Gaoi 5

Loi a Ananiasi mo Safila

1Kae ko se tagata na igoa ko Ananiasi, mo lona avaga ko Safila, na fakatau ia loa se kele, 2ti na taofi loa e ia se potu o le paaga, o iloa a ia e lona avaga ; ti na ave loa e ia le toe o le paaga, o tuku ki vae o le kau apositolo. 3Na pati loa Petelo kiate ia : Ananiasi, kolea kua ke tuku ai Satana ke fakaapele ia lou loto, o tupu ai lau loiloisi le Laumalie Maokioki, ti mo lau taofi se potu o le paaga o le kele ? 4Kanapau na leaise ke fakatau a ia, koi ke nofo fai mo lou kele ? Ti i le oki o lona fakatau, pe na leaise ke faitalisa ki lona totogi ? Kolea kua ke mafai ai ke ke tuku ki lou loto se fakatuutuu fenaaki ? Na leaise ke loi ki ni tagata, kae ki le Atua. 5I le logo a Ananiasi ki masau ana, na teka loa a ia ki lalo, o mate. Ti na soko loa se i lasi kia latou fuli ala na logo ki nea ana. 6Na tutuu ake loa ki aluga ni kau tupulaga, o kofu a ia, ti na lotou ave loa a ia, o tanu.

7Ti na sili ni ola e tolu ki ai, na ulu ake loa ki fale lona avaga ko Safila, kae na leaise iloa e ia le nea leia kua soko. 8Ti na pati loa Petelo kiate ia : Fakasa mai, pe ko le gatoaga fai leinei o le totogi o le kele ? Ti na tali loa a ia : E io, ko lona totogi a ia. 9Ti na pati loa Petelo kiate ia : Kolea kua kolua fia asiasii ai le Laumalie o le Aliki ? Ko nei latou ala na tanu ia lou avaga kua tutuu i le matapa, ti e lotou toe fata loa a koe ki fafo. 10I le lakaga fai lena, na teka loa a ia ki vae o le apositolo, o mate. Ti na ulu ake loa le kau tupulaga, o maua a ia kua mate ; ti na lotou ave loa a ia, o tanu i tafa o lona avaga. 11Ti na vilo loa se i lasi i le Ekelesia katoa ti mo latou fuli ala na logo loa ki nea ana.

Milakulo a le kau apositolo

12Na fai e le lima o le kau apositolo ni milakulo mo ni nea fakaofolele i mua o le kakai. Na lotou tutuu fuli fakatasi i le Poletike o Salomone, 13ti na leaise toa se tasi kese o nake kia latou ; kae na vikiviki lasi le kakai kia latou. 14Ti na tui se kakai toka api ki le Aliki, tagata mo fafine, ti na lotou ulu o toe fakaapi latou. 15Koia na lotou kamata fata ai a masaki ki ala, o fakamomoe i ni palepale mo ni moelaga, o tupu, ka fakalaka loa Petelo, ke lave a ia ki ni iki o latou, pe ko lona malu fua. 16Na au foki se kakai toka api mei kolo ala na ofi ki Selusalemi, o aumai ni masaki mo ni avagaia ; ti na fakamauli latou fuli.

Fakaveliveli o le kau apositolo

17Kae na tuu ake loa le pule faisakilifisio, ti mo latou fuli ala na kau mo ia, i le fetuuga o le kau Satuseo, kua lotou apele i le fuaa, 18ti na lotou too lima loa le kau apositolo, o fakaulu ki le pilisoni lasi. 19Kae, i le pouli, na fakamavaa loa e se aselo o le Aliki a matapa o le pilisoni, ti na taki loa e ia latou ki fafo, o pati kia latou : 20Kotou ano, o tutuu i le fale tapu, ti kotou fakasa ki le kakai a folafola fuli o le mauli leinei. 21I lalatou logo ki le nea lena, na lotou ulu loa ki le fale tapu i le pogipogi usu, o akonaki i ai. I le temi lena, na kaku ake loa le pule faisakilifisio mo latou ala na kau mo ia, o tanaki le fono lasi mo le kau fakamatuatua fuli o vosa o Iselaele, ti na lotou kakau loa ni iki ke aumai le kau apositolo mei le fale pilisoni. 22I le kaku a le kau leo ki le fale pilisoni, na leaise lotou maua loa latou i ai. Ti na lotou toe liliu loa, o fakasa : 23Na motou maua atu le fale pilisoni na tapono fakamalielie, ti mo le kau leo pilisoni na tuu i mua o matapa ; kae i lamatou fakamavaa a ia, na leaise motou maua fua se tasi i loto.

24I le logo a le pule o le fale tapu mo le kau pule faisakilifisio ki masau ana, na leaise lotou iloa se manatu ki le kau apositolo, ti mo ikuaga o le nea lena. 25Kae na kaku ake loa se tasi, o pati kia latou : Ko nei a tagata ala na kotou tuku ki le fale pilisoni e tutuu i le fale tapu, ti e lotou akonaki ki le kakai.

26Koia na ano loa le pule solia mo le kau leo, o taki fakamalielie mai le kau apositolo, talie na lotou i na tuki fatui latou e le kakai. 27I le oki o lalatou taki mai le kau apositolo ki mua o le fono lasi, na vesili loa le pule faisakilifisio kia latou, o pati : 28Pe na leaise motou tapui fakamakeke atu kia koutou le akonaki i le igoa lena ? Ti ko leinei, kua kotou fakaapele Selusalemi ki lakoutou akonaki, ti e kotou loto ke vilo kia matou le toto o le tagata lena !

29Ti na tali loa Petelo mo le kau apositolo : E tonu ke fakalogo ake ki le Atua i le tagata. 30Kua toe fakatuuake e le Atua o otatou tamana a Sesu, leia na kotou tamate, o tautau a ia ki le laakau. 31Kua siki a ia e le Atua ki lona lima atamai ko le Sau ti mo le Fakamauli, talie ke soli ki Iselaele le fakasemala mo le fakamolemole o agasala. 32Ko matou, e motou fakamaoki ki nea ana, ti mo le Laumalie Maokioki foki, leia kua soli e le Atua kia latou ala e fakalogo kiate ia.

33Na lotou fakainaina loa i le ita i masau ana, ti na lotou loto loa ke tamate latou.

Masau a Kamaliele

34Kae na tuuake loa se tasi ki aluga i le fono lasi, ko se faliseo, ko lona igoa ko Kamaliele, ko se toketa o le Lao, ti na fakaapaapa ki ai le kakai katoa, o fakatotonu ke fakamavae mua ki fafo le kau apositolo i se ga temi. 35Ti na pati loa a ia kia latou : Tagata Iselaele, kotou tokaga ki nea ala ka kotou fai loa ki tagata anei. 36Talie na leikiaise fualoa na sa mai Teotasi, o pati ko se tagata mauiga a ia, ti na kau loa kiate ia se kau tagata, ko tino lelau e fa : Na tamate loa a ia, ti ko latou fuli ala na muli iate ia na mavetevete loa, o pupuli noa. 37Ti oki a ia, kae sa mai loa Sutasi ko le tagata Kalilea, i le temi leia na tosi ai le kakai o le fenua, ti na toso loa e ia se toka api ki lona fetuuga : Na mate foki a ia, ti ko latou fuli ala na muli iate ia na mavetevete loa. 38Ti ko leinei, e kau pati atu kia koutou, aua na kotou toe tokaga ki tagata anei, kae kotou tuku latou ke ano. Talie kapau e au le fakakaukau lena pe ko le gaoi lena mei ni tagata, e maumau loa a ia ; 39kae kapau e au a ia mei le Atua, e leaise kotou mafai loa lona maumaui. Kotou tokaga ai na kotou tau ki le Atua i le nea leinei.

Sasa o le kau apositolo

40Ti na lotou loto tasi loa mo ia. Ti na lotou kalagai loa le kau apositolo, o fakatotonu ke sasa latou ki ni laakau, ti na lotou tapui loa kia latou le masau i le suafa o Sesu, ti na lotou tuku ake loa latou.

41Ti na ano loa le kau apositolo mei mua o le fono lasi i le fiafia, talie kua lotou aoga ki le tali o lauveli o tupu ko le suafa o Sesu. 42Ti na leaise toe tuku lalatou akonaki mo lalatou fakasa le logo malie o Sesu-Kilisito, i aso fuli, i le fale tapu, ti mo fale fuli.

Currently Selected:

Gaoi 5: FB2000

Highlight

Copy