Gaoi 6

Filifili o Tiakono e toka fitu

1I aso ana, i le tupu o le kau tisipulo o toka api, na tupu loa i le kau Elenise se lauga ki le kau Epeleo, talie na leaise tokaga ki olatou fafine lokonui i le tufa i le aso taki tasi. 2Na tanaki loa e le tino agafulu tupu lua le kau tisipulo fuli, o pati : E leaise tonu ke motou tiaki le folafola a le Atua kae motou tokaga ki laupapa. 3Koia, ei fetaina, kotou filifili ia koutou ni tagata e toka fitu, ala e tuku ki ai se fakamaoki malie, ti e apele i le Laumalie Maokioki mo le poto, ti e motou tuku loa kia latou le kavega lena. 4Ti ko matou, e motou soko atu loa lamatou tokaga ki le faikole ti mo le gaoi o le folafola.

5Ti na malie loa le manatu lena ki le Ekelesia katoa. Na lotou filifili loa Setefano, tagata na apele i le tui mo le Laumalie Maokioki, mo Filipo, mo Polokole, mo Nikanole, mo Timone, mo Palemenasi, mo Nikola ko se poloselita mei Atiokia. 6Na lotou ave loa latou ana ki mua o le kau apositolo. Ti na oki loa lalatou faikole, na lotou teki loa olatou lima kia latou.

7Na mafola le folafola a le Atua, ti na tupu o api ai le kau tisipulo i Selusalemi, ti na fakalogo ki le tui se kakai toka api o le faisakilifisio.

Fakaveliveli o le Ekelesia : Setefano

8Na apele Setefano i le tui mo le makeke, ti na fai e ia ni nea fakaofolele mo ni milakulo lalasi i mua o le kakai. 9Na tutuu ake loa ni iki o le sinakoka leia e pati ko le sinakoka o le kau Lauatea, mo ni iki o le kau Silene, mo ni iki o le kau Alesatelo, ti mo ni Sutea mei Silisia mo Asia, o visi mo ia ; 10Kae na leaise lotou ma tatali ia le poto mo le Laumalie leia na masau ai a ia. 11Koia na lotou totogi loa ni tagata ke pati : Kua motou logo ki lana masau o lauveli kia Moisese mo le Atua. 12Ti na lotou lagai loa le kakai, mo le kau fakamatuatua, mo le kau Sekelipa, ke lotou feoso o too fakamakeke a ia, o ave ki le fono lasi. 13Na lotou aumai loa ni tagata fakamaoki loi ke lotou pati : E leaise tuku e le tagata leinei ana lauveli ki le fale tapu maokioki, ti mo le lao ; 14talie kua motou logo ki lana pati : ko Sesu, lena mei Nasaleti, e maumaui loa e ia le ganea leinei, ti e fetogi loa e ia a agai fenua ala na tuku mai e Moisese kia tatou.

15Ko latou fuli ala na nonofo i le fono lasi, na lotou tio fakamaumau loa kia Setefano, o lotou tio loa ki ona mata kua faipe ni mata o se aselo.

Currently Selected:

Gaoi 6: FB2000

Highlight

Copy