Sakalia 3

Tio o Sosue, le pule faisakilifisio

1Na fakatio loa e ia au kia Sosue, le tagata faisakilifisio lasi, leia na tuu i mua o le aselo o le Eteleno, ti mo Satana leia na tuu i lona fetuu atamai o fakalakasala a ia. 2Na folafola loa le Eteleno kia Satana : Ke valoki a koe, Satana, e le Eteleno ! Ke valoki a koe e le Eteleno, leia kua filifili ia Selusalemi ! Pe leaise ko se ugaafi kaka a koe kua tatai mei le afi ? 3Ka ko leinei, na kofu e Sosue ni kofu fakalialia, i lana tuu i mua o le aselo. 4Ti na pati loa le aselo kia latou ala na tutuu i ona mua : Kotou tatala ona kofu fakalialia ! Kae na pati a ia kia Sosue : Tio, kua kau too meiate koe lau agaveli, ti kua kau fakakofu a koe ki ni kofu foou.

5Na kau pati loa : Ke teki ki lona ulu se pala mea ! Ti na lotou teki loa se pale mea ki lona ulu, ti na lotou tui loa kiate ia ni kofu. Na tuu ofi i ai le aselo o le Eteleno.

6Ti na fai loa e le aselo o le Eteleno le fakapapau leinei kia Sosue, o pati : 7E folafola le Eteleno o kau tau, o pati : Kapau e ke saele i oku ala, ti kapau e ke tausi aku fakatotonu, e ke fakamaui loa loku fale ti e ke tausi loa oku lotoa tapu, ti e kau tuku loa kiate koe ke ke ulu faitalisa kia latou ala e nonofo i leinei. 8Koia fakalogo mai Sosue, tagata faisakilifisio lasi, a koe mo ou kaukau nea ala e tonatona i ou mua ! - talie ko ni tagata ala ka liliu loa ko ni fakamailoga. - Ko leinei, e kau fakasa loa laku tagata fakasausau, le Pulapula. 9Talie ko leinei, kua kau fakatuu se fa fatu i mua o Sosue ; ti e i ai ni fa mata e fitu i le fa fatu lena e tasi ; e kau togi loa i ai, e au totonu, le nea leia e tonu ke togi i ai, e folafola le Eteleno o kau tau, ti e kau too loa le agasala a le fenua leinei, i se aso e tasi. 10Talie e folafola le Eteleno o kau tau, o pati : I le aso lena e kotou fefakaafeaki loa i lalo o le vite ti mo lalo o le fiki.

Currently Selected:

Sakalia 3: FB2000

Highlight

Copy