Mak 16
16
Ewudwazo ne
(Mat 28.1-8; Luk 24.1-12; Dw 20.1-10)
1Ɛnwomenlelielɛ Kenle ne pɛle nu la, Mɛle mɔɔ vi Magedala, nee Salome, yɛɛ Mɛle mɔɔ le Gyemise ɔ nli ne totɔle nyile ngakyile mɔɔ bɛfa bɛyɛ alufuanlɛ la, kɛ bɛfa bɛahɔwɔza Gyisɛse funli ne. 2Molɛ nwonlomɔ mangyee ne, mɔɔ ɛnee sɛnzɛne ne ɛdudu la, yɛɛ bɛhɔle sɛka ne azo a. 3-4Mɔɔ bɛlua adenle zo la, ɛnee bɛ edwɛkɛ a le kɛ, “Na nwane bɔbɔ a kɛhundo bolɛ ne mɔɔ nyi nla ne anloa la kɛmaa yɛ a?” (Bolɛ ne le kpole kpalɛ.) Na bɛmanle bɛ nye zo la bɛnwunle kɛ bɛhundo bolɛ ne dɛbadɛba. 5Bɛwolole nla ne anu na bɛnwunle kɛ kpavolɛ bie wula tɛladeɛ fufule de fema zo ɛkɛ ne, na bɛ ahonle dule.
6Na kpavolɛ ne zele bɛ kɛ, “Bɛmmamaa bɛ ahonle tu, meze kɛ bɛkpondɛ Gyisɛse mɔɔ vi Nazalɛte, mɔɔ bɛbɔle ye meanubaka nu la. Ɔnle ɛke, Nyamenle ɛdwazo ye! Bɛnlea, ɛke a bɛdole ye a. 7#Mat 26.32; Mak 14.28 Bɛhɔ na bɛhɔze Pita nee ɛdoavolɛma mɔɔ ɛha la kɛ yelumua bɛ nyunlu wɔ Galeli, na ɛkɛ ne yɛɛ bɛkɛnwu ye a, kɛmɔ ɔhanle ɔhilele bɛ la.”
8Mraalɛ ne mɔ vale anwowozolɛ nee azibɛnwo vile nla ne anu vindele na bɛnriandile bɛhɔle. Bɛambɔ zolɛ bɛangile awie biala, ɔluakɛ ɛnee bɛsulo.
EDWƐKPA ƐHYE ADWULALEƐ DƐBA KO ƐNE
Gyisɛse ye ɔ nwo ahile Mɛle mɔɔ vi Magedala la
(Mat 28.9-10; Dw 20.11-18)
[ 9Gyisɛse dwazole vile ewule nu Molɛ nwonlomɔ mangyee ne la, ɔlumuale ɔyele ɔ nwo ɔhilele Mɛle mɔɔ vi Magedala, mɔɔ ɔ nwo a ɔdule mbɔnsam nsuu ne la. 10Mɛle hɔbɔle ɛdoavolɛma ne mɔ amaneɛ. Ɛnee bɛlɛsu bɛabodo bɛ nwo; 11yemɔti bɛdele kɛ Mɛle se Gyisɛse de aze na yenwu ye, noko bɛanlie bɛanli.
Gyisɛse ye ɔ nwo ahile ɛdoavolɛma nwiɔ
(Luk 24.13-35)
12Ɛhye anzi, Gyisɛse yele ɔ nwo wɔ adenle bie azo hilele bɛ nuhua nwiɔ, wɔ mekɛ mɔɔ ɛnee bɛlɛkɔ namule nu la. 13Bɛziale bɛrahanle bɛhilele menli mɔɔ ɛha la, noko bɛanlie bɛanli.
Gyisɛse ye ɔ nwo ahile Bulu nee Ko ne
(Mat 28.16-20; Luk 24.36-49; Dw 20.19-23; Gyi 1.6-8)
14Ɛhye mɔ amuala anzi, Gyisɛse yele ɔ nwo hilele ye ɛdoavolɛma bulu nee ko ne wɔ mekɛ mɔɔ ɛnee bɛlɛdi debie la, na ɔhwile bɛ nyunlu wɔ diedi mɔɔ bɛnlɛ ye, nee bɛ anzosesebɛ ne mɔɔ yemɔti bɛnlie bɛdabɛ mɔɔ bɛnwu ye kɛ ɔde aze la bɛnli la anwo. 15#Gyi 1.8 Na akee ɔzele bɛ kɛ, “Bɛhɔ ewiade ahodoka muala anu na bɛhɔbɔ Edwɛkpa ne nolo bɛhile aleɛabo amra kɔsɔɔti. 16Awie biala mɔɔ kɛlie kɛli na bɛkɛzɔne ye la kɛnyia ngoane; na mɔɔ anlie anli la, bɛkɛbu ye ewule fɔlɛ. 17Bɛdabɛ mɔɔ bɛkɛlie bɛkɛli la, bɛbamaa bɛ tumi bɛamaa bɛayɛ nwanwane gyima mgbole: bɛbalua me duma nu bɛadudu mbɔnsam; bɛbahola bɛaha aneɛ ngakyile; 18saa bɛsɔ nwɔlɛ nu anzɛɛ bɛno pɔezen a, debie biala ɛnrɛyɛ bɛ. Bɛbava bɛ sa bɛagua wuleravolɛma anwo zo, na bɛ nwo baza.”
Gyisɛse anwumahɔlɛ
(Luk 24.50-53; Gyi 1.9-11)
19 #
Gyi 1.9-11
Awulae Gyisɛse nee ye ɛdoavolɛma ne dendɛle wiele la, bɛvale ye bɛhɔle anwuma na ɔhɔdɛnlanle Nyamenle asa fema zo. 20Ɛdoavolɛma ne ziale hɔle na bɛhɔbɔle Edwɛkpa ne nolo wɔ ɛleka biala, na Awulae boale bɛ na ɔmanle bɛ sa anloa gyima hilele kɛ bɛ nolobɔlɛ ne le nɔhalɛ.]#16.20 Mbuluku bie mɔ ɛnlɛ Edwɛkpa ɛhye adwulaleɛ ɛhye (9-20).
ADWULALEƐ DƐBA KO NOKO ƐNE#16.20 Mbuluku bie mɔ nee mɔmoane mbuluku ne mɔ bie mɔ lɛ adwulaleɛ ɛhye yɛɛ adwulaleɛ dɛba ne.
21[ 9 Na mraalɛ ne mɔ hɔle Pita nee ɛdoavolɛma mɔɔ ɛha la ɛkɛ ne hɔbɔle bɛ amaneɛ. 22 Ɛhye anzi, Gyisɛse ɔdaye ɔzoanle ye ɛdoavolɛma ne mɔ ɔmanle bɛvale Nyamenle ngoanelielɛ ne mɔɔ ɛnlɛ awieleɛ la anwo edwɛkɛ bɛhɔle ewiade amuala anu.]
Currently Selected:
Mak 16: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
