ɛYohana 17
17
ɛYɛso gha Kɛ Roo iTo Ɛbhɛ Nɛ
1Kɛ ne sɛ ɛYɛso gha kɛ taal ivol lɛbaa wo, ne ɛ waal ito ɛ yɛɛn daa ne irywa ɛ roo ɛ yɔngɔ: “ɛTaa nten nɛ kɛ tuu. Tɔɔrek ito-ndiinday mo daa ɛNgɔn mo gha, te ɛNgɔn na ne ma tɔɔrek kɛ ito-ndiinday. 2Daa ɛli ne ɛ kɛ nang ɛbhɛ igbɔm daa ninyi na gbik, te ne ɛ nang gbik ninyi na ne ɛ kɛ nang ɛbhɛ wo iken ne inat. 3iKen ne inat de ne so ɛlɛ: tɛ ninyi na seng ngɛ wu igyɛ zɔng ɛ soyɛ ɛTaanggbey ntin na gbik ne ɛYɛso ɛKiriti yegha ne ɛ kɛ tom mo. 4Nggɛ tɔɔrek ito-ndiinday mo de ndɔ ɛzay ɛli ne nggɛ taal ɛtomɛ gha ne ɛ kɛ tom me wu te mɔn no. 5ɛLyilyɛghaa wo ɛTaa, tɔɔrek ito-ndiinday daa mee, ito-ndiinday de ne nggaa ku bok ɛnu ɛyisɛ mo gha ɛli ne kaa tang ryɔng ɛzay ya.
ɛYɛso gha Kɛ Roo Ninɔn ne iCwam Ɛbhɛ na Nɛ
6“Nggɛ ku tɔɔrek ninyi na ne ɛ kɛ nang me nibhɛ ndɔ ɛzay yɛghaa wo ɛli ne ɛ so. Nibhɛ kaa so ninaa mo, ɛ kɛ ne nang me nibhɛ. Nibhɛ kɛ ne roos ibol mo de. 7ɛLyilyɛghaa wo nang, nibhɛ kɛ ne seng wu gbik nikɔn na ne ɛ kɛ nang me wo nibhɛ le ɛlɔ mo. 8Daa ɛli ne nggɛ mɔng nibhɛ ibol de ne ɛ kɛ tɔng me wo nibhɛ kɛ ne say; nibhɛ yɛɛ wu ɛtsak ne daa ɛlɔ mo gha, nibhɛ kɛ ne nang ne itin nɛ wu igyɛ ɛ kɛ tom me.
9“Nzi ne roro nibhɛ nɛ. Sɔng nzi roro ninaa ɛzay ya nɛ nang. Nzi yang roro ninaa ne ɛ kɛ nang me wo daa ɛli nɛ nibhɛ so ninaa mo. 10Gbik ninyi na ne n bok ko nibhɛ so ninaa mo; gbik ninyi na ne ɛ ma bok ko nibhɛ ne ma so ninaa nge. Nggɛ ne sɛ ito-ndiinday lenɛ nɛ nibhɛ. 11Sɔng naa tɔ ɛzay ya nang; n yaaso daa ɛlɔ mo, nibhɛ wo, nibhɛ ne kyi tɔ ndɔ ɛzay. ɛTaa ne ɛ so ɛKang! Kyɛngɛ nibhɛ ne ihwet da ne irywɛɛk mo wo bok ko, irywɛɛk ko ne ɛ kɛ nang me wo tɛ nibhɛ teye nidaan nɛ ɛli ne njwi so ne nidaan nɛ wo. 12ɛLi ne nggaa sonɛ nibhɛ wo, nggaa ne kyɛngɛse nibhɛ, ne n wɛɛ nibhɛ yɛnɛng lenɛ ne ihwet da irywɛɛk mo wo ne ɛ kɛ nang me wo bok. Sɔng ɛdɛng kɛ ne birit tang, kang ne ɛhaa ne kaa ku yɔngɔ ɛ sɛ birit to, te shwaak ɛwee ne iBol ɛTaanggbey yo.
13“ɛLyilyɛghaa wo, ne n yaaso ɛlɔ mo gha. Nzi ne bol nikɔn nɛnaa wo ɛli ne nggyi tɔ ndɔ ɛzay ya tɛ ninaa ne roos nge na ne sɛ irway ihwala nge da hyɔrɔ ndɔ nibhɛ. 14Nggɛ tɔng nibhɛ ibol mo de, ɛzay ya kɛ ne mbaray nibhɛ daa ɛli ne hame nibhɛ soye ninaa ɛzay ya ɛli ne hame ma nzo me ɛhaa ɛzay ya. 15Sɔng ɛroo nge gha i bo wu te ɛ tul nibhɛ ndɔ ɛzay ya nang, nzi bo wu te ɛ kyɛngɛse nibhɛ ɛlɔ ɛbebhe gha. 16ɛLi ne hame ne nzo ɛhaa ɛzay ya, sɔng nibhɛ ne ma so ninaa ɛzay ya nang. 17Te nibhɛ wɛwɛy ne itin de, daa ɛli ne ibol mo de so itin nɛ. 18ɛLi ne ɛ kɛ tom me ndɔ ɛzay ya, nggɛ ne ma tom nibhɛ ndɔ ɛzay ne mang. 19Nggɛ te ito nge wɛwɛy ɛlɔ nibhɛ, tɛ nibhɛ ma te ito nibhɛ wɛwɛy nɛ ntin nɛ.
ɛYɛso gha Kɛ Roo Ninaa ne Roos sa nɛ Gbik
20“Sɔng ɛroo nge gha so daa ne nibhɛ zɔng nang, nzi ma roro daa ninaa nɛ nibhɛ yaa nang ne itin nɛ ne mee wo lenɛ ne ibol nge de nɛ nibhɛ yaa sanga wo. 21ɛTaa, nzi roro te gbik nibhɛ ne teye nidaan nɛ, ɛli ɛ so ndɔ nge de ma nzo ndɔ ne mo de. Tɛ nibhɛ shɛɛ ndɔ mos, te ɛzay ya ne nang ne itin nɛ wu igyɛ ɛ kɛ tom me. 22Nggɛ nang nibhɛ ito-ndiinday de ne ɛ kɛ nang me wo, tɛ nibhɛ teye nidaan nɛ, ɛli ne mee wo ne igyɛ wo njwi so nidaan nɛ wo. 23Nzo ndɔ nibhɛ, ne ɛ ma so ndɔ mee. Tɛ nibhɛ ne byinkit gbik te ɛzay ya seng wu igyɛ ɛ kɛ tom me, wu ɛ sim nibhɛ ɛli ne ɛ ma sim me wo.
24“ɛTaa! Ɛ kɛ nang me nibhɛ, nzi ne sim tɛ nibhɛ sɛ ɛbhɛ so ne mee ɛlɔ gha ne nzo nɛ wo, tɛ nibhɛ yaang ito-ndiinday nge idee ne ɛ kɛ nang me wo daa ɛli ne ɛ kaa ku sim me tang ryɔng ɛzay ya.
25“ɛTaa ɛcik! Sɔng ninyi ɛzay ya yɛɛ yɛ nang, mee wo nzi ne yɛɛ yɛ. Ninyi yɛnaa wo yɛɛ wu igyɛ ɛ kɛ tom me. 26Nggɛ te nibhɛ seng ngɛ, naa ne maa i mɔn ɛlɛy te ishwim ba ne ˆɛ bok me nɛ wo ne ma so ndɔ nibhɛ, ne ma n so ndɔ nibhɛ ne mang.”
Currently Selected:
ɛYohana 17: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
