Luk 15
15
Boane ne mɔɔ minlinle la
(Mat 18.12-14)
1 #
Luk 5.29-30
Kenle ko bie adwuledievolɛma dɔɔnwo nee menli mɔɔ awie ɛmbu bɛ la rale kɛ bɛbadie Gyisɛse anloa edwɛkɛ. 2Na Falasiima ne nee mɛla kilehilevolɛma ne mɔ dendɛle bɛ nzo abo kɛ, “Nrenya ɛhye nee ɛtanevolɛma tu na ɔ nee bɛ to bɛ sa ɛyɛba ko anu.” 3Yemɔti Gyisɛse bule bɛ ɛrɛlɛ ɛhye:
4“Bɛ nuhua boni, yɛɛ saa ɔlɛ mboane ɛya, na ko minli a, ɔnrɛgyakyi abulahɔnla nee ngɔnla ne wɔ fienemgbole ne anu, na ɔnrɛhɔkpondɛ ko ne toonwo kɔkpula kɛ ɔkɛnwu ye la a? 5Saa ɔnwu ye a, ɔdi fɛlɛko, na ɔfa ye ɔto ɔ kɔme zo, 6ɔfa ye ɔba sua nu. Akee ɔfɛlɛvɛlɛ ɔ gɔnwo mɔ nee ye kpalɛzo amra, na ɔse bɛ kɛ, ‘Ɔyɛ me fɛ kɛ menwu me boane ne mɔɔ minlinle la. Bɛmaa yɛlie yɛ nye!’ 7Meka meahile bɛ kɛ zɔhane ala yɛɛ anyelielɛ kɛra anwuma lɔ wɔ ɛtanevolɛ ko mɔɔ kɛnlu ɔ nwo la anwo kɛdɛla menli abulahɔnla nee ngɔnla mɔɔ di boɛ na bɛngyia anlubɛnwo la a.
Dwɛtɛ fufule ne mɔɔ minlinle la
8“Anzɛɛ saa raalɛ lɛ dwɛtɛ fufule bulu na ko minli a, duzu a ɔyɛ a? Ɔsɔ kɛnlaneɛ, ɔkpoɔkpoa ye sua ne anu, na ɔka ɔ nye aze ɔkpondɛ dedee kɔkpula kɛ ɔkɛnwu ye la. 9Saa ɔnwu ye a, ɔfɛlɛvɛlɛ ɔ gɔnwo mɔ nee ye kpalɛzo amra, na ɔse bɛ kɛ, ‘Ɔyɛ me fɛ kɛ menwu me kpɔba ne mɔɔ minlinle la. Bɛmaa yɛlie yɛ nye!’ 10Meka meahile bɛ kɛ, zɔhane ala yɛɛ Nyamenle soanvolɛma di fɛlɛko wɔ ɛtanenli ko mɔɔ kɛnlu ɔ nwo la anwo a.”
Ralɛ nrenya ne mɔɔ dele atua la
11Gyisɛse hɔle zolɛ hanle kɛ, “Nrenya ko wɔ ɛkɛ. Ɔlɛ mralɛ mrenya nwiɔ. 12Bɛ nuhua ekyi ne hanle hilele ɔ ze kɛ, ‘Egya, fa me agyadeɛ ɛdeɛ maa me.’ Yemɔti ɔ ze hyɛle mɔɔ ɔlɛ la amuala anu nwiɔ manle ɔ mra nwiɔ ne. 13Kenle ekyi guale nu la ralɛ nrenya kakula ne dɔnenle ye ninyɛne ɛdeɛ ne kɔsɔɔti na ɔvale ezukoa ne ɔbɔle ɔ nwo ɔhɔle maanle zo. Ɔhɔle la, ɔbɔle ɛbɛla mgbane mgbane na ɔzɛkyele ye ezukoa ne amuala. 14Mɔɔ ɔwiele ye ezukoa ne di la ɛhɔne kpole bie zile maanle ne mɔɔ ɔwɔ nu la anu, na ɛnee akee noko ɛhwee ɛnle ɔ nwo. 15Yemɔti ɔvale ɔ nwo ɔhɔbetanle mandimasema ne mɔ anu ko, na sonla zɔhane vale ye kɛ ɔhɔnlea agbolike wɔ ye ɛya nu. 16Ɛhɔne hunle ye mɔɔ saa ɔnyianle agbolike ne mɔ aleɛ ne bie bɔbɔ a anrɛɛ ɔkɛli, noko yeannyia awie ammaa ye bie. 17Nzinlii ye adwenle rale ɔ nwo na ɔzele kɛ, ‘Gyimayɛvoma mɔɔ wɔ egya gyima nu la di aleɛ maa ɔbo bɛ nwo zo, mame a mela ɛke mɔɔ ɛhɔne ɛlɛku me la! 18Medwazo meahɔ egya anwo lɔ meahɔze ye kɛ, Egya, meyɛ ɛtane metia Nyamenle nee ɛdawɔ. 19Menfɛta kɛ ɛkɛvɛlɛ me ɛ ra bɔbɔ; fa me yɛ wɔ ɛkpama ne mɔ anu ko.’ 20Yemɔti ɔdwazole na ɔzile nu kɛ ɔkɔ ɔ ze anwo lɔ.
“Mɔɔ ɔkpukele moa moa lɔ mɔɔ ɔlɛba la ɔ ze nwunle ye, alɔbɔlɛ hunle ye kpole, na ɔnriandile ɔhɔyiale ye, ɔbɛkale ye, na ɔvole ɔ nloa anwo. 21Ralɛ nrenya kakula ne hanle hilele ɔ ze kɛ, ‘Egya, meyɛ ɛtane metia Nyamenle nee ɛdawɔ. Kɛkala, menfɛta kɛ ɛkɛvɛlɛ me ɛ ra bieko.’ 22Na ɔ ze vɛlɛle ye sonvolɛma ne mɔ na ɔzele bɛ kɛ, ‘Bɛha bɛ nwo na bɛhɔva tɛladeɛ kpalɛ bɛrawula ye. Bɛva kpɔdelera bɛwula ɔ sa, na bɛva mgbɔlaboa bɛwula ye. 23Akee bɛhɔva ɛnlankɛ ralɛ mɔɔ ɛlɔ kpalɛ la bɛrahu ye bɛmaa yɛlie yɛ nye. 24Ɔluakɛ me ra ɛhye, mefa ye kɛ ɔwule, na kɛkala yera ngoane nu; ɔminlinle, na kɛkala menwu ye.’ Na bɛbɔle ɔ bo kɛ bɛdie bɛ nye.
25“Mekɛ ne anu ɛnee ralɛ nrenya kpanyinli ne ɛhɔ ye ɛya nu. Na mɔɔ ɔlɛba na ɔbikyele ɔ ze awuke ne la, ɔdele edwɛne nee agolehanlɛ ne. 26Yemɔti ɔvɛlɛle ɔ ze sonvolɛma ne mɔ mɔɔ wɔ sua nu ɛkɛ ne la anu ko na ɔbizale ye kɛ, ‘Duzu edwɛkɛ ɔ?’ 27Na ɔbuale ye kɛ, ‘Ɛ diema ne ɛzia ɛra sua nu, na ɛ ze ɛmaa bɛhu ɛnlankɛ ralɛ kyenlera ne mɔɔ ɛwie dɔ la yɛɛ bɛlɛdie bɛ nye a, ɔboalekɛ ɔ sa ɛha ye, ɔ nwo kɔlɔnwo, ɔte kpɔkɛ.’
28“Ralɛ nrenya kpanyinli ne vale ɛya kpole, yemɔti yeangulo kɛ ɔkɛwolo awuke ne anu. Zɔhane ati ɔ ze vindele rabodole ye kɛ ɔrɛla sua nu. 29Na ɔbuale ɔ ze kɛ, ‘Egya, mezonle wɔ kɛ akɛlɛ la toonwo a yeradwu ɛnɛ a, yɛɛ metɛtule ɛ nloa edwɛkɛ metɛtole ɛlɛ. Duzu a wɔva wɔmaa me a? Ɛtɛfale abɔnkye ralɛ nretee ko bɔbɔ ɛtɛmanle me kɛ menva me nee me gɔnwo mɔ yɛva yɛlie yɛ nye. 30Na ɛ ra ɛhye mɔɔ ɛzɛkye wɔ agyadeɛ ne amuala wɔ tuutuuma anwo, na yezia yera sua nu la, wɔhu ɛnlankɛ ralɛ kyenlera ne mɔɔ ɛwie dɔ la wɔmaa ye.’ 31Na ɔ ze buale ye kɛ, ‘Me ra, wɔmɔ ɛ nee me a de ɛke dahuu a, yɛɛ debie biala mɔɔ melɛ la le wɔ ɛdeɛ. 32Noko ɔwɔ kɛ yɛdie yɛ nye na yɛdi fɛlɛko ala, ɔboalekɛ, ɛ diema ye, ɔwule, yɛɛ yezia yera ngoane nu bieko a; ɔminlinle, yɛɛ yɛnwu ye a.’ ”
Currently Selected:
Luk 15: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
