Marko 15

Bɛfa Yesu begyina Pilato nyunu

(Mateo 27.1, 2, 11-14; Luka 23.1-5; Yohane 18.28-38)

1 # Mat 27.1-2; Luk 23.1; Yoh 18.28 Na aleɛ baahye ne, ndɛndɛ so, asɔfo mbanyi ne maen mbanyi ne ahyerɛlɛfoɛ ne badwafoɛ ne amukoraa bɛhɔle agyina, na bɛkyekyele Yesu bɛfale ye beewurale Pilato sa. 2Na Pilato bisale ye kyɛ, “Wɔ ole Yudafoɛ Hene ne anaa?” Na obuale ye kyɛ, “Ye ala yeɛ ahã ne.” 3Na asɔfo mbanyi nemɔ bɔle ye kwaadu pee. [Nakoso wammua ye nwo bie.] 4Yeɛ Pilato sa bisale ye kyɛ, “Engobua ye nwo bie? Nea kwaadu worawora bɔ bɛbɔ wɔ ɔ?” 5#Mak 14.61; Yes 53.7 Nakoso Yesu ammukye ye noa ko, na ɛhe yɛle Pilato nwanwa.

Bebua Yesu ewue foɛ

(Mateo 27.15-26; Luka 23.13-15; Yohane 18.39—19.16)

6Na aluolue ne anu, né ɔyɛ a ɔyakyi kukununiɛ ko bɔ bɛkɔsrɛ ye kyɛ ɔyakyi ye ma bɛ ɔ. 7Né kukunufoɛ biemɔ wɔ berɛ bɔ babɔ bɛ panwu ɔ. Né bali awue wɔ basabasa bɔ bɛyɛ betiale awaen ne anu, na né biaa bie bɔ bɛfrɛ ye Baraba ɔ ɔboka bɛ so. 8Na ɛlɔen ne wale, na bɛhyɛle ye bo bɛsrɛle Pilato serɛserɛ so kyɛ, kyɛbɔ ɔyɛ a ɔyɔ ma bɛ ne, ɔ́yɔ ma bɛ. 9Na obisale bɛ kyɛ, “Ɛmɔkuro kyɛ meyakyi Yudafoɛ Hene ne mema ɛmɔ anaa?” 10Ofikyɛ onwuni kyɛ ɛpɔen ti yeɛ asɔfo mbanyi nemɔ baye ye bama ye ɔ. 11#Aso 3.14 Nakoso asɔfo mbanyi nemɔ pesa wurale ɛlɔen ne noa maa bɛsrɛle ye kyɛ ɔyakyi Baraba mmom ma bɛ. 12Na Pilato sa bisale bɛ kyɛ, “Nzaade, nzikyɛ yeɛ ɛmɔkuro kyɛ mefa meyɛ bɔ ɛmɔfrɛ ye Yudafoɛ Hene ne ɔ?” 13Na bɛteateane nu bieku kyɛ, “Bɔ ye mmeamudua nu!” 14Na Pilato bisale bɛ kyɛ, “Nzu ɔ, nzikyɛ bɔne yeɛ wayɔ ɔ?” Nakoso bɛhɔle so bɛteateane nu serɛserɛ kyɛ, “Bɔ ye mmeamudua nu!” 15Né Pilato pena kyɛ ɔyɔ nikyee ma ɛlɔen ne bɛ nye sɔ, yiti ɔyakyili Baraba mane bɛ, nakoso Yesu de, ofini ye mbire, na ɔyele ye mane bɛ kyɛ bɛɛbɔ ye mmeamudua nu.

Asraafoɛ goro Yesu nwo

(Mateo 27.27-31; Yohane 19.2-3)

16Asraafoɛ nemɔ fale ye bɛhɔle ahemvie berɛ, nekaa bɔ bɛfrɛ berɛ Amrado aluo ne; na bɛfrɛle asraafoɛ kure ne amukoraa maa beeyiale. 17Bɛfale ataadeɛ kɔkorɛ#15.17: ATAADEƐ KƆKORƐ: Né ɔte ahemvo ne atitirefoɛ ataadeɛ. bie bewurale ye, na bɛfale mmowue bɛnwone abotire bɛbɔle ye. 18Na bɛhyɛle ye bo bɛmomane ye kyɛ, “Yudafoɛ Hene, wɔ ngoa so oo!” 19Yeɛ bɛfale mbire befifini ye ti anu, bɛfefele nwɔserɛ beguale ye nwo, na beguale ndwerɛ bɛbɔle bɛ ti ase wɔ ye nyunu.

Bɛbɔ Yesu mmeamudua nu wɔ Golgota

(Mateo 27.32-34; Luka 23.26-43; Yohane 19.17-27)

20Na bɛgorole ye nwo beyiele nen, bɛyele ataadeɛ kɔkorɛ ne, na bɛfale ye bɔbɔ ye ataadeɛ ne bewurale ye. Na bɛfale ye bɛhɔle kyɛ bɛkwaabɔ ye mmeamudua nu. 21#Luk 23.26; Mat 27.32 Na bɛhyɛle Kireneniɛ Simɔn bɔ ɔte Aleksandro ne Rufu bɛ baba, bɔ né ofi namue nu ɔbaapɛ nu ɔ, maa ɔsoale Yesu mmeamudua ne. 22Na bɛfale Yesu beedwuli nekaa bie bɔ bɛfrɛ berɛ Golgota, bɔ ye bo kyire, “Tire Kokuroka so.” 23Bɛmane ye nzaa bɔ bafa ayirefona bafra nu ɔ, nakoso wanno. 24#Edw 22.18 Na bɛbɔle ye mmeamudua nu nen, bɛhyehyɛle ye ndaadeɛ ne anu, na beguale serewa bɛpenane ebiala deɛ bɔ okonya ɔ.

25Ngyerɛmɔ nnɔngono yeɛ bɛbɔle ye mmeamudua nu ɔ. 26Na kwaadu bɔ bɛfa bɛbɔle ye ne, bɛhyerɛle ye wɔ ye ti anwuro kyɛ, “YUDAFOƐ HENE NE.” 27Bɛbɔle awerɔm awuefoɛ nyɔ mmeamudua nu bɛbokale ye so, ko wɔ ye sa famaa so, yeɛ ko wɔ ye sa bɛen so. 28#Yes 53.12 [Na ɛhe mane Ahyerɛlɛ ne wale nu kyɛ: Baha ye bafra mmeraatolɛfoɛ.]#15.28: Tete Ahyerɛlɛ ne bie fa ngyekyɛmuɛ 28 boka so. 29#Mak 13.2; 14.58; Yoh 2.19 Na bɛ bɔ bɛɛpɛle nu berɛ ne, bɛwosole bɛ ti bɛkekane dwirɛ betiale ye kyɛ, “Eh, wɔ bɔ ebubu asɔneyɛɛ sua ne gua, ná ɛfa ɛlɛsa si ne! 30De wɔ nwo, ná fi mmeamudua ne aso dwu ase e!” 31#Edw 22.7-8 Na sɔ ala yeɛ asɔfo mbanyi ne ahyerɛlɛfoɛ nemɔ bɛkekã behyirehyirele bɛ nwo bɛgorole ye nwo kyɛ, “Olele ebiemɔ, nakoso ɔngora nne ye nwo. 32#Mat 16.1, 4 Ma Kristo ne, Yisrael Hene ne, ofi mmeamudua ne aso odwu ase kekesaala ye ma yɛnea, na yɛkole yɛkoli.” Na bɛ bɔ bɛbɔle bɛ mmeamudua nu bɛbokale ye so ne, bɛ koso bɛpepɛle ye nzoaa.

Yesu wue

(Mateo 27.45-56; Luka 23.44-49; Yohane 19.28-30)

33Na ɔbɔle eyia duabien ne, awosii katale aseɛ ne amukoraa so maa ɔɔbɔle eyia nnɔnmmiɛnza. 34#Edw 22.1-2 Na ɔbɔle eyia nnɔnmmiɛnza ne, Yesu teane nu serɛserɛ hane kyɛ, “Eloi, Eloi, lama sabaktani?” Bɔ ye bo kyire kyɛ, “Me Nyameɛ, me Nyameɛ, nzu ati yeɛ apo me ye?” 35Na mmenia bɔ né begyigyi berɛ ne bie tele sɔ dwirɛ nen, bɛhane kyɛ, “Ɛ́mɔtie, ɔfrɛ Elia!” 36#Edw 69.21 Na ko tuli amirika ɔɔfale eminaen bɔle nzaa kekarekekare bie nu, ɔfa tuale elemmire noa, na ɔfa mane Yesu kyɛ ɔno, na ɔhane kyɛ, “Ɛ́mɔyakyi bɛma yɛnea sɛ Elia kɔwa kɔɔye ye kɔwa ase a.” 37Afei Yesu teane nu serɛserɛ, na ɔhale nu. 38#Ɛks 26.31-33; Heb 10.19-20 Na ɛtena bɔ ɔpɛ asɔneyɛɛ sua ne anu ne, nu suale nyɔ fili anwuro oodwuli ase.

39 # Mak 1.11; 9.7 Na asraafoɛ ɛyaa so panyi bɔ né ogyi ye nyunu berɛ ndendeneɛ so ne, onwuni kyɛbɔ osi teane nu, ná ɔhale nu nen, ɔhane kyɛ, “Amba, biaa he ole Nyameɛ Awa ne!” 40#Yoh 19.25 Né mmrasua biemɔ koso begyigyi nziɛ nziɛ bɛnea; na né Maria Magdalene, Maria bɔ ye mma ole Yakobo kãa ne Yose, yeɛ afei Salome boka bɛ so. 41Bɛ yeɛ mmerɛ bɔ né Yesu wɔ Galilea ne, belili ye si bɛsole ye ɔ. Né mmrasua foforɛ pee koso boka so bɔ bɛ ne ye fili Yerusalem wale ɔ.

Besie Yesu

(Mateo 27.57-61; Luka 23.50-56; Yohane 19.38-42)

42 # Deut 21.22-23 Odwuli nɔsoa ne, na ɔnate kyɛ né ɔte anwoboaboa kyẽa, bɔ ɔpɛ nu a ɔte afofikyẽa ne ati, 43Yosef bɔ ofi Arimatea, badwafoɛ nemɔ anu ko bɔ bebu ye ɔ, bɔ né ye koso ɔ́nwondɛ Nyameɛ ahennie ne ɔ, osili ye hue ɔhɔle Pilato berɛ ɔɔsrɛle Yesu fuin ne. 44Na Pilato adwene nu yɛle ye naa, ofikyɛ né ɔnze sɛ wawu amba anaa! Yiti ɔfrɛle asraafoɛ ɛyaa so panyi ne, na obisale ye kyɛ owuli ɔ wahyɛ anaa. 45Na ɔte fili asraafoɛ ɛyaa so panyi ne berɛ kyɛ wawu nen, ɔmaa bɛfale efuin ne bɛmane Yosef. 46Na Yosef tɔle nwera, ɔyele efuin ne wale ase, ɔfale nwera ne kyekyele ye nwo, na ɔɔfale ye tole asieleɛ bɔ bapɛ ye wɔ nyɔbotaen bie anu ɔ nu; na omununi nyɔboɛ katale asieleɛ ne noa. 47Na Maria Magdalene ne Yose maame Maria benwuni nekaa bɔ bɛfale ye bɛtole ɔ.

Currently Selected:

Marko 15: EBP

Highlight

Copy