Dw 13
13
Gyisɛse nrinzi ye ɛdoavolɛma agyakɛ anwo
1Gyisɛse nwunle kɛ akee mekɛ ɛdwu mɔɔ ɔwɔ kɛ ɔfi ewiade ɛhye anu na ɔkɔ Selɛ ne anwo lɔ a. Mekɛ ne anu ɛnee aleɛ kye a bɛkɛli Akpabɛnwo Ɛvoyia ne. Yehulo bɛdabɛ mɔɔ bɛle ye ɛdeɛ wɔ ewiade ye anu la dahuu, yɛɛ yehulo bɛ yehɔ awieleɛ.
2Gyisɛse nee ye ɛdoavolɛma ne dɛnlanle aze nɔsolɛ nu kɛ bɛdi debie. Abɔnsam noko ɛbɔ kpɔkɛ ɛwie kɛ ɔwɔ kɛ Dwudase, Saemɔn Yesekaleɔto ara ne ye Gyisɛse maa. 3Gyisɛse ze kɛ Selɛ ne ɛmaa ye tumi bɔkɔɔ; ɔze kɛ ɔdaye Gyisɛse, ɔvi Nyamenle anwo lɔ a ɔrale a na eza ɔbazia yeahɔ Nyamenle anwo lɔ. 4Yemɔti ɔvile ɛkponle ne anwo ɔdwazole, ɔkpale ɔguale, na ɔvale tohulu ɔpɛle ɔ bo. 5Akee ɔvale nzule ɔguale kyɛnze kpole bie anu na ɔbɔle ɔ bo kɛ ɔnrinzi ye ɛdoavolɛma ne agyakɛ anwo. Ɔnrinzi ɔwie a ɛnee yeva tohulu ne mɔɔ pɛ ɔ bo la yekyikyi. 6Ɔradwule Saemɔn Pita anwo zo la, Pita bizale Gyisɛse kɛ, “Awulae, na akee wɔmɔ yɛɛ ɛnrinzi me gyakɛ anwo a?”
7Gyisɛse buale ye kɛ, “Ɛnrɛde mɔɔ melɛyɛ la abo kɛkala, na nzinlii ɛbade ɔ bo.”
8Pita zele ye kɛ, “Menrɛmaa ɛnrɛnrinzi me gyakɛ anwo kenle bie maanle nu!”
Gyisɛse buale ye kɛ, “Saa meanrinzi ɛ gyakɛ anwo a ɛnee ɛnle me ɛdoavolɛ bieko.”
9Saemɔn Pita zele ye kɛ, “Awulae, ɛnee noko mmanrinzi me gyakɛ anwo ala! Nrinzi me sa anwo nee me ti zo amuala noko!”
10Gyisɛse zele ye kɛ, “Mɔɔ ɛbia la anwo le bɔkɔbɔkɔ na ɔngyia kɛ ɔkɛbia bieko. Debie mɔɔ ɔwɔ kɛ ɔyɛ la a le kɛ ɔnrinzi ɔ gyakɛ anwo ala. Bɛ muala bɛ nwo le bɔkɔbɔkɔ. Sonla ko ala yɛɛ anwo ɛnle bɔkɔbɔkɔ a.” 11Ɛnee Gyisɛse ze sonla mɔɔ baye ye amaa la, ɛhye ati a ɔhanle kɛ, “Bɛ muala bɛ nwo le bɔkɔbɔkɔ, sonla ko ala a anwo ɛnle bɔkɔbɔkɔ a.”
12 #
Luk 22.27
Gyisɛse wiele bɛ gyakɛ anwo nrinzi la, ɔwulale ye tɛladeɛ ne na ɔziale ɔhɔdɛnlanle ɔ bo zo ne wɔ ɛkponle ne anwo, na ɔbizale bɛ kɛ, “Asoo bɛte mɔɔ meyɛ ye kɛkala la abo? 13Bɛfɛlɛ me Kilehilevolɛ nee Awulae, na ɔle kpalɛ kɛ bɛkɛvɛlɛ me zɔhane a, ɔluakɛ mele zɔhane. 14Mele bɛ Awulae nee bɛ Kilehilevolɛ, noko menrinzinrinzi bɛ gyakɛ anwo. Bɛdabɛ noko bɛnrinzinrinzi bɛ gyakɛ anwo ngoko ngoko. 15Meyɛ ndonwo ɛhye mehile bɛ, amaa bɛdabɛ noko bɛayɛ ye zɔhane ala. 16#Mat 10.24; Luk 6.40; Dw 15.20 Meka nɔhalɛ meahile bɛ: Akɛlɛ biala ɛnle kpole ɛndɛla ɔ menle; soanvolɛ biala ɛnle kpole ɛndɛla ahenle mɔɔ zoanle ye la, 17Kɛkala mɔɔ bɛnwu nɔhalɛ ɛhye la, saa bɛfa bɛyɛ gyima a bɛkɛli fɛlɛko kpole!
18 #
Edw 41.9
“Tɛ bɛ muala bɛ nwo edwɛkɛ a melɛka a; meze mɔɔ mekpa nu meye bɛ la. Na Nyamenle Edwɛkɛ ne mɔɔ se, ‘Sonla ne mɔɔ nee me di nee me no la hakyile ɔ nzi zile me’ la ɔwɔ kɛ yɛ zɔhane. 19Meka ɛhye meahile bɛ kɛkala kolaa na yeazi, amaa saa ɔsi a, bɛalie bɛali kɛ ‘Medame a le Medame’, 20#Mat 10.40; Mak 9.37; Luk 9.48; 10.16 Meka nɔhalɛ ne meahile bɛ: Awie mɔɔ kɛlie awie biala mɔɔ menwɔzoa ye la ɛlie medame noko, yɛɛ mɔɔ kɛlie me la ɛlie ahenle mɔɔ zoanle me la.”
Gyisɛse se bɛbaye ye bɛamaa
(Mat 26.20-25; Mak 14.17-21; Luk 22.21-23)
21Gyisɛse hanle ɛhye la, ɛnee akee nyane ɛha ye kpole kpalɛ, na ɔhanle ɔdole gua kɛ, “Meka nɔhalɛ ne meahile bɛ: Bɛdabɛ, bɛ nuhua ko baye me amaa.”
22Ɛhye yɛle ɛdoavolɛma ne azibɛnwo kpole na bɛnleɛnleanle bɛ nyunlu. 23Ɛnee ɛdoavolɛ ne mɔɔ Gyisɛse kulo ye edwɛkɛ la de Gyisɛse anwo ɛkɛ ne. 24Yemɔti Saemɔn Pita bɔle ɔ nye hilele ye kɛ, “Biza ye ahenle mɔɔ ɔlɛka ɔ nwo edwɛkɛ la.”
25Ɛdoavolɛ ne hwenle bikyele Gyisɛse na ɔbizale ye kɛ, “Awulae, ɛnee nwane ɔ?”
26Gyisɛse buale kɛ, “Saa mebu kpanwo ne mebɔ subue ne anu na mɔɔ menwɔva menwɔmaa ye la, yemɔ ɔ.” Yemɔti Gyisɛse bule kpanwo ne ekyi, ɔvale ɔbɔle subue ne anu na ɔvale ɔmanle Dwudase, Saemɔn Yesekaleɔto ara ne. 27Dwudase liele kpanwo ne la yɛɛ Seetan wolole ye a. Gyisɛse zele ye kɛ, “Ka ɛ nwo yɛ mɔɔ ɛyɛ la.” 28Awie biala mɔɔ de ɛkponle ne anwo la ande mɔɔ Gyisɛse hanle hilele Dwudase la abo. 29Kɛmɔ Dwudase a ɛnee nea bɛ gya zo la ati, ɛdoavolɛma ne bie mɔ dwenlenle kɛ Gyisɛse ɛzoa ye kɛ ɔhɔtotɔ ninyɛne mɔɔ bɛbahyia nwolɛ wɔ ɛvoyia ne ɛlilɛ nu la, anzɛɛ yeha yehile ye kɛ ɔva debie ɔhɔmaa ehyianvolɛma.
30Dwudase liele kpanwo ne la, ndɛndɛ ne ala ɔvindele; na ɛnee aleɛ ɛdwo.
Mɛla fofolɛ ne
31Dwudase vindele la, Gyisɛse hanle kɛ, “Akee bɔ zo mɔɔ medame Sonla Ra, me anyunlunyia ne ɛla ali a; bɛbalua me nwo zo bɛaye Nyamenle anyunlunyia ne bɛahile. 32Na saa bɛdua me nwo zo bɛye Nyamenle anyunlunyia ne bɛkile a, Nyamenle ɔdaye ɔbaye medame Sonla Ra ne noko, me anyunlunyia ne yeahile, na ɔbayɛ ɛhye ndɛndɛ ne ala. 33#Dw 7.34 Me mra, me nee bɛ ɛnrɛdɛnla ɛnrɛhyɛ. Bɛbakpondɛ me, na mɔɔ menganle mengilele Dwuu mgbanyima ne mɔ la yɛɛ meka meahile bɛdabɛ noko a. ‘Bɛnrɛhola ɛleka mɔɔ melɛkɔ la kɔ’. 34#Dw 15.12,17; 1 Dw 3.23; 2 Dw 5 Memaa bɛ mɛla fofolɛ: Bɛhulo bɛ nwo ngoko ngoko. Kɛ mezi mehulo bɛ la, zɔhane ala yɛɛ bɛhulo bɛ nwo ngoko ngoko a. 35Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.”
Gyisɛse se Pita bakpo ye
(Mat 26.31-35; Mak 14.27-31; Luk 22.31-34)
36Saemɔn Pita bizale ye kɛ, “Awulae, na nienwu a ɛkɔ a?”
Gyisɛse buale ye kɛ, “Kɛkala, ɛleka mɔɔ melɛkɔ la, ɛnrɛhola me toa, na nzinlii ɛbadoa me lɔ.”
37Pita bizale ye kɛ, “Awulae, duzu ati a menrɛhola wɔ toa kɛkala ɛ? Meziezie me nwo kɛ saa ewule bɔbɔ a menwɔwu menwɔmaa wɔ.”
38Gyisɛse buale ye kɛ, “Amgba wɔboɔboa ɛ nwo kɛ ɛkɛwu ɛkɛmaa me ɔ? Meka nɔhalɛ ne meahile wɔ: Akɔlɛ kabɔ la ɛnee wɔha ye fane nsa kɛ ɛnze me.”
Currently Selected:
Dw 13: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
