TOHI GAUE A TE KAU APOSITOLO 15
15
Fihi ki te silikosisio i Selusalemi
1Nee hifo age leva mai Sutea he kau tagata ae nee natou akonaki ki te u tehina, o ui: Kapau e mole silikosisioi koutou o mulimuli ki te lao a Moisese, pea e mole feala ke haofaki koutou. 2Nee i ai leva he talaga ia Paulo mo Palenapa mo natou aena, o natou fihi lahi ai; pea nee fakatotonu leva e te u tehina ke hake ia Paulo mo Palenapa, mo ni ihi o natou, ki Selusalemi ki te kau apositolo mo te kau matuatua, o uhiga mo te mea aia. 3I te osi o tonatou tuku ake e te Ekelesia, nee natou hoko atu leva tonatou fagona i Fenisia mo Samalia, o fakamatala ki te u tehina te tafoki a te kau pagani, pea nee natou fakafiafiai lahi leva natou. 4I tanatou kaku ki Selusalemi, nee fakatalitali leva natou e te Ekelesia, mo te kau apositolo, pea mo te kau matuatua, pea nee natou fakamatala age leva te u mea fuli nee fai e te Atua ia natou.
Taofi a Petelo ke aua naa fakamaua te kau pagani ki te lao
5Kae nee tuu ake leva ki oluga ni ihi kua tui i te faahiga o te kau faliseo, o ui: E tonu ke silikosisioi te kau pagani mo fakamaua natou ke mulimuli ki te lao a Moisese.
6Nee fakatahi leva te kau apositolo mo te kau matuatua o sioi te mea aena. 7Nee fai leva he fihi lahi, pea nee tuu ake leva Petelo ki oluga, o ui age kia natou: Tagata tehina, kua kotou iloi talu mai fualoa nee fai e te Atua he filifili ia koutou, o tupu ke logo te kau pagani ki te folafola o te Evaselio mai toku gutu, pea ke natou tui. 8Pea ko te Atua, ae e ina iloi te u loto, nee ina fakamooni kia natou, i tana foaki te Laumalie Maonioni kia natou o hage ko tatou; 9nee mole pe ina fai he fakakehekehe ia tatou mo natou, kua ina fakamaa onatou loto aki te tui. 10Pea koeni, kotea e koutou ahiahii ai te Atua, o kotou hili ai ki te kia o te kau tisipulo he kavega ae nee mole feala ke amo e atatou tamai pee ko tatou totonu? 11Kae e tou tui nee fakamauli tatou o tupu ko te kalasia o te Aliki Sesu, o tatau mo natou. 12Nee fakalologo leva te fakatahi katoa, pea nee fakalogo kia Palenapa mo Paulo, ae nee na fakamatala leva te u milakulo fuli mo te u mea fakaofoofo ae nee fai e te Atua ia naua i te lotolotoga o te kau pagani.
13I te osi o tana fakamatala, nee palalau leva Sakopo, o ui: Tagata tehina, kotou fakalogo mai kia au! 14Kua fakamatala e Simone te uluaki tuku e te Atua ona mata ki te u puleaga, o ina filifili maia natou he hahai ke ina fua tona huafa. 15Pea e alu tahi te mea aena mo te u folafola a te kau polofeta, o hage ko tona tuu i te tohi:
16 I te hili o te u mea aena, e au toe liliu mai anai, pea e au toe lagai anai te falela o Tavite nee holo,
E au toe fakafoou anai te u mea nee maumau, pea e au toe fakatuu anai ia,
17 O tupu ke kumi te Aliki e te toega o te u tagata,
Pea mo te u puleaga fuli e puaki ai toku huafa.
E ui e te Aliki, ae e ina fai te u mea aena,
18 Pea nee ina fakaha natou talu mai fualoa.
E mole maua te kau pagani ki te lao
19Koia e au manatu ai ke aua naa fakatupu ni faigataaia kia natou kua tafoki ki te Atua i te kau pagani, 20kae ke tou fai he tohi kia natou ke natou fakamamao mai te u fakalialia o te u taulaatua, mo te faiaga, mo te u manu mamate, pea mo te toto. 21Koteuhi kua mau i te u kolo fuli, talu mai te u taitupu afea, ni hahai e natou akonaki kia Moisese pea e natou lau ia i te u sapato fuli i te u sinakoka.
Manatu a te kau apositolo
22Pea nee lelei leva ki te kau apositolo, mo te kau matuatua, pea mo te Ekelesia katoa, ke filifili ia natou pea ke fekaui ki Atiokia, o fakatahi mo Paulo mo Palenapa, ia Suta nee fakahigoa ko Palasapasi mo Silasi, ko ni tagata mauhiga i te u tehina. 23Pea nee natou fakatoo leva kia natou he tohi nee fai fenei: Ko te kau apositolo, mo te kau matuatua, pea mo te u tehina, fakaalofa atu ki te u tehina i te kau pagani, kia natou e nonofo i Atiokia, mo Silia, pea mo Silisia!
24I tamatou logo nee olo atu ni ihi ia matou, kae nee mole pe matou tuku kia natou he fakatotonu, pea nee natou fakamamahii koutou aki anatou akonaki, pea nee natou fakamaveuveui okotou laumalie. 25Nee matou fai he tonu, i te osi o tamatou fakatahi fuli mo he loto e tahi, ke matou filifili ni fakafofoga pea ke matou fekaui atu natou kia koutou mo otatou ofaina ko Palenapa mo Paulo. 26Ko he u tagata naua nee na siaki ona mauli o uhiga mo te huafa o totatou Aliki ko Sesu Kilisito. 27Koia kua matou fekaui atu ai leva ia Suta mo Silasi, ke na fakaha gutu atu anai te u mea aena kia koutou. 28Koteuhi kua tonu e te Laumalie Maonioni pea mo matou foki, ke aua naa fakamaua kia koutou he tahi age kavega i te mea e aoga, 29ke iloi: Ke koutou fakamamao mai te u inasi nee momoli ki te u taulaatua, mai te toto, mai te u manu mamate, pea mai te faiaga; e lelei kia koutou ke kotou fakamamao mai te u mea aena. Nofola.
Fekaui o Suta mo Silasi ki Atiokia
30Nee natou mavae leva maia natou, o olo ki Atiokia, pea nee natou fakatoo leva te tohi ki te hahai nee fakatahi. 31I te osi o tona lau, nee fiafia leva te u tehina ki te u palalau fakalotomalohi nee natou mau mai te tohi. 32Ko Suta mo Silasi, ae nee polofeta foki, nee na fakalotomalohii leva te u tehina mo fakamalohii leva natou aki ni akonaki lahi osi. 33I te osi o ni aho, nee tuku leva naua e te u tehina ke na toe liliu i te tokalelei kia natou ae nee natou fekaui mai naua. 34Kae nee lelei ia leva e Silasi ke toe nofo atu mua ia.
35Nee nofo leva ia Paulo mo Palenapa i Atiokia mo ihi age, o akonaki mo fakaha te folafola a te Aliki.
Mavete a Paulo mo Palenapa
36Pea nee hili ki ai ni aho, nee ui age leva e Paulo kia Palenapa: Ta toe liliu o ahiahi ki te u tehina i te u kolo fuli nee ta fakaha ai te folafola a te Aliki, ke ta iloi tona aluaga. 37Nee loto Palenapa ke na olo mo Soane, nee fakahigoa ko Maleko; 38kae nee manatu leva Paulo e mole lelei ke na ave ia ae nee ina siaki naua i Pafilia, pea nee mole ulu mo naua ki te fai o te gaue. 39Nee malohi tana loto kehekehe o tupu ai leva tana mavete. Nee too leva e Palenapa ia Maleko mo ia, o na folau i he vaka ki te motu ko Sipele.
40Nee filifili leva e Paulo ia Silasi, pea nee alu leva ia, i te osi o tona tuku e te u tehina ki te kalasia o te Aliki.
41Nee fakalaka leva ia i Silia mo Silisia, o fakamalohii te u Ekelesia.
Currently Selected:
TOHI GAUE A TE KAU APOSITOLO 15: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
