TOHI GAUE A TE KAU APOSITOLO 13
13
Filifili o Paulo mo Palenapa
1Nee i ai ni polofeta mo ni toketa i te Ekelesia o Atiokia: Ko Palenapa mo Simeone nee higoa ko Uli, mo Lusiusi mai Silene, mo Manaene ae nee lahi fakatahi mo te hau ko Helote Atipasi, pea mo Saulo. 2I te lolotoga o tanatou atolasio ki te Aliki mo tanatou sesunio, nee ui leva e te Laumalie Maonioni: Koutou vahei kehe kia au ia Palenapa mo Saulo ki te gaue ae kua au paui naua ki ai. 3Koia, i te osi o tanatou sesunio mo tanatou faikole, nee natou hili leva onatou nima kia naua, pea nee natou tuku age leva naua ke na olo.
4Ko Palenapa mo Saulo, ae nee fekaui e te Laumalie Maonioni, nee na hihifo leva ki Selesia, pea nee na hopo leva i ai ki he vaka o olo ki te motu ko Sipele.
5I tana kaku ki Salamina, nee na fakaha leva te folafola a te Atua i te u sinakoka o te kau Sutea. Nee tokoni Soane kia naua.
Fakafehagai a Satana
6I te osi o tanatou fakalaka i te motu katoa o kaku ki Pafosi, nee natou mau leva he tagata gaohi mea fakatemonio, ko he polofeta loi, ko he Sutea nee higoa ko Pale-Sesu. 7Nee nofo ia mo te kovana Loma ko Selesiusi Paulusi, ko he tagata poto. Nee fekau leva e te kovana aena ke paui age ia Palenapa mo Saulo, koteuhi nee ina fakaha leva tona fia logo ki te folafola a te Atua. 8Kae nee fakafehagai leva kia naua te tagata gaohi mea fakatemonio ko Elimase, ko te uhiga aia o tona higoa, pea nee faiga leva ia ke aua naa tafoki te kovana. 9Kae ko Saulo, nee higoa foki ko Paulo, nee fonu i te Laumalie Maonioni, nee ina sioi leva ia pea nee ina ui age leva kia ia: 10Tagata kua fonu i te malualoi mo te kaka fuli pe, foha o Satana, fili o te faitotonu, pe e mole ke fakagata anai tau fakakovii te u ala totonu o te Aliki? 11Koeni i te lakaga nei, kua to kia koe te nima o te Aliki, e ke kivi anai, pea e mole ke toe sio anai ki te laa o fualoa. I te temi pe aia nee to leva kia ia te nenefu mo te fakapouli; pea nee taufa leva ia, o kumi he tahi ke ina taki ia ia. 12Pea ko te kovana, i tana sio ki te mea nee hoko, nee tui leva ia, he kua lave ia ia te akonaki a te Aliki.
Akonaki a Paulo i Atiokia i Pisitia
13Nee hopo leva ia Paulo mo ona kaumea ki te vaka i Pafosi, pea nee notou olo leva ki Pelese i te fenua o Pafilia. Kae nee mavae leva Soane ia naua o toe liliu ki Selusalemi. 14Mai Pelese nee na hoko atu leva tona fagona, pea nee na kaku leva ki Atioka o Pisitia. I te aho o te sapato, nee na ulu leva ki te sinakoka, pea nee na nonofo leva i ai. 15I te osi o te lau o te tohi o te lao mo te tohi a te kau polofeta, nee fekaui leva e te u pule o te sinakoka ke ui kia naua: Tagata tehina, kapau e kolua mau ni kupu ke fakalotomalohi ai te hahai, pea kolua palalau.
16Pea nee tuu ake leva Paulo ki oluga, o hiki tona nima, pea nee ina ui leva: Tagata Iselaele, pea mo koutou e mataku ki te Atua, koutou fagono mai! 17Ko te Atua o te hahai aeni o Iselaele nee ina filifili atatou tamai. Pea nee ina fakatuputupua ia o mauhiga i tana nofo i Esipito, pea nee ina fakamavae leva ia mai ai aki tona nima mafimafi. 18Pea nee ina fafaga leva natou ia tau e fagofulu i te toafa; 19pea nee ina maumaui leva ni puleaga e fitu i te fenua o Kanaane, kae nee ina vae leva tonatou fenua kia natou. 20I te hili o te mea aia, i te lolotoga o te u tau e fageau nimagofulu ape, nee ina foaki leva kia natou ni tui fakamaau, o kaku ki te polofeta ko Samuele. 21Nee natou kole leva he hau. Pea nee foaki age leva e te Atua kia natou, lolotoga o tau e fagofulu, ia Saulo foha o Kise, mai te faahiga o Pesamino; 22pea hili tana siaki ia, nee ina fakanofo leva ia Tavite ko tonatou hau, ae nee fakamooni leva ia ki ai, o ui:
Kua au mau Tavite,
Foha o Isaia, tagata e tatau mo toku loto, ae e ina fai anai toku loto katoa.
23Pea mei te hako o Tavite nee lagai ake e te Atua ki Iselaele he fakamauli, ko Sesu, o mulimuli ki tana fakapapau. 24Ia mua o tana hau, nee fakaha e Soane te papitema o te fakahemala ki te hahai katoa o Iselaele. 25I te fakaosi o te mauli o Soane, nee ina ui leva: E mole ko au ae e kotou talitali ki ai: kae koeni, e muli mai ia au ia ae e mole pe au gali ke au vevete ona sulie.
26Tagata tehina, foha o te lanu o Apalahamo, pea mo koutou fuli ae e mataku ki te Atua, kua tuku mai kia koutou te folafola aeni o te mauli. 27Kae ko te hahai o Selusalemi mo onatou pule, nee mole natou iloi leva ia Sesu, pea i tanatou tautea ia, nee natou fakahoko ai te u folafola a te kau polofeta e lau i te u aho sapato fuli. 28Logo ai nee mole natou mau he hala ia ia e taau mo te mate, nee natou kole kia Pilato ke tamatei ia ia. 29I te osi o tanatou fakahoko te u mea fuli nee tohi o uhiga mo Sesu, nee natou too leva ia mai te koluse, o tuku ki he tanuma. 30Kae nee toe fakatuuake ia e te Atua mai te kau mate. 31Nee ha ia i te lolotoga o ni mohu aho kia natou ae nee hake fakatahi mo ia mai Kalilea ki Selusalemi, pea kua liliu i te temi nei ko ana tagata fakamooni ia mua o te hahai.
32Pea ko maua, e ma fakaha atu kia koutou te logo lelei aeni: ko te fakapapau ae nee fai e te Atua ki atatou tamai, 33kua ina fakahoko kia tatou aeni ko anatou fanau, i tana toe fakatuuake ia Sesu mai te kau mate, o mulimuli ki te mea e tohi i te Pesalemo lua:
Ko toku foha ia koe, nee au fanaui ia koe i te aho nei.
34Pea e fakaha foki i he tahi age koga tohi e ina toe fakatuuake ia mai te kau mate, koteuhi ke aua naa pala tona sino, o ui:
E au foaki anai kia koutou te u kalasia ae nee fakapapau kia Tavite, te u kalasia mooni mo heegata.
35Pea e toe ui foki i te tahi age koga tohi:
E mole ke tuku anai ke pala te sino o tou sagato.
36Kae ko Tavite, i te osi o tana fai i tona taitupu te finegalo o te Atua, nee mate leva ia pea nee tanu leva ia mo ana tamai, pea kua pala tona sino. 37Kae nee mole pe he pala i te sino o ia ae nee toe fakatuuake e te Atua.
38Koia, tagata tehina, ke koutou iloi te mea aeni e ma fakaha kia koutou: E mau te fakamolemole o te u agahala i tona huafa, 39pea ko ae e tui kia ia e ateaina anai ia i te u agahala fuli ae nee mole feala ke kotou ateaina ai i te lao a Moisese. 40Koia, koutou tokaga pe ke aua naa hoko kia koutou te mea ae e fakaha i te u tohi a te kau polofeta: 41Koutou sisio, koutou kau matasoka, Kotou punamauli pea kotou pupuli; Koteuhi e au fai anai i okotou aho he gaue, He gaue ae e mole kotou tui anai ki ai mo kapau e fakamatala atu anai ia kia koutou.
42I tana ulu ki fafo, nee fakaafe age leva naua ke na toe palalau ki te mea aena i te tahi ake sapato; 43pea, i te mavete o te fakatahi, nee kaugamalie he kau Sutea mo he kau poloselite* tauhi lelei ki te Atua nee natou mulimuli leva ia Paulo mo Palenapa, pea nee na palalau leva kia natou, o fakalotoi natou ke natou pipiki ki te kalasia o te Atua.
Fakafehagai a te kau Sutea kia Paulo
44I te tahi ake sapato, nee teitei fakatahi fuli te kolo katoa, o fakalogo ki te folafola a te Atua. 45Ko te kau Sutea, i tanatou sio ki te hahai, nee natou fonu leva i te finenonofo, pea nee natou fakafehagai leva ki te u mea nee palalau ki ai Paulo, o natou laukovi mo nukinuki kia ia. 46Kae nee asilisili loto malohi leva ia Paulo mo Palenapa, o ui kia natou: nee tonu ke uluaki fakaha mua kia koutou te folafola a te Atua; kae, koteuhi e koutou fakafisi ki ai, pea e koutou fakaha e mole kotou aoga ki te mauli heegata, koeni, e ma maliu anai ki te kau pagani. 47Koteuhi, ko te fakatotonu aia nee tuku mai e te Aliki kia maua:
Nee au fakanofo ia koe ke liliu ko te malama o te u puleaga,
Ke ke ave te fakamauli o kaku ki te potupotu o te kele.
48Nee fiafia te kau pagani i tanatou logo ki te mea aena, pea nee natou fakakololia ki te folafola a te Aliki, pea nee tui leva natou fuli nee fakatutuu ki te mauli heegata.
49Pea nee mafola te folafola a te Aliki i te fenua katoa. 50Kae nee fakakovii leva e te kau Sutea te u fafine aliki ae nee lotu Sutea, mo te u tagata mauhiga o te kolo. Pea nee natou lagai leva he fakataga kia Paulo mo Palenapa, pea nee natou kapu leva naua mai tonatou fenua. 51Nee tutui leva kia natou e Paulo mo Palenapa te efu i ona vae, pea nee na olo leva ki Ikonia, 52kae nee fonu te kau tisipulo i te fiafia pea mo te Laumalie Maonioni.
Currently Selected:
TOHI GAUE A TE KAU APOSITOLO 13: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
