Mɔl 13
13
Ebilam nee Lɔɔto avinli tete
1Na Ebilam vale ɔ ye, yɛɛ Lɔɔto nee debie biala mɔɔ ɔlɛ la vile Yigyibiti, na ɔhɔle Keena nyiakɛ. 2Ebilam yɛle sukuavolɛ kpole kpalɛ, ɔlɛ nyɛmoa, dwɛtɛ fufule, yɛɛ ezukoa nvutuke. 3Na ɔluoluale nyiakɛ lɔ toonwo ɔhɔdwule Bɛtɛle, ɛleka mɔɔ ɔlumuale ɔbɔle ye aseseɛ ne la, wɔ Bɛtɛle nee Eyae avinli. 4Ɔhɔle ɛleka ne mɔɔ ɔlumuale ɔzile ye azukponle ne la, na ɔzonlenle Ɛdɛnkɛma.
5Lɔɔto noko mɔɔ nee Ebilam hɔle la, ɔdaye ɔnyianle mboane, mbɔnkye, nlankɛ, yɛɛ ndanlɛ azua. 6Yemɔti ɔrale kɛ ɛnee akee bɛ mu nwiɔ bɛnzo azɛlɛ ne mɔɔ bɛde zolɛ la azo. Ɔluakɛ bɛ mu nwiɔ bɛ anwonyia ne mɔ ɛyɛ mgbole yɛɛ eza bɛ nwo ɛzo. 7Yemɔti ɔngyɛ ɛnee kpolera ɛdɔ bɛ mu nwiɔ bɛ menli mɔɔ nea bɛ nyɛmoa ne mɔ la avinli. (Mekɛ ne anu ɛnee Pɛlɛzema nee Keenama wɔ azɛlɛ ne azo.)
8Ebilam zele Lɔɔto kɛ, “Mmamaa yɛmaa kpolera tɔ yɛ mu nwiɔ yɛ avinli, anzɛɛ wɔ menli nee me menli mɔɔ nea yɛ nyɛmoa ne mɔ la avinli, ɔboalekɛ yɛle abusua ko. 9Azɛlɛ tɛtɛtɛlɛlɛ a la yɛ nyunlu lɔ la. Te ɛ nwo. Saa ɛkɔ bɛne zo a, mebahɔ fema zo, yɛɛ saa ɛkɔ fema zo noko a, mebahɔ bɛne zo.”
10 #
Mɔl 2.10
Lɔɔto dole ɔ nye nleanle azɛlɛ ne na ɔnwunle kɛ Dwɔdan Bɔnza ne anu, toonwo mɔɔ kɔdwu Zowaa la lɛ nzule dɔɔnwo kɛ Ɛdɛnkɛma tola ne anu nee Yigyibiti azɛlɛ zo la. (Mekɛ ne anu ɛnee Ɛdɛnkɛma ɛtɛsɛkyele azuamgbole Sodɔm nee Gomɔla.) 11Na Lɔɔto vale Dwɔdan Bɔnza na ɔvale ɔ ti ɔbɔle aduduleɛ ɔdele ɔ nwo ɔvile Ebilam anwo. 12Ebilam dɛnlanle Keena azɛlɛ zo, na Lɔɔto hɔdɛnlanle azuamgbole ne mɔ mɔɔ wɔ Bɔnza ne anu la bie mɔ azo na akee ɔdule ɔhɔdɛnlanle Sodɔm. 13Sodɔmma le amumuyɛ; bɛyɛle ɛtane mgbole bɛtiale Ɛdɛnkɛma.
Ebilam tu ahɔ Hibulɔn
14Mɔɔ Lɔɔto dele ɔ nwo vile Ebilam anwo la, Ɛdɛnkɛma zele Ebilam kɛ, “Gyinla ɛleka mɔɔ ɛwɔ la, na maa ɛ nye zo nea ɛbɔ nu afoa nu, nyevile nu afoa nu, yɛɛ aduduleɛ nee adɔleɛ afoa nu, 15#Gyi 7.5 ɔluakɛ mebava azɛlɛ ne mɔɔ ɛ nye dua ye la amuala meamaa wɔ nee ɛ bo zo amra, meamaa yeayɛ bɛ ɛdeɛ bɔkɔɔ. 16Mebamaa ɛ bo zo amra azo kɛ ɛnwea, mɔɔ bɛnrɛhola bɛ tia a. 17Dwazo na kpɔsa kɔ azɛlɛ ne ati nee ɔ bo, kpɔsa nwu azɛlɛ ne tɛtɛlɛ nee ye tendenle, ɔluakɛ mebava meamaa wɔ.” 18Yemɔti Ebilam dudule ye ndanlɛ sua ne na ɔhɔdɛnlanle Mameli oku mbaka ne mɔ mɔɔ wɔ Hibulɔn la anwo. Na ɛkɛ ne, ɔzile azukponle ɔmanle Ɛdɛnkɛma.
Currently Selected:
Mɔl 13: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
