Malaki 2

Nyameɛ bɔ asɔfo mɔ kɔkɔ

1“Ɛmɔ, asɔfo mɔ, sɔ ahyɛdeɛ he, ɔkɔ ma ɛmɔ. 2Sɛ ɛmɔanyɛ sotie, yeɛ sɛ ɛmɔamva banzie ɛmɔ ahone nu kyɛ ɛmɔkɔfa animnyam bɛkɔma me dumaa a, ngɔprapra musue ngogua ɛmɔ so, na ngɔnoma ɛmɔ saleɛ ne, Asafo AWURADE noa dwirɛ ɛne; yoo, manoma bɛ dada, ofikyɛ ɛmɔmva benzie ɛmɔ ahone nu. 3#Ɛks 29.14; Lew 4.11-12 Tie, ngohwi ɛmɔ bosofoɛ bɛ nyunu, na ngɔfa bondua ngɔpete ɛmɔ nyunu, ɛmɔ aluolue ngaka bondua ne, na bekogyi ɛmɔ ne bondua ne bekogua. 4#Num 3.11-13 Na ɛmɔkonwu kyɛ me yeɛ nzomane maa bɛfale sɔ mmeraa dwirɛ ne bɛbrɛle ɛmɔ ɔ, amaa ɔnate so me ne Lewi apam ne watindim, Asafo AWURADE noa dwirɛ ɛne. 5#Num 25.12 M’apam ne yɛle ngoa ne asomdwee mane ye, na mva mane ye kyɛ osuro. Osurole me, na me dumaa nwo suronyi tɔle ye so. 6Nahorɛ mmeraa ne yɛle ye noa dwirɛ, na amumuyɛɛ biala wamvite ye noa. Asomdwee ne pɛpɛɛpɛyɛlɛ nu yeɛ ɔne me natele ɔ, na ɔmane mmeni pee bɛyakyili amumuyɛɛyɔlɛ. 7Ofikyɛ, bɔ odi kyɛ ofite ɔsɔfo noa ole nimdeɛ, na ye noa dwirɛ nu yeɛ odi kyɛ mmenia bɛpena mmeraa ne ɔ, ofikyɛ ɔte Asafo AWURADE bɔfoɛ. 8Nakoso ɛmɔali makyebu bafi atee ne aso; ɛmɔafa ɛmɔ noa dwirɛ bama mmeni pee basoti bafi mmeraa ne anwo; ɛmɔagua Lewi apam ne anwo fiɛ, Asafo AWURADE noa dwirɛ ɛne. 9Yiti, me koso, maprapra animguaseɛ magua ɛmɔ so, yeɛ mabrɛ ɛmɔ ase wɔ maen maen amukoraa bɛ nyunu, kyɛbɔ ɛmɔmva m’atee so, ná mmom ɛmɔbua ndɛengyea ne ala.”

Yisrael anni nahorɛ amma Nyameɛ

10Aso nna Seɛ komapɛ yeɛ yɛ mukoraa yɛle ye ɔ? Aso nna Nyameɛ komapɛ yeɛ ɔbɔle yɛ ɔ? Na ɔwale ye sɛ bɔ ebiala pepɛ ngondombo okyire obiɛngo, bɔ yɛfa yɛgua yɛ nana mɔ apam ne anwo fiɛ ɔ? 11Yuda anni nahorɛ, na bɛbɔ akyiwadeɛ bra wɔ Yisrael ne Yerusalem; ofikyɛ AWURADE nekaa krongron bɔ ɔla ye ahone nwo ne, Yuda agua ye nwo fiɛ, na wagya bosoen ɛwɔfoɛ bie ɔwa brasua. 12Na bienzua biala bɔ ɔyɔ sɔ, kyɛ okyirekyire oo, anaa osua oo, AWURADE konua ye boso ama mukoraa bɛ bo kofi Yakob ɛtena sua nu, bɔ ebiala ngɔha bɔ ɔkɔfa afɔleɛ kɔbrɛ Asafo AWURADE ɔ. 13Nikyee bieku bɔ ɛmɔsa bɛyɔ ɛhe: ɛmɔfa ɛmoenporolɛ, esuɛ ne awuyebɔlɛ bɛkata AWURADE afɔleɛ bokyea ne aso; ofikyɛ onne afɔleɛ ne ndo nu ko, yeɛ ye nye nzɔ bɔ ofi ɛmɔ berɛ ne ko. 14Na ɛmɔbisa kyɛ, “Nzu ati ɔ?” Hmmm, ofikyɛ, ɛne wɔ mmerandeɛ nu braa ɛmɔ agyaa ne, AWURADE te nu danzeniɛ. Nakoso anni nahorɛ amma ye, ɔwɔ nu kyɛ ɔte w’anwokaniɛ ne w’apam braa de. 15Aso Nyameɛ wanyɔ ɛmɔ sona komapɛ bɔ ngoa sunzum wɔ ɛmɔ nu ɔ? Na nzikyɛ yeɛ ɔpena ɔ? Kyɛ ɛmɔkɔwo mmaa bɔ Nyameɛ surolɛ wɔ bɛ nu ɔ. Yiti ɛ́mɔnea ɛmɔ nwo yé wɔ ɛmɔ sunzum nwo, na nnɛma ebiala fa ye mmerandeɛ nu braa ɔfa nnakannaka atee so. 16Ofikyɛ mekyi agyaayiralɛ, AWURADE Yisrael Nyameɛ noa dwirɛ ɛne; yeɛ sona bɔ ɔfa nzɛmmɔne kata ye tena so ɔ, Asafo AWURADE noa dwirɛ ɛne. Yiti ɛ́mɔnea ɛmɔ nwo yé wɔ ɛmɔ sunzum nwo, ná ɛmɔammɔ sɔ nnakannaka bra ne. 17Ɛmɔfa ɛmɔ dwirɛ bedwane AWURADE so anu. Nakoso ɛmɔnwa, “Atee beni aso yeɛ yadwane ye so anu ɔ?” Bɔ ɛmɔkã ne, ye ɛhe: “Ebiala bɔ ɔyɔ bɔne ne, ɔte paa wɔ AWURADE nyunu, na ode ye to nu.” Yeɛ ɛmɔbisa kyɛ, “Nyameɛ bɔ obua ndɛen ne, ɔwɔ nisua?”

Currently Selected:

Malaki 2: EBP

Highlight

Copy