Mɔl 19
19
Sodɔmma ɛtaneyɛlɛ ne
1Nyamenle soanvolɛma nwiɔ ne dwule Sodɔm nɔsolɛ nu; ɛnee Lɔɔto de Sodɔm anlenkɛ kpole ne anloa. Mɔɔ Lɔɔto nwunle bɛ la, ɔdwazole ɔhɔyiale bɛ, ɔbutule bɛ nyunlu mutule nu 2na ɔzele kɛ, “Me menle mɔ, mesɛlɛ bɛ, bɛ nee bɛ sonvolɛ ɛhɔ sua nu, bɛhɔnrinzi bɛ gyakɛ anwo na bɛla, na aleɛbahye bɛadwazo ndɛ bɛahɔ.”
Bɛbuale ye kɛ, “Kyɛkyɛ, yɛda gua ye azo nɔe.”
3Na Lɔɔto anye bolole kpalɛ ɔzɛlɛle bɛ, yemɔti bɛhakyile bɛ nwo bɛ nee ye hɔle sua nu. Lɔɔto manle ye sonvolɛma ne donle kpanwo mɔɔ mgbɔvonle ɛnle nu la, ɔdole bɛ ɛkponle na bɛlile.
4Na mɔɔ ɔdwule mekɛ mɔɔ bɛkala la, Sodɔm suakpole ne azo mrenya ngakula nee mgbanyinli, bɛ muala kɔsɔɔti, ko bɔbɔ anga amozi, bɛrale bɛrabɛnrale bɛyiale sua ne mɔɔ bɛwɔ nu la. 5Bɛvɛlɛle Lɔɔto na bɛbizale ye kɛ, “Menli mɔɔ razokoɛle wɔ nɔsolɛ ye la wɔ nienwu? Fa bɛ finde ɛke maa yɛva bɛ.”
6Lɔɔto vindele, ɔdole anlenkɛ ne anu na ɔdoale bɛ alie nwo lɔ 7ɔhɔzele bɛ kɛ, “Me mediema mrenya, mebodo bɛ, bɛmmayɛ amumuyɛ ɛhye. 8#Maa 19.22-24 Bɛdie, melɛ me mra mraalɛ nwiɔ mɔɔ ɛnze nrenya fee a. Bɛmaa menva bɛ membɛlɛ bɛ, na bɛ nee bɛ ɛyɛ debie biala mɔɔ bɛdabɛ bɛkulo la. Menli ɛhye mɔ ɛdeɛ, bɛmmayɛ bɛ ɛhwee, ɔluakɛ bɛle me nyɛvolɛ, yɛɛ ɔwɔ kɛ menea bɛ boɛ.”
9Na bɛzele ye kɛ, “Dwazo ɛkɛ ne! Wɔmɔ ɛdawɔ mumua ne ɛle ɛyɛvolɛ wɔ suakpole ye azo. Wɔmɔ ɛbahakyi yɛ kɔme nu ndɛnebuavolɛ. Yɛ nee wɔ bali ye ɛsesebɛ bɔbɔ yɛadɛla menli ɛhye mɔ.” Akee bɛholole Lɔɔto anwo zo na bɛyɛle kɛ bɛkabu anlenkɛ ne. 10Na menli nwiɔ ne dole bɛ sa hwenle Lɔɔto hɔle bɛ nwo ɛkɛ ne wɔ sua ne anu, na bɛdole anlenkɛ ne anu. 11#2 Arl 6.18 Akee bɛmanle menli mɔɔ ɛrayi anlenkɛ ne anloa la amuala anye zinle; ngakula o, mgbanyinli o, biala ɛnnwu debie, yemɔti bɛlile nvuovua bɛkpondɛle anlenkɛ ne.
Lɔɔto fi Sodɔm
12Nɔe ne ala, menli nwiɔ ne zele Lɔɔto kɛ, “Ɛlɛ awie wɔ ɛke ɔ? Ka kile ɛ mra mrenya, ɛ mra mraalɛ nee bɛ hu mɔ anzɛɛ awie biala mɔɔ ɛze ye suakpole ye azo la maa bɛvi suakpole ye azo bɛye bɛ nwo, 13ɔluakɛ yɛsɛkye suakpole ye, ɔboalekɛ bɛ ɛtaneyɛlɛ ne ɛyɛ kpole yɛɛ bɛ ɛtane ne mɔ anwo ngehanleɛ ɛdwu Ɛdɛnkɛma anyunlu, na yezoa yɛ kɛ yɛrazɛkye suakpole ye.”
14Yemɔti Lɔɔto vindele nɔe ne hɔdunwuele ɔ mra mraalɛ ne mɔ bɛ hu mɔ mɔɔ baragya bɛ la, na ɔzele bɛ kɛ, “Bɛdwazo, bɛvi suakpole ye azo bɛye bɛ nwo, ɔluakɛ Ɛdɛnkɛma ɛlɛba arazɛkye suakpole ye.” Noko bɛdwenlenle kɛ ɔlɛbɔ nzɛmedɛ.
15Aleɛbahye ne, Nyamenle soanvolɛma ne mɔ zele Lɔɔto kɛ, “Ka ɛ nwo dwazo, fa ɛ ye nee ɛ mra mraalɛ nwiɔ ne mɔɔ wɔ ɛke la nriandi, anrɛɛ bɛ muala bɛkɛdɔ nzonle wɔ suakpole ye ndeanlɛ nu.” 16#2 Pit 2.7 Noko Lɔɔto hwenlehwenlenle ɔ bo aze, yemɔti menli ne mɔ zɔle ye nee ɔ ye nee ɔ mra mraalɛ ne mɔ asa na bɛ nee bɛ rale suakpole ne kandiba, ɔluakɛ ɛnee Ɛdɛnkɛma se bɛ anwunvɔne. 17Na mɔɔ bɛ nee bɛ dwule suakpole ne kandiba la, bɛ nuhua ko zele kɛ, “Bɛnriandi bɛlie bɛ ngoane. Bɛmmato bɛ nye bɛ nzi, yɛɛ bɛmmagyinla ɛleka biala wɔ bɔnza ne anu. Bɛnriandi bɛhɔ awoka ne mɔ azo lɔ, anrɛɛ bɛkɛha esike nu.”
18Lɔɔto hanle kɛ, “O, kyɛkyɛ, me menle, 19bɛnlea, bɛ sonvolɛ ye ɛzɔ bɛ nye, na bɛze ye anwunvɔne kpole ɛhye bɛlie ye ngoane. Noko menrɛhola nriandi dwu awoka ne mɔ azo lɔ, anrɛɛ munzule ne kɛdo me adenle nu kɛmaa menwɔwu. 20Suakpole ye mɔɔ zua ɛke ala la bikye mɔɔ menriandi mekɔ zolɛ a ɔle kpalɛ a, yɛɛ eza ɔle ekyi. Bɛmaa menriandi mengɔ ɛkɛ ne na mebanyia ngoane.”
21Ɔbuale ye kɛ, “Menwu wɔ anwunvɔne ɛhye noko, menrɛzɛkye sua zɔhane mɔɔ wɔha ye edwɛkɛ la. 22Ka ɛ nwo nriandi kɔ ɛkɛ. Ɔboalekɛ saa ɛtɛdwule ɛkɛ ne a menrɛyɛ ɛhwee.” Zɔhane ati bɛvɛlɛle sua zɔhane Zowaa#19.22 Zowaa: Duma ɛhye abo a le “ekyi.”
Sodɔm nee Gomɔla ɛzɛkyelɛ
23Mɔɔ Lɔɔto dwule Zowaa la, ɛnee sɛnzɛne ne ɛdudu. 24Na Ɛdɛnkɛma manle sɔlefe nee senle vi anwuma dɔle kɛ ezule guale Sodɔm nee Gomɔla azo. 25#Mat 10.15; Luk 10.12; 2 Pit 2.6; Dwu 7 Na ɔzɛkyele azuamgbole zɔhane mɔ, bɔnza ne anu amuala, nee menli mɔɔ wɔ azuamgbole ne mɔ azo la amuala, yɛɛ debie biala mɔɔ fifile azɛlɛ ne azo la. 26Na Lɔɔto aye ne mɔɔ ɛnee li ɔ nzi la dole ɔ nye ɔ nzi, na ɔhakyile ngyenle mpila. #Luk 17.32
27Ebileham dwazole nwonlomɔ mangyee ne ala na ɔhɔgyinlanle ɛleka mɔɔ ɔgyinlanle Ɛdɛnkɛma anyunlu la. 28Ɔdole ɔ nye Sodɔm nee Gomɔla na ɔnleanle azɛlɛ ne mɔɔ la bɔnza ne anu la amuala azo, na ɔnwunle kɛ maanle ne mɔɔ ɛlɛyela la esike ne ɛdwazo bolonwonwo kɛ tɔlɔra senle. 29Ɛnee kɛ Nyamenle zile zɛkyele azuamgbole zɔhane mɔ mɔɔ wɔ bɔnza ne anu la ɛne. Noko ɔhakyele Ebileham, yemɔti ɔyele Lɔɔto ɔvile nu wɔ mekɛ mɔɔ ɔsɛkye azuamgbole mɔɔ Lɔɔto dɛnlanle zolɛ la.
Mowabema nee Amɔnoma abo
30Ɛnee Lɔɔto sulo kɛ ɔkɛdɛnla Zowaa, yemɔti ɔ nee ɔ mra mraalɛ nwiɔ ne dule vile Zowaa na bɛhɔdɛnlanle bolɛ bɔne bie anu wɔ awoka ne mɔ anu. 31Na ralɛ raalɛ kpanyinli ne zele ekyi ne kɛ, “Yɛ ze ɛyɛ kpanyinli, yɛɛ nrenya biala ɛnle azɛlɛ ye azo mɔɔ nee yɛ kɛla, kɛmɔ bɛyɛ ye ewiade amuala la. 32Bɛla, maa yɛnloa egya nwanye yɛmaa ɔbo, na yɛ nee ye ɛla, amaa yɛ nee ye anyia mralɛ yɛazie yɛ gyakɛ anu.” 33Yemɔti kenle ko ne nɔe ne bɛmanle bɛ ze nwanye bɛmanle ɔbole na ralɛ raalɛ kpanyinli ne nee ye hɔlale. Ɔbole kpole somaa, yemɔti yeannwu kɛ ɔ ra raalɛ ne zile ralale na yeayɛ ye ɛdwazolɛ nu.
34Aleɛ hyenle la, ralɛ raalɛ kpanyinli ne zele ekyi ne kɛ, “Nea, nɔe me nee egya lale. Maa yɛmaa ɔnlo nwanye ɔbo bieko ɛnɛ nɔe na ɛ nee ye ɛhɔla, na ɔlua ɔ nwo zo yɛanyia mralɛ.” 35Yemɔti kenle ko ne nɔe ne bɛmanle bɛ ze nlonle nwanye bole, na ralɛ raalɛ ekyi ne doale ye nee ye hɔlale. Noko bɛ ze annwu ye, ɔluakɛ ɔbole somaa. 36Zɛhae adenle zo yɛɛ Lɔɔto amra mraalɛ nwiɔ ne nee bɛ ze nrenzɛle a. 37Ralɛ raalɛ kpanyinli ne wole ralɛ nrenya na ɔdonle ye Mowabe.#19.37 Mowabe: Ɔ bo a le “Ɔvi egya ɛkɛ.” Ɔ bo zo amra a le Mowabema mɔɔ wɔ ɛkɛ ne ɛnɛ nee ɛnɛ la. 38Ekyi ne noko wole ralɛ nrenya na ɔdonle ye Bɛnamae.#19.38 Bɛnamae: Ɔ bo a le “Me nwo sonla akunlu ralɛ nrenya.” Ɔ bo zo amra a le Amɔnoma mɔɔ wɔ ɛkɛ ne ɛnɛ nee ɛnɛ la.
Currently Selected:
Mɔl 19: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
