Mɔl 26
26
Ayezeke de Gilaa
1Saa ɛye ɛhɔne ne mɔɔ Ebileham mekɛ zo rale la a, ɛhɔne bieko rale azɛlɛ ne azo. Na Ayezeke hɔle Filisitiama Belemgbunli Abemɛlɛke anwo lɔ wɔ Gilaa. 2Ɛdɛnkɛma yele ɔ nwo hilele ye wɔ ɛkɛ ne ɔzele ye kɛ, “Mmakɔ Yigyibiti. Tɛnla azɛlɛ ne mɔɔ menwɔze wɔ kɛ ɛdɛnla zolɛ la azo. 3#Mɔl 22.16-18 Duolua azɛlɛ ɛhye azo ala na me nee wɔ balua. Mebayila wɔ, ɔluakɛ ɛdawɔ nee ɛ bo zo amra yɛɛ mebava azɛlɛ ɛhye meamaa bɛ a, na mebali me ɛwɔkɛ ne mɔɔ membɔle ɛ ze Ebileham la azo. 4Mebamaa ɛ bo zo amra ayɛ dɔɔnwo kɛ anwomanyunlu nwɔlɔra. Mebava azɛlɛ ɛhye mɔ amuala meamaa ɛ bo zo amra, na ɛ bo zo amra anwo zo yɛɛ maanle maanle kɔsɔɔti mɔɔ wɔ ewiade la balua anyia nyilalɛ a. 5Ɔboalekɛ Ebileham diele me ne na ɔvale me folɛdulɛ, ɔlile me mɛla nee ngyehyɛlɛ ne mɔ azo.”
6Yemɔti Ayezeke dɛnlanle Gilaa. 7#Mɔl 12.13; 20.2 Menli mɔɔ wɔ maanle ne anu la bizale ye ɔ ye anwo edwɛkɛ la, ɔzele kɛ, “Ɔle me diema raalɛ”, ɔluakɛ ɔsulo kɛ ɔkɛha kɛ, “Me ye ɔ”, anrɛɛ ɔlua Relɛbɛka ati menli mɔɔ wɔ maanle ne anu la kɛhu ye, ɔboalekɛ Relɛbɛka anwo yɛ fɛ kpalɛ. 8Mɔɔ ɔdɛnlanle ɛkɛ ne ɔhyɛle kpalɛ la, kenle ko Filisitia Belemgbunli Abemɛlɛke gyi ye nvɛnzɛlɛ ne anu la, ɔnwunle kɛ Ayezeke nee ɔ ye Relɛbɛka ɛlɛdi anyezo. 9Yemɔti Abemɛlɛke vɛlɛle Ayezeke na ɔbizale ye kɛ, “Nea, raalɛ ne le ɛ ye, na duzu ati yɛɛ ɛse ɔle ɛ diema ɛ?”
Ayezeke buale kɛ, “Ɔboalekɛ ɛnee medwenle kɛ ɔlua yemɔ ɔ ti bɛkɛhu me.”
10Abemɛlɛke bizale ye kɛ, “Na ɛhye mɔɔ wɔva wɔli yɛ la abo a le duzu? Menli mɔɔ wɔ maanle ye anu la bie kola nee ye da, na anrɛɛ wɔhwe munzule kpole wɔmaa yɛ.” 11Yemɔti Abemɛlɛke bɔle ye menli ne mɔ kɔkɔ kɛ, “Ɛdawɔ biala mɔɔ ɛkɛva ɛ sa ɛkɛha nrenya ɛhye anzɛɛ ɔ ye la, ɔwɔ kɛ bɛku wɔ.”
12Ɛvolɛ zɔhane Ayezeke yɛle egyinli wɔ ɛkɛ ne azɛlɛ ne azo, na ɛbuhenle ne dwule la ye bɛyɔba ne bɔle nwolɛ ɛya. Ɛdɛnkɛma yilale ye, na ɔnyianle ɔ nwo. 13Na ɔhɔle zolɛ ɔnyianle ninyɛne, ɔkpazile toonwo akee ɔyɛle sukoavolɛ kpole kpalɛ. 14Ɔnyianle mboane nee nlankɛ dɔɔnwo; ye awuke yɛle kpole na nuhua yɛle gbudugbudu, yemɔti Filisitiama anye bolole ye. 15Filisitiama vulale ndɛtɛlɛ duoduale bula ne mɔ mɔɔ ɔ ze Ebileham maanle ye sonvolɛma bɔle wɔ mekɛ mɔɔ ɔde aze la amuala.
16Na Abemɛlɛke zele Ayezeke kɛ, “Ɛvi yɛ maanle ye anu tu, na ɛ nwo bɔbɔ akee ɛyɛ ɛzulolɛ ɛdɛla yɛ.” 17Yemɔti Ayezeke vi maanle ne anu dule na ɔhɔyɛle ye azokoɛleɛ wɔ Gilaa bɔnza ne anu na ɔdɛnlanle ɛkɛ. 18Na Ayezeke eza bɔle bula ne mɔ mɔɔ bɛbɔle bɛ wɔ mekɛ mɔɔ ɔ ze Ebileham de aze la bieko, ɔluakɛ ɔ ze Ebileham wule la, Filisitiama duoduale bula ne mɔ. Na Ayezeke vale aluma mɔɔ ɛnee ɔ ze ɛva ɛtoto bula ne mɔ la vɛlɛle bɛ.
19Ayezeke sonvolɛma ne hɔle bɔnza ne anu lɔ na bɛhɔbɔle bula bie na bɛnyianle nzule dɔɔnwo wɔ nu la, 20Gilaa menli mɔɔ ka nyɛmoa la radoale Ayezeke sonvolɛma ne mɔ bɛ nee bɛ zule nwolɛ kpolera bɛzele kɛ, “Nzule ne le yɛ ɛdeɛ.” Yemɔti ɔdonle bula ne Yisɛke,#26.20 Yisɛke: Ɔ bo a le “Kpolerazulɛ.” ɔboalekɛ bɛ nee ye zule ɔ bo zo kpolera.
21Bɛhɔbɔle bula bieko, na eza bɛlile ɔ bo zo butule, yemɔti ɔvɛlɛle ye Setena.#26.21 Setena: Ɔ bo a le “Ɛkpɔlɛ.” 22Akee ɔvi ɛkɛ ne ɔhɔle ɔ nyunlu ekyii na ɔhɔbɔle bula bieko, na yemɔ butule amba nwolɛ. Yemɔti ɔdonle ye Rilihɔbo,#26.22 Rilihɔbo: Ɔ bo a le “Ɛleka ngome.” ɔzele kɛ, “Kɛkala akee Ɛdɛnkɛma ɛmaa yɛ ɛleka, na yɛbakpazi wɔ azɛlɛ ye azo.”
23Ayezeke vi ɛkɛ ne la ɔhɔle Biyɛhyiba. 24Na Ɛdɛnkɛma yele ɔ nwo hilele ye wɔ kenle ko ne mɔɔ ɔdwule ɛkɛ ne la nɔe ne, ɔzele ye kɛ, “Mame a mele ɛ ze Ebileham Nyamenle ne a; mmasulo, ɔluakɛ me nee wɔ a lua a. Mebayila wɔ na meamaa ɛ bo zo amra azo ayɛ dɔɔnwo wɔ me sonvolɛ Ebileham ati.” 25Yemɔti ɔzile azukponle wɔ ɛkɛ ne na ɔzonlenle Ɛdɛnkɛma, na ɔzile ye ndanlɛ sua wɔ ɛkɛ. Ayezeke sonvolɛma ne bɔle bula wɔ ɛkɛ ne.
Ayezeke nee Abemɛlɛke ngyehyɛlɛ ne
26 #
Mɔl 21.22
Akee Abemɛlɛke vi Gilaa hɔle Ayezeke anwo ɛkɛ. Ɔ nee Ahɛzate mɔɔ tu ye folɛ la yɛɛ ye Safohyenlema Kpanyinli Faekɔlo a hɔle a. 27Ayezeke bizale ye kɛ, “Bɛdabɛ mumua ne bɛkyi me, bɛdu me, na duzu ati a akee bɛra me nwo ɛke a?”
28Bɛbuale ye kɛ, “Yɛnwu ye wienyi kɛ Ɛdɛnkɛma nee wɔ a lua a. Yemɔti yɛse, maa yɛha ndane yɛyɛ ngyehyɛlɛ yɛhye ɔ bo 29kɛ ɛnrɛyɛ yɛ ɛtane biala, kɛmɔ yɛanva yɛ sa yɛanga wɔ, yɛanyɛ wɔ ɛhwee na yɛgyakyi wɔ adenle anzonudwolɛ nu kɛ ɛhɔ la. Wɔmɔ, ɛle sonla mɔɔ Ɛdɛnkɛma ɛyila wɔ a.” 30Yemɔti Ayezeke dole bɛ ɛkponle, na bɛlile na bɛnlonle. 31Akee bɛ muala bɛdwazole nwonlomɔ mangyee ne ala na bɛhanle ndane. Na Ayezeke manle bɛ adenle manle bɛhɔle anzonudwolɛ nu.
32Kenle ko ne ala Ayezeke sonvolɛma ne rahanle bula mɔɔ bɛbɔ la anwo edwɛkɛ hilele ye na bɛzele ye kɛ, 33“Yɛnyia nzule.” Ɔvɛlɛle ye Hyiba.#26.33 Hyiba: Ɔ bo a le “Amonlelilɛ.” Yemɔti ɛnɛ nee ɛnɛ, bɛfɛlɛ suakpole ne Biyɛhyiba.
Yisɔ nyɛvolɛ mraalɛ ne mɔ
34Yisɔ lile ɛvolɛ abulanla la, ɔgyale Hɛtenli Biyɛlae ara raalɛ Dwudete, yɛɛ Hɛtenli Yilɔn ara raalɛ Basɛmate; 35na bɛmanle ɛbɛla ɛbɔlɛ ne bɔbɔ bɔnlebɔnlenle Ayezeke nee Relɛbɛka ati anu.
Currently Selected:
Mɔl 26: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
