Mɔl 36

Yisɔ abo zo amra

(1 Edk 1.34-37)

1Ɛhye mɔ a le Yisɔ abo zo amra; bɛdabɛ ko ne ala a bɛfɛlɛ bɛ Yidɔmma la. 2Yisɔ gyale Keena mraalɛ. Bɛmɛ a le Hɛtenli Yilɔn ara Eda nee Enaa ara Ɔhɔlebama. Enaa ɔ ze a le Haevaenli Zebɛyɔn, 3yɛɛ akee Yehyemeeyɛle ara Basɛmate mɔɔ ɔ diema raalɛ a le Nɛbeeyo la. 4Eda nee Yisɔ wole Ɛlaefaze; Basɛmate wole Riliwɛle, 5yɛɛ Ɔhɔlebama wole Gyiyɛhye, Gyeelam, yɛɛ Kɔla. Yisɔ amra mrenya mɔɔ ɔwole bɛ wɔ Keena azɛlɛ zo la ɛne.

6Akee Yisɔ vale ye mraalɛ ne mɔ, ɔ mra mrenya nee mraalɛ, yɛɛ ye awuke nu amra amuala, ye nlankɛ, ye nyɛmoa nee ye agyadeɛ biala mɔɔ ɔnyianle wɔ Keena azɛlɛ zo la, na ɔvile ɔ diema Gyekɔbo anwo ɛkɛ ɔhɔle maanle bie anu moa moa. 7Ɔluakɛ ɛnee bɛ agyadeɛ ne mɔ ɛyɛ mgbole mɔɔ ɔ nee ɔ diema Gyekɔbo bɛngola bɛmbɔ nu bɛndɛnla a. Ɛleka mɔɔ ɛnee bɛde la ɛyɛ ekyi, ɔngola ɔnzɔ bɛ nee bɛ nlankɛ ne mɔ. 8Yemɔti Yisɔ hɔdɛnlanle Siyɛ maanle nu awoka ne mɔ azo. Yisɔ a le Yidɔm.

9Yisɔ mɔɔ zole Yidɔmma la abo zo amra ɛne: 10-13Yisɔ aye Eda wole nrenya ko, Ɛlaefaze; Ɛlaefaze wole mrenya nnu: Timan, Omaa, Zifo, Geetam, yɛɛ Kinaeze. Eza ɔvale raalɛ bieko, bɛfɛlɛ ye Temena. Ɔ nee ye wole ralɛ nrenya ko; bɛfɛlɛ ye Amalɛke.

Yisɔ aye Basɛmate wole nrenya ko bɛfɛlɛ ye Riliwɛle. Riliwɛle wole mrenya nna: Neehate, Zilaa, Hyama, yɛɛ Mezaa.

14Yisɔ aye Ɔhɔlebama mɔɔ ɔ ze a le Zebɛyɔn ara Enaa la wole mrenya nsa: Gyiyɛhye, Gyeelam, yɛɛ Kɔla.

15Mbusua ekpunli ekpunli mɔɔ Yisɔ zole bɛ la ɛne. Yisɔ ara kpanyinli Ɛlaefaze zole mbusua ekpunli ekpunli ɛhye mɔ: Timan, Omaa, Zifo, Kinaeze, 16Kɔla, Geetam, yɛɛ Amalɛke. Bɛ muala bɛle Yisɔ aye Eda abo zo amra, yɛɛ bɛle Ɛlaefaze abusua ekpunli ne anu mgbanyinli wɔ Yidɔm.

17Yisɔ ara Riliwɛle a zole mbusua ekpunli ekpunli ɛhye mɔ a: Neehate, Zilaa, Hyama, yɛɛ Mezaa. Bɛle Yisɔ aye Basɛmate abo zo amra yɛɛ bɛle mbusua mgbanyinli wɔ Riliwɛle abusua ekpunli ne anu.

18Yisɔ aye Ɔhɔlebama zole mbusua ekpunli ɛhye mɔ: Gyiyɛhye, Gyeelam, yɛɛ Kɔla. Mbusua mgbanyinli mɔɔ Yisɔ aye Ɔhɔlebama, mɔɔ ɔ ze a le Enaa la wole bɛ la ɛne. 19Yisɔ a zole mbusua ekpunli ɛhye mɔ amuala a, yɛɛ bɛ muala bɛle mbusua mgbanyinli wɔ Yisɔ abusua ekpunli ne anu.

Siyɛ abo zo amra

(1 Edk 1.38-42)

20-21Tete ne, ɛnee menli mɔɔ de Siyɛ azɛlɛ ne azo la a le Hɔlaenli Siyɛ abo zo amra ne mɔ. Bɛmɛ a le: Lotan, Hyobale, Zebɛyɔn, Enaa, Daehyɔn, Yizɛ, yɛɛ Daehyan. Bɛle mbusua mgbanyinli wɔ Hɔlaema avinli.

22Lotan abo zo amra a le Hɔlae nee Himan mbusua ne mɔ anu amra. (Lotan lɛ ɔ diema raalɛ, bɛfɛlɛ ye Temena.)

23Hyobale abo zo amra a le Alevan, Manahate, Yibale, Hyifo, yɛɛ Onam.

24Zebɛyɔn amra mrenya nwiɔ: Eyaa nee Enaa. (Enaa ɛhye a vale ɔ ze Zebɛyɔn asoaso ne mɔ hɔle adidi wɔ fienemgbole ne anu, mɔɔ ɔhɔvindele nzubula wuluwulu ne mɔ azo la). 25-26Enaa ara nrenya a le Daehyɔn. Daehyɔn abo zo amra a le mbusua ekpulike ekpulike ɛhye mɔ: Hɛmedan, Ɛhyeban, Yetelan, yɛɛ Kilan. Enaa lɛ ɔ ra raalɛ, bɛfɛlɛ ye Ɔhɔlebama.

27Yizɛ abo zo amra a le Belehan, Zeeyavan, yɛɛ Ekan.

28Daehyan abo zo amra a le Ɛɛze nee Ɛlan.

29-30Hɔlae mbusua ekpunli ekpunli mɔɔ wɔ Yidɔm azɛlɛ zo la mgbanyinli a le Lotan, Hyobale, Zebɛyɔn, Enaa, Daehyɔn, Yizɛ, yɛɛ Daehyan.

Yidɔm Arelemgbunli

(1 Edk 1.43-54)

31-39Menli ɛhye mɔ lile arelemgbunli wɔ Yidɔm kolaa na Yizilayɛma anyia arelemgbunli azie bɛ.

Biyɔ ara Bila mɔɔ vi Denehabaa

Zilaa ara Dwobabe mɔɔ vi Bɔzelaa

Huhyam mɔɔ vi Timan la

Bidade ara Heedade mɔɔ hunle Medeanema wɔ Mowabe kpɔkɛ nu la. Ɔvi Evete.

Samelaa mɔɔ vi Maselika

Hyɔɔlo mɔɔ vi Rilihɔbo mɔɔ wɔ Azule Yufileti ne anloa la.

Akebɔ ara Beeyale Heenan

Heedade mɔɔ vi Peewu, (ɔ ye a le Mɛhɛtabɛle) Mɛhɛtabɛle ɔ nli a le Meetelɛde yɛɛ ɔ nla a le Meezahabe.

40-43Yisɔ a zole Yidɔm mbusua ekpunli ekpunli ɛhye mɔ a: Temena, Aleva, Gyitɛte, Ɔhɔlebama, Yila, Paenɔn, Kinaeze, Timan, Mebezaa, Magedeɛle, yɛɛ Ayelam. Ɛleka mɔɔ mbusua ekpunli ekpunli ɛhye mɔ ko biala dɛnlanle la, bɛvale abusua ekpunli ne duma bɛdonle ye.

Currently Selected:

Mɔl 36: NB

Highlight

Copy