Marko 16

Yesu wutingyelɛ

(Mateo 28.1-8; Luka 24.1-12; Yohane 20.1-10)

1 # Luk 23.56; Yoh 19.39 Na afofikyẽa ne pɛle nu ne, Maria Magdalene, Yakobo maame Maria ne Salome bɛtɔle ayirefona kyɛ bɛkwaafa bɛpopa ye. 2Na dapɛn ne anu kyẽa bɔ oli moa ne, ye ngyerɛmɔ tutututu, bɛhɔle asieleɛ ne aso, bɔ né eyia apukye ɔ. 3Na bebisabisale bɛ nwo kyɛ, “Nwa yeɛ okomunu nyɔboɛ ne kofi asieleɛ ne noa kɔma yɛ ɔ?” 4Nakoso bɛmane bɛ ti so nen, benwuni kyɛ nyɔboɛ ne amunu ato ahameɛ; né ɔte piri paa. 5Bewurale asieleɛ ne anu ne, benwuni aberandeɛ bie bɔ owura ataadeɛ fufue tendenn kyɛ ɔte asieleɛ ne famaa so berɛ, na bɛ kunu tele bɛ. 6Na osele bɛ kyɛ, “Nnɛmɔma ɛmɔ kunu te ɛmɔ. Ɛmɔpena Nasarɛteniɛ Yesu bɔ bɛbɔle ye mmeamudua nu ne. Watingye, ɔnne wa. Ɛ́mɔnea nekaa bɔ bɛfale ye bɛtole ɔ! 7#Mat 26.32; Mak 14.28 Nakoso ɛmɔɔbɔ ye asuafoɛ nemɔ ne Petro amaneɛ kyɛ ódi ɛmɔ nyunu moa kɔ Galilea; na berɛ yeɛ ɛmɔkonwu ye ɔ, kyɛbɔ ɔhã hyirele ɛmɔ ne.” 8Na befili asieleɛ ne anu befitele ndɛndɛ bɛnwati bɛhɔle; ofikyɛ ahunundetelɛ ne ɛserɛ tɔle bɛ so. Na bammɔ so bangyire ebiala, ofikyɛ né besuro.

Yesu ye ye nwo ali kyire Maria Magdalene

(Mateo 28.9-10; Yohane 20.11-18)

9 # Yoh 20.18 [Na kyẽa bɔ oli moa ne ngyerɛmɔ tutututu bɔ odwɔsole nen, olili moa yele ye nwo ali hyirele Maria Magdalene, bɔ otuli sunzummɔne nzoo fili ye nu ne. 10Na ye koso ɔɔbɔle bɛ bɔ bɛ ne Yesu natele, bɔ né bɛ wora abɔ ná besu ne amaneɛ. 11Nakoso bɛtele kyɛ watingye ná ɔte ase, ná wanwu ye nen, banne banni.

Yesu ye ye nwo ali kyire asuafoɛ nyɔ

(Luka 24.13-35)

12Na ɛhe asi ne, ɔyele ye nwo ali sue foforɛ nu hyirele bɛ nu nyɔ, wɔ mmerɛ bɔ né bɛnate atee so bɛkɔ akuraa nu ɔ. 13Na besale bɛ si bɛɛbɔle bɛ ngaa ne amaneɛ, na banne bɛ koso banni.

Yesu ye ye nwo ali kyire asuafoɛ buru ne ko ne

(Mateo 28.16-20; Luka 24.36-49; Yohane 20.19-23; Asomafoɛ 1.6-8)

14Na ɛhemɔ asi ne, ɔyele ye nwo ali hyirele asuafoɛ buru ne ko ne wɔ mmerɛ bɔ né bedidi ɔ. Na ohwili bɛ nyunu wɔ elelɛ bɔ banne banni, ɔne b’asoserɛ nwo, ofikyɛ banne bɛ bɔ benwuni ye kyɛ watingye ne banni.

Yesu fa nzɛmba ne soma bɛ

15Na ɔhã hyirele bɛ kyɛ, “Ɛmɔhɔ wiase amukoraa bɛɛhã nzɛmba ne behyire abɔdeɛ amukoraa. 16Sona bɔ okole koli ná bɛkɔbɔ ye asu nen, bekole ye ngoa; nakoso bɔ onne nni ne de, bekobua ye foɛ. 17Na bɛ bɔ bede bedi ne, nzɛngyerɛnneɛ hemɔ yeɛ okoli bɛ si ɔ: Me dumaa nu, bekotutu sunzummɔne mɔ; bɛkɔhã edwudwolɛ foforɛ mɔ; 18bɛkɔma ewoo mɔ so, na sɛ bɛno nikyee biala bɔ ɛborɔ wɔ nu a, ɔngɔyɔ bɛ huu; bɛkɔfa bɛ sa bekogua ayarefoɛ so maa bɛkɔte apɔ.”

Nyameɛ fa Yesu kɔ nyameɛso

(Luka 24.50-53; Asomafoɛ 1.9-11)

19Na afei, Awurade Yesu dwudwo hyirele bɛ yiele nen, Nyameɛ fale ye hɔle nyameɛso, na ɔɔtenane Nyameɛ sa famaa so. 20Na bɛ de, bɛhɔle bɛɛhane nzɛmba ne nekaa biala, na Awurade fale bɛ yɔle adwuma, na ɔfale nzɛngyerɛnneɛ bɔ ɔboka so ne aso ɔfoale edwirɛ ne aso. Amen.]

Currently Selected:

Marko 16: EBP

Highlight

Copy