Luka 13

Kɔkɔbɔlɛ

1Sɔ mmerɛ ne ala nu, né mmenia biemɔ wɔ berɛ, na bɛhane Galileafoɛ bɔ Pilato fale bɛ mogya frafrale b’afɔleɛ mɔ ne nwo dwirɛ behyirele ye. 2Na obuale bɛ kyɛ, “Galileafoɛ bɔ benwuni sɔ amaneɛ ne, ɛmɔdwene kyɛ né bɛte bɔnefoɛ bɛtra Galileafoɛ ngaa ne amukoraa ti ɔ? 3Mekã mekyire ɛmɔ kyɛ, daabi. Nakoso sɛ ɛmɔanzakyera ɛmɔ adwene a, sɔ ala yeɛ ɛmɔ amukoraa ɛmɔkowu ɔ. 4Anaa mmenia buru ne mmɔtwɛ bɔ Siloam abandenden bu guale bɛ so huni bɛ ne, ɛmɔdwene kyɛ né bɛte bɔnefoɛ bɛtra mmenia amukoraa bɔ bɛte Yerusalem anaa? 5Daabi, na mekã mekyire ɛmɔ kyɛ, sɛ ɛmɔanzakyera ɛmɔ adwene a, sɔ ala yeɛ ɛmɔkowu ɔ.”

Borɔdoma bakaa bɔ onzu mmaa ne

6Na Yesu buli bɛ anyandera he: “Né biaa bie walua borɔdoma bakaa wɔ ye bondua boo nu. Ɔhɔle kyɛ ɔkwaapena so mmaa ne bie, na wannya bie. 7Yiti osele borɔdoma boo so hwɛsoniɛ ne kyɛ, ‘Nea, afoɛ nza mumua ɛhe yeɛ mawa kyɛ mebaatete bakaa he aso mmaa bɔ mannya bie ɔ. Bu ye to! Nzu ati yeɛ ɔsɛkye aseɛ mbaen ɔ?’ 8Na obuale ye kyɛ, ‘Me mene, maa ogyina berɛ afoɛ he koso, kɔpem kyɛ ngofumvu ye bo, ná ngɔfa fofoɛ ngoguagua ye bo ɔ. 9Sɛ osu mmaa afoɛ bieku a, ye de né ye paa nu ɔ; nakoso sɛ wanzu de a, né abu ye mato.’ ”

Yesu sa anwonyerɛ afofikyẽa

10Afofikyẽa bie, né Yesu ɔyɛ ngyerɛkyerɛ wɔ nyianu sua nemɔ ko anu. 11Né braa bie wɔ berɛ bɔ sunzum bie afa anwonyerɛ ato ye so afoɛ buru ne mmɔtwɛ ɔ; né ye nu akondo bɔ ɔngora ye nu tengyɛ koraa po ɔ. 12Na Yesu nwuni ye ne, ɔfrɛle ye sele ye kyɛ, “Mmobraa, wɔ nwo asande wɔ afi w’anwonyerɛ ne anu!” 13Na ɔfale ye sa guale ye so, na berɛ ne ala ye nu tengyɛle, na ɔyele Nyameɛ ayɛ.

14 # Ɛks 20.9-10; Deut 5.13-14 Nakoso nyianu sua ne anu panyi ne fɛle yaa kyɛ Yesu asa anwonyerɛ afofikyẽa ɔ, na osele mmenia ne kyɛ, “Elesia yeɛ ɔsɛ kyɛ yɛfa yɛyɔ adwuma ɔ. Sɔ ngyẽa nemɔ yeɛ ɛmɔbra ma bɛsa ɛmɔ anwonyerɛ ɔ, na ɔnzɛ kyɛ ɔyɛ afofikyẽa.”

15Yeɛ Awurade buale ye kyɛ, “Nyaatwomfoɛ! Ɛmɔ nu nwa yeɛ ɔnzangye ye nandwie anaa ye afunum mvi nekaa bɔ odidi ɔ afofikyẽa, ná ɔmva ye ngɔ maa ɔngɔno nzue ɔ? 16Sɔ braa he, ɔte Abraham bosoniɛ bɔ Abɔnzam akyekye ye afoɛ buru ne mmɔtwɛ mumua ɛhe; aso ɔnzɛ kyɛ bɛsangye ye befi ɛkyekyelɛ he anu afofikyẽa anaa?” 17Na ɔhane sɔ nen, ye pɔfoɛ nemɔ amukoraa bɛfɛrele; na mmenia ne amukoraa bɛ nye gyele animnyam nningyein bɔ ɔyɔle ne amukoraa nwo.

Sinapi baa nwo anyandera

(Mateo 13.31-32; Marko 4.30-32)

18Na Yesu bisale kyɛ, “Nyameɛ ahennie ne, sɛɛ yeɛ ɔte ɔ, na nzikyɛ anwo yeɛ ngɔfa ngɔtoto ɔ? 19Ɔte kyɛ sinapi baa ko bɔ biaa bie fa ooluale ye wɔ ye bondua boo nu ɔ. Onyini yɛle bakaa piri, na ewienu nnomaa bɛnwone bɛ saen wɔ ye mmaen nemɔ aso.”

Mɔle harewaa nwo anyandera

(Mateo 13.33)

20Yesu bisale bieku kyɛ, “Nzikyɛ nwo yeɛ ngɔfa Nyameɛ ahennie ne ngɔtoto ɔ? 21Ɔte kyɛ mɔle harewaa bɔ braa bie fa forale esam kongo nza maa odwuli kyɛ ye mukoraa tuli ɔ.”

Anoa bɔtɔfee ne

(Mateo 7.13, 14, 21-23)

22Yesu hyinini nguro ne nguraa mɔ nu yɛle ngyerɛkyerɛ, na ɔfale so kyɛ ɔkɔ Yerusalem. 23Na ebie bisale ye kyɛ, “Awurade, mmenia kãa bie yeɛ bekole bɛ ngoa hɔ anaa?” Yeɛ Yesu sele bɛ kyɛ, 24“Ɛ́mɔpere béwura anoa bɔtɔfee ne anu! Na mekã mekyire ɛmɔ kyɛ, mmenia pee bɛkɔpena kyɛ bekowura nu ɔ, na bɛngɔhora. 25Na sɛ awuro ne mene dwɔso to anoa ne anu pɛ a, yeɛ ɛmɔkɔhyɛ ye bo bekogyina ye si ɔ, na ɛmɔkɔbɔ anoa ne anu bɛkɔhã kyɛ, ‘Yɛ Mene, Yɛ Mene, bukye anoa ne ma yɛ.’ Na okobua ɛmɔ kyɛ, ‘Menze nekaa bɔ ɛmɔfi ɔ.’ 26Yeɛ ɛmɔkɔhyɛ ye bo bɛkɔhã kyɛ, ‘Yɛdidili ná yɛnone wɔ wɔ nyunu, na ɛyɛle ngyerɛkyerɛ wɔ yɛ mmorɔnoɛ so.’ 27#Edw 6.8 Na okose kyɛ, ‘Mekã mekyire ɛmɔ kyɛ, menze nekaa bɔ ɛmɔfi ɔ. Ɛ́mɔfi me so bɛhɔ, ɛmɔ amukoraa bɔ ɛmɔyɔ bɔ ɔndengyɛ ɔ!’ 28#Mat 22.13; 25.30 Na sɛ ɛmɔnwu Abraham, Yisake, Yakob ne ngɔmhyɛlɛfoɛ ne amukoraa kyɛ bɛwɔ Nyameɛ ahennie ne anu, ná ɛmɔ de bafoa ɛmɔ bafi nu a, ɛmɔkɔbɔ awuye ná ɛmɔanwose ɛmɔ gye. 29Na mmenia kofi eyia afiteleɛ, eyia atɔleɛ, sorɔ ne ngwaen bɛkɔɔtena ɛpoentolɛ bo wɔ Nyameɛ ahennie ne anu. 30#Mat 19.30; 20.16; Mak 10.31 Na ɛ́mɔtie, ebiemɔ wɔ berɛ bɔ baha nziɛ bɔ bekoli moa ɔ; yeɛ ebiemɔ wɔ berɛ bɔ bali moa bɔ bɛkɔha nziɛ ɔ.”

Yesu kuro Yerusalem dwirɛ

(Mateo 23.37-39)

31Na sɔ mmerɛ ne anu, Farasiifoɛ biemɔ wale beesele ye kyɛ, “Fi wa kɔ, ofikyɛ Herode pena wɔ ku wɔ!” 32Na osele bɛ kyɛ, “Ɛmɔɔhã behyire sɔ safuboa ne kyɛ, ‘Tie, métutu sunzummɔne mɔ ná mesa anwonyerɛ ɛnɛ ne ɛhema, na ye ɛlɛsa ne aso ngoyie m’adwuma.’ 33Nakoso ɛnɛ ne ɛhema ne ye alehyeleɛ de, ɔsɛ kyɛ metoa m’ateetulɛ ne aso; ofikyɛ ɔkɔyɛ se kyɛ bekohu ngɔmhyɛlɛniɛ wɔ nekaa bie, sana Yerusalem.

34“O, Yerusalem, Yerusalem, wɔ bɔ eku ngɔmhyɛlɛfoɛ ná ɛboro bɛ bɔ basoma bɛ wɔ berɛ nyɔboɛ ɔ! Mmerɛ nyɛɛ ɛhe yeɛ mbenane kyɛ ahaa meboaboa wɔ mma noa, kyɛbɔ akɔtaen boaboa ye mma noa wura ye ndaa bo ɔ, nakoso ɛmɔambene so! 35#Edw 118.26; Yer 22.5 Ɛ́mɔtie, bɛkɔyakyi ɛmɔ awuro ne berɛ dandue bɛkɔma ɛmɔ. Na mekã mekyire ɛmɔ kyɛ, ɛmɔngonwu me ko maa okoodwu mmerɛ bɔ ɔkɔwa kyɛ ɛmɔkɔhã kyɛ, ‘Saleɛ ole bɔ ɔnate Awurade dumaa nu ɔ́ba ye!’ ”

Currently Selected:

Luka 13: EBP

Highlight

Copy