Mɔl 14
14
Ebilam die Lɔɔto ngoane
1Arelemgbunli nna ɛhye mɔ, Babelonia Belemgbunli Ameleefɛle, Ɛleesaa Belemgbunli Aleyɔko, Yilam Belemgbunli Kɛdɔleewomɛ, yɛɛ Goyem Belemgbunli Taedale, 2nee arelemgbunli nnu bie nyianle konle. Arelemgbunli nnu ne mɔ a le Sodɔm Belemgbunli Bila, Gomɔla Belemgbunli Bɛhya, Adomaa Belemgbunli Hyaenabe, Zɛboyem Belemgbunli Hyɛmibɛ, yɛɛ Bila anzɛɛ Zowaa belemgbunli ne. 3Arelemgbunli nnu ɛhye mɔ vale bɛ ɛlɔnema bɔle nu wɔ Sedem Bɔnza, mɔɔ ɛnɛ bɛfɛlɛ ye Nyevile Wulera la. 4Ɛnee arelemgbunli nnu ɛhye mɔ wɔ Belemgbunli Kɛdɔleewomɛ abo, bɛzonle ye toonwo ɛvolɛ bulu nee nwiɔ. Ye ɛvolɛ bulu nee nsa ne anu, bɛdele atua. 5Ye ɛvolɛ bulu nee nna ne anu Belemgbunli Kɛdɔleewomɛ nee arelemgbunli mɔɔ ɔ nee bɛ lɛ konle nu agɔnwolɛyɛlɛ la vale bɛ ɛlɔne hɔhanle Relɛfeeyemma mɔɔ wɔ Ahyetɛlo Kaneeyem, Zuzemma mɔɔ wɔ Ham, yɛɛ Yimemma mɔɔ wɔ Hyeevi Keleateeyem la senle dwɛɛ lile bɛ nwo zo konim. 6Eza bɛhanle Hɔlaema mɔɔ wɔ Yidɔm awoka ne mɔ azo la senle, na bɛvoanle bɛ toonwo bɛhɔdwule Ɛlepɛlan, mɔɔ wɔ ɛsɛlɛ ne anloa la, 7na bɛziale bɛ nzi bɛrale Keedɛhye mɔɔ ɛnee bɛfɛlɛ ye Ɛnemehyepate la, bɛrahanle Amalɛkema nee Amɔlema mɔɔ de Heezazɔn Teemaa la senle, bɛlile bɛ muala bɛ nwo zo konim.
8-9Na Sodɔm, Gomɔla, Ademaa, Zɛboyem, yɛɛ Bila arelemgbunli vale bɛ ɛlɔnema dwazole na bɛ nee Yilam Belemgbunli Kɛdɔleewomɛ, Babelonia Belemgbunli Ameleefɛle, Ɛleesaa Belemgbunli Aleyɔko, yɛɛ Goyem Belemgbunli Taedale ɛlɔnema ne bɔle ye zo wɔ Sedem Bɔnza. Bɛle arelemgbunli nnu yɛɛ bɛ nee arelemgbunli nna ɛlɛko a. 10Sedem Bɔnza ne anu le bilewu ahuma ngome, yemɔti mɔɔ Sodɔm nee Gomɔla arelemgbunli nriandi ahɔ la, bɛhɔfolofolole ahuma ne bie mɔ anu, na arelemgbunli mɔɔ hale la nriandile hɔle awoka ne mɔ azo. 11Yemɔti ɛlɔnema ne sesale Sodɔmma nee Gomɔlama ninyɛne ne kɔsɔɔti nee bɛ aleɛ hɔle. 12Eza bɛhyele Lɔɔto, mɔɔ le Ebilam adiema nrenya ne ara nrenya ne, mɔɔ ɛnee de Sodɔm la, na bɛvale ye nee ɔ nwo ninyɛne kɔsɔɔti bɛhɔle.
13Na awie ko mɔɔ vile ɛsalɛ la nriandile rahanle hilele Hibulunli Ebilam. Ebilam ɛnee de ɛleka bie mɔɔ bikye Amɔlenli Mameli oku mbaka ne mɔ mɔɔ bɛyɛ ɛzonlenlɛ wɔ bɛ bo la. Mameli amediema mrenya a le Ɛhyekɔlo nee Enɛ, yɛɛ bɛmɛ nsa bɛle Ebilam konle nu agɔnwolɛma. 14Ebilam dele kɛ bɛhye ye awozoa ne nuokɛ bɛ nee ye ɛlɛkɔ la, ɔvale ye menli ɛya nsa bulu nee mɔtwɛ ne mɔɔ wɔ ye sua nu ɛkɛ mɔɔ yetete bɛ wɔ konle nu la, na ɔ nee bɛ voanle arelemgbunli nna ne toonwo ɔhɔdwule Dan. 15Ɔhyɛle ye ɛlɔnema ne anu na ɔvale bɛ ɔhɔle ye kpɔvolɛma ne anwo zo nɔɔzo, ɔtetale bɛ na ɔvoanle bɛ toonwo ɔhɔdwule Hobaa, wɔ Dɛmasekɛse sɔlɔ. 16Akee ɔvale ninyɛne ne amuala, ye busuanli Lɔɔto nee ɔ nwo ninyɛne, mraalɛ ne mɔ nee menli mɔɔ bɛhyele bɛ nuokɛ la amuala ɔziale ɔrale.
Mɛlekezɛdɛke Yila Ebilam
17Mekɛ mɔɔ Ebilam vi konle ne mɔɔ ɔlile Belemgbunli Kɛdɔleewomɛ nee arelemgbunli mɔɔ nee ye lua la anwo zo konim la anloa ziale rale la, Sodɔm belemgbunli ne hɔyiale ye wɔ Hyeevi Bɔnza, (mɔɔ eza bɛfɛlɛ ye “Belemgbunli Bɔnza” la). 18#Hib 7.1-10 Na Seelɛm Belemgbunli Mɛlekezɛdɛke rɛlɛle ye kpanwo nee nwanye. Mɛlekezɛdɛke le Anwuma Anwuma Nyamenle ne sɛlɛvolɛ. 19Na ɔyilale Ebilam ɔzele kɛ, “Ebilam, Anwuma Anwuma Nyamenle ne, mɔɔ bɔle anwuma nee aze la ɛyila wɔ. 20Ayɛlɛyelɛ ɛha Anwuma Anwuma Nyamenle ne mɔɔ ɛye wɔ kpɔvolɛma ne ɛmaa wɔli bɛ nwo zo konim la.” Na Ebilam hyɛle debie biala mɔɔ ɔnyianle la anu bulu na ɔdule ɛkpɔ ko ɔmanle Mɛlekezɛdɛke.
21Na Sodɔm belemgbunli ne zele Ebilam kɛ, “Fa menli ne mɔ maa me, na fa ninyɛne ne mɔ yɛ wɔ ɛdeɛ.”
22Ebilam zele Sodɔm belemgbunli ne kɛ, “Meha ndane mehile Ɛdɛnkɛma, Anwuma Anwuma Nyamenle ne mɔɔ bɔle anwuma nee aze la, 23kɛ menrɛva nyɛma anzɛɛ mgbɔlaboa zo nyɛma mɔɔ le wɔ ɛdeɛ la, na wɔanyia adenle wɔaha kɛ, ‘Medame a memaa Ebilam ɛnyia ɔ nwo a.’ 24Menrɛva ɛhwee kɛ mɔɔ me ɛlɔnema ne ɛli la, yɛɛ menli mɔɔ nee me hɔle la afoa nu ɛdeɛ ne ala. Yemɔti maa Enɛ, Ɛhyekɔlo, yɛɛ Mameli ɛva bɛ afoa nu ɛdeɛ mɔɔ wɔ nu la.”
Currently Selected:
Mɔl 14: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
