Mɔl 37
37
Dwosefi nee ɔ mediema mrenya ne mɔ
1Gyekɔbo dɛnlanle ɔ ze abo zo ne wɔ Keena azɛlɛ zo. 2Gyekɔbo abusua ne anwo tetedwɛkɛ ɛne:
Dwosefi lile ɛvolɛ bulu nee nsuu la ɛnee ɔ nee ɔ mediema ne mɔ a fa mboane ne mɔ kɔ adidi a. Ɔ nee ɔ mediema mɔɔ le ɔ ze mraalɛ Belehaa nee Zelepa amra mrenya ne mɔ a kɔ a. Ɛnee mɔɔ ɔ mediema ne mɔ yɛ la ɛnyɛ ye fɛ, yemɔti ɔbaka ɔkile ɔ ze.
3Ɛnee Gyekɔbo kulo Dwosefi tɛla ɔ mra mɔɔ ɛha la amuala, ɔboalekɛ ɔyɛle ɛrelera la yɛɛ ɔwole ye a. Ɔkpomgbale tɛladeɛ tendenle mɔɔ lɛ ɔ sa ndendenle la ɔmanle ye. 4Na mɔɔ ɔ mediema ne mɔ nwunle kɛ bɛ ze kulo ye edwɛkɛ tɛla bɛ la, bɛangulo ye edwɛkɛ yɛɛ bɛ nee ye ambɔ nzɛmedɛ.
5Kenle ko Dwosefi hanle ɛlalɛ, na mɔɔ ɔhanle ɔhilele ɔ mediema ne mɔ la, akee bɛhyile ye bɔkɔɔ. 6Ɔhanle ɔhilele bɛ kɛ, “Bɛdie ɛlalɛ bie mɔɔ meha la: 7Ɛnee ɔle kɛ yɛwɔ ɛya nu yɛlɛkyekye hwiiti mɔɔ yɛpɛ la avile avile. Na nea, me file ɛdeɛ ne dwazole gyinlanle senze, na bɛ ɛdeɛ ne mɔ rabɔle yiale ye na bɛbɔle bɛ ti aze bɛmanle me ɛdeɛ ne.”
8Ɔ mediema ne mɔ bizale ye kɛ, “Ɛnee ɛdwenle kɛ ɛbali yɛ nwo zo belemgbunli ɔ? Anzɛɛ ɛdwenle kɛ wɔmɔ yɛɛ ɛbazie yɛ a?” Yemɔti ye ɛlalɛ ne mɔɔ ɔhanle nee ɔ nloa edwɛkɛ ne ati, bɛhyile ye bɔkɔɔ.
9Dwosefi eza hanle ɛlalɛ bieko, na ɔhanle ɔhilele ɔ mediema ne mɔ. Ɔse, “Bɛdie, meha ɛlalɛ bieko. Menwunle kɛ sɛnzɛne ne, yɛɛ siane ne, yɛɛ nwɔlɔra bulu nee ko ɛlɛbɔ bɛ ti aze amaa me.”
10Ɔhanle ɛlalɛ ne ɔhilele ɔ ze nee ɔ mediema ne mɔ la, ɔ ze hwile ɔ nyunlu, na ɔzele ye kɛ, “Duzu ɛlalɛ a wɔha la? Ɛkpondɛ wɔaze kɛ medame, ɛ nli, yɛɛ ɛ mediema mrenya ne mɔ yɛbaradu yɛagua ɛ nyunlu yeabɔ yɛ ti aze yɛamaa wɔ ɔ?” 11#Gyi 7.9 Na akee ɔ mediema mrenya ne mɔ anye bolole ɔ nwo na ɔ ze ɛdeɛ, ɔvale edwɛkɛ ne ɔziele ɔ ti anu.
Bɛdɔne Dwosefi na bɛva ye bɛhɔ Yigyibiti
12Kenle ko Dwosefi amediema ne mɔ vale bɛ ze mboane ne mɔ hɔle adidi wɔ Hyikɛm. 13Gyekɔbo zele Dwosefi kɛ, “Ɛ mediema ne mɔ ɛva mboane ne mɔ ɛhɔ adidi wɔ Hyikɛm. Bɛla maa menzoa wɔ bɛ nwo lɔ.”
Dwosefi buale kɛ, “Egya, mewɔ ɛke, soa me.”
14Gyekɔbo zele ye kɛ, “Kɔ kɔnlea ɛ mediema ne mɔ saa bɛ nwo le kpalɛ a, na wɔanlea kɛ mboane ne mɔ noko si de la, na sia baha kile me.” Yemɔti Dwosefi ɔ ze zoanle ye vi Hibulɔn Bɔnza na ɔhɔle Hyikɛm.
Dwosefi dwule Hyikɛm 15na ɔnnwu ɔ mediema ne mɔ la, ɛnee akee ɔluolua nu wɔ Hyikɛm ɛbɔ ne anu. Nrenya bie nwunle ye na ɔbizale ye kɛ, “Duzu a ɛkpondɛ a?”
16Dwosefi buale ye kɛ, “Melɛkpondɛ me mediema mrenya ne mɔ. Mebodo wɔ, kile me ɛleka mɔɔ bɛva bɛ mboane ne mɔ bɛhɔ adidi la.”
17Nrenya ne buale ye kɛ, “Mendele kɛ bɛlɛka kɛ bɛkɔ Dotan, yemɔti bɛhɔ.” Na Dwosefi doale bɛ na ɔhɔnwunle bɛ wɔ Dotan.
18Bɛnwunle kɛ ɔlua moa moa lɔ ɔlɛba la, bɛhɔle ɔ ti akpamo kɛ bɛku ye. 19Bɛhanle bɛhilele bɛ nwo ngoko kɛ, “Ahenle ne mɔɔ ka ɛlalɛ ne la a ɛlɛba la. 20Bɛrɛla bɛmaa yɛhu ye na yɛvuandi ye funli ne yɛdo ahuma ne mɔ ko anu; na yɛhɔha kɛ nanemgbole bie ɛhye ye ɛli; na yɛnlea kɛ ye ɛlalɛ ne mɔɔ ɔka la kɛzi kɛwie ye la.”
21Na mɔɔ Wulubɛn dele la, ɔliele ye ɔvile bɛ sa nu. Ɔzele kɛ, “Bɛmmamaa yɛku ye. 22Bɛmmamaa yɛka mogya biala yɛgua. Bɛvuandi ye bɛdo kuma ɛhye mɔɔ wɔ fienemgbole ye anu la anu. Bɛmmafa bɛ sa bɛka ye.” Ɔyɛle ɛhye, amaa yealie ye yeavi bɛ sa nu, na nzinlii yeava ye yeahɔmaa ɔ ze. 23Yemɔti mɔɔ Dwosefi radwule ɔ mediema mrenya ne mɔ anwo ɛkɛ ne la, bɛhyele ye, bɛkpolole ye tɛladeɛ tendenle anu meɛbea ne mɔɔ ɔwula la, 24na bɛvale ye bɛdole kuma ne anu. Ɛnee nzule ɛnle kuma ne anu, yɛɛ ɛhwee ɛnle nu.
25Akee bɛdɛnlanle aze kɛ bɛdi debie; na bɛmanle bɛ nye zo la, bɛnwunle kɛ Yehyemeeyɛle adendulɛma ekpunli bie ɛlɛba. Bɛvi Geleade, bɛlɛ bɛ afunlumu mɔɔ zozo ɛyɛlɛ, alufuanlɛ, yɛɛ ayile ndɔkɛ bɛlɛkɔ Yigyibiti. 26Na Dwuda zele ɔ mediema ne mɔ kɛ, “Saa yɛku yɛ diema ne na yɛminli ɔ bo zo a, duzu nvasoɛ a yɛnyia a? 27Bɛrɛla, bɛmaa yɛdɔne ye yɛmaa Yehyemeeyɛlema ɛhye mɔ. Bɛmmamaa yɛfa yɛ sa yɛka ye, na ɔle yɛ diema. Yɛdayɛ ko ne ala ɔ.” Na ɔ mediema ne mɔ kponlenle zolɛ. 28#Gyi 7.9 Medean gualilɛma ne radwule ɛkɛ ne la, bɛyele Dwosefi bɛvile kuma ne anu, na bɛdɔnenle ye dwɛtɛ fufule abulanwiɔ bɛmanle Yehyemeeyɛlema, na bɛ nee ye hɔle Yigyibiti.
29(Ɛnee Wulubɛn ɛnle ɛkɛ.) Mɔɔ ɔziale ɔrale la, ɔhɔle kuma ne anwo na ɔnwunle kɛ Dwosefi ɛnle nu. Ɔsuosuanle ye tɛladeɛ ne mɔɔ ɔwula la anu, 30na ɔziale ɔhɔle ɔ mediema ne mɔ anwo ɛkɛ ne ɔhɔbizale bɛ kɛ, “Kakula ne ɛnle ɛkɛ; na mame, kɛ menyɛ me nwo ɛ?”
31Na bɛhunle abɔnkye ko, bɛvale ye mogya bɛyɛle Dwosefi tɛladeɛ ne anu. 32Bɛvale tɛladeɛ anu meɛbea ne bɛrɛlɛle ɔ ze na bɛhanle kɛ, “Debie mɔɔ yɛnwu ye la ɛne, nea saa ɛ ra ne tɛladeɛ ne a?”
33Gyekɔbo nleanle tɛladeɛ ne na ɔzele kɛ, “Me ra nrenya ne tɛladeɛ ne ɔ; nanemgbole bie ɛhu ye, ɛtete Dwosefi bɔkɔɔ?” 34Na Gyekɔbo suosuanle ye tɛladeɛ ne mɔɔ ɔwula la anu, ɔvale ɛrele ɔpɛle ɔ bo, na ɔzunle ɔ ra ne mekɛ dɔɔnwo. 35Ɔ mra mrenya ne mɔ nee ɔ mra mraalɛ ne mɔ amuala rakyekyele ɔ rɛle, noko yeamkponle na ɔhanle kɛ, “Kyɛkyɛ, mebava nyane meawu meahɔ ɛbolɔ lɔ meahɔdo me ra ne.” Na ɔ ze hɔle zolɛ zunle ye.
36Mekɛ ne anu ɛnee Medeanema ne mɔɔ dɔle Dwosefi la ɛdɔne ye bieko wɔ Yigyibiti ɛmaa Pɔtefaa, Yigyibiti Falo#37.36 Falo: Yigyibiti belemgbunli ne abɔdinli ɔ. Ɔnle duma. ne sinzavolɛma safohyenle ne.
Currently Selected:
Mɔl 37: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
