TOHI GAUE A TE KAU APOSITOLO 16
16
Filifili o Timoteo e Paulo
1Nee alu leva ia ki Telepe mo Lisitia. Pea koeni, nee i ai he tisipulo nee higoa ko Timoteo, tama a he fafine Sutea nee tui, pea nee tamai ia ki he Keleka. 2Nee fakamooni lelei kia ia te u tehina i Lisitia mo Ikonia. 3Nee loto leva Paulo ke ina ave ia ia; pea nee ina too leva ia o silikosisioi, koteuhi ko te kau Sutea nee nonofo i te kogamea aena, he nee natou iloi fuli e tamai Keleka ia. 4I tana fakalaka i te u kolo, nee na fakahoko ki te u tehina te u tonuaga nee fai e te kau apositolo mo te kau matuatua o Selusalemi, ke natou fai ki ai. 5Nee asilisili malohi te u Ekelesia i te tui, pea nee natou asilisili kaugamalie i te u aho takitahi.
Sio a Paulo i Toloasi
6I tona taofi e te Laumalie Maonioni ke aua naa na fakaha te folafola i Asia, nee na fakalaka leva ki Filisia mo te fenua ko Kalatia. 7I tana kaku o ovi ki Misia, nee na faiga leva ke na ulu ki Pitinia; kae nee mole fakagafua leva e te Laumalie o Sesu kia naua. 8Koia nee na fakalaka ai leva i Misia, pea nee na hifo leva ki Toloasi. 9I te pouli, nee mau leva e Paulo he sio: nee ha age leva kia ia he tagata Masetonia, o ina fai age kia ia te kole aeni: Hau ki Masetonia, tokoni mai kia matou! 10I te osi o te sio aena a Paulo, nee matou kumi atu aipe ke matou olo ki Masetonia, he kua matou iloi pau leva kua paui matou e te Aliki ke matou fakaha i ai te logo lelei.
Ulu a Paulo ki Eulopa, kaku ki Filipe
11Nee matou mavae leva i Toloasi, o motou faila fakahagatonu ki Samotalase, pea nee matou hihifo leva i te aho ake ki Neapolisi. 12Mai hena nee matou olo leva ki Filipe, ae ko te kolo mua o te kogafenua o Masetonia, pea ko he kolo nee fakalogo ki Loma. Nee matou nonofo leva i ni kii aho i te kolo aena.
13I te aho o te sapato, nee matou olo leva ki te tua kolo, ki he liua, koteuhi nee matou manatu ake leva nee tuu i ai he kogamea faikole. Nee matou nonofo leva ki lalo, pea nee motou palalau leva ki te u fafine ae nee fakatahi i ai.
Litia, uluaki fafine tafoki
14Ko he tahi o natou, nee higoa ko Litia, fafine faikoloa kie kula, mai te kolo ko Tiatile, ko he fafine nee mataku ki te Atua, pea nee fagono mai ia kia matou. Nee avahi leva e te Aliki tona loto, ke tokaga ia ki te mea nee palalau ki ai Paulo. 15I te osi o tona papitema, ia ia mo tona famili, nee ina fai mai leva kia matou te kole aeni: Kapau e koutou fakamooni e au tui mooni ki te Aliki, koutou ulu ki toku fale, pea koutou nonofo i ai. Pea nee ina fakamalohii leva matou ke matou tali tana kole.
Pilisoni o Paulo mo Silasi
16I tamatou olo ki te kogamea faikole, nee hau leva o fakafetaulaki mai kia matou he taahine faifekau ae nee nofo ai he temonio faikikite, pea nee lahi osi te u koloa nee mau e ona pule ia ia, i tana faikikite loi. 17Pea nee ina kamata leva te mulii o Paulo mo matou. Nee kalaga ia: Ko te u tagata aeni ko te u tagata faifekau a te Atua Maoluga, pea e natou fakaha atu kia koutou te ala o te mauli. 18Nee ina fai leva te mea aena i he u aho. I tona kua fiu, nee mafuli age leva ia Paulo o palalau ki te temonio: E au fakatotonu atu kia koe, i te huafa o Sesu Kilisito, mavae ki tua maia ia. Pea nee mavae atu aipe te laumalie.
19I te sio a te kau pule o te fafine faifekau aena kua puli te matapuna paaga nee natou falala ki ai, nee natou puke leva Paulo mo Silasi o toho naua ki te malae fakafenua, kia mua o te u pule. 20Nee natou ave leva naua kia mua o te u tui fakamaau Loma, o ui: Ko te u tagata aeni e na fakatupu maveuveu i totatou kolo; 21ko ni Sutea naua, ae e na fakaha ni agaifenua e mole gafua ke tou tali pee ke tou fai, koteuhi e tou Loma. 22Nee malaga ake leva te hahai o fakafehagai kia naua; pea nee fakatotonu leva e te kau tui fakamaau ke tatala ona kofu, kae ke haha naua aki ni akau. 23I te osi o tona haha, nee natou li leva naua ki te pilisoni, mo te fakatotonu ki te tagata leo pilisoni ke leoleo mau naua. 24Ko te tagata leo pilisoni, i tana mau te fakatotonu aena, nee ina li leva naua ki he kogafale fakapouli o te fale pilisoni, pea nee ina fakamau leva ona vae aki ni pou akau.
Tafoki o te pule o te fale pilisoni
25I te vaeluapo, nee faikole mo hiva fakavikiviki ki te Atua ia Paulo mo Silasi, pea nee logo te kau pilisoni kia naua. 26Pea fokifa pe kua to he mafuike lahi, o galulu ai te u fakatafito o te fale pilisoni; i te temi pe aena, nee aava leva te u matapa fuli, pea nee motumotu leva te u seini o te kau pilisoni katoa. 27Nee ala ake leva te tagata leo pilisoni, pea, i tana sio kua aava te u matapa o te fale pilisoni, nee ina tohoi ake leva tana heleta ke ina fakamate ia, he nee manatu ia kua feholaki te kau pilisoni. 28Kae nee kalaga leo lahi leva Paulo kia ia: Aua pe naa ke fai kia koe he mea kovi, koeni matou fuli i heni. 29Nee kole age leva e te tagata leo ke aumai he malama, pea nee hu fakatavili leva ia ki loto, o fakamapee ifo ki te kele ia mua o Paulo mo Silasi, nee tete katoa tona sino. 30Nee ina taki leva naua ki fafo, o ui: U aliki, kotea e tonu ke au fai ke au mauli ai? 31Nee tali age leva Paulo mo Silasi: Tui ki te Aliki ko Sesu, pea e ke mauli anai, ia koe mo tou famili. 32Pea nee na fakaha leva kia ia te folafola a te Aliki, feia kia natou fuli nee nonofo i tona fale. 33Nee ina too leva naua i te hola pe aena o te pouli, pea nee ina fufulu leva ona lavea, pea nee papitemai aipe ia ia mo tona famili katoa. 34Nee ina taki leva naua ki tona fale, pea nee ina tuku leva he meakai kia naua, pea nee fakafiafia leva ia mo tona famili katoa i tana kua tui ki te Atua.
Mavae o Paulo mo Silasi i te pilisoni
35I te aho ake, nee fekau leva e te u tui fakamaau ki te u ofisa ke fakaha ki te tagata leo pilisoni: Fakaateaina age te u tagata aena. 36Pea nee fakaha age leva e te tagata leo pilisoni te u palalau aena kia Paulo: Kua tuku logo mai kia au te u tui fakamaau ke fakaateainai kolua; koia i te temi aeni kua kolua ateaina, kolua olo i te tokalelei. 37Kae nee ui age leva e Paulo ki te u ofisa: Nee natou haha maua ki te u akau ia mua o te hahai kae nee mole pe fakamaaui maua, maua aeni ko te u tagata Loma, nee natou li maua ki te pilisoni, pea i te temi nei e natou fakamavae fakafufu maua mei te pilisoni! E mole fai feia anai! Ke natou omai totonu o fakaateainai maua. 38Nee fakahoko leva e te u ofisa te u palalau aena ki te u tui fakamaau, pea nee natou matataku lahi osi i tanatou iloi ko te u tagata Loma naua. 39Nee natou omai leva o fakakolekolei naua, pea nee natou fakamavae naua i te pilisoni, mo kolekole age kia naua ke na mavae i te kolo. 40I tana mavae i te pilisoni, nee na ulu leva ki te fale o Litia, pea, i te osi o tana felavei mo te u tehina pea mo tana fakalotomalohii natou, nee na olo leva.
Currently Selected:
TOHI GAUE A TE KAU APOSITOLO 16: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
