SENESI 16
16
Akale; tupu o Isemaele
1Ko Salai te ohoana o Apalamo, nee mole ina foaki he fanau kia Apalamo. Kae nee i ai hana fafine faifekau Esipito, nee higoa ko Akale. 2Pea nee ui leva e Salai kia Apalamo: Koeni, kua fakapaa au e te Eteleno; e au kole atu kia koe ke ke alu ki taku fafine faifekau; e lagi feala anai ke au mau maia ia ni fanau. Nee fakalogo leva ia Apalamo ki te leo o Salai. 3Pea nee too leva e Salai, te ohoana o Apalamo, ia Akale, ko te fafine Esipito ae ko tana fafine faifekau, o foaki ke ohoana mo Apalamo, ko tona ohoana totonu, i te hili o tau e hogofulu ki te nofo o Apalamo i te fenua ko Kanaane.
4Nee alu leva ia ia kia Akale, ae nee faitama leva. I tana sio kua faitama ia ia, nee sio kovi leva ia Akale ki tona aliki fafine. 5Pea nee ui leva e Salai kia Apalamo: Ke to kia koe toku mamahi. Nee au tuku taku fafine faifekau ki tou fatafata; pea nee talu tana sio kua faitama ia ia, mo tana sio kovi mai kia au. Ke nofo te Eteleno ko te tuifakamaau ia au mo koe! 6Nee tali leva e Apalamo kia Salai: Koeni, e ke pule ki tau fafine faifekau, ke ke fai kia ia te mea ae e ke lelei ia. Pea nee gaohi kovii leva ia ia e Salai; pea nee hola leva ia ia o mamao maia ia.
7Nee mau leva ia ia e te aselo a te Eteleno ia tafa o he matapuna vai i te toafa ae e tuu i te ala o Sua. 8Nee ina ui leva: Akale, fafine faifekau a Salai, e ke hau mai fea, pea e ke alu ki fea? Nee ina tali leva: E au hola mamao maia Salai, ko toku aliki fafine. 9Nee ui leva e te aselo a te Eteleno kia ia: Ke ke toe liliu ki tou aliki fafine, pea ke fakamalalo i ona mua. 10Nee ui leva e te aselo a te Eteleno kia ia: E au fakaliuliuga anai tou hakoga, pea e liliu anai ia ia o lahi, o mole feala anai tona lau. 11Nee ui leva e te aselo a te Eteleno kia ia: Koeni kua ke faitama, pea e ke fanaui anai he tama, pea e ke foaki anai kia ia te higoa ko Isemaele; koteuhi kua logo te Eteleno ki tau tagi i tou mamahi. 12E hage anai ia ia ko he asino vao; e malaga anai tona nima ki te u tagata fuli, pea e fakafehagai anai te nima o te u tagata fuli kia ia. E nofo anai ia ia ia mua o ona tehina fuli. 13Nee ui leva e Akale: Pe nee au sio mooni i heni ki ae e sio mai kia au? Pea nee ina tuku leva te higoa ko Ata-Ele-Loi ki te Eteleno ae nee palalau kia ia: Ko koe ko Ele-Loi, ko te Atua ae e sio kia au. 14Koia ae e higoa ai te vaikeli aia, ko te vaikeli o Lasai-Loi, vaikeli o ae e sio kia au; e tuu ia i te vaha o Katesi mo Paleti.
15Nee fanaui leva e Akale he foha kia Apalamo; pea nee foaki leva e Apalamo te higoa ko Isemaele ki te foha aia nee fanaui e Akale kia ia. 16Nee tau valugofulu ma ono ia Apalamo i te fanaui e Akale ia Isemaele kia ia.
Currently Selected:
SENESI 16: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
