ɛLuka 7
7
ɛYɛso gha Kɛ te ɛKpuru ɛNdiinday niSooja ne iRooma ɛKen
(ɛMac 8.5-13)
1Kɛ ne sɛ ɛYɛso gha kɛ taal bol nɛ ninyi na, ne ɛ phɛ ne iKafanahum. 2ɛNggyɛ wo, ɛdɛ ɛkpuru ɛdɛ ɛndiinday nisooja ne iRooma gha kaa ne so shwa, ɛnu ne iku. ɛNdiinday yɛghaa nggyɛ wo kaa ne i sim ɛkpuru ɛbhɛ gha gbom. 3ɛNdiinday nisooja gha ne phok ibol ɛYɛso de, ne ɛ tom nidɛng ninu nikɔɔn niYahodawa na ɛlɔ ɛYɛso gha wu tɛ nibhɛ bhɛ roo ɛbhɛ, te ɛ yɛɛs, ɛ te ɛkpuru ne gha ɛken. 4Nibhɛ ne phɛ ɛlɔ ɛYɛso gha, nibhɛ bhɛ roro ne ɛbhɛ gbom, nibhɛ yaak ɛbhɛ, “ɛNyi yɛghaa wo kɛ hɔn ɛ sɛ phyik ɛbhɛ wo, 5daa ɛli ne ɛ sim igbagha mos so gbom, ɛ kɛ lɔl njwii ijwee ne itɔɔy.”
6iPhɛ ɛlɛy yang, ɛYɛso gha ne roos nibhɛ. Kɛ ne sɛ nibhɛ yek cɛcɛk ne ijwee ɛndiinday yo nang, ɛndiinday ya ne kyii shii tom nitaay ɛbhɛ ɛlɔ ɛYɛso gha, wu tɛ nibhɛ bhɛ yaak ɛbhɛ, “ɛDaray, sɔng, ɛ tak ito mo iyɔm ɛ yɛɛs so nang. Sɔng nggɛ ma yung hɔn ɛ sɛ lel ndɔ ne ijwee nge wo nang. 7iPhɛ phɛ kɛ te sɔng nzi yaang nggɛ hɔn nzɛ yɛɛs ɛlɔ mo gha nang. Ku shɛɛ ɛnggyɛ wo te ɛ boote zɔng, ɛkpuru nge gha yaa ne te ɛken. 8Daa ɛli ne mee wo, ma n bok ɛndiinday, ne n bok nisooja ne nzi ma wɛɛ nibhɛ. Nzi yaak ɛdɛng, ‘Cwi ɛnggyɛ,’ ne ɛ phɛ. Ne n da yaak ɛdɛng, ‘Yɛɛs ɛbɛ,’ ne ɛ yɛɛs. Wu nggɛ ne yaak ɛkpuru nge gha, ‘Mɔn ɛlɛ,’ aa ne mɔn.”
9Kɛ ne sɛ ɛYɛso gha kɛ phok ibol lɛdee wo, ne ɛ wum me zii, ne ɛ ji hyereey, ɛ yaak ninyi na nɛ nibhɛ kungus ɛbhɛ wo, “Nzi tɔng nyini itin nɛ, sɔng nggɛ ku sɛ ihywee ne ìnang ne itin nɛdee wo ndɔ niSɛrɛla de nang.”
10ɛNyi gha ne kɛɛ tom mo ne kyii ɛ hyil le, ne ɛbhɛ sɛ ɛkpuru ɛndiinday ɛbhɛ gha kɛ te ɛken.
ɛYɛso gha kɛ Seme ɛNgɔn ɛKusang
11Ne sɛ kɛ phyɔngɔle ncɛt#7.11 kɛ phyɔngɔle ncɛt: ɛByin ne iWee ne ile gha kaa haa ibol lɛdee wo ɛlɛ, “Kɛ ne cwiil ne ihwɛlɛ.”, ɛYɛso gha ne phɛ ɛdɛ ɛgarang nga ne bok ɛbhɛ iNayin, nɛ ninɔn ne icwam ɛbhɛ na. iDira ninyi de gbom ne ma ta i kungus ɛbhɛ. 12Kɛ ne sɛ ɛYɛso gha kɛ tuu ɛnu ne izuk ɛgarang nga, ne ɛ sɛ nidɛng ninyi na bok ikom, nibhɛ wuusi nɛ ɛgarang nga. iKom be kaa ne so idee ɛdɛ ɛngɔn ɛphas de ne ɛbhɛ kaa ku soye ɛngɔn ɛdaan ɛgyinɛ. ɛGyinɛ gha kaa ne soyɛ ɛkusang. iDira ninyi de kaa ne so gbom nɛ nibhɛ kungus ikom be. 13Kɛ ne sɛ ɛDaray ya kɛ yaang ɛkusang nga, ne ɛ yaa san iyɔm ɛbhɛ gbom. Ne ɛ ji yaak ɛbhɛ, “Sɔng ɛ san no nang.”
14ɛYɛso gha ne hyeete ɛbhɛ dat ifɛlɛng ngo ne ikom be sonɛ wo, ninyi na nɛ nibhɛ kɛ tɔɔk ikom be ne shii kyinak yak. Ne ɛ ji boote ne ikom be, ɛ yɔngɔ, “ɛNgɔn ɛphas! Nzi bokɛ, yilitsik.” 15ɛNgɔn na ne ɛ kɛ ku wo, ne yilitsik, ɛ soos, ɛ yaa bol. ɛYɛso gha ne ji nang ɛgyinɛ gha ɛbhɛ.
16Ninyi na ne wum ɛnik gbom, nibhɛ ne ho ne dɛp ɛTaanggbey ye, nibhɛ bo, “ɛDɛ ɛgbaang ɛnɛbi wo kɛ yɛɛs ndɔ njwɛɛn! ɛTaanggbey ya yɛɛs ne phɔt ninyi ɛbhɛ na.”
17iBol ɛkɔn nɛdee wo ne ɛYɛso gha kɛ mɔn no ne shii shwalat ndɔ ne ivel ne iYahudiya ba gbarang, iphɛ phyii bhɛ hɔn nihak nigarang nɛ nibhɛ sos cɛcɛk.
ɛYohana ne Yaak ne iBatisima gha kɛ Tom Ninyi ɛLɔ ɛYɛso Gha
(ɛMac 11.2-19)
18Ninɔn ne icwam ɛYohana na ne bhɛ tɔng ɛbhɛ nikɔn nɛnaa wo gbik. Ne ɛ yel-le nibhɛ ifaa, 19ɛ tom nibhɛ ɛlɔ ɛDaray ya, wu tɛ nibhɛ bhɛ yaak ɛbhɛ, “iGyɛ ɛ soyɛ ɛnyi gha ne kaa yaak njwii ɛ sɛ yɛɛs so, hang njwi hyep ɛhak?”
20Kɛ ne sɛ ninyi na kɛ phɛ ɛlɔ ɛYɛso gha, nibhɛ ne yaak ɛbhɛ, “ɛYohana ne Yaak ne iBatisima gha kɛ tom njwii, wu te njwi yaak kɛ, ‘iGyɛ soyɛ ɛnyi gha ne kaa yaak njwii ɛ sɛ yɛɛs soo, hang njwi hyep ɛhak?’ ”
21Nɛ nten-nten nɛ, ɛYɛso gha ne tes ninaa ne shwa na niken ihywee-ihywee. Ɛ tuul ikpabyik niphoo ndɔ ninaa nɛ nibhɛ bok ifɛ, ɛ ta phaasel ninaa niwil irwisɛ. 22Ne ɛ ji kyii ninyi ifaa yɛnaa nggyɛ wo nɛ ɛ yɔngɔ, “Kyii ɛn ɛbhɛ tɔng ɛn ɛYohana yegha nikɔn na ne ɛ kɛ yaang ɛn no, gbik nɛ ninaa ne ɛ kɛ phok ɛn no. Niwil la kɛ yaa wɛɛ, nigyamil la yaa hyel tsik. Nikparong nga kɛ tes niken, nirwan na kɛ yaa tenes ivol, ikpom ba ta semese. Kɛ ne ta tɔng nihala ninyi na iBol iYɛnɛng ngge.#7.22 Ta yɛɛn: ɛSh 35.5-6; 61.1. 23ɛHaa ɛwɛng ngaa nggyɛy ne ɛ kɛ say ibol nge de, ɛ sang to irway ba.”#7.23 Ta yɛɛn: ɛSh 29.18-19; 35.5-6; 61.1-2.
24Kɛ ne sɛ ninɔn ne tom ɛYohana gha yek en, ɛYɛso gha ne ji yaa bol nɛ ninyi na daa ne ito ɛYohana de, ɛ yaak nibhɛ, “ɛLi ne ɛ kaa phɛ ɛn ɛlɔ ɛYohana yegha ndɔ ɛhay ya, ɛyakɔn ne ɛ kaa tas ɛn aa bhɛ yaang ɛn lɛɛ? iNzang ne igbil bɛm naa? 25iKyee ne ɛ kaa phɛɛs ne yaang ɛn lɛɛ? ɛNyi ne ɛ bok itsura ne izel naa? Kwa! Ninyi ne sɔsɔɔy itsura ne izel da, nibhɛ ta i phok itso nibhɛ ba iyɛnɛng ngge i shɛsɛ ne idee nigɔm. 26Ne jung so ikyee ne ɛ kaa phɛɛs ne yaang ɛn dek? ɛNɛbi yee? Ɛɛy! Ɛ ma yung phyin ɛNɛbi gha. 27Ɛbhɛ ne kaa ku haa ibol ɛbhɛ de i yɔngɔ,
‘Naa tom ɛngɔn ne tom nge, ɛ ho ɛyisɛ mo,
ɛbhɛ aa ne bhɛ ryɔng ngɛ ɛnkiinɛ mo wo nyɛɛn.’ ”#7.27 Ta yɛɛn: ɛMal 3.1.
28ɛYɛso ne ta yɔngɔ, “Nzi tɔng nyini, gbik ɛnyi ne ɛkuk kɛ yɛk ɛbhɛ, ɛYohana gha phyin. Gbik ne iphɛ ɛlɛy, ɛnyi gha ne ɛ kɛ ne taasek gbom ndɔ ne igbɔm ɛTaanggbey ba, ne ɛ phyin ɛbhɛ.”
29Ninyi na gbik, ma phyin byinki nɛ ninaa ne saasel ijam ne ivel la, ne sɛ nibhɛ kɛ phok ɛlɛ wo, ne sim wu ibol ɛTaanggbey de ku so cik, lenɛ ne ibatisima de ne ɛYohana gha kaa yaak ngɛ wo. 30Gbik ne iphɛ ɛlɛy, niFarisawa na nɛ Ninaa ne Kpɛl ɛShara gha ne jung mbaray ɛkɔn na ɛTaanggbey ya kaa bok daa nibhɛ wo, sɔng nibhɛ ne sim ɛYohana gha yaak nibhɛ ne ibatisima de nang.#7.30 Ta yɛɛn: ɛMac 21.32; ɛLuk 3.12.
31ɛYɛso gha ne boote, ɛ yɔngɔ, “Naa ji ten ninyi ne izam mɛnaa wo ne kyee daa mɛɛ? Nibhɛ so te ikyee daa mɛɛ? 32Nibhɛ so tɛ ninɔn nɛ nibhɛ kɛ soos ɛtungga, nibhɛ yeres en, nibhɛ bo:
‘Njwi kɛ wurus nyini ɛmandɛɛng,
sɔng ɛ kɛ ne yel ɛn isham mɛ nang.
Njwi kɛ ne yaak ne ɛhuhɔɔ,
Sɔng ne ɛ ne say ɛn njwii nɛ nang.’
33“Daa ɛli ne ɛYohana ne Yaak ne iBatisima gha kaa yɛɛs ɛ mbaray tang sɔ inɛn ɛnap, ɛɛ kuma; ne ɛ yaa bo ɛn wu ɛ bok niphoo. 34ɛNgɔn ɛNyi gha kɛ ne yɛɛs, ɛ re, ɛ ta sɔ inɛn ba, ɛ kɛ ne yaa bok ɛn wu ɛ bok idɔ ɛphiri, wu ɛ so ɛtaay ninaa ne saasel ijam ne ivel, nɛ ‘ninaa ne ɛfɔt’. 35Gbik ne iphɛ ɛlɛy, i ne seng ntsɛntsɛng ɛTaanggbey de so itin nɛ ɛlɔ ninyi na nɛ nibhɛ bok ko lenɛ nɛ nitomɛ nɛ nibhɛ mɔn.”
Kɛ Hana ɛDɛ ɛKuk ka ne ɛFɔt Ɛbhɛ
36ɛDɛng ndɔ niFarisawa na kaa ne yel-le ɛYɛso yegha ne ire ne ijwee ɛbhɛ. ɛYɛso gha ne phɛ ne ijwee ɛbhɛ wo ɛbhɛ sos, ɛ te ita nggyuk ɛlɔ ne re ire gha. 37ɛGarang ngeghaa nggyɛ wo, ɛdɛ ɛkuk ka kaa ne sonɛ ne ɛ ku so ɛhaa ne ɛfɔt gbom. Ne ɛ phok wu ɛYɛso gha so ne ijwee ɛnyi niFarisawa na, ɛ re ire. ɛKuk ka ne yɛɛs ne ikum ne idɛ inɔɔy de ne mpɛ bok ijam gbom. Kɛ ryɔng ikum inɔɔy de ne idɛ ikɛɛ de ne i bok ɛlibasita. 38Ne ɛ kyinak ɛtsim ɛYɛso gha, cɛcɛk ne ɛbhɛ, ɛ san, nyilis ɛbhɛ na ne jii sirit re ne ita ɛYɛso de. Ne ɛ ji bo itsotso ne ito ɛbhɛ ɛ yis nɛ niyilis na. Ɛ ji ho ne irwa-nggburuk ne ita ɛYɛso de, ɛ wum iphɛ hap ɛ sit iphɛ ne nɔɔy ba.
39Kɛ ne sɛ ɛFarasii gha ne ɛ kɛ yel-le ɛYɛso yegha kɛ yaang ɛlɛ wo, ne ɛ wungare ndɔ ɛbhɛ ɛ yɔngɔ, “Sɛ yɔng ɛnyi yɛghaa wo so ɛNɛbi gha ɛtsak, ɛ sɛɛ ne seng ihywee de ne ɛ ɛkuk kɛghaa wo so, ne ɛ darat ɛbhɛ wo. Ɛ sɛ ne seng ɛli ne ɛ ku so ɛhaa ne ɛfɔt ta.”
40ɛYɛso gha ne shii boote ne ɛnyi gha, ɛ yaak ɛbhɛ, “ɛSimɔn, n bok idɛ bol de ne naa mɔng nge.” ɛNyi gha ne kyii nɛ, ɛ yɔngɔ, “Ɛɛy, mɔng me ɛKyɛɛ ne icwam ɔɔy.”
41ɛYɛso gha ne yaak ɛbhɛ, “niDɛng ninyi na kaa so ifaa ne kaa roos nibhɛ ijam, kaa roos ɛdɛng ijam be ikpɔl iwii, ne roos ɛdɛng nzuwubɔ iwii. 42Sɔng ɛdɛ ɛbhɛ ne tang yɛɛ ne tal ɛnyi gha ijam be ne i roos ɛbhɛ wo nang. ɛNyi gha ne tek nibhɛ nɛ. ɛYaphɛɛ yɛ ndɔ nibhɛ wo aa ne ɛ sim ɛbhɛ ɛ shɛs se?”
43ɛSimɔn na ne yaak ɛbhɛ, “Nzi wɛɛ te ɛhaa ne roos ɛbhɛ ijam gbom be.”
ɛYɛso gha ne yaak ɛbhɛ, “Ɛɛy! Ɛlɛy ne iphɛ so.”
44ɛYɛso gha ne ji hyereey, ɛ yɛɛn ɛkuk ka. Ne ɛ ji yaak ɛSimɔn negha, “Ɛɛ yaang ɛkuk kɛgha woo? Nggɛ lel ne ijwee mo, sɔng ɛ kɛ ne nang me inɛn ne kuus ita#7.44 inɛn ne kuus ita: niYahodawa na kaa say ɛhaa ne kpoo inɛn ne inɛn tɛ nibhɛ kuus ita, te iphɛ tɔɔrek wu kɛ say ɛnyi yɛ. nang, ɛ kɛ ne kus me ita de nɛ niyilis ɛbhɛ, ɛ ji yes iphɛ ne itsotso ne ito ɛbhɛ. 45Sɔng ɛ kɛ ne wum me hap ɛ kyili me nang, ɛkuk kɛghaa wo ne ma tɔ ɛkakuum ma, ɛ kɛ wum me hap ɛɛ kyiisi me. 46Sɔng ɛ kɛ ne sit me inɔɔy daa ne ito nge nang, ɛkuk kɛgha wo kɛ ne ruu me inɔɔy ba ne ita. 47iPhɛ ɛlɛy yang, nzi ne bok kɛ, kɛ ne hana ɛbhɛ ne ɛfɔt ɛbhɛ wo ne ɛbhɛ so gbom mo, daa ɛli ne ɛ kɛ ma tɔɔl me ishwim ba gbom. ɛNyi gha ne kɛ ne hana ɛbhɛ nɛ ncɛt to nang, ɛ kɛ ma tɔɔl ishwim ba ncɛt.”
48ɛYɛso gha ne ji yaak ɛkuk ka, “Kɛ hana yɛ ne ɛfɔt mo wo.”
49ɛByin ninyi na nɛ nibhɛ ne so ɛlɔ ne re ire gha, ne yaa wunga ndɔ nibhɛ, nibhɛ bo, “ɛYa ɛnyi ghaa woo, ne han ninyi na ne ɛfɔt too?”
50ɛYɛso gha ne yaak ɛkuk ka, “ìNang ne iTin mo de kɛ phɔt tɛ, cwi me ncaang.”
Currently Selected:
ɛLuka 7: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
