Gyi 8
8
1Na Sɔɔlo liele ye ɛhunlɛ ne dole nu.
Sɔɔlo yɛ Asɔne ne kpɔdekpɔde
Ɔvi kenle ko ne ala bɛbɔle ɔ bo kɛ bɛyɛ diedima mɔɔ wɔ Gyɛlusalɛm la kpɔdekpɔde. Yemɔti diedima ne amuala zandele; bie mɔ hɔle Dwudiya nee Samɛlea maanzinli ne mɔ anu, na ɔhale ɛzoanvolɛma ne ala. 2Na Nyamenlezonlenlɛma bie mɔ hɔvale Sitivin hɔziele ye na bɛzunle ye kpole kpalɛ.
3 #
Gyi 22.4-5; 26.9-11 Na Sɔɔlo bɔle mɔdenle ala kɛ ɔkɛzɛkye Asɔne ne. Ɔwolowolole azua nu ɔhɔhwenle mraalɛ nee mrenya mɔɔ ɛzɔ diedi ne anu la na ɔvale bɛ ɔvindele ɔmanle bɛguale bɛ efiade.
Bɛka Edwɛkpa ne wɔ Samɛlea
4Diedima ne bɔle asande la bɛnriandile bɛhɔle azua azua zo na bɛhɔhanle Edwɛkpa ne. 5Felepe hɔle Samɛlea suakpole bie azo hɔhanle Mɛzaya ne anwo edwɛkɛ hilele menli mɔɔ wɔ ɛkɛ ne la. 6Mɔɔ menli ne diele na bɛnwunle nwanwane ninyɛne mɔɔ ɔyɛle la, bɛ muala bɛliele bɛlile, 7ɔluakɛ ɔmanle sunsum ɛtane dɔɔnwo deɛdeanle nu na bɛvile menli somaa ne ala anwo. Menli mɔɔ ɛdwidwe nee abuburama dele kpɔkɛ, 8na suakpole ne azo amra lile fɛlɛko kpole.
9Nrenya bie wɔ suakpole ne azo; bɛfɛlɛ ye Saemɔn. Nrenya ɛhye ɛva ngonyiayelɛ ɛha Samɛlea maanlema ne ɛzulolɛ, na ɔka kɛ ɔdaye ɔle sonlakpole. 10Awie biala mɔɔ wɔ maanle ne anu, mgbanyinli nee ngakula muala tie ye. Bɛse, “Sonla ɛhye a le Nyamenle tumi ne mɔɔ bɛfɛlɛ ye ‘Tumi Bedevinli’ la.” 11Ɔvale ngonyia ɔdanle bɛ nye zo na ɔmanle bɛzulole ye kpalɛ na bɛliele ye bɛlile. 12Na mɔɔ bɛdele Edwɛkpa ne mɔɔ fane Nyamenle Belemgbunlililɛ ne anwo nee Gyisɛse Kelaese duma ne mɔɔ Felepe hanle nwolɛ edwɛkɛ la, mraalɛ nee mrenya kɔsɔɔti liele lile na bɛmanle bɛzɔnenle bɛ. 13Saemɔn ɔdaye ɔliele ɔlile na bɛzɔnenle ye. Nzinlii ɔvale ɔ nwo ɔbɔnenle Felepe, na ɔ nee ye luale. Mɔɔ ɔnwunle sɛkɛlɛneɛ nee nwanwane ninyɛne mɔɔ Felepe yɛle la, ɔyɛle ye azibɛnwo kpole.
14Ɛzoanvolɛma ne dele wɔ Gyɛlusalɛm kɛ menli mɔɔ wɔ Samɛlea la ɛzɔ Nyamenle edwɛkɛ ne anu la bɛzoanle Pita nee Dwɔn wɔ lɔ. 15Bɛhɔle la bɛzɛlɛle Sunsum Nwuanzanwuanza ne bɛmanle diedima ne mɔ. 16Ɔluakɛ ɛnee bɛzɔne bɛ wɔ Awulae Gyisɛse duma nu ɛdeɛ, noko Sunsum Nwuanzanwuanza ne ɛtɛbale bɛ nwo zo. 17Pita nee Dwɔn vale bɛ sa guale menli ne mɔ ati zo zɛlɛle, na bɛnyianle Sunsum Nwuanzanwuanza ne.
18-19Mɔɔ Saemɔn nwunle kɛ ɛzoanvolɛma ne fa bɛ sa gua menli ti zo a bɛnyia Nyamenle Sunsum ne la, ɔhanle kɛ, “Bɛlie ezukoa na bɛmaa medame noko tumi ɛhye bie, amaa awie biala mɔɔ menwɔva me sa menwɔgua ɔ ti zo la anyia Sunsum Nwuanzanwuanza ne bie.”
20Na Pita buale ye kɛ, “Abule ɛbu wɔ nee wɔ ezukoa ne amuala, kɛ ɛkɛdwenle kɛ bɛfa ezukoa a bɛtɔ Nyamenle ahyɛlɛdeɛ a! 21Ɛyɛ yɛ gyima ɛhye bie a ɔnrɛyɛ boɛ, ɔluakɛ ɛnli nɔhalɛ wɔ Nyamenle anyunlu. 22Zɔhane ati, nu ɛ nwo wɔ wɔ amumuyɛ adwenle ɛhye anwo, na sɛlɛ Awulae kɛ saa ɔyɛ na ɔkɛyɛ boɛ a, ɔva wɔ ɛtane ɔhyɛ wɔ kɛ wɔdwenle zɔhane a. 23Ɔluakɛ menwu kɛ ɛle anyebolo kpole kpalɛ na ɛtane ɛbɔ wɔ kpanwu.”
24Saemɔn zele Pita nee Dwɔn kɛ, “Mekpa bɛ kyɛlɛ, bɛzɛlɛ Awulae bɛmaa me, amaa mɔɔ bɛha la biala anzi me nwo zo.”
25Nzinlii Pita nee Dwɔn hanle Edwɛkpa ne, lile Awulae anwo daselɛ, na bɛziale bɛhɔle Gyɛlusalɛm. Bɛkɔ la bɛvale Samɛlea namunamu ne mɔ dɔɔnwo azo bɛhanle Edwɛkpa ne.
Felepe nee Yiteyopeanli kpanyinli ne
26Awulae soanvolɛ dendɛle zele Felepe kɛ, “Kɔ nyiakɛ nehane, wɔ Gyɛlusalɛm nee Gaza adenle ne azo.” (Adenle ɛhye la ɛsɛlɛ zo; ɛnɛ bɛnva zolɛ.) 27-28Na Felepe zile nu hɔle. Ɛnee Yiteyopeanli kpanyinli bie mɔɔ le abɔlɔba kpanyinli mɔɔ nea Yiteyopea Belemgbunli Raalɛ ne gya zo la ɔdaye ɔlua adenle ne azo. Ɔhɔle Nyamenle ɛzonlenlɛ wɔ Gyɛlusalɛm na ɔde ye ehwili nu yezia ɔlɛkɔ ye sua zo. Mɔɔ ɔde ehwili ne anu la ɛnee ɔlɛkenga Nyamenle kpɔmanvolɛ Ayezaya nwoma ne. 29Sunsum ne zele Felepe kɛ, “Twe bikye ehwili ne.” 30Yemɔti Felepe nriandile hɔle ehwili ne anwo, na ɔdele kɛ ɔlɛkenga Nyamenle kpɔmanvolɛ Ayezaya nwoma ne, na ɔbizale ye kɛ, “Asoo ɛte mɔɔ ɛlɛkenga la abo?”
31Nrenya ne buale ye kɛ, “Na kɛ mesi meyɛ mete ɔ bo ɛ? Kyesɛ awie kilehile nu kile me.” Na ɔmanle Felepe radɛnlanle ehwili ne anu wɔ ɔ nwo ɛkɛ ne. 32#Aye 53.7-8 Ɛleka mɔɔ ɛnee ɔlɛkenga la se,
“Ɔle kɛ boane mɔɔ bɛ nee ye ɛhɔ ahunleɛ,
anzɛɛ boaneralɛ mɔɔ bɛlɛpepɛ ye enrinli la,
yeambuke ɔ nloa.
33Bɛgolole ɔ nwo, bɛbuale ye mgbɔvondɛne,
awie ɛnrɛhola ɔ bo zo amra kile,
ɔluakɛ bɛpɛle ye ɛbɛla ne sinli wɔ ewiade ye anu.”
34Na abɔlɔba ne bizale Felepe kɛ, “Kile ɛhye anu kile me. Nwane anwo edwɛkɛ a Nyamenle kpɔmanvolɛ ne ɛlɛka a, ɔdaye ɔ nwo edwɛkɛ yɛɛ ɔlɛka a anzɛɛ awie gyɛne ɔ?” 35Na Felepe bɔle ɔ bo wɔ Nyamenle Edwɛkɛ ɛhye azo, na ɔhanle Edwɛkpa ne mɔɔ fane Gyisɛse anwo la ɔhilele ye. 36Mɔɔ bɛlua adenle zo bɛlɛkɔ la, bɛrale azule bie anloa, na nrenya ne zele Felepe kɛ, “Nea, nzule ɛ! Duzu a si wɔ adenle mɔɔ ɔmaa ɛsɔne me a ɔnyɛ boɛ a?”
[ 37Felepe zele ye kɛ, “Saa ɛdie ɛdi bɔkɔɔ wɔ wɔ ahonle nu a, bɛsɔne wɔ a ɔyɛ boɛ.”
Ɔbuale ye kɛ, “Ɛhɛe, medie medi kɛ Gyisɛse Kelaese a le Nyamenle Ara ne a.”]
38Nrenya ne manle ehwili ne gyinlanle, ɔ nee Felepe bɛhɔle azule ne anu na ɔmanle Felepe zɔnenle ye. 39Mɔɔ bɛvi azule ne anu bɛvole file zo la, Sunsum ne vale Felepe minliminlinle. Nrenya ne annwu ye bieko, na ɔvale fɛlɛko ɔhɔle. 40Felepe hɔvindele Azotɛse na ɔhɔkpɔsale namunamu ne mɔ anu ɔhanle Edwɛkpa ne toonwo ɔradwule Sizalia.
Currently Selected:
Gyi 8: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
