Dw 14
14
Gyisɛse a le adenle ne mɔɔ kɔ Selɛ ne anwo lɔ la
1Gyisɛse zele bɛ kɛ, “Bɛmmamaa bɛ rɛle bɔ na bɛdi nyane. Bɛlie Nyamenle bɛli na bɛlie medame noko bɛli. 2Egya awuke nu ɛkɛ ne, azua ngome; mekɔ meahɔziezie ɛleka meamaa bɛ. Saa ɔnle zɔhane a anrɛɛ menrɛha menrɛhile bɛ. 3Saa mekɔ na mesiezie ɛleka memaa bɛ a, mebara bieko na mearava bɛ meahɔ me nwo lɔ, amaa bɛadɛnla ɛleka mɔɔ mewɔ la. 4Bɛdabɛ bɛze adenle ne mɔɔ kɔ ɛleka mɔɔ melɛkɔ la.”
5Tɔmase bizale ye kɛ, “Awulae, yɛnze ɛleka mɔɔ ɛlɛkɔ la; na kɛ ɔkɛyɛ na yɛanwu adenle ne mɔɔ kɔ ɛkɛ ne la ɛ?”
6Gyisɛse buale ye kɛ, “Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.” 7Ɔvale ɔzɔle zo kɛ, “Saa bɛze me a anrɛɛ bɛze Egya noko, yɛɛ ɔvi ɛnɛ mɔɔ kɔ la, bɛnwu ye yɛɛ bɛze ye.”
8Felepe hanle kɛ, “Awulae, kile yɛ Selɛ ne; mɔɔ yɛkpondɛ la ala ɛne.”
9Gyisɛse buale ye kɛ, “Felepe, yemɔti mekɛ tendenle ye mɔɔ me nee bɛ muala ɛdɛnla la bɛnze me? Awie mɔɔ ɛnwu me la ɛnwu Selɛ ne. Duzu ati a akee ɛbiza me kɛ, ‘Kile yɛ Selɛ ne ɛ?’ 10Felepe, na ɛnlie ɛnli kɛ mede Selɛ ne nu yɛɛ Selɛ ne de me nu ɔ?” Gyisɛse akee hanle hilele ye ɛdoavolɛma ne amuala kɛ, “Edwɛkɛ mɔɔ meha mehile bɛ la ɛnle me ti anwo edwɛkɛ. Selɛ ne mɔɔ de me nu la a yɛ ye gyima a. 11Bɛlie me bɛli kɛ mede Selɛ ne nu yɛɛ Selɛ ne de me nu. Saa tɛ ye zɔhane a, ɛnee gyima mɔɔ meyɛ la ati, bɛlie me bɛli. 12Meka nɔhalɛ ne meahile bɛ: Awie mɔɔ kɛlie me kɛli la kɛyɛ gyima mɔɔ meyɛ la bie, yɛɛ ɔbayɛ mɔɔ tɛla ɛhye mɔ la bɔbɔ, ɔluakɛ melɛkɔ Selɛ ne anwo lɔ, 13yɛɛ mɔɔ bɛkɛbiza ye biala wɔ me duma nu la, mebayɛ, amaa bɛalua Ralɛ ne anwo zo bɛaye Selɛ ne anyunlunyia bɛahile. 14Saa bɛbiza debie biala wɔ me duma nu a, mebayɛ.
Sunsum Nwuanzanwuanza ne anwo ɛwɔkɛ
15“Saa bɛkulo me a, bɛbali me mɛla ne mɔ azo. 16Mebabiza Selɛ ne meamaa yeamaa bɛ Boavolɛ fofolɛ, na ɔ nee bɛ aradɛnla dahuu. 17Boavolɛ zɔhane, yemɔ a le Sunsum ne mɔɔ baye nɔhalɛ ne mɔɔ fane Nyamenle anwo la ahile bɛ la. Ewiade ɛnrɛhola ɛnrɛlie ye, ɔboalekɛ ɔnrɛnwu ye yɛɛ ɔnze ye. Na bɛmɛ bɛze ye, ɔluakɛ ɔ nee bɛ a de a yɛɛ ɔde bɛ nu.
18“Saa mekɔ a, menrɛgyakyi bɛ nrisa; mebara bɛ nwo bieko. 19Ɔnrɛhyɛ biala ɛnee ewiade ɛnnwu me bieko, na bɛmɛ, bɛbanwu me, na kɛmɔ mede ngoane nu la, bɛdabɛ noko bɛbadɛnla ngoane nu. 20Saa mekɛ zɔhane dwu a bɛkɛnwu kɛ mede Egya nu na bɛdabɛ noko bɛde me nu, na medame mede bɛ nu la.
21“Awie biala mɔɔ kɛlie me mɛla ne mɔ na ɔkɛli zolɛ la, yemɔ a kulo me a. Egya bahulo awie biala mɔɔ kulo me la, na medame noko mebahulo ye na meaye me nwo meahile ye.”
22Dwudase (tɛ Dwudase Yesekaleɔto ɔ) bizale ye kɛ, “Awulae, duzu ati a ɛye ɛ nwo wɔahile yɛ na ɛnrɛye ɛ nwo ɛnrɛhile ewiade ɛ?”
23Gyisɛse buale ye kɛ, “Awie biala mɔɔ kulo me la bali me ngilehilelɛ zo. Egya bahulo ye, na me nee Egya yɛbara ɔ nwo ɛkɛ yɛ nee ye aradɛnla. 24Mɔɔ ɛngulo me la ɛnli me ngilehilelɛ zo. Edwɛkɛ ne mɔɔ bɛde la ɛnvi me ɛkɛ ne, ɔvi Selɛ ne mɔɔ zoanle me la ɛkɛ.
25“Mekɛ mɔɔ me nee bɛ de ala ye yɛɛ meha ɛhye mehile bɛ la o! 26Boavolɛ ne, mɔɔ le Sunsum Nwuanzanwuanza ne, mɔɔ Selɛ ne bazoa ye wɔ me duma nu la, barahilehile bɛ debie biala, na yeamaa bɛahakye mɔɔ meha mehile bɛ la amuala.
27“Anzonudwolɛ a mefa megyakyi bɛ a; medame me anzonudwolɛ a mefa megyakyi bɛ a. Menva memmaa bɛ kɛmɔ ewiade fa maa la. Bɛmmamaa bɛ rɛle bɔ na bɛdi nyane; bɛmmasulo noko. 28Bɛdele kɛ meha kɛ, ‘Melɛkɔ na mebara bieko.’ Saa bɛhulole me a, anrɛɛ bɛ nye ɛlie kɛ melɛkɔ Selɛ ne anwo lɔ a, ɔboalekɛ yemɔ, ɔle kpole ɔtɛla me. 29Kɛkala meha ɛhye mehile bɛ, kolaa na yeazi, amaa saa ɔsi a, bɛalie bɛali. 30Menrɛhola me nee bɛ ɛnrɛdendɛ ɛnrɛhyɛ dɔɔnwo biala, ɔboalekɛ mɔɔ sie ɛtane ewiade ɛhye la ɛlɛba. Ɔnlɛ me nwo zo tumi ɛdeɛ, 31noko ɔwɔ kɛ ewiade nwu kɛ mekulo Selɛ ne; yemɔti meyɛ debie biala mɔɔ ɔkɛze me la.
“Bɛdwazo bɛmaa yɛhɔ.”
Currently Selected:
Dw 14: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
