ɛLuka 6
6
iBol ɛTuk ne iWɛsɛ niYahodawa
(ɛMac 12.1-8; ɛMar 2.23-28)
1Kaa ne sɛ ɛdɛ ɛtuk ne iwɛsɛ gha, ɛYɛso gha nɛ ninɔn ne icwam ɛbhɛ ne i hyel ndɔ ne ihwap ne kɛ hap ne ɛlikama. Ninɔn ne icwam ɛbhɛ na ne yaa haa ɛlikama wo, nibhɛ re. 2Nidɛng niFarisawa na ne phom, nibhɛ yɔngɔ, “iKyee iphɛ kɛ te ɛ mɔn ɛn ɛkɔn na ne ɛShara ɛMuusaa gha bo wu hang njwɛɛn sɛɛ mɔn ɛtuk ne iwɛsɛ ghaa?”
3ɛYɛso gha ne kyii nɛ, ɛ yɔngɔ, “Ɛ kɛ ku shɛɛ tang tɔng ɛn ɛkɔn na ne ɛDoda gha kaa mɔn no, nten de ne ɛbhɛ wo, nɛ ninyi ɛbhɛ na, kaa so kpyak ko naa? 4ɛLi ne ɛ kaa bhɛ lel ndɔ ne ijwee ɛTaanggbey, ɛ bo ibɛrɛdi de ne kɛ tek ɛTaanggbey ye nɛ ɛ re, ɛ ma nang ninyi ɛbhɛ na nibhɛ ma re. ɛShara njwɛɛn na ne ku bo wu ɛbo ɛTaanggbey zɔng bhɛ sɛɛ yɛɛ ne re ire yɛdee nggyɛ wo.”#6.4 Ta yɛɛn: 1ɛSam 21.1-6.
5ɛYɛso gha ne ji yaak nibhɛ, “ɛNgɔn ɛNyi gha bok igbɔm daa ɛTuk ne iWɛsɛ gha.”
iBol ɛNyi ne ɛ kɛ Baghat iWɔ
(ɛMac 12.9-14; ɛMar 3.1-6)
6Kaa ne ta sɛ ɛdɛ ɛtuk ne iWɛsɛ gha dɔng, ɛYɛso gha ne phɛ ndɔ ne ijwee ne itɔɔy ɛ yaa bhɛ mɛmɛ ninyi na nɛ. ɛDɛ ɛnyi gha kaa ne ma so ɛnggyɛ wo, ne iwɔ ne irwye ɛbhɛ kɛ baghat. 7niFarisawa na nɛ Ninaa ne Kpɛl ɛShara gha kaa ne ku i tɔk ɛkɔn na nɛ nibhɛ sɛɛ sɛ nibhɛ wum ɛYɛso yegha nɛ, iphɛ ɛlɛy, nibhɛ ne sit ɛbhɛ ne irwisɛ, nibhɛ wɛɛ, hang aa yung yɔng wu yaa te ɛnyi gha ɛken ɛtuk ne iwɛsɛ gha yɔɔ. 8ɛYɛso gha ne seng icwas nibhɛ ba, ne ɛ yaak ɛnyi gha ne iwɔ ɛbhɛ kɛ baghat to, “Yilitsik te ɛ yɛɛs daa ɛyisɛ ɛbɛ.” ɛNyi gha ne yilitsik ɛ phɛ daa ɛyisɛ gha.
9ɛYɛso gha ne ji yaak nibhɛ, “Naa phom nyini, ikyee ne ɛShara njwɛɛn na kɛ sim njwɛɛn nɛ te njwɛɛn mɔn ɛtuk ne iWɛsɛ ghaa? Ɛ bo te njwɛɛn mɔn ɛkɔn ɛyɛnɛng nge, hang ɛbebhe yɛ? Te phɔt iken ɛnyi, hang bees iphɛ?” 10Ne ɛ hyereey, ɛ yɛɛn nibhɛ gbik, ne ɛ ji yaak ɛnyi gha, “Tɔɔrek iwɔ mo wo.” ɛNyi gha ne tɔɔrek iwɔ wo, ifɛ ne shii te ikpen. 11Ninyi na tes njenjek, nibhɛ ne yaa bol ndɔ nibhɛ, nibhɛ tɔk ɛkɔn na nɛ nibhɛ yaa mɔn ɛYɛso yegha nɛ.
ɛYɛso gha kɛ Karase Ninɔn ne Tom Ɛbhɛ
(ɛMac 10.1-4; ɛMar 3.13-19)
12Ndɔ nituk kɛnaa nggyɛ wo nang, ɛYɛso gha ne bhɛ wara daa ne idɛ igol aa bhɛ boote ne ɛTaanggbey, ne ɛbhɛ bol ne ɛTaanggbey ihwɛlɛ phyii wuru. 13Kɛ ne sɛ ihwɛlɛ wo kɛ wuru wo nang, ne ɛ yel-le ninɔn ne icwam ɛbhɛ na gbik. Ɛ karase nidɛng, ndɔ nibhɛ wo, ɛnduwubɔ nɛ ninyi ifaa, ɛ yaak nibhɛ, ninɔn ne tom. 14Nibhɛ kaa ne so ɛlɛ: ɛSimɔn, ne ɛYɛso gha kaa nang ɛbhɛ idɛ irywɛɛk ko ɛ bok ɛbhɛ ɛBiturus. Ne ɛgwaa ɛSimɔn na ɛNdarawus, ne ɛYakub, ne ɛgwaa ɛbhɛ ɛYohana, ne ɛFilibus, ne ɛBatɔlɔmi. 15Ne ɛMacu, ne ɛToma, ne ɛYakub ne ɛ so ɛngɔn ɛLifiyos. Ne ɛSimɔn, ɛnyi ne ɛ kaa sim ɛgarang ɛbhɛ gbom. 16Ne ɛYahuza ɛngɔn ɛYakub, gbik ne ɛYahuza ne iSikɔrɔti ne ɛ kaa kyii mɔɔng ɛ rɛp ɛYɛso ye.
ɛYɛso gha Kɛ Mɛmɛ Ninyi na Nɛ ɛ ta Tes Nibhɛ niKen
(ɛMac 4.23-25)
17ɛYɛso gha ne tɔm nɛ ninɔn ne tom ɛbhɛ na, ɛ ji kyinak ɛlɔ ne ɛ so tas, ne idira ninɔn ne icwam ɛbhɛ de. iDira ninyi kaa ne ma so ɛnggyɛ wo, nibhɛ kaa ne les ne ivel ne iYahudiya, ne iYɛrushɛlɛm, gbik ne ibum ne iTaya, ne iSidɔn. 18Nibhɛ kaa ne yɛɛset tɛ nibhɛ tenes ɛYɛso yegha, te ɛ ta jung tes nibhɛ niken. Ninaa nɛ niphoo i tak nibhɛ iyɔm ne yɛɛset, ɛYɛso gha ne ma tes nibhɛ niken. 19Ninyi na gbik ne i tɔk tɛ nibhɛ sɛɛ dat ɛYɛso yegha, daa ɛli ne ito-ndiinday kaa wuusi ndɔ ɛbhɛ, iphɛ tes nibhɛ niken gbik.
Niwɛng
(ɛMac 5.1-12)
20ɛYɛso gha ne yɛɛn ninɔn ne icwam ɛbhɛ na, ne ɛ yɔngɔ:
“Ninaa ɛwɛng ngaa nggyɛy
nɛ nibhɛ so nihala na,
daa ɛli ne igbɔm ɛTaanggbey da
soye ivaa mon.
21Ɛ so ɛn ninaa ɛwɛng
ninyi ɛn no ne ɛ so ɛn kpyak ko,
daa ɛli ne ɛ sɛ́ sighisi en.
Ninaa ɛwɛng ngaa nggyɛy
nɛ nibhɛ i san no,
daa ɛli nɛ nibhɛ sɛ́ ne sɛ.
22Ninaa ɛwɛng ngaa nggyɛy,
ne ɛzay kɛ mbaray nibhɛ wo,
ɛ towos nibhɛ wo
ɛ yaak nibhɛ wu nibhɛ soye
nibebhe na lenɛ ne ɛNgɔn ɛNyi gha.#6.22 Ta yɛɛn: 1ɛBi 4.14.
23“Yaa sɛ nikɔn nɛnaa wo kɛ sɛ nyini wo; say ɛn ne irway ihwala, te ɛ yel ɛn isham, daa ɛli ne sɛ mɔn nyini iyɛnɛng gbom daa ne irway wo. Ɛlɛy nɛ nikyɛɛ-nikyɛɛ nibhɛ na kaa mɔn niNabawa na nɛ.”
Nikawɛy
24“iPhɛ ne so nyini
ɛkɔn ne ɛnik,
nyinɛn no ne ɛ bok ɛn
iryat de ɛlyilyɛghaa wo,
ɛ kɛ ku phok iyɛnɛng mon de.
25ɛKɔn ne ɛnik nyinɛn no ne
ɛ kɛ sighi en ɛlyilyɛghaa wo,
ɛ sɛ yaa phok ɛn ikpyak.
ɛKɔn ne ɛnik nyinɛn no ne
ɛɛ sɛ́ ɛn ɛlyilyɛghaa wo,
ɛ sɛ̀ yaa bees ɛn irway,
ɛ san ɛn.
26ɛKɔn ne ɛnik nyinɛn no nɛ ninyi na i ton nyini ɛlyilyɛghaa wo, ɛlɛy nɛ nikyɛɛ-nikyɛɛ nibhɛ na kaa mɔn ninabawa ne hal irywɛɛk ka nɛ.”
Sim ɛn Ninaa ne iPhup Mon Na
(ɛMac 5.38-48; 7.12)
27“Nzi ne bok nyini, nyinɛn ne ɛ tenes ɛn mɛɛn no: Sim ɛn ninaa ne iphup mon na, te ɛ mɔn ɛn ninaa nɛ nibhɛ mbaray nyini wo ɛkɔn ɛyɛnɛng. 28Sit ɛn ninaa nɛ nibhɛ i naas nyini ɛnu ɛbebhe gha ne ɛwɛng, te ne ˆɛ roo ɛn ɛTaanggbey ye daa ne ito ninaa nɛ nibhɛ baasek nyini nggbang ngga. 29Wu ɛnyi gha kɛ baal lɛ nggbaam, hyere ɛbhɛ ijwɛng dɔng. Wu ɛnyi gha kɛ ne phɔt ɛgbaang ɛtura mo, hante ɛbhɛ ne ɛshɛɛrɛng ngɛ dɔng. 30Gbik ɛnyi gha ne ɛ kɛ roo yɛ ɛkɔn, nang ɛbhɛ. Wu ɛnyi kɛ ne phɔt ɛkɔn mo, sɔng ɛ yaak ɛbhɛ te ɛ kyii nang nge nang. 31Mɔn ɛn ninyi na ɛkɔn na ne ɛ sim ɛn te sɛ mɔn nyini nɛ wo.#6.31 Ta yɛɛn: ɛMac 7.12.
32“Wu ɛ kɛ sim ɛn ninyi na nɛ nibhɛ sim nyini zɔng ngo, ɛwɛng ne ikyee ne aa ne sɛ ɛn ne? Nzo ninaa ne ɛfɔt i ma sim ninaa nɛ nibhɛ sim nibhɛ wo. 33Wu ɛ kɛ ne mɔn ɛn iyɛnɛng ngge daa ninaa nɛ nibhɛ ma mɔn nyini nɛ zɔng ngo, ɛwɛng ne ikyee ne aa ne sɛɛ? Nzo ninaa ne ɛfɔt i ma mɔn ɛlɛy. 34Wu ɛ kɛ ne kɔp ɛn ninaa nɛ nibhɛ sɛ kyii nyini nɛ wo, ɛwɛng ne ikyee ne aa ne sɛ ɛn ne? Nzo ninaa ne ɛfɔt i ma kɔbhɔs ninaa ne ɛfɔt, daa ɛli nɛ nibhɛ sɛ kyii nibhɛ nɛ ɛnu yɛ. 35Yang sim ɛn ninaa ne iphup mon na, te ɛ mɔn nibhɛ nikɔn niyɛnɛng. Kɔp ɛn nibhɛ ɛkɔn na, sɔng ne ɛ tas ɛn wu sɛ bhɛ kyii nyini nɛ nang. Sɛ ne bhɛ mɔn nyini iyɛnɛng gbom, ɛ ta te nyini ninɔn ɛTaanggbey ne ɛ so daa Nyu ne irywa na nɛ ne itin nɛ, daa ɛli ne ɛTaanggbey ya tɔɔsel ninaa ne bɛɛs nikɔn na nɛ nibebhe na iyɛnɛng ɛbhɛ de gbik. 36Te ɛn nyini ninaa ne san iyɔm, ɛli ne ɛKyɛɛ mon na soye ɛhaa ne san iyɔm ma.”
Sɔng Ɛ Bol ɛn Nigwaa Mon na ɛShara gha Nang
(ɛMac 7.1-5)
37“Sɔng ɛ hyɛ ɛn nigwaa mon na ɛshara gha nang, sɔng yaa ne ma hyɛ nyini nɛ nang. Sɔng ɛ hyɛ ɛn nigwaa mon na ɛshara nang, sɔng yaa ne ma hyɛ nyini nɛ nang. Han ɛn nigwaa mon na nɛ, sɛ ne ma han nyini nɛ. 38Nang ɛn, yaa ne ma nang nyini ɛgyuuru hyɔrɔ, i yɛk ngɛ jujuu, i sit nyini ɛbyin nɛ ne ɛtura. Ɛgyuuru gha ne ɛ kɛ ɛn nang nɛ, ɛbhɛ ne yaa ne ma nang nyini nɛ.”
39ɛYɛso gha ne boote nɛ nibhɛ ndɔ ne igɔrɔp, ɛ yaak nibhɛ, “ɛWil la kɛ ku hɔ ɛhak ɛwil ɛntsɛng bɛ? Wu ɛ kɛ mɔn ɛlɛ wo, nibhɛ yaa ne ɛbyin nge, nibhɛ bhɛ hoghɛse ndɔ ɛyek.#6.39 Ta yɛɛn: ɛMac 15.14. 40Sɔng ɛngɔn ne icwam ma kɛ ku phyin ɛkyɛɛ ne icwam ɛbhɛ gha nang. Yaa yang sɛ kɛ gbaat ɛbhɛ gbik, aa ne te tɛ ɛkyɛɛ ne icwam ɛbhɛ gha.”#6.40 Ta yɛɛn: ɛMac 10.24-25; ɛYoh 13.16; 15.20.
41“iKyee phɛ kɛ te ɛ yaang ɛnkɔlɔng ngo ne ɛbhɛ so ndɔ ne irisɛ ɛgwaa mon de, ɛ ji sang yaang ngguk ne ihon de ne iphɛ so ndɔ ne idee mo dee?” 42Aa mɔn ɛlii ɛ yaak ɛgwaa mo gha, “Yɛɛs te n tul lɛ ɛnkɔlɔng ne irisɛ mo wo,” ɛ ji sang yaang ngguk ne ihon de ne iphɛ so yɛ ndɔ ne irisɛ mo dee? iGyɛ wo ne ɛ soyɛ ɛluk ka, yang tsa ɛ tul ngguk ne ihon de ne irisɛ mo de nyɛɛn, aa ne ji wɛɛ yɛnɛng ɛ tul ɛnkɔlɔng ne irisɛ ɛgwaa mo de.
I Seng ɛHon na ne iKpam Ɛbhɛ
(ɛMac 7.15-20; 12.33-35)
43Sɔng ɛhon ɛyɛnɛng nga i yɛk ikpam ivebhe nang. Sɔng ɛhon ɛbebhe gha ne ma ta yɛk ikpam iywɛnɛng nang. 44I seng ɛhon na ne ikpam ɛbhɛ. Sɔng i sɛ ikpam ɛpharang ngga ɛhon ne itɔrɔp nang. Sɔng i ne sɛ ikpam ɛnap ba ɛjejen nang.#6.44 Ta yɛɛn: ɛMac 12.33. 45ɛNyi ɛyɛnɛng nga mɔn nikɔn niyɛnɛng lenɛ ne yɛnɛng ngge ne iphɛ ku so ndɔ ne irway ɛbhɛ. ɛBebhe ɛnyi gha ne ma mɔn nikɔn nibebhe lenɛ ne ibebhe de ne iphɛ ku so ndɔ irway ɛbhɛ. ɛNu gha bhɛ bol nikɔn na nɛ nibhɛ so ndɔ ne irway ɛnyi ba.
iBol Ninyi iFaa nɛ nibhɛ kɛ Lɔl iDee
(ɛMac 7.24-27)
46“iKyee iphɛ kɛ te ɛ ma shii bok ɛn mɛɛn ‘ɛDaray, ɛDaray ya,’ ɛ kyii sang i mɔn ɛn ɛkɔn na ne nzi bo te mɔn ɛn noo? 47Na tɔɔl nyini ɛli ne ɛnyi gha ne ɛ kɛ yɛɛs ɛlɔ nge gha ɛ tenes ibol nge de ɛ ji roos iphɛ wo, ɛ so. 48Ɛ so te ɛnyi ne aa lɔl ijwee; ɛ kɛ ne tsa ɛ rum ivel, ɛ cwaasek ne ikpɛɛ, ɛ lɔl ɛtum mɛ, ɛ ji lɔl ijwee ɛbhɛ wo dak ne ɛtum mo. Kɛ ne sɛ inɛn ne ihywel kɛ bo ɛzay, mpɛ ne kyi ijwee wo, ifɛ ne i shɛɛ kɔs, daa ɛli ne kɛ lɔl ifɛ daa ne ɛtum ɛyɛnɛng. 49ɛNyi gha ne ɛ kɛ ne tenes ibol nge de, ɛ mbaray tang roos iphɛ wo nang, ɛ so te ɛnyi gha ne ɛ kɛ lɔl ijwee ɛbhɛ tang ɛtum. Kɛ ne sɛ inɛn ne ihywel kɛ bo ne ɛzay, mpɛ ne kyiri ijwee wo, ifɛ ne bungaay, ifɛ sirit re, gburung! Gburung.”
Currently Selected:
ɛLuka 6: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
