Yohane 9

Yesu te anyesiniwaaniɛ bie nye

1Na Yesu ɔ́pɛ nu kɔ nen, onwuni ebie bɔ ye nye asi fi mmerɛ bɔ bɛwole ye ɔ. 2#Luk 13.2; Hes 18.20; Ɛks 20.5 Na ye asuafoɛ nemɔ bisale ye kyɛ, “Rabi, nwa yeɛ ɔyɔle bɔne ɔ, biaa he anaa ye awofoɛ, bɔ ɔmaa ɔnate so bɛwole ye anyesiniwaaniɛ ye?” 3Na Yesu buale kyɛ, “Nna biaa he, anaa ye awofoɛ yeɛ bɛyɔle bɔne ɔ; na mmom kyɛ Nyameɛ nnwumaa kɔla ali wɔ ye nu ti ɔ. 4Na mmerɛ bɔ alehyeleɛ wɔ berɛ ye de, ɔsɛ kyɛ yɛyɔ bɔ ɔsomane me ne nnwumaa; na alesaleɛ ɔ́ba bɔ ebiala ngɔhora ngɔyɔ adwuma ɔ. 5Mmerɛ bɔ nwɔ wiase ye de, me ole wiase kanea ne.”

6 # Mak 7.33; 8.23 Na ɔhane sɔ nen, ɔfele nwɔserɛ guale aseɛnwo, na ɔfale nwɔserɛ ne frale nnɛterɛ, na ɔfale nnɛterɛ ne wasale biaa ne nye so, 7#2 Ahe 5.10; Luk 13.4 na osele ye kyɛ, “Kɔ, ná konwunzi so wɔ ɛkwaa Siloam nu,” (bɔ ye bo kyire: Bɔ basoma ye ɔ). Yiti osili nu hɔle oonwunzini so, na osa wale nen, né onwu nikye.

8 # Aso 3.2, 10 Na mandamu berɛ ama ne bɛ bɔ banwu ye le kyɛ mmerɛ bie né ɔsrɛsrɛ nikyee ne, bebisale kyɛ, “Nna biaa he yeɛ né ɔte berɛ ɔsrɛsrɛ nikyee ye?” 9Ebiemɔ hane kyɛ, “Ye ɔ.” Yeɛ ebiemɔ koso hane kyɛ, “Daabi, osoma ye mbaen.” Na ye bɔbɔ osele kyɛ, “Me bɔbɔ me ala ɔ.” 10Na bebisale ye kyɛ, “Ɔyɛle sɛɛ yeɛ wɔ nye ne tele ɔ?” 11Na obuale kyɛ, “Biaa bie bɔ bɛfrɛ ye Yesu ne, ye yeɛ ɔdɔnene nnɛterɛ fa wasale me nye so ɔ, na ɔhã hyirele me kyɛ, ‘Kɔ ɛkwaa Siloam nu konwunzi so.’ Na ngɔnwunzini so, yiti yeɛ ɔmaa menwu nikyee ye.” 12Yeɛ bebisale ye kyɛ, “Ɔwɔ nisua?” Na obuale kyɛ, “Menze.”

Farasiifoɛ feefee nu

13Bɛfale biaa bɔ mmerɛ bie né ye nye asi ne bɛbrɛle Farasiifoɛ nemɔ. 14#Mat 12.1-4 Na kyẽa bɔ Yesu dɔnene nnɛterɛ ná ɔfa tele ye nye ne, né ɔte afofikyẽa. 15Yeɛ Farasiifoɛ nemɔ koso besa bisale ye kyɛbɔ osi yɛle bɔ afei de onwu nikye ɔ. Na obuale bɛ kyɛ, “Ɔfale nnɛterɛ wasale me nye so, yeɛ ngɔnwunzini so ɔ, yiti yeɛ menwu nikyee ye.” 16#Mat 12.2 Yeɛ Farasiifoɛ ne anu biemɔ hane kyɛ, “Sɔ biaa ne, nna Nyameɛ berɛ yeɛ ofi ɔ, ɔnate kyɛ onni afofikyẽa so.” Na ebiemɔ koso bɛhane kyɛ, “Ɔkɔyɛ sɛɛ né sona bɔ ɔte bɔnefoɛ ɔ wahora wayɔ nzɛngyerɛnneɛ bɔ ɔte sɔaa ɔ?” Na bɛ nu hyehyɛle.

17 # Mat 21.11 Yiti besa bebisale anyesiniwaaniɛ ne kyɛ, “Wɔ koso, nzikyɛ yeɛ ɛkã fa ye nwo ɔ, ye bɔ ɔtele wɔ nye ne?” Na osele kyɛ, “Ɔte ngɔmhyɛlɛniɛ.”

18Nakoso Yudafoɛ nemɔ de, banne ye nwo dwirɛ ne banni, kyɛ né ye nye asi, na afei de onwu nikye ɔ, kɔpem kyɛ bɛfrɛle biaa bɔ onwu nikyee n’awofoɛ, 19na bebisale bɛ kyɛ, “Ɛmɔ awa bɔ ɛmɔnwa bɛwole ye anyesiniwaaniɛ ne, ye ɛhe anaa? Ɔyɛle sɛɛ bɔ afei de onwu nikyee ye?” 20Yeɛ ye awofoɛ buale bɛ kyɛ, “Yɛ de, yɛse kyɛ yɛ wa ɛne, na yɛwole ye ɔ né ye nye asi; 21nakoso kyɛbɔ osi yɛle bɔ afei onwu nikyee ye de, yɛnze; yeɛ yɛnze bɔ ɔtele ye nye ne ɔ. Ɛ́mɔbisa ye, wanyi, na ye bɔbɔ okodwudwo kɔma ye nwo!” 22#Luk 6.22; Yoh 7.13 Ye awofoɛ hane sɔ, ofikyɛ né besuro Yudafoɛ nemɔ; ɔnate kyɛ né Yudafoɛ nemɔ bayɛ adwene kyɛ, sɛ ebie kã ye pefee kyɛ ye ole Kristo ne a, bekotu ye bekofi nyianu sua nu berɛ. 23Ɛhe ati yeɛ ɔmaa ye awofoɛ bɛhane kyɛ, “Wanyi, ɛ́mɔbisa ye!”

24Yiti besa bɛfrɛle biaa bɔ mmerɛ bie né ɔte anyesiniwaaniɛ ne, na besele ye kyɛ, “Fa animnyam ma Nyameɛ! Yɛ de, yɛse kyɛ biaa he ɔte bɔnefoɛ.” 25Yeɛ obuale kyɛ, “Sɛ ɔte bɔnefoɛ a, me de menze; nikyee komapɛ yeɛ mese ɔ: ahaa né nde anyesiniwaaniɛ, nakoso kekesaala ye de menwu nikye.” 26Na bebisale ye kyɛ, “Ɔyɛle wɔ sɛ koraa? Ɔtele wɔ nye ne sɛ?” 27Na obuale bɛ kyɛ, “Mahã mahyire ɛmɔ dada, nakoso ɛmɔandie. Nzu ati yeɛ ɛmɔpena kyɛ betie ye bieku ɔ? Ɛmɔ koso, ɛmɔpena kyɛ ɛmɔyɛ ye asuafoɛ anaa?” 28#Yoh 5.45 Yeɛ bɛpepɛle ye nzoaa besele kyɛ, “Wɔ yeɛ ɛte ye suaniɛ ɔ; na yɛ de, yɛte Mose asuafoɛ. 29Yɛse kyɛ Nyameɛ dwudwo hyirele Mose, nakoso sɔ biaa he de, yɛnze nekaa bɔ ofi ɔ!” 30Na biaa ne buale bɛ kyɛ, “Edwirɛ nwanwa ɛhe! Ɛmɔnze nekaa bɔ ofi ɔ, nakoso me de, ɔtele me nye! 31#Edw 34.15, 16 Yɛse kyɛ Nyameɛ ndie bɔnefoɛ mɔ, nakoso sɛ ebie sɔne Nyameɛ ná ɔyɛ ye apɛdeɛ a, ye yeɛ Nyameɛ tie ye ɔ. 32Ofi wiase ahyɛaseɛ, yɛttele ye le kyɛ ebie ate sona bɔ bɛwole ye anyesiniwaaniɛ ɔ ye nye. 33Sɛ nna Nyameɛ berɛ yeɛ biaa he ofi a, ahaa ɔngɔhora ngɔyɔ huu.” 34Na bebuale ye kyɛ, “Bɛwole wɔ bɛtole bɔne nu buroburoburo, na afei wɔ yeɛ ekyirekyire yɛ ɔ?” Na bɛfoane ye befili nyianu sua ne anu.

Anyesiniwaaniɛ ne de Yesu di

35Na Yesu tele kyɛ bafoa ye bafi nyianu sua ne anu, na onwuni ye nen, obisale ye kyɛ, “Ede Sona Awa#9.35: Tete Ahyerɛlɛ ne bie kã kyɛ: Nyameɛ awa. ne di anaa?” 36#Rom 10.14 Na obuale kyɛ, “Me Mene, nwa ole ye, ná nne ye nni?” 37Na Yesu sele ye kyɛ, “Anwu ye, na bɔ ɔne wɔ bedwudwo ne, ye ɛne.” 38#Mat 28.9 Na ɔhane kyɛ, “Awurade, mede medi!” Na ɔkotole sɔnene ye.

Sunzum nu anyesiniwaafoɛ

39Na Yesu hane kyɛ, “Ndɛenbualɛ ti yeɛ mmale wiase ɔ, amaa ɔnate so bɛ bɔ bennwu nikyee ne banwu nikye; ná bɛ bɔ benwu nikyee ne koso bakakyi anyesiniwaafoɛ.” 40#Rom 2.19 Yeɛ Farasiifoɛ ne anu biemɔ bɔ né bɛwɔ ye nwo berɛ ne, bɛtele sɔ dwirɛ ne, na bebisale ye kyɛ, “Yɛ koso, yɛte anyesiniwaafoɛ anaa?” 41#Yoh 15.22, 24 Na Yesu buale bɛ kyɛ, “Sɛ ɛmɔte anyesiniwaafoɛ a, ahaa ɛmɔnni bɔne nwo fɔ; nakoso ɔnate kyɛ ɛmɔnwa ‘Yɛnwu nikye’ ne ati, ɛmɔ bɔne mata ɛmɔ.”

Currently Selected:

Yohane 9: EBP

Highlight

Copy