TOHI GAUE A TE KAU APOSITOLO 10
10
Petelo mo Kolenelio
1Nee i ai i Sesalea he tagata nee higoa ko Kolenelio, ko he setulio o he fua solia nee ui ko te solia Italia. 2Nee tauhi lelei ia mo ofa ki te Atua, ia ia mo tona fale katoa; nee lahi tana fai meaofa ki te hahai, pea nee faikole tuumau ia ki te Atua.
3I he hilihoata vae hola tolu, nee sio mata leva ia i he sio ki he aselo a te Atua nee ulu age ki tona fale, o ui age kia ia: Kolenelio! 4I tana siofia ia mo he mataku lahi, nee ina tali age leva: Aliki, kotea? Pea nee ui age leva e te aselo kia ia: Ko au kole mo au meaofa kua hake mai kia mua o te Atua, pea kua ina manatui natou. 5Fekaui i te lakaga nei ni tagata ki Sope, o taki mai Simone e higoa ko Petelo; 6e nofo ia i te api o he tagata gaue kiliimanu e higoa ko Simone, pea e tuu tona api i te matatai.
7I te mavae a te aselo ae nee palalau kia ia, nee paui leva e Kolenelio he toko lua i ana tagata faifekau, pea mo he tagata solia agatonu ia natou nee tauhi kia ia; 8i te osi o tana fakamatala age kia natou o te u mea fuli, nee ina fekaui leva natou ke olo ki Sope.
Sio a Petelo ki he kie nee hifo mai lagi
9I te apogipogi ake, nee kei natou lolotoga fagona i te ala, pea nee natou fakaovi ki te kolo, nee hake leva Petelo ki te fuga ato, i te te hoata ape, o faikole. 10Nee fia kai leva ia, pea nee loto leva ia ke kai. I te lolotoga o te teuteui o he meakai kia ia, nee fakasio leva ia ki he sio. 11Nee sio leva ia ki te lagi kua ava, pea ko he mea nee hage ko he foi kie lahi nee nonoo i ona tapa e fa, nee hifo leva o tau ki te kele, 12pea nee mau i loto te u manu vae fa fuli, mo te u manu totolo o te kele, pea mo te u manulele o te lagi. 13Pea nee ui age leva e he leo kia ia: Petelo, tuu ki oluga, tamatei pea kai. 14Kae nee tali age leva e Petelo: Kailoa, Aliki, koteuhi e heeki pe au kai i he aho ki he mea e tapu pee uli. 15Pea nee toe ui age leva te leo kia ia ko tona tua lua aia: Ko te mea kua fakaha e te Atua e maa, aua naa ke sio ki ai o hage ko he mea e uli. 16Nee hoko tua tolu te mea aena, pea nee toe too ake leva ia ki te lagi.
17Pea i te lolotoga fakakaukaui e Petelo te uhiga o te mea ae nee sio ki ai, koeni, nee tutuu ake leva ki te matapa te u tagata ae nee fekaui mai e Kolenelio, o kumi te fale o Simone. 18Pea nee natou fehui leva o leo lahi pe e nofo i heni ia Simone, ae e higoa ko Petelo.
19I te fakakaukau a Petelo ki te mea nee sio ki ai, nee ui age leva e te Laumalie kia ia: Koeni ni tagata e toko tolu e natou kumi koe; 20tuu ki oluga, o hifo ki lalo, pea ke alu mo natou; aua naa ke mataku, he ko au ae nee au fekaui mai natou. 21Pea nee hifo leva Petelo, o ui age ki te u tagata aena: Koeni, ko au ae e koutou kumi; kotea te mea e kotou omai ai? 22Pea nee natou tali age leva: Ko Kolenelio, ko he setulio Loma, tagata agatonu mo ofa ki te Atua, ae kua fakamooni ki ai te puleaga katoa o te kau Sutea, nee fakaha kia ia e te Atua i tana aselo maonioni ke aumai ia koe ki tona fale, ke logo ia ia ki au folafola.
Alu a Petelo ki te fale o Kolenelio
23Pea nee fakaulu age leva natou e Petelo ki fale, o ina talitali ai natou. I te aho ake, nee tuu ake leva ia ki oluga, o alu mo natou. Pea nee olo foki mo ia ni ihi o te u tehina mai Sope.
24Nee natou kaku leva ki Sesalea i te aho ake. Nee talitali Kolenelio kia natou, pea nee ina fakaafe age ona matua mo ona kaumea totonu. 25I te hu ake a Petelo ki fale, nee hau leva Kolenelio o fakafetaulaki mai kia ia, pea nee to tuutuli ifo leva ia ki ona vae mo hu kia ia. 26Kae nee fakatuu ake leva ia ki oluga e Petelo, o ui: Tuu ki oluga; ko au ko he tahi tagata pe. 27Pea i tana feleu mo ia, nee ulu leva ia ki fale, o ina mau he hahai kaugamalie kua fakatahi i ai. 28Pea nee ina ui age leva kia natou: E koutou iloi e tapu ki te Sutea tana fakatahi mo he matapule pee ko tana ulu ki tona api; kae nee fakaha mai e te Atua kia au ke aua pe naa au sio ki he tagata e tahi e tapu pee uli. 29Koia, nee mole au toe fai ai he fehui o uhiga mo taku hau, koteuhi nee kotou paui age ki au; koia e au kole atu ai kia koutou pe kotea te tupuaga o takotou fekau ke kumi mai au.
30Nee ui age leva e Kolenelio: Kua hili ki ai aho e fa, i te hola aeni, hola tolu hilihoata, nee au faikole i toku api; pea koeni, nee tuu mai leva ki oku mua he tagata nee teu gigila, o ui: 31Kolenelio, kua tali tau kole, pea kua manatui e te Atua au meaofa. 32Koia, fekaui he tahi ki Sope, o kumi mai ia Simone, e higoa ko Petelo; e nofo ia i te fale o Simone, tagata gaue kiliimanu, i te matatai. 33Pea nee au fekau atu aipe he tahi kia koe, pea nee ke manavaofa o hau. Koia i te temi nei, kua matou nofo fuli i heni ia mua o te Atua, ke matou fakalogo ki te u mea fuli nee fakatotonu atu e te Aliki kia koe ke ke fakaha mai kia matou.
Akonaki a Petelo ki te kau pagani
34Pea nee avahi leva e Petelo tona gutu, o ui: E mooni, kua au mahino, e mole fai e te Atua he fakakehekehe ki he tahi, 35kae i te puleaga fuli, ko ae e ofa kia ia mo haele i te maonioni, e lelei ia ki ona mata. 36Nee ina fekau te folafola ki te u foha o Iselaele, o ina fakaha kia natou te tokalelei ia Sesu-Kilisito, ae ko te Aliki o te u tagata fuli. 37Kua kotou iloi te mea nee hoko i Sutea katoa, nee kamata mai Kalilea i te osi o te akonaki mo te papitema a Soane. 38Kua koutou iloi pe nee feafeai te takai e te Atua aki te Laumalie Maonioni pea mo te malohi o Sesu mai Nasaleti, ae nee fealuaki i te potu fuli pe, o fai te u mea lelei pea mo fakamauli natou fuli nee pulei e Satana, koteuhi nee nofo te Atua mo ia. 39Ko te u tagata fakamooni matou o te u mea fuli nee ina fai i te fenua o te kau Sutea mo Selusalemi. Nee natou tamatei ia, o natou tautau ia ki te akau. 40Nee toe fakatuuake ia e te Atua i te tolu aho, pea nee ina fakagafua ke ha ia, 41o mole ki te hahai katoa, kae ki te u tagata fakamooni ae nee filifili fakatomua e te Atua, kia matou ae nee kai mo inu fakatahi mo ia, i te osi o tana toe tuuake mai te kau mate. 42Pea nee fakatotonu mai e Sesu kia matou ke matou fakaha ki te hahai mo fakamooni ko ia totonu ae kua fakanofo e te Atua ko te tui fakamaau o te kau mauli mo te kau mate. 43Ko te kau polofeta fuli e natou tuku o uhiga mo ia te fakamooni: ko he tahi pe e tui kia ia e ina tali i tona huafa te fakamolemole o te u agahala.
Hifo o te Laumalie Maonioni ki te kau pagani
44Nee kei puaki e Petelo te u palalau aena, koeni nee hifo leva te Laumalie Maonioni kia natou fuli ae nee fakalogo ki te folafola. 45Nee punamauuli leva te kau agatonu silikosisio ae nee omai mo Petelo, koteuhi kua toe tufaki foki te meaofa o te Laumalie Maonioni ki te kau pagani. 46He nee natou logo ki tanatou palalau i te u lea kehekehe, mo tanatou fakakololia ki te Atua.
47Pea nee ui leva e Petelo: Pe e feala ke tou fakafisi te vai o te papitema kia natou aeni kua natou tali te Laumalie Maonioni o hage pe ko tatou? 48Pea nee ina fakatotonu leva ke papitemai natou i te huafa o te Aliki. Pea nee natou kole age leva kia ia ke toe nofo mua mo natou i ni kii aho.
Currently Selected:
TOHI GAUE A TE KAU APOSITOLO 10: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
