Mɔl 25
25
Ebileham abo zo amra bie mɔ
(1 Edk 1.32-33)
1Ebileham gyale raalɛ bieko. Bɛfɛlɛ ye Kɛtula. 2Ɔ nee ye wole Zemelan, Dwɔkohyan, Midan, Medean, Yehyebake yɛɛ Hyua. 3Dwɔkohyan wole Hyiba nee Didan. Didan amra a le Ahyulem, Lɛtuhyem, yɛɛ Lɛɛmem. 4Medean amra mrenya a le Yifaa, Yifɛ, Heenɔko, Abaeda, yɛɛ Ɛledeeya. Ɛhye mɔ amuala le Kɛtula abo zo amra.
5Ebileham vale ye debie biala mɔɔ ɔlɛ la manle Ayezeke. 6Na ye mgbɔnla ne mɔ amra ɛdeɛ, ɔmanle bɛ ahyɛlɛ ninyɛne, yɛɛ mekɛ mɔɔ ɛnee ɔtɛwule la, ɔmanle ngakula zɔhane mɔ hwenle bɛ nwo vile Ayezeke anwo, hɔle aduduleɛ maanle bie anu.
Ebileham ewule nee ye ɛzielɛ
7-8Ebileham yɛle kpanyinli kpalɛ, ɔyɛle ɛrelera nwosonwoso na yeawu. Ɔlile ɛvolɛ ɛya ko abulasuu nee nnu. 9Ɔ mra mrenya Ayezeke nee Yehyemeeyɛle ziele ye wɔ Makepilaa Bolɛ bɔne ne anu wɔ Hɛtenli Zohaa ara Yifolɔn azɛlɛ ne azo aduduleɛ afoa nu mɔɔ kɔne Mameli la. 10Azɛlɛ ɛhye a Ebileham dɔle vile Hɛtema ɛkɛ ne la. Ɛkɛ ne a bɛziele Ebileham nee ɔ ye Sɛla a. 11Ebileham ewule ne anzi, Nyamenle yilale Ayezeke. Na Ayezeke dɛnlanle bula ne mɔɔ bɛfɛlɛ ye “Teasenli ne mɔɔ nwu me la Bula” ne anwo.
Yehyemeeyɛle abo zo amra
(1 Edk 1.28-31)
12Ebileham ara Yehyemeeyɛle, mɔɔ ɔ nee Sɛla Yigyibitinli sonvolɛ raalɛ Heega wole la, 13wole mralɛ mrenya ɛhye mɔ. Bɛ aluma yɛɛ bɛ awolɛ nu, kɛ bɛsi bɛdoa zolɛ la ɛne: Nɛbeeyo a le kpanyinli a. Akee Kidaa, Adebili, Mebesam, 14Mehyema, Dumaa, Masa, 15Heedade, Tima, Gyitɛ, Neefehye, yɛɛ Kidɛmaa. 16Menli ɛhye mɔ yɛle mbusua ekpunli ekpunli bulu nee nwiɔ mgbanyinli yɛɛ bɛvale bɛ aluma bɛtotonle bɛ namunamu nee bɛ azokoɛleɛ ne mɔ. 17Yehyemeeyɛle lile ɛvolɛ ɛya ko ɛvolɛ abulasa nee nsuu, na ɔwule, na bɛziele ye. 18Yehyemeeyɛle abo zo amra ne dɛnlanle Havelaa nee Hyulu mɔɔ saa ɛlɛkɔ Aselea a ɛnee ɔwɔ Yigyibiti aduduleɛ la. Bɛ nee Ebileham abo zo amra mɔɔ hale la andɛnla.
Yisɔ nee Gyekɔbo awolɛ ne
19Ebileham ara nrenya Ayezeke abo zo amra ɛne: Ebileham wole Ayezeke. 20Ayezeke lile ɛvolɛ abulanla la yɛɛ ɔgyale Relɛbɛka a. Relɛbɛka le Arelamenli Bɛtuwɛle mɔɔ vi Mɛsɔpɔteemea la ara raalɛ. Ɔ diema nrenya a le Leeban. 21Kɛmɔ ɛnee Relɛbɛka ɛnwo la ati, Ayezeke zɛlɛle Ɛdɛnkɛma maanle ye; Ɛdɛnkɛma diele ye nzɛlɛlɛ na ɔ ye Relɛbɛka nrenzɛle. 22Ɛnee ɔlɛnrenzɛ ndalɛ, na ngakula ne mɔ bɔle ɔ bo kɛ bɛko bɛ nli akunlu. Relɛbɛka zele kɛ, “Na duzu edwɛkɛ a ɛra me nwo zo a?” Yemɔti ɔhɔle kɛ ɔkabiza nwolɛ wɔ Ɛdɛnkɛma ɛkɛ.
23Na Ɛdɛnkɛma zele ye kɛ,
“Maanle nwiɔ a gua ɛ kunlu a;
Ɛbawo ndalɛ, na bɛ nloa ɛnrɛzɛ.
Ko anwo bayɛ se adɛla ko;
Kpanyinli ne bazonle ekyi ne.”
24Mekɛ ne dwule na ɔ ko hanle ye la, ɔwole ndalɛ, mrenya nwiɔ. 25Kpanyinli ne le kɔkɔlɛ, ɔ nwo amuala le enrinli dɔɔnwo, na bɛdonle ye Yisɔ.#25.25 Yisɔ: Duma ɛhye bɛfa ye kɛ yemɔ a le Siyɛ, maanzinli ne mɔɔ nzinlii Yisɔ abo zo amra dɛnlanle nu la. Siyɛ abo a le “anwo enrinli.” 26Akee bɛwole ekyi ne, na yemɔ ɔkara la, ɛnee ɔlɛ Yisɔ agyakɛ taboa ne anzi. Na bɛdonle ye Gyekɔbo.#25.26 Gyekɔbo: Ɔ bo a le “ɔsɔ egyakɛ taboa nzi.” Ayezeke lile ɛvolɛ abulasia la yɛɛ ɔwole bɛ a.
Yisɔ tɔne ye awolɛ kpanyinli gyinlabelɛ ne
27Ngakula ne mɔ nyinle la Yisɔ nyianle ɛbɔlɛ di yɛɛ ɔze ɛbɔlɛlilɛ nye zo. Gyekɔbo noko yɛle sonla bɛtɛɛ, na dahuu ɔwɔ sua nu. 28Ayezeke hulole Yisɔ, ɔboalekɛ ɛnee ɔmaa ɔnyia ɛbɔ nu nane ɔdi; na Relɛbɛka noko hulole Gyekɔbo.
29Kenle ko mɔɔ ɛnee Gyekɔbo ɛlɛto ye aluba tolo la Yisɔ vi ɛbɔ nu rale, na ɛnee ɛhɔne ɛlɛku ye kpalɛ. 30Ɔzele Gyekɔbo kɛ, “Maa me aluba kɔkɔlɛ tolo ye bie meno na me nye zo ɛlɛbulu!” (Ɛhye ati a bɛvɛlɛle ye Yidɔm#25.30 Yidɔm: Ɔ bo a le “kɔkɔlɛ.” la).
31Gyekɔbo zele ye kɛ, “Ɛnee dumua tɔne wɔ awolɛ kpanyinli gyinlabelɛ ne maa me.”
32Yisɔ buale kɛ, “Melɛwu, awolɛ kpanyinli noko ɔdaye ɔkile duzu?”
33 #
Hib 12.16
Gyekɔbo zele ye kɛ, “Ɛnee ka ndane kɛ ɔvi ɛnɛ mɔɔ kɔ la, medame a mele kpanyinli a.”
Yemɔti Yisɔ hanle ndane ne na ɔdɔnenle ye awolɛ kpanyinli gyinlabelɛ ne ɔmanle Gyekɔbo. 34Akee Gyekɔbo manle Yisɔ kpanwo nee aluba kɔkɔlɛ tolo ne bie. Yisɔ lile kpanwo ne, ɔnlonle tolo ne, ɔnlonle nzule ɔguale zolɛ na ɔdwazole ɔhɔle. Ɛnee kɛ ɔyɛle mɔɔ Yisɔ kpole ye awolɛ nu gyinlabelɛ la ɛne.
Currently Selected:
Mɔl 25: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
