Luka 24

Yesu tingye fi ewue nu

(Mateo 28.1-10; Marko 16.1-8; Yohane 20.1-10)

1Na dapɛn ne anu kyẽa bɔ oli moa ne, ye alebahyene, bɛfale ayirefona bɔ besiesiele ne bɛhɔle asieleɛ ne aso. 2Na benwuni kyɛ nyɔboɛ ne amunu afi asieleɛ ne noa, 3na bewurale nu, nakoso bannwu Awurade Yesu fuin ne berɛ. 4Na ɔwale kyɛ, ɛhe maa bɛyɛle basaa, na mvum nu, mmienzua nyɔ bɔ bɛ ndaadeɛ te fufue hyɛnhyɛnn ɔ beegyinane bɛ nwo berɛ. 5Na ɛserɛ hane bɛ maa bɛfale bɛ nyunu bebutubutuli berɛ. Na mmienzua nemɔ bisale bɛ kyɛ, “Nzu ati yeɛ ɛmɔpena teasefoɛ wɔ awufoɛ nu ɔ? 6#Mat 16.21; 17.22-23; 20.18-19; Mak 8.31; 9.31; 10.33-34; Luk 9.22; 18.31-33 [Ɔnne wa, watingye.] Ɛ́mɔkaye bɔ ɔhã hyirele ɛmɔ ne, mmerɛ bɔ né ɔwɔ Galilea ne, 7kyɛ, ‘Ɔsɛ kyɛ bɛfa Sona Awa ne bewura bɔnefoɛ mɔ sa, ná bɛbɔ ye mmeamudua nu, ná ye ɛlɛsa so watingye.’ ”

8Na bɛkayele ye dwirɛ ne, 9na besa befili asieleɛ ne aso bɛɛfale ye mukoraa nwo amaneɛ bɛbɔle asuafoɛ buru ne ko ne, ɔne bɛ ngaa ne amukoraa. 10Na Maria Magdalene, Yoana, Yakobo maame Maria, yeɛ afei mmrasua bieku mɔ boka so yeɛ bɛɛfale edwirɛ he bɛbɔle asomafoɛ nemɔ amaneɛ ɔ. 11Nakoso bɛ de, bebuli sɔ dwirɛ ne kyɛ ɛhoaa bie ɔ, na banne bɛ banni.

12[Na Petro dwɔsole, ole amirika hɔle asieleɛ ne aso, ɔkotole huli ye nye ase neane nu, na onwuni kyɛ nwera ne gua ahameɛ; na ofili berɛ hɔle awuro, na bɔ wasi ne yɛle ye nwanwa.]

Emawoso atee so

(Marko 16.12-13)

13Na sɔ kyẽa ne ala, né bɛ nu nyɔ bɛ́kɔ akuraa bie bɔ bɛfrɛ ye Emawoso nu; bɔ efi Yerusalem ɛkɔ berɛ a ɔte kɔyɛ kwanzii nzoo ɔ. 14Né bedi edwirɛ hemɔ bɔ wasisi ne amukoraa nwo ngɔmɔ. 15Na ɔwale kyɛ begu so bedi ngɔmɔ ná bebisabisa bɛ nwo nen, Yesu bɔbɔ opingyele bɛ, na ɔne bɛ bɛbɔle agyirɛ bɛhɔle. 16Nakoso wamma bɛ nye ne wangora wannwu kyɛ ye ɔ. 17Na obisale bɛ kyɛ, “Nzikyɛ yeɛ ɛmɔdi ye nwo ngɔmɔ bɛkɔ bɔ ɛmɔ wora abɔ ye?” 18Yeɛ bɛ nu ko bɔ bɛfrɛ ye Kleopa ne obuale ye kyɛ, “Wɔ ngome yeɛ ɛte wɔfoɛ wɔ Yerusalem ɔ, bɔ yeɛ ɛnze edwirɛ mɔ bɔ ɛlɛsa ye wasisi dɔ ye?” 19Na obisale bɛ kyɛ, “Nzikyɛ dwirɛ ɔ?” Na bebuale ye kyɛ, “Ɔfa Nasarɛteniɛ Yesu bɔ ɔte ngɔmhyɛlɛniɛ bɔ ole tumi wɔ nnwumaa ne edwudwolɛ nu, wɔ Nyameɛ ne maen ne amukoraa nyunu nwo, 20ɔne kyɛbɔ yɛ asɔfo mbanyi ne maen mbanyi bɛyele ye bɛmane maa bebuale ye ewue foɛ, ná babɔ ye mmeamudua nu ɔ. 21Nakoso yɛ de, ahaa né yɛ nye la so kyɛ ye yeɛ ɔbaale Yisrael ɔ. Na ɛhemɔ amukoraa asi ne, edwirɛ hemɔ sili ɔ ɛlɛsa ɛhe. 22Amba, yɛ nu mmrasua nemɔ bie bɛmane yɛ nwo dwirili yɛ. Bɛhɔle asieleɛ ne aso ɛnɛ alebahyene, 23nakoso bannwu ye fuin ne; na besa bɛwale bɛɛbɔle amaneɛ kyɛ abɔfo biemɔ yele bɛ nwo ali hyirele bɛ po, maa bɛhane kyɛ ɔte ase. 24Na yɛ nu mmenia ne biemɔ koso bɛhɔle asieleɛ ne aso, na beenwuni kyɛbɔ mmrasua nemɔ bɛhane ne ala; nakoso ye de, bannwu ye.”

25Afei osele bɛ kyɛ, “O ɛmɔ ndeaseɛ wɔ dede, ɛmɔ adwene te nganga kyɛ ɛmɔkole bɔ ngɔmhyɛlɛfoɛ nemɔ bahã ne amukoraa bekoli ɔ! 26Aso né onhia kyɛ Kristo ne onwu sɔ amaneɛ ne koraka ná wahɔ ye animnyam nu hɔ ɔ?” 27Na ɔhyɛle ye bo fili Mose ne ngɔmhyɛlɛfoɛ ne amukoraa so ohyirehyire Ahyerɛlɛ ne amukoraa nu dwirɛ bɔ ɔfa ye nwo ɔ nu hyirele bɛ. 28Na bepingyele akuraa bɔ bɛ́kɔ so nen, ɔyɛle kyɛ ɔpɛ nu kɔ moa, 29na bɛsrɛle ye serɛserɛ so kyɛ, “Maa yɛla, na aleɛ adwo, ewienu pinipini.” Yiti ɔne bɛ bɛhɔle awuro kyɛ ɔne bɛ bɛkwaala berɛ. 30Na ɔwale kyɛ ɔne bɛ bɛtenane poen nwo kyɛ bedidi nen, ɔfale paanoo ne, oyirale so, na obubuli nu fa mane bɛ. 31Na afei bɛ nye ne bukyebukyele,#24.31: Okyire kyɛ: bɛ nye wale bɛ nwo so. na benwuni kyɛ ye ɔ; na otu minini. 32Na besisele bɛ nwo kyɛ, “Mmerɛ bɔ né ɔne yɛ di ngɔmɔ wɔ atunu dɔ, bɔ né okyirekyire Ahyerɛlɛ ne anu kyire yɛ ne, aso yɛ kunu anyɛ yɛ nufaa?”

33Na bedwɔsole berɛ ne ala besa bɛhɔle Yerusalem; na beenwuni asuafoɛ buru ne ko ne, bɛne bɛ bɔ bɛboka bɛ so ne kyɛ bayia neka horɛ ɔ, 34bɔ begu so bɛkã kyɛ, “Awurade adwɔso amba, na waye ye nwo ali wahyire Simɔn.” 35Yeɛ mmenia nyɔ ne bɛhane bɔ osili atunu dɔ ne, ɔne kyɛbɔ bɛfale paanoo bubulɛ ne anu benwuni kyɛ ye ahɔ ɔ behyirele bɛ.

Yesu ye ye nwo ali kyire ye asuafoɛ nemɔ

(Mateo 28.16-20; Marko 16.14-18; Yohane 20.19-23; Asomafoɛ 1.6-8)

36Na begu so bɔ bɛkã sɔ dwirɛ nen, Yesu bɔbɔ oogyinane b’afia berɛ, [na osele bɛ kyɛ, “Asomdwee hã ɛmɔ oo!”] 37Na bɛbɔle binim, na ɛserɛ hane bɛ maa besusuli kyɛ ɛnwomee yeɛ banwu ye ɔ. 38Na osele bɛ kyɛ, “Nzu ati yeɛ ɛserɛ ahã ɛmɔ ye? Nzu ati yeɛ ɛmɔsu aporowaa ɛmɔ adwene nu ye? 39Ɛ́mɔnea me sa ne me gya, na me bɔbɔ ala ɔ. Ɛ́mɔsɔ me nu bɛ́nea; ofikyɛ ɛnwomee de olle anwoɔnaen ne mmowue kyɛbɔ ɛmɔnwu ye kyɛ nne ye ne.” 40[Na ɔhane sɔ nen, ɔfale ye sa ne ye gya hyirele bɛ.] 41Na anigye bɔ né banya ne, ɔne ye nwanwa bɔ ɔyɛ bɛ ne asi ne po, né begu so benne benni, na obisale bɛ kyɛ “Ɛmɔle aleɛ bie wɔ wa anaa?” 42Na bɛmane ye tiré bɔ batoto ɔ sii bie, 43na ole lili wɔ bɛ nyunu berɛ.

44Na osele bɛ kyɛ, “Ɛhemɔ ole me dwirɛ bɔ nga ngyirele ɛmɔ ne, mmerɛ bɔ né me ne ɛmɔ yɛwɔ berɛ ne, kyɛ bɔ bahyerɛ bafa me nwo amukoraa wɔ Mose mmeraa ne ngɔmhyɛlɛfoɛ ne Edwein Nwomaa ne anu ne, ɔsɛ kyɛ ɔba nu ɔ.”

45Afei obukyele b’adwene nu maa bɛtele Ahyerɛlɛ ne abo. 46Na osele bɛ kyɛ, “Bahyerɛ ye kyɛ, ‘Ɔsɛ kyɛ Kristo ne onwu amaneɛ, ná ye ɛlɛsa ne aso odwɔso fi awufoɛ nu, 47ná bafa ye dumaa so babɔ adwenesakyera ne bɔnefakyɛ nwo dawure wɔ maen maen amukoraa nu, na bɛkɔhyɛ ye bo wɔ Yerusalem.’ 48Ɛmɔte ɛhemɔ nwo adanzefoɛ. 49#Aso 1.4 Na ɛ́mɔtie, ngɔsoma me Baba bɔhyɛ ne maa ɔkɔwa ɛmɔ so; nakoso ɔsɛ kyɛ ɛmɔnwondɛ wɔ Yerusalem kuro ye anu, kodwu mmerɛ bɔ bɛkɔma ɛmɔ anwoserɛ bekofi anwuro ɔ.”

Kristo nyameɛso hɔlɛ

(Marko 16.19, 20; Asomafoɛ 1.9-11)

50 # Aso 1.9-11 Afei ɔfale bɛ fili berɛ oodwuli Betania, na ɔmane ye sa so yirayirale bɛ. 51Na ɔwale kyɛ ogu so bɔ oyirayira bɛ nen, ɔne bɛ lili ndetemuɛ, [na Nyameɛ mane ye so hɔle nyameɛso. 52Na bɛkotole bɛsɔnene ye,] na bele anigye pirikua besa bɛwale Yerusalem. 53Na daa biala né bɛwɔ asɔneyɛɛ sua nu berɛ bɛye Nyameɛ ayɛ.

Currently Selected:

Luka 24: EBP

Highlight

Copy