EVASELIO A MATEO 9
9
Fakamauli o he tagata palalisia
1Nee hopo leva ia Sesu ki he vaka, pea nee fakalaka leva ia ia i te tai, o alu ki tona kolo. 2Pea koeni, nee aumai leva kia ia he tagata palalisia ae nee moe i he palepale. I tana sio ki tanatou tui, nee ui leva ia Sesu ki te tagata palalisia: Ke ke loto malohi, siaku fanau, kua fakamolemole au agahala. 3Pea nee ui leva e ni ihi sekelipa i onatou loto: E fasituu te tagata aeni. 4Pea nee ui leva e Sesu, i tana iloi anatou manatu loto: Kotea e kotou mau ai ni manatu kovi i okotou loto? 5Koteuhi kotea e faigafua age, i te ui: Kua fakamolemole au agahala, mo te ui: Tuu ki oluga, o haele? 6Kae o tupu ke kotou iloi e nofo te Foha o te tagata i te kele mo te pule ki te fakamolemole o te u agahala, nee ina ui leva ki te tagata palalisia: Tuu ki oluga, too tou palepale, pea ke alu ki tou api. 7Pea nee tuu ake leva ia ia ki oluga, o alu ki tona api. 8I te sisio a te hahai ki te mea aena, nee natou punamauuli osi, pea nee natou fakakololia leva ki te Atua, ae kua ina foaki ki te u tagata he pule feia.
Kalagai o Mateo
9I tana alu ki he tahi age kogamea, nee sio leva ia Sesu ki he tagata ae nee heka i te pilo o te u tukuhau, pea nee higoa ia ko Mateo. Nee ui leva e Sesu kia ia: Muli mai ia au! Nee tuu ake leva te tagata aena ki oluga, pea nee muli leva ia ia ia Sesu.
10Nee heka leva ia Sesu i te laupapa kai i te loto fale, pea koeni, nee omai leva he kau popelikano kaugamalie pea mo ni hahai mauli kovi, o kakai fakatahi mo ia pea mo ana tisipulo i te laupapa kai. 11Nee sisio leva te kau faliseo ki te mea aena, pea nee natou ui leva ki ana tisipulo: Kotea e kai ai tokotou pule mo te kau popelikano pea mo te kau agahala? 12I te logo a Sesu kia natou, nee ina ui leva kia natou: E mole ko natou ae e malolo e aoga ki ai te toketa, kae ko te kau mahaki. 13Kotou olo, pea kotou ako te uhiga o te mea aeni: E mau toku fiafia i te manavaofa, kae mole i ni sakilifisio. Koteuhi nee mole au hau o paui ni tagata agatonu, kae ni tagata agahala.
Sesunio; te kie foou mo te u utele* foou
14Nee omai leva te u tisipulo a Soane kia Sesu, o ui: Kotea e matou sesunio ai, matou pea mo te kau faliseo, kae e mole sesunio au tisipulo? 15Nee tali leva e Sesu kia natou: Pe e feala ke putu te u kaumea o te tagata ohoana, kae kei nofo te tagata ohoana mo natou? E hoko mai anai te u aho ae e too ai anai te tagata ohoana maia natou, pea e natou sesunio anai. 16E mole tui e he tahi he kie foou ki he kofu afea; koteuhi e ina haei anai te kofu afea, pea e kovi age anai te mahae. 17E mole tuku foki he vino foou ki ni utele afea, koteuhi e mahaehae anai te u utele afea, pea e hali anai ki tua te vino pea e maumau anai mo te u utele; kae e tuku te vino foou ki ni utele foou, pea e tologa anai te vino mo te u utele.
Milakulo e lua: te fafine mo te ofafine o Sailusi
18Nee ina lolotoga fakaha kia natou te u folafola aena, koeni, nee kaku mai leva he pule, o tulolo i ona mua, o ui: Nee hoki mate nei pe toku ofafine; kae hau ia koe o hili kia ia ou nima, pea e mauli anai ia ia. 19Nee tuu ake leva ia Sesu ki oluga, pea nee muli leva ia ia mo ana tisipulo ia ia.
20Pea koeni, nee fakaoviovi age leva kia ia mai muli he fafine ae nee fakafanoa tona toto talu maia tau e hogofulu ma lua, o fafa ki te tapa o tona kofu. 21Koteuhi nee ina ui i tona loto: Kapau e feala pe ke au fafa ki tona kofu, pea e au mauli anai. 22Nee mafuli leva ia Sesu, o ui, i tana sio kia ia: Ke ke loto malohi, siaku taahine, kua fakamauli ia koe e tau tui. Pea nee mauli leva te fafine aena i te hola pe aia.
23I te kaku a Sesu ki te fale o te pule, o sio ki te kau pupuhi fakatagi mo te hahai ae kua tagi laulau, 24nee ina ui leva kia natou: Koutou fakamamao kehe atu; koteuhi e mole mate te taahine, kae e moe ia ia. Pea nee natou nukinuki leva kia ia. 25I te osi o te fekaui o te hahai, nee ulu leva ia ia ki loto, pea nee ina too leva te nima o te taahine, pea nee tuu ake leva te taahine ki oluga. 26Nee mafola leva tona logologona i te fenua katoa.
Fakamauli o te u kivi e toko lua mo he tagata avea
27I tana mavae mai ai, nee muli leva ia Sesu ni tagata kivi e toko lua, ae nee taukalaga: Foha o Tavite, ofa mai kia maua! 28I tana kaku ki fale, nee fakaoviovi mai leva te u tagata kivi e toko lua kia ia, pea nee ui leva e Sesu kia naua: Pe e kolua tui e au fealagia te mea aena? Pea nee na tali leva kia ia: Io, Aliki. 29Pea nee fafa leva ia Sesu ki ona mata, o ui: Ke fai kia kolua o mulimuli ki takolua tui. 30Pea nee ava leva ona mata. Nee fai leva e Sesu kia naua te fakatotonu fakamalohi aeni: Kolua tokaga ke aua pe naa iloi e he tahi te mea aeni. 31Kae i tana mavae, nee na fakamafola leva tona logologona i te fenua katoa.
32Nee natou olo leva, pea koeni, nee aumai leva kia Sesu he tagata avea ae nee gutu mate. 33I te osi o te kapu o te temonio, nee palalau leva te tagata gutu mate. Pea nee ofolele leva te hahai, o ui: E mole heeki ha he mea fenei i Iselaele i he aho. 34Kae nee ui leva e te kau faliseo: E ina kapu te kau temonio i te malohi o te pule o te kau temonio.
Ofa o Sesu ki te hahai
35Nee fealuaki leva ia Sesu i te u kolo lalahi fuli mo te u kolo liliki, o akonaki i te u sinakoka, mo fakaha te logo lelei o te puleaga, pea mo fakamauli te u mahaki fuli pea mo te u maimoa fuli.
36I tana sio ki te hahai, nee ofa leva ia ia kia natou, koteuhi ko he hahai fakaofaofa mo ogosia o hage ko ni ovi ae e hala tauhi ovi. 37Nee ui leva e Sesu ki ana tisipulo: E lahi te taukai kae toko sii te kau gaue. 38Koutou kole ki te pule o te taukai ke fekaui ni kau gaue ki tana taukai.
Currently Selected:
EVASELIO A MATEO 9: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
