SENESI 15
15
Fakafoou o fakapapau kia Apalamo
1I te osi o te u mea aia, nee tuku leva te folafola a te Eteleno kia Apalamo i he sio kia ia, o ui: Apalamo, aua naa ke mataku! Ko au ko tou paletau, pea e lahi anai tou fakapale. 2Nee tali leva e Apalamo: Aliki Eteleno, kotea te mea ae e ke foaki mai anai kia au? E au alu, kae e mole haku fanau; pea ko ae e ina mau anai te u koloa o toku fale, ko Eliesele mai Tamaso. 3Pea nee ui leva e Apalamo: Koeni, nee mole ke foaki mai kia au hoku hakoga, pea ko ae nee tupu i toku fale e ina mau anai toku tofiga.
4Pea nee folafola leva te Eteleno kia ia: E mole anai ko ia ae e ina mau anai tou tofiga, kae ko ae e hau anai mai ou tootooga ka ina mau anai tou tofiga. 5Pea nee ina taki leva ia Apalamo ki fafo, o ina ui kia ia: Sio ki te lagi, pea ke lau te u fetuu, mo kapau e ke ma lau natou. Pea nee ina ui leva kia ia: E fena anai tou hakoga. 6Nee tui leva ia Apalamo ki te Eteleno, ae nee ina totogi leva kia ia tana tui aki te faitotonu.
7Nee toe ui leva e te Eteleno kia ia: Ko au ko te Eteleno, ae nee ina fakamavae ia koe mai Ulu i Kaletea, ke foaki kia koe te fenua aeni ma au. 8Nee tali leva e Apalamo: Aliki Eteleno, e au iloi feafeai anai e au mau anai ia ia? 9Pea nee ui leva e te Eteleno: Too he pipi fafine mui e tau tolu, mo he tao e tau tolu, mo he ovi tagata e tau tolu, mo he kulukulu, mo he lupe mui. 10Nee too leva e Apalamo te u manu fuli aia, o fahifahi natou i lotomalie, pea nee ina fakaatuatu leva te u inasi o fakafehagaaki. Kae nee mole ina fahi leva te u manulele. 11Nee felelei mai leva te u manulele fekai ki te u manu mamate; kae nee kapu leva natou e Apalamo.
12I te to o te laa, nee kaku leva he fia moe lahi kia Apalamo; pea koeni nee to leva kia ia he mataku lahi mo he fakapouli lahi. 13Pea nee ui leva e te Eteleno kia Apalamo: Ke ke iloi papau e nofo matapule anai tou hakoga i he fenua kehe. E natou nofo popula anai i ai, pea e fakatagai anai natou i ai ia tau e fageau. 14Kae e au fakamaaui anai te puleaga aena nee natou popula ki ai, pea e natou mavae anai mai ai mo ni koloa lahi. 15Ko koe, e ke alu anai i te tokalelei ki au tamai, pea e tanu anai ia koe i te osi o he temi matua lelei. 16I te fa taitupu, e natou toe liliu mai anai ki heni; koteuhi e heeki kaku te agahala o te hahai Amole ki tona fonu lelei. 17I te to o te laa, nee to leva he fakapouli lahi; pea fokifa kua ha leva he afi kakaha ae nee kokohu pea uloulo, o fakalaka i lotomalie o te u manu ae nee fahi.
18I te aho aia, nee fakapapau leva te Eteleno kia Apalamo, o ui: E au foaki te fenua aeni ki tou hakoga, mai te vaitafe o Esipito o kaku ki te vaitafe lahi, ko te Eufalate: 19ko te fenua o te kau Kenia, mo te kau Kenati, mo te kau Katemoni, 20mo te kau Eti, mo te kau Pelesi, mo te kau Lefaimi, 21mo te kau Amole, mo te kau Kanaane, mo te kau Kilikasi, pea mo te kau Sepusi.
Currently Selected:
SENESI 15: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
