TOHI GAUE A TE KAU APOSITOLO 14
14
Paulo mo Palenapa i Ikonia
1I Ikonia nee ulu leva ia Paulo mo Palenapa ki te sinakoka o te kau Sutea, pea nee na akonaki leva i ai, pea nee tui leva he hahai kaugamalie o te kau Sutea mo te kau Keleka. 2Kae ko te kau Sutea tui gataa nee natou fakakovii leva te kau pagani ke natou loto kovi ki te u tehina. 3Kae nee na nonofo leva o fualoa i Ikonia, o hoko atu tana palalau mo he lototoa pea mo he falanaki ki te Aliki, ae nee ina fakamooni te folafola o tona kalasia, pea nee ina fakagafua ke fai e ona nima ni milakulo mo ni mea fakaofoofo. 4Nee vaelua leva te hahai o te kolo: nee kau ihi mo te kau Sutea pea nee kau ihi mo te kau apositolo. 5I te temi nee teuteu ai te kau pagani mo te kau Sutea, o fakatahi mo onatou pule, ke natou fakatagai mo taumakai naua, 6nee iloi leva e Paulo mo Palenapa te mea aena, pea nee na feholaki leva ki te u kolo o Likaoni, ko Lisitia mo Telepe, pea mo ona tafatafa. 7Pea nee na fakaha leva i ai te folafola.
Paulo mo Palenapa i Lisitia
8I Lisitia nee nofo ai he tagata nee palalisia, nee mole pe faa tuu i ona vae, nee palalisia ia talu mai tona tupu, nee mole heeki pe haele ia. 9Nee fakalogo ia ki te palalau a Paulo, nee siofi leva ia e Paulo, pea nee sio ia kua ina mau te tui ke fakamauli ai, 10pea nee ina ui age leva e Paulo o leo lahi kia ia: Tuu totonu ki oluga i ou vae. Pea nee tuu ake leva te tagata ki oluga o haele.
11I te sisio a te hahai ki te mea kua fai e Paulo, nee kalaga leva ia i te palalau fakalikaonia: Kua hifo mai te u atua kia tatou, kua natou fakaata ki te u tagata. 12Nee natou fakahigoa Palenapa ko Supitele, pea ko Paulo ko Mekulio, koteuhi nee ko ia nee ina tuku ia te folafola. 13Ko te pelepitelo o Supitele, ae nee tuu tona fale tapu i te matapa o te kolo, nee ina aumai leva ni pipi tagata kua tau kahoa ki te matapa o te kolo, pea nee loto leva ia mo te hahai, ke natou momoli he sakilifisio. 14I te iloi e te u apositolo ko Palenapa mo Paulo te mea aena, nee na hae leva ona kofu, kae na oho leva ki lotomalie o te hahai, o kalaga: 15Oi tagata, kotea e koutou fai ai te mea aena? Ko maua foki, ko ni tagata maua, e ma natula tatau mo koutou; pea e ma fakaha atu kia koutou he logo lelei, pea e ma kole atu kia koutou ke koutou fakafisi ki te u mea vaiga aena, kae ke koutou tafoki ki te Atua mauli ae nee ina fakatupu te lagi, mo te kele, mo te tai, pea mo mea fuli i ai. 16Ko te Atua aia, i te u taitupu kua hili, nee ina tuku te puleaga fuli ke natou muli i onatou ala, 17kae nee mole toe gata tana fakamooni kia ia, i tana fai te u mea lelei, i tana foaki kia koutou mai te lagi te u ua mo te u temi mahu, i tana foaki atu kia koutou te meakai o lahi aupito, pea mo tana fakafonu koutou aki te fiafia. 18Nee na mafai leva te taofi o te hahai aki te u palalau aena, ke natou momoli age kia naua he sakilifisio.
Taumakai o Paulo i Lisitia
19Pea nee kaku age leva mai Atiokia mo Ikonia he kau Sutea ae nee natou fakalotokovii leva te hahai; pea, i te osi o tanatou taumakai Paulo, nee natou toho leva ia ki te tua kolo, koteuhi nee natou ui kua mate ia. 20Kae nee takatakai leva Paulo e te kau tisipulo, pea nee tuu ake leva ia ki oluga, o toe ulu ki te kolo. I te aho ake, nee alu leva ia ki Telepe mo Palenapa.
Filifili o te u matuatua i te u Ekelesia
21I te osi o tana fakamafola te Evaselio i te kolo aena pea mo tana fai ni tisipulo kaugamalie, nee na toe liliu leva ki Lisitia, mo Ikonia pea mo Atiokia, 22nee na fakamalohii te u loto o te kau tisipulo ke natou hoko atu aipe tanatou taofi malohi o te tui, pea nee na ui age: E lahi te u mamahi e tonu ke tou fakalaka ai ki te puleaga o te Atua. 23Nee na fakanofo leva ni kau matuatua i te u Ekelesia takitahi, pea i te osi o te faikole mo te sesunio, nee na momoli leva natou ki te Aliki ae kua natou tui ki ai. 24Nee na fakalaka leva i Pisitia, pea nee na toe omai leva ki Pafilia. 25I te osi o tana fakaha te folafola i Pelese, nee na hifo leva ki Atalia.
Toe liliu ki te Ekelesia o Atiokia
26Mai ai nee na heka leva ki he vaka o olo ki Atiokia, te kolo ae nee tuku ai naua ki te kalasia o te Atua o uhiga mo te gaue kua na fakahoko. 27I tana kaku ki Atiokia, nee na fakatahii leva te Ekelesia, pea nee na fakamatala age leva te u mea fuli nee fai e te Atua ia naua, mo tana avahi ki te kau pagani te matapa o te tui. 28Pea nee na nonofo leva i ai o fualoa mo te kau tisipulo.
Currently Selected:
TOHI GAUE A TE KAU APOSITOLO 14: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
