Gyi 9
9
Sɔɔlo die Edwɛkpa ne ali
(Gyi 22.6-16; 26.12-18)
1Mekɛ ne anu ɛnee Sɔɔlo lɛ ye kɔdiawu adwenle ne tɛgyegye Awulae ɛdoavolɛma ne. Ɔhɔle Sɛlɛvolɛ Kpanyinli ne ɛkɛ 2na ɔhɔliele tumi ngɛlɛta kɛ ɔkɔ Dɛmasekɛse nyianu azua ne mɔ anu yeahɔhye bɛdabɛ mraalɛ nee mrenya mɔɔ bɛlua Awulae Adenle ne azo la, yeakyekye bɛ, ɔ nee bɛ ara Gyɛlusalɛm.
3Mɔɔ ɔlua adenle zo na ɔka ekyii ɔdwu Dɛmasekɛse la, wienyi kpole bie vi anwomanyunlu rabɔle yiale ye. 4Ɔpɛle ɔfinle na ɔdele kɛ ɛnelɛ bie se, “Sɔɔlo! Sɔɔlo! Duzu ati a ɛlɛyɛ me kpɔdekpɔde zɛhae ɛ?”
5Na ɔbizale kɛ, “Awulae, ɛdawɔ nwane ɔ?”
Ɛnelɛ ne buale ye kɛ, “Medame a mele Gyisɛse mɔɔ ɛlɛyɛ me kpɔdekpɔde la. 6Dwazo kɔ suakpole ne azo na bɛbahile wɔ debie mɔɔ ɔwɔ kɛ ɛyɛ la.”
7Menli mɔɔ nee Sɔɔlo lua la dɔle mumule, bɛandɛ bɛ nloa anu, ɔluakɛ bɛdele ɛnelɛ ne, na bɛannwu awie biala. 8Sɔɔlo vi azɛlɛ ne anwo dwazole la ɛnee ɔ nye ɛzi. Yemɔti bɛsosɔle ɔ sa bɛ nee ye hɔle Dɛmasekɛse. 9Kenle nsa, ɛnee ɔnnwu debie, yɛɛ ɔnli debie na yeanlo nzule.
10Kelaese ɛdoavolɛ bie wɔ Dɛmasekɛse, bɛfɛlɛ ye Ananayase. Wɔ ɛnyelɛzodeɛnwunlɛ nu, ɔdele kɛ Awulae se, “Ananayase!” Ɔliele zolɛ kɛ, “Awulae, medame ɛ.”
11Na Awulae zele ye kɛ, “Kɔ kpalɛ ne mɔɔ bɛfɛlɛ ye ‘Fɔɔnwo’ la azo, na kɔ Dwudase sua nu, na biza awie bie mɔɔ vi Taasɛse na bɛfɛlɛ ye Sɔɔlo la. Ɔgua zolɛ ɔlɛyɛ nzɛlɛlɛ, 12na wɔ ɛnyelɛzodeɛnwunlɛ nu yenwu nrenya bie mɔɔ bɛfɛlɛ ye Ananayase la kɛ yera ɔ nwo ɛkɛ yerava ɔ sa yegua ɔ ti zo yemaa yenwu debie bieko.”
13Ananayase zele kɛ, “Awulae, menli dɔɔnwo ɛha sonla ɛhye anwo edwɛkɛ nee debie mɔɔ yeva yehile wɔ menli ne mɔɔ wɔ Gyɛlusalɛm la ɛhile me. 14Na yera ɛke kɛ ɔlɛ tumi ngɛlɛta vi sɛlɛvolɛ mgbanyinli ne mɔ ɛkɛ kɛ ɔbahye bɛdabɛ mɔɔ bɛsonle wɔ la amuala.”
15Awulae zele ye kɛ, “Wɔmɔ kɔ, na meye ye kɛ ɔrayɛ me sonvolɛ, ɔva me duma ɔhɔ bɛdabɛ mɔɔ bɛnle Dwuuma la anu nee arelemgbunli nee Yizilayɛma kɔsɔɔti anwo zo. 16Na medame mebahile ye amaneɛ mɔɔ ɔbanwu ye wɔ me duma nu la.”
17Yemɔti Ananayase hɔle sua nu ɛkɛ, ɔvale ɔ sa ɔguale Sɔɔlo ati zo na ɔzele ye kɛ, “Adiema Sɔɔlo, Awulae Gyisɛse, mɔɔ ɛlua adenle zo ɛlɛba ɛke mɔɔ ɔyele ɔ nwo ɔhilele wɔ la ɛzoa me ɛ nwo ɛke, amaa wɔanwu debie bieko na Sunsum Nwuanzanwuanza ne ara ɛ nwo zo.” 18Ɛkɛ ne ala debie bie mɔɔ le kɛ fɛlɛ nwo abonle la vi Sɔɔlo anye zo guale aze, na ɔnwunle debie bieko; na ɔdwazole ɔmanle bɛzɔnenle ye. 19Akee ɔlile debie na ɔ nwo gyinlanle ye.
Sɔɔlo bɔ Edwɛkpa ne nolo wɔ Dɛmasekɛse
Sɔɔlo nee ɛdoavolɛma ne dɛnlanle mekɛ ekyi wɔ Dɛmasekɛse, 20na ɔhɔle nyianu azua ne mɔ anu ɔhɔbɔle nolo kɛ Gyisɛse, “Yemɔ a ɔle Nyamenle Ara ne a.” 21Ɔyɛle bɛdabɛ mɔɔ bɛdele ye edwɛkɛ ne la azibɛnwo kpole na bɛbizale kɛ, “Na tɛ sonla ɛhye a ɛlɛkuhu menli mɔɔ bɔ Gyisɛse duma wɔ Gyɛlusalɛm la ɔ? Anzɛɛ yeamba ɛke kɛ ɔbahye bɛdabɛ mɔɔ bɛbɔ Gyisɛse duma la yeahɔmaa sɛlɛvolɛ mgbanyinli ne mɔ ɔ?”
22Na Sɔɔlo nyianle anwosesebɛ kpalɛ wɔ ye edwɛkɛhanlɛ nu na ɔholale ɔhilehilele nu kɛ Gyisɛse a le Mɛzaya ne, ɔmanle ɔrale kɛ Dwuuma bɔbɔ mɔɔ wɔ Dɛmasekɛse la dɔle mumule wɔ nwolɛ.
23 #
2 Kɔl 11.32-33
Kenle guale nu ekyii la, Dwuuma ne hɔle akpamo kɛ bɛku ye, 24na Sɔɔlo dele. Dwuuma ne dɛle ye wɔ sua ne azo nlenkɛ mgbole ne mɔ anloa nɔɔzo nee ewiazo kɛ bɛ sa kɛha ye bɛkɛhu ye. 25Na kenle ko nɔɔzo Sɔɔlo ɛdoavolɛma ne vale ye dɛnlanle kɛndɛne nu, vale ye wulale suakpole ne bane ne tokule bie anu, na bɛliele ye bɛtɛɛ bɛdwulale ye aze wɔ suakpole ne bane ne anzi lɔ.
Sɔɔlo kɔ Gyɛlusalɛm
26Sɔɔlo hɔle Gyɛlusalɛm na ɔyɛle kɛ ɔlɛ ɔ nwo ɔkabɔ ɛdoavolɛma ne anwo la bɛanlie ye bɛanli, na bɛzulole ye. 27Zɔhane ati Baanabase raboale ye na ɔ nee ye hɔle ɛzoanvolɛma ne ɛkɛ. Ɔhilehilele kɛ Sɔɔlo zile nwunle Awulae wɔ adevinli ne na Awulae dendɛle hilele ye, nee Sɔɔlo ahonle mɔɔ zile na ɔvale Gyisɛse duma ɔbɔle Edwɛkpa ne nolo wɔ Dɛmasekɛse la amuala ɔhilele bɛ. 28Yemɔti akee bɛmanle Sɔɔlo nee bɛ luale, na ɔyele ɔ nyunlu wienyi ɔvale Awulae duma ɔbɔle Edwɛkpa ne nolo wɔ Gyɛlusalɛm amuala. 29Eza ɔ nee Dwuuma mɔɔ ka Giliki la zule kpolera ɔmanle bɛnyianle adwenle kɛ bɛku ye. 30Mɔɔ diedima ne bie mɔ dele ɛhye la, bɛvale Sɔɔlo bɛhɔle Sizalia na bɛmanle ɔhɔle Taasɛse.
31Ɔlua Sɔɔlo ɛhakyilɛ zo akee Asɔne ne mɔɔ wɔ Dwudiya, Galeli, yɛɛ Samɛlea la nyianle anzonudwolɛ na ɔnyinle. Na ɔlua Sunsum Nwuanzanwuanza ne moalɛ zo Asɔne ne nyianle anwosesebɛ, menli dɔɔnwo rale nu na bɛvale Nyamenlezulolɛ bɛluale.
Pita wɔ Leda nee Dwɔpa
32Pita hɔle ɛleka dɔɔnwo, na kenle ko ɔhɔkpɔlale Nyamenle menli ne mɔɔ wɔ Leda la. 33Ɛkɛ ne yɛɛ ɔhɔnwunle nrenya bie mɔɔ bɛfɛlɛ ye Yiniase la kɛ yedwidwe na yela ɛleka ko toonwo ɛvolɛ mɔtwɛ. 34Na Pita zele ye kɛ, “Yiniase, Gyisɛse Kelaese ɛyɛ wɔ ayile. Dwazo na nyenya wɔ ɛkpa ne.” Na ɛkɛ ne ala Yiniase dwazole. 35Menli mɔɔ wɔ Leda nee Hyɛlɔn la nwunle nrenya ne na bɛhakyile bɛdoale Awulae.
36Dwɔpa noko, raalɛ bie wɔ ɛkɛ, bɛfɛlɛ ye Tabeta. (Ye duma ne Giliki nu a le Dɔkase.)#9.36 Duma Tabeta anzɛɛ Dɔkase abo a le “Kɛtɛboɛ.” Ɔle ɛdoavolɛ. Raalɛ ɛhye vale ye mekɛ yɛle ahunlunyele gyima na ɔboale ehyianvolɛma. 37Mekɛ ne anu ɔ nwo dole ye na ɔwule. Bɛbiale ye na bɛdedale ye wɔ ɛbolɔnsane zo ekpumgbunli ne mɔ bie anu. 38Dwɔpa nee Leda anwa biala. Yemɔti mɔɔ diedima ne mɔɔ wɔ Dwɔpa la dele kɛ Pita wɔ Leda la, bɛzoanle menli nwiɔ bɛmanle bɛhɔvale nrɛlaleɛ bɛhɔmanle ye kɛ. “Yɛsɛlɛ wɔ, bɔ mɔdenle ka ɛ nwo bɛla.” 39Pita noko anzi aze na ɔ nee bɛ hɔle. Ɔhɔdwule la, bɛ nee ye hɔle ɛbolɔnsane ne azo ɛleka mɔɔ bɛdeda ye la. Ahunlanvolɛ mraalɛ mɔɔ Dɔkase ɛyɛ bɛ nyele ɛlɛ la vale ɛzunlɛ rabɔle yiale Pita na bɛvale adɛladeɛ mɔɔ Dɔkase kpomgbale hyɛle bɛ, wɔ mekɛ mɔɔ ɔde aze la bɛhilele ye. 40Pita vindele bɛ, na ɔhotole ɔzɛlɛle; ɔhakyile ɔ nye funli ne anwo na ɔzele kɛ, “Tabeta, dwazo!” Raalɛ ne bukele ɔ nye na ɔnwunle Pita la, ɔmanle ɔ nwo zo ɔdɛnlanle aze. 41Pita zɔle ye manle ɔdwazole ɔgyinlanle. Akee ɔvɛlɛle diedima ne nee ahunlanvolɛ mraalɛ ne mɔ na ɔvale ye ɔmanle bɛ. 42Edwɛkɛ ɛhye kpondenle Dwɔpa amuala, na menli somaa ne ala liele Awulae lile. 43Pita dɛnlanle Dwɔpa hyɛle dɔɔnwo wɔ nrenya bie mɔɔ yɛ nwoma nwo gyima mɔɔ bɛfɛlɛ ye Saemɔn la sua nu.
Currently Selected:
Gyi 9: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
