Mateo 3
3
Asubɔlɛniɛ Yohane nzɛmbahanɛ
(Marko 1.1-8; Luka 3.1-18; Yohane 1.19-28)
1Sɔ mmerɛ ne anu, Asubɔlɛniɛ Yohane wale Yudea ɛserɛ so kyɛ ɔkã nzɛmba. 2#Mat 4.17; Dan 2.44; 4.17 Ɔnwa, “Ɛ́mɔsakyera ɛmɔ adwene, ofikyɛ nyameɛso ahennie ne apingye!” 3#Yes 40.3 Ye yeɛ ngɔmhyɛlɛniɛ Yesaya hane ye nwo dwirɛ kyɛ,
“Ebie tea nu wɔ ɛserɛ so kyɛ,
Ɛ́mɔsiesie Awurade atee,
ná ɛ́mɔma ye atimbire tengyɛ.”
4 #
2 Ahe 1.8; Sak 13.4; Lew 11.22 Né Yohane wura afupɔngɔ nwiaa ataadeɛ, na né ɔbɔ nwomaa abɔsoɛ. Aleɛ bɔ né odi ole mmɛbɛ mbiri ne woɛ. 5Mmenia bɔ befi Yerusalem, Yudea amukoraa ne bɛ bɔ befi Yɔɔdan nwo amukoraa bebiri bɛwale ye berɛ; 6na bɛhane bɛ bɔne maa ɔbɔle bɛ asu wɔ asue Yɔɔdan nu.
7 #
Mat 12.34; 23.33; 1 Tɛs 1.10 Na onwuni kyɛ Farasiifoɛ ne Sadusiifoɛ nemɔ anu pee bɛba maa ɔbɔ bɛ asu nen, osele bɛ kyɛ, “Ewoo mmaa bɔ ɔte kyɛ ɛmɔ ɔ! Nwa yeɛ otuli ɛmɔ foɛ paa kyɛ ɛ́mɔnwati béfi ahonehulɛ bɔ ɔba ne anu ɔ? 8Odi kyɛ ɛmɔyɔ bɔ okyire kyɛ ɛmɔasakyera ɛmɔ adwene amba ɔ. 9#Yoh 8.33; Rom 4.16 Na nnɛma ɛmɔlakalaka ɛmɔ nwo bɛka kyɛ, ‘Abraham bosofoɛ ole yɛ’; na mekã mekyire ɛmɔ kyɛ, Nyameɛ kɔhora kɔkakyi nyɔboɛ hemɔ maa bɛkɔyɛ Abraham bosofoɛ. 10Bafa akumaa ne babɔ bakaa ne ndii nu dada. Yiti bakaa biala bɔ onzu mmaa paa ne, bekobu ye, ná bagyi bato see nu. 11Me de, mebɔ ɛmɔ asu wɔ nzue nu maa okyire kyɛ ɛmɔasakyera ɛmɔ adwene, nakoso bɔ oli me si ɔ́ba ne de, odi mu tra me; na memvata kyɛ ye mbaboa po ngotira ɔ. Ye de, ɔkɔfa Sunzum Krongron ne see yeɛ ɔkɔbɔ ɛmɔ asu ɔ. 12#Mat 13.30 Otira ye huhuamoa nu; ɔkɔprapra ye nekaa bɔ ɔboro aburoo ne monomono. Ɔkɔboaboa ye aburoo ne noa kogua pata so, nakoso afafu ne de, ɔkɔfa see bɔ onnua le ɔ yeɛ ɔkɔyera ye ɔ.”
Yohane bɔ Yesu asu
(Marko 1.9-11; Luka 3.21-22)
13Yeɛ Yesu fili Galilea wale Yohane berɛ wɔ Yɔɔdan noa kyɛ ɔbɔ ye asu. 14Yohane yɛle kyɛ ahaa osi ye ate, Ɔnwa, “Wɔ yeɛ ɛfata kyɛ ɛbɔ me asu ɔ, na afei wɔ yeɛ ɛ́ba me berɛ ɔ?” 15Yeɛ Yesu buale ye kyɛ, “Ma ate maa yɛyɔ ye sɔ kekesaala ye, na yɛyɔ bɔ Nyameɛ ahyehyɛ ne.” Yiti Yohane penene so. 16Mmerɛ bɔ ɔbɔle Yesu asu yiele nen, Yesu fili nzue ne anu fitele pɛ, yieee, anwuro bukyele (mane ye), na onwuni Nyameɛ Sunzum ne kyɛ abubure odwu ba ye so, 17#Mat 12.18; 17.5; Mak 9.7; Luk 9.35; Edw 2.7; Yes 42.1 na yieee, edwudwolɛ bie fili nyameɛso wale kyɛ, “Mma bɔ ɔla m’ahone nwo ná me nye gye ye nwo paa ne ɛhe.”
Currently Selected:
Mateo 3: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.
