Senesi 25

Mate o Apalaamo

1Na toe avaga loa Apalaamo mo se tasi ake fafine na igoa ko Ketula. 2Na fanaui loa e Ketula kia Apalaamo a Similane, mo Sokesane, mo Metane, mo Matiane, mo Sisepake, mo Suake. 3Na fakatupu loa e Sokesane a Sepa mo Tetani. Ko vosa o Tetani ko le kau Asulimi, mo le kau Letusimi, mo le kau Leumimi. 4Ko vosa o Matiane ko Efa, mo Efele, mo Enoke, mo Apita, mo Eletaa. Ko latou fuli ana ko vosa o Ketula.

5Na soli loa e Apalaamo ona koloa fuli kia Isaake. 6Kae na fai loa e ia ni nea alofa ki vosa o ana tinifu ; i lona koi mauli na kakau loa e ia latou ke lotou ano ki le fenua o le potu Esite, ke mamao mei lona vosa ko Isaake.

7Ko nei a aso o fetuu o le mauli o Apalaamo : na mauli loa a ia i fetuu e kau lelau kau fitu tupu lima. 8Na tuku loa e Apalaamo lona laumalie, ti na mate loa a ia i le oki o se temi matua manuia, na lasi ai ona fetuu, ti na tapuakina ona aso. Ti na fakatasi loa a ia ki lona kakai. 9Ti na tanu loa a ia e ona vosa ko Isaake mo Isemaele i le ana o Makepela, i le faisaga o Efelone, ko le vosa o Tesoa, ko le tagata Eti, i le potu esite o Mamele. 10Ko le faisaga lena leia na totogi e Apalaamo ki vosa o Eti. Na tanu loa i ai Apalaamo mo Sala, lana avaga.

11I le oki o le mate o Apalaamo, na tapuaki loa le Atua kia Isaake, lona vosa. Na nofo a ia o ofi ki le sosoni o Lasai-Loi.

Sakoga o Isemaele

12Ko leinei le sakoga o Isemaele, vosa o Apalaamo, leia na fanaui e Akale, le fafine Esipito, fafine fakasausau a Sala, kia Apalaamo.

13Ko nei a igoa o vosa o Isemaele, o mulimuli ki lolatou tupu : Ko le vosa uluaki o Isemaele ko Nepasote mo Keta, mo Atepeele, mo Mipesame, 14mo Misima, mo Tuma, mo Masa, 15mo Atate, mo Tema, mo Setule, mo Nafise, mo Ketema. 16Ko vosa ana e kau agafulu tupu lua o Isemaele ; ko olatou igoa ana o mulimuli ki olatou kolo mo kele ala na lotou nofo ai. Na lotou liliu loa ko pule o lolatou kakai.

17Ti ko nei a fetuu o le mauli o Isemaele : ko fetuu e kau lelau kau tolu. Na tuku loa e ia lona laumalie ti mate loa a ia, ti na fakatasi loa a ia mo lona kakai. 18Na nofo loa a vosa o Isemaele i Avila o kaku ki Suli, leia e ofi ki Esipito, i le ala ki Asilia. Na nofo loa Isemaele mo ona fetaina fuli.

Sakoga o Isaake

19Ko leinei le sakoga o Isaake, vosa o Apalaamo. 20Na fakatupu loa e Apalaamo a Isaake. Na fetuu kau fa Isaake i le aso leia na avaga ai loa a ia mo Lepeka, taine o Petuele, ko le tagata Silia o Patane-Alame, ti ko le tuagaane o Lapane, ko le tagata Silia. 21Na faikole loa Isaake ki le Eteleno o tupu ko lana avaga, talie na paa a ia. Ti na tali loa e le Eteleno lana kole, ti na tinae loa lana avaga ko Lepeka. 22Na feteke loa a toe i lona manava ; ti na pati loa a ia : Kapau e feneeki, kolea na kau tinae ai ? Na ano loa a ia o fakasa le nea lena ki le Eteleno. 23Ti na pati loa le Eteleno kiate ia : E nofo ni puleaga e lua i lou manava, ti e mavae loa ni kakai e lua mei lou manava, o tasi mo ia lana aga, ti e makeke ake loa se tasi i le tasi. Ti e fakasausau loa le uluaki ki le muli. 24Na kaku loa ki le aso leia kua tonu ke fanau ai Lepeka, ti ko leinei na i ai se ata i lona manava. 25Na mavae ake loa le uluaki kua mea katoa a ia, ofaipe se taupulupulu fulufulu : ti na soli loa kiate ia le igoa ko Esau. 26Ti na vilo ake loa lona taina, leia na kukumi e lona lima le mulivae o Esau ; ti na soli loa kiate ia le igoa ko Sakopo. Na fetuu kau ono Isaake i le aso leia na la tupu ai.

Fakatau e Esau o lona tuulaga uluaki

27Na lalasi ake loa a toe. Ti na poto loa Esau i le kapu manu, ko se tagata taka uta a ia. Kae na liliu loa Sakopo ko se tagata agamalu, leia na nofo mau i falela. 28Na alofa loa Isaake kia Esau, talie na kai a ia ki manu ala na kapu e ia ; kae na alofa Lepeka kia Sakopo.

29I se aso leia na fai ai e Sakopo se supa, na ifo ake loa Esau mei le vao kua gaegae ai. 30Ti na pati loa Esau kia Sakopo : E kau kole atu kiate koe ke ke soli mai kiate au se pa lenitili mei le supa lena ke kau kai, talie kua kau gaegae ai. Ko le tupuaga a ia o le tuku o le igoa o Etome kia Esau.

31Na pati loa Sakopo : Ke ke fakatau mai kiate au i le aso nei lau pule o le vosa uluaki. 32Na tali loa Esau : Ko leinei au kua vave mate, kolea le aoga kiate au o le pule lena ? 33Ti na pati loa Sakopo : Fakapapau mai kiate au i le aso nei. Ti na fakapapau loa a ia kiate ia, ti na fakatau loa e ia lona pule o le uluaki vosa kia Sakopo. 34Ti na soli loa e Sakopo kia Esau se pane mo se pa lenitili. Na kai loa a ia mo inu, ti na tuu ake loa a ia o ano. Na fakanoai loa e Esau lona pule o le vosa uluaki i le nea lena.

Currently Selected:

Senesi 25: FB2000

Highlight

Copy