Gaoi 18

Gaoi a Paulo i Kolinito

1I le oki o le nea lena, na mavae loa Paulo mei Atena o ano ki Kolinito. 2Ti na maua loa e ia i ai se Sutea na igoa ko Akilasi, na tupu i Ponito, nao tau mai fua mei Italia mo lona avaga ko Pelesila, talie na fakatotonu e le sau ko Kolote ke mavae le kau Sutea katoa mei Loma. Ti na ano loa Paulo kia laua ; 3ti tupu na lotou gaoi tatau, na nofo loa a ia i lola fale, o gaoi : talie na lotou fai falela.

4Ti na akonaki loa Paulo i le sinakoka i aso sapato fuli, ti na aumai e ia ki le tui ni Sutea mo ni Keleka. 5Kae, i le kaku mai a Silasi mo Timoteo mei Masetonia, na tokaga ata loa a ia ki le folafola, o fakasa ki le kau Sutea ko Sesu ko le Kilisito. 6Kae na fakafesagai loa le kau Sutea kiate ia o lauveli kiate ia ; koia na tutui ai loa e Paulo ona kofu, o pati kia latou : Ke toe vilo lokoutou toto ki okoutou ulu ! E kau mea i ai. Kamata atu i le aso nei e kau ano loa ki le kau pagani. 7Ti na mavae loa a ia mei ai, o ano ki le fale o se tagata na igoa ko Susitino, leia na i ki le Atua, ti na pipiki lona fale ki le sinakoka. 8Kae na tui loa ki le Aliki a Kilisipusi, ko le pule o le sinakoka, mo lona famili katoa. Ti na fakalogo foki ni kakai Kolinito toka api kia Paulo, o lotou tui loa, mo papitema.

9Ti na pati loa le Aliki kia Paulo i se tio i le pouli : Aua na ke i ; kae ke masau, ti aua na ke fakalologo, 10talie e kau nofo mo koe, ti e leaise lave loa le lima o se tasi kiate koe o fai se nea veli kiate koe ; masau, talie e kau maua ia se kakai toka api i le kolo leinei.

11Ti na nofo loa a ia i ai i le fetuu katoa mo masina e ono, o ako le folafola a le Atua ki le kau Kolinito.

12Kae i le pule a le kovana Loma ko Kalione i Akaia, na fakatasi loa le kau Sutea, o lotou too Paulo, ti na lotou taki loa a ia ki mua o le telepinale, 13o pati : Ko le tagata leinei e ako ia le kakai ke tausi ki le Atua i se tausi leia e fakafesagai ki le lao. 14Ti na faiga loa Paulo ke masau, kae na pati loa Kalione ki le kau Sutea : Kakai Sutea, kapau ko se tukipo pe ko se sala mamafa, e kau fakalogo atu loa kia koutou ; 15kae kapau ko ni visi o uiga mo se masau, pe ko ni igoa, pe ko lakoutou lao, a koutou fai le nea lena : E leaise kau loto ke kau fakamaau ia a nea ana. 16Ti na kakau loa e ia latou mei le telepinale. 17Koia na lotou too fuli loa a Sositene, ko le pule o le sinakoka, o sasa i mua o le telepinale, kae na leaise tokaga fua Kalione ki le nea a ia.

Toe liliu a Paulo ki Atiokia

18Na toe nofo loa Paulo i Kolinito o fualoa. Ti oki, na mavae loa a ia mei fetaina, o ano vaka ki Silia mo Pelesila mo Akilasi ; kae na tele mua lona ulu i Senikelea, talie na fai e ia se fakapapau.

19Na lotou kaku loa ki Efeso, ti na tuku loa e Paulo ona kaukau nea i ai. Na ulu loa a ia ki le sinakoka, o masau mo le kau Sutea, 20ti na lotou kole ake loa kiate ia ke nofo mua i se ga temi mo latou. 21Kae na leaise loto loa a ia ki ai, ti na mavae loa a ia meia latou, o pati : E tonu ai ke kau fai le aso o le Pasikate i Selusalemi. E kau toe liliu mai loa kia koutou, mo kapau ko le finegalo a ia o le Atua. Ti na mavae loa a ia i Efeso.

22I lana kaku ki Sesalea, na pale loa a ia ki Selusalemi, ti i le oki o lana felavei mo le Ekelesia, na ifo loa a ia ki Atiokia.

Tolu fanoga a Paulo

23I le oki o lana nofo i Atiokia i se ga temi, na toe ano loa Paulo ki Kalatia mo Filisia, o fakamakeke le kau tisipulo katoa.

Akonaki a Apolosio

24Ti na nake loa ki Efeso se tagata Sutea, na igoa ko Apolosio, na tupu i Alekasia, ko se tagata na poto masau, ti na toe poto lasi i le Tosi tapu. 25Ti na ako a ia i le ala o le Aliki, ti i le oli o lona loto, na fakasa loa e ia mo fakamatala i le maoki le anoaga o Sesu, kae na iloa fai e ia le papitema a Soane. 26Ti na kamata masau fakalauatea loa a ia i le sinakoka. Na fakalogo loa kiate ia a Akilasi mo Pelesila, ti na la too loa a ia mo laua, o toe fakamatala fakatotonu ake kiate ia le ala totonu o le Atua. 27I lona loto ke ano ki Akaia, na ekenaki loa a ia e fetaina ki ai, ti na lotou fai loa se tosi ki le kau tisipulo ke lotou tali malie a ia. I lana kaku ki ai, na aoga lasi loa a ia kia latou ala kua tui ki le kalasia o le Atua ; 28talie na taui fakamakeke e ia le kau Sutea i ganea apiapi, o fakasa mei le Tosi tapu ko Sesu ko le Kilisito.

Currently Selected:

Gaoi 18: FB2000

Highlight

Copy