ɛYohana 18
18
Kɛ Wum ɛYɛso Yegha
(ɛMac 26.47-56; ɛMar 14.43-50; ɛLuk 22.47-53)
1Kɛ ne sɛ ɛYɛso gha kɛ taal ɛroo yeghaa wo, ɛbhɛ wo nɛ ninɔn ne icwam ɛbhɛ na ne tek ɛlɔ yɛ nibhɛ bere ɛPhele ne iKidirɔn. ɛDɛ ɛrɛng nihon na kaa ne so ne ikpang ngɛwoo nggyɛ wo, ɛYɛso gha nɛ ninɔn ne icwam ɛbhɛ na ne phɛ ɛnggyɛ wo.
2ɛYahuza gha, ne ɛ kaa rɛp ɛYɛso yegha, kaa ne ku i yɛɛ ɛlɔ yɛdaa daa ɛli ne ɛYɛso gha kaa i mɔɔng ɛ sɛm me ɛnggyɛ wo nɛ ninɔn ne icwam ɛbhɛ na.
3ɛYahuza gha kaa ne ho ɛyisɛ ɛguu nisooja ne iRooma, nɛ ninaa hyep iDeng gbik nɛ nindiinday nibo ɛTaanggbey nɛ niFarisawa kaa tom, ɛ phɛ nɛ ɛrɛng nihon na. Ninyi yɛnaa nggyɛ wo kaa ne bok nikɔn ne itsom, ne igoo ne ikpum gbik ne igoo ne sunga.
4ɛYɛso gha ne seng ɛkɔn negha ne aa te ne ɛbhɛ gbik, iphɛ ɛlɛy ne ɛ shompeey ɛyisɛ ɛ phom nibhɛ ɛ yɔngɔ, “ɛHay ne ɛ tɔk ɛn ɛbhɛ lɛɛ?”
5Nibhɛ ne kyii nɛ nibhɛ yɔngɔ, “ɛYɛso ne iNazarat.”
ɛYɛso gha ne yaak nibhɛ, “Mee nzo ɛbhɛ.” ɛLɛy, ɛYahuza gha ne aa rɛp ɛYɛso yegha kaa so ɛnggyɛ wo nɛ nibhɛ. 6Kɛ ne sɛ ɛYɛso gha kɛ yɔngɔ, “Mee nzo ɛbhɛ,” nibhɛ ne kyisi ne ɛtsim, nibhɛ hoghɛsɛ ne ivel.
7ɛYɛso gha ne kyii ta phom nibhɛ dɔng ɛ yɔngɔ, “ɛHay ne ɛ tɔk ɛn ɛbhɛ lɛɛ?”
Nibhɛ ne ta kyii nɛ nibhɛ yɔngɔ, “ɛYɛso ne iNazarat.”
8ɛYɛso gha ne ta yaak nibhɛ, “Nggɛ ku mɔng nyini wu mee nzo ɛbhɛ, wu mee wo ne ɛ tɔk ɛn no, ne ɛ tek ɛn ninyi yɛnaa wo nibhɛ hyel.” 9Ɛ kaa boote ɛlɛ te shwaak ɛkɔn na ne ɛ kaa ku boote ɛ yɔngɔ, “ɛTaa! Sɔng nggɛ biri ɛdɛng ndɔ ninyi yɛnaa wo ne ɛ kɛ nang me wo nang.”
10ɛSimɔn ɛBiturus sa ne shii sɔnɔ ɛwal ne ɛ kaa bok ɛ tɛmɛ ɛkpuru ɛgɔm nibo ɛTaanggbey ya ne itsoro ne iwɔ ne irwye ɛ bala. Kaa ne i bok ɛkpuru yɛ ɛMalikus.
11ɛYɛso gha ne yaak ɛbhɛ, “ɛBiturus, sɔɔl ɛwal lo nɛ ne ifaran nɛ. iPhɛ so nggbinggbing n sɔ ɛhyihyangas sa ne ɛkyɛɛ gha kɛ nang me wo.”
Kɛ Phɛ ne ɛYɛso ɛlɔ ɛNas
(ɛMac 26.57-58; ɛMar 14.53-54; ɛLuk 22.54)
12ɛGuu nisooja ne iRooma na ne ɛndiinday nibhɛ gbik nɛ ninaa ne hyep ideng ngge ne ji wum ɛYɛso yegha, nibhɛ rop ɛbhɛ ibɔ. 13Nibhɛ hyel lɛ nibhɛ phɛ nɛ ɛlɔ ɛNas. ɛNas sa kaa ne soye ɛkyɛɛ ɛkuk ɛKayafa, ne ɛ kaa soye ɛgɔm nibo ɛTaanggbey ne ishay yɛdee nggyɛ wo. 14ɛKayafa gha ɛbhɛ kaa ne ku yaak niYahodawa na wu iphɛ kɛ jam mɛ ɛnyi ɛdaan ku ɛlɔ ninyi maa na.
ɛBiturus sa Kɛ Re iShamas ɛYɛso
(ɛMac 26.69-70; ɛMar 14.66-68; ɛLuk 22.55-57)
15ɛSimɔn ɛBiturus sa, ne ɛdɛ ɛngɔn ne icwam ma ne kungus ɛYɛso yegha ɛtsim. ɛGɔm nibo ɛTaanggbey ya kaa ne i yɛɛ ɛngɔn ne icwam mɛghaa nggyɛ wo, iphɛ ɛlɛy ne ɛ kungus ɛYɛso yegha ɛbhɛ lel ndɔ ɛsaa ne ijwee ɛgɔm nibo gha. 16ɛBiturus sa ne ji kyinak ne izay ɛnu ne izuk. ɛNgɔn ne icwam mɛghaa nggyɛ wo ne ɛgɔm nibo gha i yɛɛ ɛbhɛ wo, ne kyii ɛbhɛ boote ne ɛngɔn ɛlyilyap pa ne ɛ hyep ɛnu ne izuk ka, ɛngɔn ɛlyilyap pa ne ji bo ɛBiturus segha ɛ lel lɛ. 17ɛNgɔn ɛlyilyap pa ne ɛ so ɛnu ne izuk ka ne yaak ɛBiturus segha, “Sɔng ɛ soyɛ ɛdɛ ɛngɔn ne icwam ɛnyi yɛghaa nggyɛ wo nang nge?”
ɛBiturus sa ne kyii nɛ ɛ yɔngɔ, “Kwa, sɔng nzo ɛdɛng nang.”
18ɛLɔ yɛ kaa ne so ntsentseng, iphɛ ɛlɛy nikpuru na gbik nɛ ninaa ne hyep pa ne murak igboo nibhɛ saa. ɛBiturus sa ne ma phɛ ɛbhɛ kyinak ne ɛlɔ yɛ ɛ saa igboo wo.
ɛGɔm niBo ɛTaanggbey ya kɛ Phomos ɛYɛso yegha iVol
(ɛMac 26.59-66; ɛMar 14.55-64; ɛLuk 22.66-71)
19ɛGɔm nibo ɛTaanggbey ya ne phom ɛYɛso yegha ibol daa ne ito ninɔn ne icwam ɛbhɛ de ne daa ne imɛmɛ ɛbhɛ da.
20ɛYɛso gha ne kyii ɛbhɛ nɛ ɛ yɔngɔ, “Nggɛ bol ne ɛzay ya wɛsɛrɛk. Nggɛ ne i mɛmɛ ninyi na nɛ ndɔ ne idee ne itsɔɔy ne ndɔ ne iDeng ɛlɔ gha nɛ niYahodawa na kaa tumɛɛy yɛ. Sɔng nggɛ bol idɛ bol de gying nang. 21iKyee iphɛ kɛ ne te ɛ phomos me woo? Phom ninyi na nɛ nibhɛ kɛ tenes me wo, nibhɛ yɛɛ ɛkɔn na ne nggɛ tɔng nibhɛ.”
22Kɛ ne sɛ ɛYɛso gha kɛ boote ɛlɛ wo, ɛdɛ ɛhaa ne hyep ideng nga ne ɛ kaa so ɛnggyɛ wo ne cwɛɛl ɛbhɛ ɛyisɛ, ɛ yaak ɛbhɛ, “ɛHay ɛbhɛ bok kɛ te ɛ bol ne ɛgɔm nibo na ɛlɛ woo?”
23ɛYɛso gha ne kyii ɛbhɛ nɛ ɛ yɔngɔ, “Wu nggɛ boote idɛ ibol de ne iphɛ so ibebhe yɛ, ne ɛ tɔɔl ninyi na, wu ɛkɔn na ne nggɛ ne bol lo ɛ so itin nɛ, ikyee iphɛ kɛ ne te ɛ cwɛɛl me woo?” 24ɛNas sa ne kyii ne ɛbhɛ, ɛ maa tɔ ne irop ba, wu te phɛ nɛ ɛlɔ ɛKayafa ne ɛ soye ɛgɔm nibo.
ɛBiturus sa Kɛ ta Yɔng wu Hang i Yɛɛ ɛYɛso Ye
25ɛSimɔn ɛBiturus sa kɛɛ ne ma tɔ ɛnggyɛ wo ɛ saa igboo wo, nibhɛ ne yaak ɛbhɛ, “Sɔng ɛ ma so ɛdaan ndɔ ninɔn ne icwam ɛnyi yenaa nggyɛ wo nang nge?”
ɛBiturus sa ne kyii nɛ ɛ yɔngɔ, “Kwa! Sɔng nzo ɛdɛng nang.”
26ɛDɛ ɛkpuru ɛgɔm nibo na ne ɛ so ɛgwaa ɛnyi gha ne ɛBiturus kaa bala ɛbhɛ itsoro wo ne phom ɛbhɛ ɛ yɔngɔ, “Sɔng nggaa yaang ngɛ ne ɛbhɛ ndɔ ɛrɛng nihon na nang ngee?”
27ɛBiturus sa ne ta hɔng ɛnu ne ivel dɔng; nɛ nten nɛ ɛrom mo ne ji shii tɛpeey.
Kɛ Phɛ ne ɛYɛso gha ɛLɔ ɛBilatus
(ɛMac 27.1-2,11-14; ɛMar 15.1-5; ɛLuk 23.1-5)
28Kɛ ne cwiil ne ihwɛlɛ ywiriri niYahodawa na ne bo ɛYɛso yegha ne ijwee ɛKayafa wo nibhɛ phɛ nɛ ne ijwee ɛgɔm ne iRooma. Sɔng nindiinday niYahodawa na ne bhɛ sim nibhɛ lel ndɔ ɛsaa ɛgɔm-na gha nang, nibhɛ bo wu n yaa yung te kpɛɛ iphɛ ji ring en ne re idira ne Tes iDee Tsak. 29iPhɛ ɛlɛy ɛBilatus sa ne wuru ne izay ɛ sɛ nibhɛ ɛ phom nibhɛ ɛ yɔngɔ, “ɛYa ɛkɔn ɛkpɛɛ ne ɛnyi yɛghaa wo kɛ mɔn ne?”
30Nibhɛ ne kyii nɛ nibhɛ yɔngɔ, “Sɛɛ yɔng ɛ kɛ sang mɔn ɛkɔn ɛkpɛɛ sɔng njwi sɛɛ ne yɛɛs sɛ ne ɛbhɛ wo nang.”
31ɛBilatus sa ne yaak nibhɛ, “Ɛɛy, nyinɛn no, ne ɛ bo ɛn ɛbhɛ, ɛbhɛ bol ɛn ɛbhɛ ɛshara gha ɛli ne ikpii mon na bol lo.”
Nibhɛ ne kyii nɛ nibhɛ yaak ɛbhɛ, “Sɔng kɛ sim njwii nɛ te njwi hyɛ ɛnyi ɛshara ne iku nang.” 32Nibhɛ kɛ boote ɛlɛ wo te shwaak ibol de ne ɛYɛso gha kaa boote daa ne ihywee ne iku de ne aa ku wo.
33ɛBilatus sa ne kyii ɛ lel ndɔ ne ijwee wo, ɛbhɛ yel-le ɛYɛso yegha ɛ phom ɛbhɛ ɛ yɔngɔ, “iGyɛ ɛ soyɛ ɛgɔm niYahodawa naa?”
34ɛYɛso gha ne kyii nɛ ɛ yɔngɔ, “iGyɛ ɛ bok ibol lɛdee woo? Hang ɛnyi bhɛ kɛ mɔn ngɛ?”
35ɛBilatus sa ne kyii nɛ ɛ yɔngɔ, “Ɛ wɛɛ te nzo ɛnyi ne iYahuda naa? Nzo ninyi mo nɛ nindiinday nibo ɛTaanggbey mo nibhɛ kɛ nang me igyɛ. iKyee ne ɛ kɛ mɔn noo?”
36ɛYɛso gha ne yaak ɛbhɛ, “Sɔng igbɔm nge da so ihywee ivaa ɛzay yɛdaa nang. Sɛɛ yɔng igbɔm nge da so ihywee ivaa ɛzay da, ninaa ne roos nge na sɛɛ ne hal irywen, nibhɛ ring ne nang me nɛ nindiinday niYahodawa na. Sɔng igbɔm nge da ne so ivaa ndɔ ɛbɛ nang.”
37ɛBilatus sa ne phom ɛbhɛ ɛ yɔngɔ, “Ɛ soyɛ ɛgɔm me?”
ɛYɛso gha ne kyii nɛ ɛ yɔngɔ, “Ɛ kɛ mɔng cik ne ɛ bo wu nzo ɛgɔm ma. iBol lɛ iphɛ kɛ te i yɛk me, ibol lɛ iphɛ phɛ kɛ ne ta te n yɛɛs ndɔ ɛzay ya; te n tɔng itin nɛ, gbik ɛnyi gha ne ɛ so ɛhaa ne itin na, aa ne phok me.”
38ɛBilatus sa ne yɔngɔ, “iKyee iphɛ so itin dee?”
Kɛ Hyɛ ɛYɛso yegha ɛShara ne Ku
(ɛMac 27.15-31; ɛMar 15.6-20; ɛLuk 23.13-25)
Kɛ ne sɛ ɛBilatus sa kɛ boote ɛlɛ wo, ne ɛ ta wuru ɛbhɛ sɛ niYahodawa na ɛ yaak nibhɛ, “Sɔng nggɛ sɛ ɛbhɛ ne ɛkɔn ɛkpɛɛ nang. 39ɛLi ne ku mɔn nyini nɛ wo, i biri nyini ɛnyi ɛdaan nten ne idira ne Tes iDee de Tsak ko, ɛ sim ɛn te nzɛ biri ‘ɛGɔm niYahodawa naa’?”
40Nibhɛ ne kyii nɛ ne ɛgbaang ne izɔlɔs, nibhɛ yɔngɔ, “Kwa! Sɔng ɛbhɛ nang. Te nang njwii ɛBarabas se!” ɛBarabas sa kaa ne soye ɛhaa ne bɛɛs igbɔm.
Currently Selected:
ɛYohana 18: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
