Malaki 3
3
Nyameɛ kɔsoma ye bɔfoɛ ne
1 #
Mat 11.10; Mak 1.2; Luk 1.76; 7.27 “Tie, mebaasoma me bɔfoɛ maa odi me nyunu osiesie atee nu. Na AWURADE bɔ ɛmɔpena ye ne, bɔ ye ole apam bɔfoɛ bɔ ɔla ɛmɔ ahone nwo ne, ɔkɔhɔ ye asɔneyɛɛ sua nu mvum nu. Tie, ɔ́ba, Asafo AWURADE noa dwirɛ ɛne. 2#Yow 2.11; Nye 6.17 Nakoso kyẽa bɔ ɔ́ba ne, nwa yeɛ ɔkɔhora kogyina ye noa ɔ? Ɔye ye nwo ali a, nwa yeɛ ɔkɔhora kogyina ye nyunu ɔ? “Ofikyɛ ɔte kyɛ sona bɔ ohuro buralɛ ɔ ye see ne, ɔne bɔ ɔkɔ atapoɛ ɔ ye saminaen; 3ɔkɔtena ase kyɛ dwumvoɛ bɔ ohuro ɛdwetɛ ɔye ye nwo fiɛ ɔ: ɔkɔte Lewi boso ama mɔ bɛ nwo, okohwi bɛ nwo kyɛ sikaa kɔkorɛ ne ɛdwetɛ, amaa ɔnate so bafa tenenee afɔleɛ babrɛ AWURADE. 4Na afei, Yuda ne Yerusalem b’afɔleɛ kɔsɔ AWURADE nye kyɛ daa tete mmerɛ afoɛ mɔ bɔ bapɛ nu bahɔ deɛ ne ala.
5“Na afei ngɔhwe ngopingye ɛmɔ ngobua ndɛen. Ngoli adanzeɛ ndɛndɛ so ngotia ngonyaayelɛfoɛ, agyaasɛkyelɛfoɛ, bɛ bɔ bɛta ngondombo ndaen, bɛ bɔ besisi paafoɛ wɔ b’akatuaa nwo, bɛ bɔ bedi kunafoɛ ne nyisiaa aminɛ, bɛ bɔ besisi ɛwɔfoɛ ná benzuro me ɔ, Asafo AWURADE noa dwirɛ ɛne.
6“Ofikyɛ me, AWURADE, menzesã; yiti ɛmɔ, Yakob boso ama, ɛmɔ boso ngonua.
7Ofi ɛmɔ nana mɔ aberɛ so yeɛ ɛmɔali me nhyehyɛleɛ nwo makyebu bɔ ɛmɔanni so ɔ. Ɛ́mɔsa bɛbra me berɛ, na me koso ngosa ngɔwa ɛmɔ berɛ, Asafo AWURADE noa dwirɛ ɛne. Nakoso ɛmɔnwa: ‘Ɔkɔyɛ sɛɛ né yasa yawa?’ 8Aso odi kyɛ sona di Nyameɛ ndurum anaa? Nakoso ɛmɔ de, ɛmɔdi me ndurum. Na ɛmɔbisa kyɛ, ‘Atee beni aso yeɛ yɛdi wɔ ndurum ɔ?’ Ɛmɔdi ye wɔ buru nu ngyɛmuɛ ko ɔne afɔleɛbɔlɛ nu. 9Ɛnomalɛ yeɛ mafa manoma ɛmɔ ɔ, ofikyɛ ɛmɔdi me ndurum, mekyire maen ne amukoraa. 10#Lew 27.30; Num 18.21-24; Deut 12.6; 14.22-29; Neh 13.12 Ɛ́mɔfa buru nu ngyɛmuɛ ko ne amukoraa bɛbra nekaa bɔ besie nningyein ne, amaa ɔnate so aleɛ awa m’awuro. Ɛ́mɔfa béso me bɛ́nea, sɛ mengobukye nyameɛso mboma mengɔma ɛmɔ a, sɛ mengohwie saleɛ ngogua ɛmɔ so ma ongobu ngɔfa so a, Asafo AWURADE noa dwirɛ ɛne. 11Ɛmɔ ti ngosi sɛkyefoɛ ne ate, amaa ɔnate so wanzɛkye ɛmɔ aseɛ so aleɛ ne; yeɛ ɛmɔ fieso bobe amui ne ngɔporo ngogua, Asafo AWURADE noa dwirɛ ɛne. 12Na afei, maen maen amukoraa bɛkɔfrɛ ɛmɔ Bɛ bɔ Banya Saleɛ ɔ, ofikyɛ ɛmɔkɔyɛ anika maen, Asafo AWURADE noa dwirɛ ɛne.
13“Ɛmɔkekã edwirɛ yeayea betia me, AWURADE noa dwirɛ ɛne. Nakoso ɛmɔbisa kyɛ, ‘Nzikyɛ dwirɛ yealɛ yeɛ yahã yatia wɔ ɔ?’ 14Ɛmɔahã kyɛ, ‘Ɔte mbaen kyɛ sona kɔso Nyameɛ ɔ. Mvasoɛ beni yeɛ ɔwɔ so kyɛ yɛkoli ye nhyehyɛleɛ so, ɔne kyɛ yɛkɔnate Asafo AWURADE nyunu wɔ nnuhoɛ nu ɔ? 15Na afei de, yɛbu ahandaenfoɛ kyɛ bɛ yeɛ banya saleɛ ɔ; amba, bɛ bɔ bɛbɔ bra tɛɛ ne yeɛ benya ngɔsoɛ ɔ; amba, bɛ bɔ beso Nyameɛ bɛnea ne yeɛ benya bɛ ti bedidi nu ɔ.’ ”
16Yeɛ bɛ bɔ besuro AWURADE ne, bedwudwo behyirehyirele bɛ nwo. AWURADE yɛle asoɛ tiele, na ɔtele; na bɛ bɔ besuro AWURADE ná bedi ye dumaa ni ne, bɛhyerɛle bɛ dumaa wɔ ngayeɛ nwomaa nu wɔ AWURADE nyunu. 17Asafo AWURADE nwa nyoo: Kyẽa bɔ ngobua ndɛen ne, bɛkɔyɛ me bɔbɔ me deɛ, na ngonwu bɛ anwumvoin kyɛbɔ seɛ onwu ɔwa bɔ ɔso ye ɔ anwumvoin ɔ. 18Na afei ɛmɔkosa bɛkɔwa, na ɛmɔkonwu nzonzoleɛ bɔ ɔla teneneeniɛ ne bɔnefoɛ b’afia ɔ, yeɛ bɔ ɔla sona bɔ ɔso Nyameɛ ne bɔ ɔnzo ye ɔ b’afia ɔ.
Currently Selected:
Malaki 3: EBP
Highlight
Share
Copy
Want to have your highlights saved across all your devices? Sign up or sign in
Esahie Bible © Bible Society of Ghana, 2018.
