Gaoi 19

Akonaki a Paulo i Efeso

1I le koi nofo a Apolosio i Kolinito, na kaku loa Paulo ki Efeso, i le oki o lana fakalaka i fenua o Asia. I lana felavei mo ni iki o le kau tisipulo, na pati loa a ia kia latou : 2Pe na kotou tali le Laumalie Maokioki, i le temi leia na kotou tui ai ? Ti na lotou tali loa kiate ia : E leikiaise motou logo fua e i ai se Laumalie Maokioki. 3Ti na pati loa a ia : Ko le papitema fea leia na kotou tali ? Ti na lotou tali loa : Ko le papitema leia a Soane. 4Ti na pati loa Paulo : Na fai papitema Soane ki le papitema o le fakasemala, o pati ki le kakai ke tui ki leia e au i ona muli, ko lona uiga, kia Sesu. 5I masau ana, na papitema loa latou i le suafa o le Aliki ko Sesu. 6I le teki loa e Paulo ona lima kia latou, na ifo loa le Laumalie Maokioki kia latou, ti na lotou masau loa ki ni masau kesekese, ti na lotou kikite loa. 7Ko ni tagata latou e tino agafulu tupu lua.

Nofo o Paulo i Efeso i fetuu e lua,

8Ti na ulu loa Paulo ki le sinakoka o masau fakalauatea i ai. I le lolotoga o masina e tolu, na masau a ia ki nea o le Puleaga o le Atua, o faiga ke tafoki latou ala na fakalogo kiate ia. 9Kae, i le fakafefeka mo le tui gataa o ni iki, o lauveli i mua o le toka api ki le ala o le Aliki, na tiaki loa e Paulo latou. Kae na too kese loa e ia le kau tisipulo mo ia, o ako loa e ia latou i aso fuli i le fale ako o Tilanusi. 10Na fetuu lua le nea lena, o tupu ai loa le logo ki le folafola a le Aliki o le kakai katoa leia na nofo i Asia, Sutea mo Keleka. 11Ti na fai e le Atua ni milakulo lalasi i le lima o Paulo,

12o kaku ai ki le fakalave o ni kie pe ko ni musuala kua lave ki lona tino ki le kau masaki, ti na mavae a masaki mo temonio meia latou.

13Ti na asiasii loa e ni tagata Sutea kapu temonio ala na feanoaki saele, ke lotou kapu i le igoa o le Aliki Sesu a laumalie veli meia latou ala na lotou nonofo ai, o pati : E kau fakatotonu atu kia koutou, i le Sesu leia e fakasa e Paulo ! 14Ko latou ala na fai ia le nea lena, ko vosa e toka fitu o se tagata ko Seva, tagata Sutea, ko se tasi o le kau pule faisakilifisio. 15Kae na tali loa le laumalie veli kia latou : E kau iloa Sesu, ti e kau iloa pe ko ai Paulo, kae ko koutou, ko ai ma koutou ? 16Ti na oso loa kia latou le tagata leia na nofo ai le laumalie veli, mo se makeke lasi ai, o fakavelivelii le toka lua o latou, o lotou fesolaki ai mei le fale lena, kua telefua mo lavelavea. 17Ti na iloa loa le nea lena e le kau Sutea katoa mo le kau Keleka katoa ala na nonofo i Efeso, ti na lotou i fuli, o fakakololia ki le suafa o le Aliki ko Sesu. 18Ti na toka api ai o latou ala na tui na au loa o kofesio mo fakasa a nea ala na lotou fai. 19Ti na toka api foki ia latou ala na fai nea fakatemonio na aumai ia alatou tosi, o tutu i mua o le kakai katoa : Na fakaano lona totogi ki ni fa piesi paaga e kau lima afe.

20Ti na asilisili mafola mo makeke le folafola a le Aliki.

21I le sili o nea ana, na manatu loa Paulo ke ano ki Selusalemi, o fakalaka atu i Masetonia mo Akaia. Na pati a ia : Ka oki loa laku ano ki ai, e tonu loa ke kau tio i Loma. 22Ti na kakau loa e ia ki Masetonia se toka lua i ona tokoi, ko Timoteo mo Elaseto, kae toe nofo atu mua a ia totonu i Asia.

Maveuveu i Efeso

23I le temi lena, na soko loa se maveuveu lasi o uiga mo le ala o le Aliki. 24Ko se tagata fau nea fakateuteu na igoa ko Temetiliusi, na fau ia ki le siliva ni fakatata liliki o le fale tapu o Atelemisi, ti na fakagaoi e ia se kakai toka lasi ai. 25Ti na fakatasii loa e ia latou ana, mo latou ala na gaoi tatau mo latou, o pati : Kau tagata, e kotou iloa e fakalogo lotatou mauli ki le matani gaoi leinei ; 26kae kua kotou tio ti kua kotou logo, i Efeso mo Asia katoa, kua fakalotoi mo toso e le Paulo lena se kakai toka api ai, o pati ko atua ala na fau e le lima o le tagata, e leaise ko ni atua latou. 27Ko le tutamaki leia ka soko e leaise gato fua ki le saele veli o latatou matani gaoi ; kae e toe fakanoai foki mo le fale tapu o le finealiki lasi ko Aletemisi, leia e atolasio ki ai Asia katoa mo malama nei katoa, ti e toe puli ai foki mo lona kololia.

28Ti na lotou itaita ai i lalatou logo ki masau ana, ti na lotou kalaga loa : E lasi le Aletemisi o le kau Efeso !

29Ti na maveuveu loa le kolo katoa. Na lotou feoso fakatasi fuli loa ki le malae fai manogi, o too le sa tagata Masetonia ko Kaiusi mo Alisitake, ko kau folau o Paulo. 30Ti na loto loa Paulo ke ano ki mua o le kakai, kae na taofi loa a ia e le kau tisipulo ; 31ti ko ni iki foki o le kau pule fai manogi, ko ona kaukau nea, na kakau ia loa kiate ia ni tagata, o kole kiate ia, ke aua na ano ki le malae fai manogi. 32Na kalaga kesekese le kakai, talie kua maveuveu le fakatasi katoa, ti na api ai latou ala na leaise malama ki le tupuaga o lalatou fakatasi. 33Ti na fakamavae loa mei le kakai a Alesatelo, leia na fakasolosolo loa e le kau Sutea ke masau ; ti na siki loa e Alesatelo lona lima ke masau ki le kakai. 34Kae i lalatou iloa ko le Sutea a ia, na lotou kalaga fakatasi fuli loa i ni ola e lua : E lasi le Aletemisi o le kau Efeso !

35Kae na lolomi loa le kakai e le sekalaipe o le kolo, o pati : Tagata Efeso, ko ai le tagata leia e leaise iloa ia e taupau e le kolo ko Efeso le fale tapu o le Aletemisi lasi, ti mo lona fakatata leia na vilo mei le lagi ? 36Talie e leaise mafai ke fakafesagai se tasi ki le nea lena ; e tonu ke kotou nonofo fakamalielie fai mua, kae aua na kotou osoi fakatavili se nea. 37Talie kua kotou aumai a tagata anei, kae na leikiaise lotou fai ni maumau i le fale tapu, pe ko ni masau veli ki lotatou finealiki ko Aletemisi. 38Kapau e i ai se tasi leia e mamae ki ai Temetiliusi mo lana kau gaoi, e i ai ni aso fai fakamaau, ti i ai mo ni pule fakamaau ; ke lotou tagi ki le telepinale. 39Kapau e i ai ni iki ake a nea ala e kotou tio ki ai, ti koi fakatokatoka loa latou i le fono, o mulimuli ki le lao. 40E feala ke fakalakasala loa tatou, o tupu ko le maveuveu leia kua soko i le aso nei, talie e leaise nea fua ke fakamaoki ai le tupuaga o latatou fakatasi leinei. I le oki o lana masau, na veteki loa e ia le fakatasi.

Currently Selected:

Gaoi 19: FB2000

Highlight

Copy