Mateo 5

Akonaki i le mauga

1I lana tio ki le kakai, na pale loa Sesu ki le mauga : ti na tonatona loa a ia ki lalo, ti na fakafeofi ake loa ana tisipulo kiate ia. 2Ti na fakamavaa loa e ia lona gutu, ti na akonaki loa a ia kia latou, o pati :

3Manuia latou ala e mativa i le loto, talie e fakalogo kia latou le Puleaga o le atu lagi.

4Manuia latou ala e loto mamae, talie e fakapelepelei loa latou !

5Manuia latou ala e agamalu, talie e lotou maua loa le kele !

6Manuia latou ala e fia kai mo fia inu ki le faitotonu, talie e lotou makokona loa !

7Manuia latou ala e manavaalofa, talie e lotou maua loa le manavaalofa !

8Manuia latou ala e loto mea, talie e lotou tio loa ki le Atua !

9Manuia latou ala e ave ia le tokamalie, talie e fakaigoa loa latou ko vosa o le Atua !

10Manuia latou ala e fakavelivelii o tupu ko le faitotonu, talie e fakalogo loa kia latou le Puleaga o le atu lagi !

11Manuia loa koutou, mo ka pativelii loa koutou, mo ka fakavelivelii loa koutou pe lau loa kia koutou a veli kesekese, o tupu ko au. 12Kotou fimalie ti kotou fiafia lasi, talie e lasi loa lokoutou fakapale i le atu lagi ; talie na fenaaki foki le fakavelivelii o le kau polofeta ala na muamua atu ia koutou.

Le patai o le kele ; le malama o le malama nei

13Ko le patai koutou o le kele. Kae kapau e puli le konakona o le patai, e fakakonakona loa a ia ki lea ? E aoga fai a ia ke ti ki fafo ti ke takatakafi e tagata. 14Ko le malama koutou o le malama nei. Ko se kolo leia e tuu i aluga o se mauga e leaise feala ke munia ; 15ti e leaise tutu se malama ke fakapulou ki se fa kisi, kae e teki a ia ki aluga o le tekiaga malama, ti e fakamalamai loa e ia latou fuli ala e nonofo i le loto fale. 16Ke mu lokoutou malama i mua o tagata, o tupu ke lotou tio ki akoutou gaoi malilie, ti ke lotou fakakololia ki lokoutou Tamana leia e nofo i le atu lagi.

Kilisito mo le lao

17Aua na kotou pati na kau au o soloi le lao a Moisese pe ko le kau polofeta, na leaise kau au o soloi kae o fakasoko. 18Talie e kau fakasa maoki atu kia koutou, e leaise puli loa le kele mo le lagi kae e leikiaise fakasoko a ga puani fuli ti mo ga matai tosi fuli o le lao. 19Ko leia e soloi ia loa se fakatotonu e tasi o fakatotonu liliki oki ana, ti mo ako ia loa ki tagata ke fai fenaaki, e fakaigoa loa a ia ko le tagata ikiiki oki i le Puleaga o le atu lagi ; kae ko leia e fai ia loa latou, ti mo ako ia loa ke fai latou, ko ia lena e fakaigoa loa ko le tagata lasi i le Puleaga o le atu lagi. 20Talie e kau pati atu kia koutou, kapau e leaise fakalaka ake lakoutou faitotonu i le faitotonu a le kau sekelipa mo le kau faliseo, e leaise kotou ulu loa ki le Puleaga o le atu lagi.

Lauveli, moliga, fakamolemole

21Kua kotou logo na fakasa ki le kau matua afea : Aua na ke tukipo loa ; ko leia e tukipo loa e tonu ke ave a ia ki le fakamaau. 22Kae ko au, e kau pati atu kia koutou ko leia e ita ki lona taina, e tonu ke ave a ia ki le fakamaau ; ko leia e pati loa ki lona taina : Valeuka ! E tonu ke fakatua e le fono lasi : Ti ko leia e pati loa ki lona taina : Uluvale ! E tonu ke fakatua ki le afi o Ifeli. 23Kapau e ke momoli lau moliga i le aletale, ti ke manatu ake i ai e nofo lou taina mo se nea kiate koe, 24tuku i ai lau moliga i mua o le aletale, kae ke ano mua o fakatokatoka mo lou taina ; ti oki, ti ke au loa o momoli lau moliga. 25Fakatokatoka vave mo lou fili i le temi leia e kolua ano ai i le ala, o tupu ke aua na ave loa e ia a koe ki le tui fakamaau, ti ke aua na ave loa a koe e le tui fakamaau ki le ofisa, ti ke aua na ave loa a koe ki le pilisoni. 26E kau fakasa maoki atu kiate koe, e leaise ke mavae loa mei lena kae e leikiaise ke ui ia le fa piesi fakaoki.

Manumanu, tono, mavete avaga

27Kua kotou logo na fakasa : Aua na ke tono. 28Kae ko au, e kau pati atu kia koutou, ko leia e tio ki se fafine ti manumanu a ia ki ai, kua tono a ia mo le fafine lena i lona loto. 29Kapau e fakatupu siga kiate koe lou fa mata atamai, kapei a ia o ti mamao meiate koe ; talie e malie ake kiate koe ke mate se koga e tasi i ou koga tino, kae ke aua na ti lou tino katoa ki le afi. 30Ti kapau e fakatupu siga kiate koe lou lima atamai, tuuti a ia o ti mamao meiate koe ; talie e malie ake kiate koe ke mate sou koga tino e tasi i ou koga tino fuli, kae ke aua na ti lou tino katoa ki le afi.

31Kua fakasa : Ko le tagata leia e kapu ia lona avaga e soli ia loa kiate ia se tosi mavete. 32Kae ko au, e kau pati atu kia koutou ko le tagata leia e kapu ia lona avaga, (gato fai mo kapau na tono a ia mo se tagata), e tuku e ia lona avaga ke tono mo se tasi ake tagata ; ti ko le tagata leia e avaga loa mo se fafine leia na kapu e lona avaga e fai ia loa se tono mo le fafine lena.

Takua noa, lagavaka

33Kua kotou logo foki na fakasa ki le kau matua afea : Aua na motusi lau fakapapau, kae fai ki le Aliki le nea leia na ke fakasa i lau fakapapau. 34Kae ko au, e kau pati atu kia koutou ke aua na kotou fai se fakapapau fua e tasi : pe i le lagi, talie ko le ekeekeaga a ia o le Atua ; 35pe i le kele, talie ko lona tekiaga vae a ia, pe i Selusalemi, talie ko le kolo a ia o le Sau lasi. 36Aua na ke fai foki se fakapapau i lou ulu, talie e leaise ke mafai ia le fakaliliu o tea pe uli se fului ulu fua e tasi. 37Ko lakoutou io ke io, ti ko lakoutou leai ke leai ; ko le nea leia e fakalasi ia a ia e au mei le pule veli.

Alofa ki le fili

38Kua kotou iloa na fakasa : Mata ki le mata, nifo ki le nifo. 39Kae ko au, e kau pati atu kia koutou ke aua na kotou fakatutuu ki le tagata agaveli. Kapau e paai a koe e se tasi i lou kalaafau atamai, tuku ake kiate ia mo leia ake kalaafau. 40Kapau e loto se tasi ke ave ia a koe ki le fakamaauaga, o tupu ko lou kofu loto, toe tuku ake kiate ia mo lou taupulupulu. 41Kapau e fakamakeke atu se tasi kiate koe ke kolua fai se kilometa e tasi, fai ni kilometa e lua mo ia. 42Soli ki leia e kole atu kiate koe, ti aua na ke titua ki leia e fia too maua meiate koe.

43Kua kotou logo na fakasa : E ke alofa loa ki lou oloi ti e ke vesia loa ki lou fili. 44Kae ko au, e kau pati atu kia koutou : Kotou alofa ki okoutou fili, kotou tapuaki kia latou ala e tutuku ia koutou, kotou fai le nea leia e malie kia latou ala e vesia mai kia koutou, ti kotou ulufaki latou ala e fai nea veli mai kia koutou ti mo fakaveliveli mai kia koutou, 45o tupu ke kotou liliu ko vosa o lokoutou Tamana i selo ; talie e fakasopo e ia lana laa o fakatatau ki le kau agaveli ti mo le kau agamalie, ti e fakato e ia lana ua o fakatatau ki le kau agatonu ti mo le kau agasala. 46Kapau e kotou alofa fua kia latou ala e alofa mai kia koutou, kolea le fakapale leia e kotou maua loa ? Pe e leaise fai fenaaki foki le kau popelikano ? 47Ti kapau e kotou fakaalofa fua ki okoutou fetaina, pe kotou fai se nea mauiga ? Pe leaise fai fenaaki foki le kau pagani ? 48Koia ke kotou malie tukupau, ofaipe lokoutou Tamana i Selo leia e malie tukupau.

Currently Selected:

Mateo 5: FB2000

Highlight

Copy