujɛng ngge ɛlɔ ne re ihway yo, ɛbhɛ tɔk izee ne ihywɛ kɛ biri to. 13Wu ɛ kɛ ne bhɛ sɛ ihywɛ, nzi ne tɔng nyini itin nɛ, irway ihwala da daa ne ihywɛ izaan nɛdee nggyɛ wo, yaa ne phyin irway ihwala ne ihywɛ nzuwubɔ ɛnduwujɛng ne ihywɛ ɛnduwujɛng nggɛ ne hame ihywɛ kɛ ma birit to. 14Ɛlɛy ne ɛKyɛɛ mon ɛdaa ne irywa gha, sɔng ɛ sim tɛ ɛdɛ ɛngɔn ɛshɛɛrɛng ngɛghaa wo sɛ ku nang.”
iBol ɛGwaa ne Ɛ kɛ Mɔn ɛHak ɛFɔt
15“Wu ɛgwaa mo gha kɛ ne mɔn nɛ ɛfɔt to, cwi ɛlɔ ɛbhɛ, te ɛbhɛ tɔɔrek ɛbhɛ ɛfɔt ɛbhɛ wo nyinɛn ne ɛbhɛ ifaa. Wu ɛ kɛ ne bhɛ phok kɛ ɛ kɛ ne kyii ne ɛgwaa mo gha. 16Wu ɛ kɛ ne bhɛ shɛɛ tang phok kɛ, ne ɛ bo ɛnyi ɛdaan, hang ifaa yɔɔ ɛ phɛ nɛ, daa ɛli ne ɛWee ne iBol ɛTaanggbey yo i bo, ‘Wu i lenɛ ne ibol ninyi ifaa, hang itwat yɔɔ ne ryɔng ibol de.’ 17Wu ɛ kɛ ne ta bhɛ mbaray tang phok nibhɛ, ne ɛ cwi ne ɛbhɛ ɛlɔ ne idira ninaa ne roos, wu ɛ kɛ ne ji ta bhɛ mbaray tang phok idira ninaa ne roos sa, ne ɛ bo ɛn ɛbhɛ te ɛ kɛ teye ɛhaa ɛzay ne ɛhaa ne ɛfɔt.”
18Nzi tɔng nyini itin nɛ, gbik ɛkɔn na ne ɛ kɛ rop ɛn ndɔ ɛzay ya kɛ ne ma rop ɛbhɛ daa ne irywa wo, ɛkɔn na ɛ kɛ ne biri ɛn ndɔ ɛzay ya, kɛ ne ma biri daa ne irywa wo.
19“Nzi ne ta bok nyini, wu ninyi ifaa ndɔ ɛzay ya kɛ sim me nɛ daa ɛdɛ ɛkɔn na nɛ nibhɛ roro, ɛKyɛɛ nge gha ne ɛ so daa ne irywa wo, aa ne mɔn nibhɛ ɛkɔn nɛ. 20ɛLɔ gha nɛ ninyi ifaa, hang itwat yɔɔ kɛ sɛme nɛ ndɔ ne irywɛɛk nge wo, ne n sonɛ ndɔ nibhɛ.”
iBol ɛNyi ne Ɛ kɛ Sang Hana ɛGwaa Ɛbhɛ Nɛ
21ɛBiturus sa ne yɛɛs ɛlɔ ɛYɛso gha ɛ phom ɛbhɛ ɛ yɔngɔ, “ɛDaray, ɛmaghee ne ɛgwaa nge gha sɛɛ mɔn me ɛfɔt to maa nzi han ɛbhɛ nɛ woo? ɛNiitaa yee?”
22ɛYɛso gha ne yaak ɛBiturus segha, “Kwa, sɔng ɛniitaa nang, ɛniitaa gha ɛte nzuwubɔ ɛniitaa yɛ.”#18.22 ɛniitaa gha ɛte nzuwubɔ ɛniitaa yɛ: ɛByin ne iWee da kɛ haa ɛbɛ wo ɛlɛ, Nzuwubɔ ɛniitaa ne ifɛ ɛniitaa, kaabi nibhɛ bo, wu han ɛgak sonɛ.
23iPhɛ ɛlɛy, igbɔm ɛdaa ne irywa da so te ɛgɔm ne ɛ sim ɛ sɛɛ wɛɛ ɛli nɛ nikpuru ɛbhɛ kɛ mɔn ɛbhɛ ɛtomɛ. 24Ne sɛ ɛ kɛ tum phɛl da, ne yɛɛs ɛbhɛ ne ɛdɛ ɛkpuru gha ne ɛ bok ɛgɔm ma ijam gbom ne hame aa tang yɛɛ ne tal lɛ. 25Daa ɛli ne aa sang yɛɛ ne tal lɛ wo nang, ɛkyɛɛ ne ijwee ɛbhɛ gha ne yɛk ngɛ wu te bo ɛbhɛ ne ɛkuk ɛbhɛ, nɛ ninɔn ɛbhɛ gbik ne ɛkɔn na ne ɛ bok, i bhɛ rɛp i bo ijam mɛ i tal ne ɛkɔn na ne i roos ɛbhɛ wo. 26“ɛKpuru gha ne ho ne irwa-nggburuk ɛ roro ɛgɔm ma ɛ bo, ‘ɛNdiinday, bo me ɛbɔk, na tal lɛ ijam mo de gbik.’ 27ɛGɔm mɛghaa nggyɛ wo ne san iyɔm ɛbhɛ ɛ tek ɛbhɛ ne ɛkɔn na ne i roos ɛbhɛ wo ɛ yaak ɛbhɛ te ɛ hyel.”
28“ɛKpuru yeghaa nggyɛ wo ne wuru, ne ɛbhɛ sɛ ɛhak ɛtaay ɛtomɛ ɛbhɛ ne ɛ ma roos ɛbhɛ idɛ ijam be ncɛt ne ɛ wum ɛtaay ya, ɛ phyingɛl ɛbhɛ ɛmbeeng ɛ yaak ɛbhɛ, ‘Tal me ijam nge de ne nzi roos sɛ wo.’ 29ɛTaay ɛtomɛ ɛbhɛ gha ne ho ne irwa-nggburuk, ɛ roro ɛbhɛ ɛ yaak ɛbhɛ, ‘Bo me ɛbɔk, na tal lɛ ijam mo de gbik.’
30“Ne ɛ mbaray, ɛ wum ɛtaay ya ɛbhɛ bhɛ rop ne ijwee ne nyang, ɛtaay ya ne bhɛ shɛɛ ɛnggyɛ wo ɛ phyii tal ɛbhɛ ɛkɔn na ɛ roos ɛbhɛ wo gbik.
31“Kɛ ne sɛ nitaay ɛtomɛ ɛbhɛ na kɛ phok ibol lɛ, nibhɛ ne te njenjek gbom, nibhɛ ne bhɛ tɔng ɛgɔm ma ɛkɔn na ne ɛ kɛ te wo. 32ɛGɔm ma ne yel-le ɛbhɛ, ɛ yaak ɛbhɛ, ‘Ɛ soye ɛbebhe ɛkpuru! Nggɛ tek kɛ ne ijam be ne nzi roos sɛ wo daa ɛli ne ɛ kɛ roro me.’ 33iKyee phɛ kɛ ne te ɛ kɛ shɛɛ tang san iyɔm ɛtaay ɛtomɛ mo gha ɛli ne nggɛ san iyɔm mo dee? 34ɛGɔm ma ne te njenjek, ɛ yɛk ngɛ i bhɛ rop ɛbhɛ ne ijwee ne nyang i bhɛ baasek ɛbhɛ nggbang, ɛbhɛ shɛɛ ɛnggyɛ ɛ phyii tal ɛkɔn na ne i roos ɛbhɛ wo gbik. 35Ɛlɛy, ne ɛKyɛɛ nge gha ne ɛ so daa ne irywa wo yaa ne mɔn gbik ɛnyi gha ne ɛ kɛ mbaray tang hana ɛgwaa ɛbhɛ gha nɛ ndɔ ɛkyikyum ne irway ɛbhɛ gha.”
Currently Selected:
ɛMacu 18: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
