TOHI GAUE A TE KAU APOSITOLO 12
12
Fakatagai o te Ekelesia:
Pilisoni o Petelo
1I te temi foki aena, nee kamata fakatagai leva e te hau ko Helote ni ihi o te Ekelesia, 2pea nee ina tamatei leva aki te heleta ia Sakopo, tehina o Soane. 3I tana sio nee alu lelei te mea aia ki te kau Sutea, nee ina fakatotonu leva ke toe too foki mo Petelo. Ko te u aho aena o te u pane hala fakatupu. 4I te osi o te puke o Petelo, o fakaulu ki te pilisoni, nee tuku leva e Helote ke leo ia e ni vaega solia e fa nee taki toko fa, mo te manatu ke fakamaaui ia ia mua o te hahai moka osi anai te Pasikate. 5Pea nee leo leva Petelo i te fale pilisoni; kae nee mole toe gata te fai e te Ekelesia o ni kole ki te Atua o uhiga mo ia.
Haofaki fakamilakulo o Petelo
6I te po ae nee ala uhu ake pea fakamaaui leva ia e Helote, nee moe Petelo ia vaha o te u tagata solia e toko lua, nee hai ia aki ni seini e lua; pea nee tutuu ni kau leo i mua o te matapa o leo te fale pilisoni. 7Pea koeni, nee tuu mai leva he aselo a te Aliki, pea nee mu leva he malama i te loto fale pilisoni. Nee fafagu leva e te aselo ia Petelo, o papa ki tona faahi, mo ui: Tuu vave ki oluga! Pea nee fetooki leva te u seini mai ona nima. 8Pea nee ui age leva e te aselo kia ia: Tui tou kilii pipi mo ou taka. Pea nee ina fai ki ai. Pea nee toe ui age leva e te aselo kia ia: Tui tou pulupulu, pea ke mulimuli mai ia au. 9Nee ulu leva Petelo ki fafo, pea nee mulimuli leva ia i te aselo, kae nee mole ina iloi pe e mooni te mea nee fai e te aselo, pe ko hana moemisi. 10Nee na fakalaka i te uluaki kau leo, mo tona lua, pea nee na kaku leva ki te matapa ukamea e ave ia ki te kolo, pea nee ava toko tahi leva ia i ona mua; nee na ulu leva ki fafo, pea nee na olo leva i he ala. Pea fokifa kua puli leva te aselo ia Petelo.
11I tana malama ake i hena, nee ui leva e Petelo: Kua au iloi papau i te temi nei nee fekaui mai e te Atua tana aselo, pea nee ina fakamauli au mai te nima o Helote pea mo mea fuli pe nee talitali ki ai te hahai Sutea. 12I te osi o tana fakakaukau, nee alu leva ia ki te fale o Malia, fae a Soane ae nee fakahigoa ko Maleko, koteuhi nee fakatahi i ai he kaugamalie o faikole. 13Nee ina fisifisi leva i te matapa lahi, pea nee hau leva he fafine faifekau nee higoa ko Lota, o fakalogologo. 14Nee ina iloi leva te leo o Petelo; pea, i tona fiafia, nee mole ina avahi te matapa kae nee lele leva ia, o fakaha te tuu a Petelo i fafo i te mua matapa. 15Nee natou ui age leva ki te fafine faifekau: E ke vale. Kae nee ina fakapapau age leva ko te mooni. Pea nee natou ui leva: Ko tona aselo. 16Kae nee hoko atu leva te fisifisi a Petelo i te matapa. Nee natou avahi leva te matapa, pea nee natou punamauli leva i tanatou sio kia ia. 17Nee hiki leva e Petelo tona nima kia natou ke fakalologo, pea nee ina fakamatala age leva kia natou tona fakamauli e te Aliki mai te fale pilisoni, pea nee ina ui age leva: Koutou fakaha te mea aena kia Sakopo mo te u tehina. Pea nee ulu leva ia ki fafo o alu ki he tahi age kogamea.
18I te aho ake, nee feohoaki leva te kau solia, o kumi pe kotea te mea kua hoko kia Petelo. 19Nee fakatotonu leva e Helote ke kumi ake ia, kae nee mole mau leva ia; nee ina fakafehui leva te kau leo, pea nee ina fakatotonu leva ke tamatei natou. Pea nee hifo leva ia mai Sutea ki Sesalea o nofo i ai.
Tautea mo te mate o Helote
20Nee mau e Helote he ita lahi ki te hahai o Tile mo Sitone. Kae nee natou loto tahi leva ke natou olo kia Helote; nee natou mau leva Palasetusi, ko te tagata leo o te kogafale o te hau; pea nee natou kole leva te tokalelei kia Helote, koteuhi nee mauli onatou fenua mai te fenua o te hau. 21I te aho kua fakatuutuu ki ai, nee tui leva e Helote ona kofu fakahau, pea nee heka leva ia i te hekaaga fakahau, o palalau kia natou. 22Nee kalaga leva te hahai, o ui: Leo o he atua, kae mole o he tagata! 23I te temi pe aena, nee taai leva ia e he aselo a te Aliki, koteuhi nee mole ina fakakololiai te Atua. Pea nee kai leva ia e te u ugaga, o mate ai.
24Kae nee mafola leva te folafola a te Atua, pea nee tuputupua leva o lahi aupito te kau tisipulo.
25Ko Palenapa mo Saulo, i te osi o tana fakahoko tana fekau, nee na toe liliu leva mai Selusalemi, pea nee na ave leva ia Soane, nee fakahigoa ko Maleko.
Currently Selected:
TOHI GAUE A TE KAU APOSITOLO 12: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
