Yohane 10

Yesu ole Mmoaenneafoɛ paa ne

1Nahorɛ nu paa, mekã mekyire ɛmɔ kyɛ, ebiala bɔ ɔmva anoa ne anu ngɔ mmoaennduin ne anu, ná mmom ɔfo fa nekaa bie ɔkɔ nu nen, ɔte awueniɛ ne awerɔm awueniɛ; 2#Mak 6.34 nakoso bɔ ɔfa anoa ne anu ɔkɔ nu ne de, ɔte mmoaen nemɔ bɛ neafoɛ. 3Ye yeɛ anoa wɛmvoɛ ne obukye ye ɔ; mmoaen nemɔ bɛte ye komvi, na ɔfa ye bɔbɔ ye mmoaen bɛ dumaa yeɛ ɔfa frɛ bɛ maa befite ɔ. 4Na sɛ ɔma ye bɔbɔ ye mmoaen nemɔ befite a, odi bɛ nyunu, na mmoaen nemɔ di ye si, ofikyɛ bɛse ye komvi ngome. 5Na ɛwɔfoɛ de, bengoli ye si, na mmom bɛkɔnwati bekofi ye nwo; ɔnate kyɛ bɛnze ɛwɔfoɛ mɔ komvi. 6#Mak 9.32 Yesu buli bɛ anyandera he, nakoso bande edwirɛ bɔ ɔhã hyirele bɛ ne abo.”

Yesu te mmoaennduin anoa ne.

7Yeɛ Yesu sele bɛ bieku kyɛ, “Nahorɛ nu paa, mekã mekyire ɛmɔ kyɛ, me ole mmoaen nemɔ b’anoa ne. 8#Yer 23.12; Hes 34.2 Bɛ bɔ belili me nyunu moa bɛwale ne amukoraa bɛte awuefoɛ ne awerɔm awuefoɛ, na mmoaen nemɔ bandie bɛ. 9Me ole anoa ne; na sɛ ebie fa me so kɔ nu a, bekole ye ngoa; na okoli nu akɔneaba, na okonya nekaa bɔ okodidi ɔ. 10#Edw 65.11; Rom 5.17 Awueniɛ ne ɔmma, sana ɔbaawua, ná oku, ná ɔsɛkye; nakoso me de, mmale kyɛ bekonya ngoa, ná banya ye mmorosoɛ ɔ.

11 # Edw 23.1; Mat 2.6; Luk 12.32; Yes 40.11; Hes 34.11-16 “Me ole mmoaenneafoɛ paa ne. Mmoaenneafoɛ paa ne, ɔfa ye ngoa to berɛ ma mmoaen ne. 12Nakoso paaniɛ bɔ nna ye ole mmoaenneafoɛ ne, bɔ mmoaen ne bɛtte ye deɛ nen, sɛ onwu kyɛ pataku ba a, ɔyakyi mmoaen ne berɛ nwati; na pataku ne bakye bɛ, na ɔbɔ bɛ sande. 13Paaniɛ ne nwati, ofikyɛ ɔte paaniɛ, na mmoaen ne nwo nhia ye. 14#Ɛks 33.12 Me ole mmoaenneafoɛ paa ne; mese me deɛ, na me deɛ koso se me, 15#Mat 11.27 kyɛbɔ Baba ne se me, ná me koso mese Baba ne nen; na mefa me ngoa meto berɛ mema mmoaen ne. 16#Yes 56.8; Aso 10.34, 35 Na nne mmoaen foforɛ biemɔ bɔ bɛ de nna mmoaen kure he anu yeɛ befi ɔ; na ɔsɛ kyɛ mefa bɛ koso meba ɔ, na bɛkɔte me komvi. Yiti mmoaen kure ne kɔyɛ komapɛ ɔne mmoaenneafoɛ ko.

17“Na ye sɔ ati, Baba ne kuro me dwirɛ, ofikyɛ mefa me ngoa meto berɛ, amaa ɔnate so masa mafa ye bieku. 18#Mat 26.53 Ebie nne mvi me sa nu, na mmom me bɔbɔ yeɛ mefa meto berɛ ɔ. Ye nwo tumi wura me sa kyɛ mefa meto berɛ ɔ, yeɛ ye nwo tumi wura me sa kyɛ mesa mefa ye bieku ɔ; na ahyɛdeɛ he yeɛ nya mvili me Baba berɛ ɔ.” 19#Yoh 6.52 Na ɔnate edwirɛ hemɔ ati, Yudafoɛ nemɔ anu hyehyɛle bieku. 20#Mak 3.22 Bɛ nu pee hane kyɛ, “Ole sunzummɔne, na wabɔ laen. Nzu ati yeɛ ɛmɔtie ye ɔ?” 21Na ebiemɔ koso hane kyɛ, “Sona bɔ ole sunzummɔne ne, nna sɔ yeɛ ye noa dwirɛ te ɔ. Sunzummɔne kɔhora kɔte anyesiniwaafoɛ nye anaa?”

Yudafoɛ po Yesu

22Na Asɔneyɛɛ sua nwo petenɛ aluolue ne dwuli wɔ Yerusalem, na né ɔte prakasua mmerɛ. 23#Aso 3.11 Né Yesu natenate asɔneyɛɛ sua ne anu, wɔ Solomon abrannaa so. 24#Luk 22.67 Yeɛ Yudafoɛ nemɔ bɛɛpɛle ye nwo beyiale, na bebisale ye kyɛ, “Ɛkɔmaa yɛkɔnwondɛ yɛkoodwu kyinzu? Sɛ wɔ ole Kristo ne a, kã ye pefee kyire yɛ.”

25Na Yesu buale bɛ kyɛ, “Mahã mahyire ɛmɔ, na ɛmɔnne benni. Nnwumaa bɔ meyɔ wɔ me Baba dumaa nu ne, bedi me nwo adanzeɛ. 26Nakoso ɛmɔ de, ɛmɔnne benni, ofikyɛ nna me mmoaen ne anu yeɛ ɛmɔfi ɔ.#10.26: Tete Ahyerɛlɛ ne bie fa sɔ so kyɛ: kyɛbɔ nga ngyirele ɛmɔ ne. 27Me mmoaen nemɔ bɛte me komvi, mese bɛ, na bedi me si. 28#Yoh 17.2; 1 Yoh 2.25 Mema bɛ daa ngoa, na bengomini le; na ebiala ngofoti bɛ ngofi me sa nu. 29Me Baba bɔ ɔfale bɛ mane me ne, ɔte piri tra ebiala; na ebiala ngɔhora ngofoti bɛ ngofi me Baba sa nu. 30#Deut 6.4 Me ne Baba ne yɛte ko.”

31Yeɛ Yudafoɛ nemɔ sesale nyɔboɛ bieku kyɛ bɛkwaafa bɛboro ye. 32Na Yesu buale kyɛ, “Nnwumaa paa pee bɔ ofi me Baba ne berɛ yeɛ mayɔ mahyire ɛmɔ ɔ; na bɛ nu beni ati yeɛ ɛmɔbaaboro me nyɔboɛ ye?” 33#Lew 24.16; Mat 26.63-66 Na Yudafoɛ nemɔ buale kyɛ, “Nna adwuma paa bie ti yeɛ yɛbaaboro wɔ nyɔboɛ ɔ; na mmom musue dwirɛ ti ɔ; ofikyɛ ɛte kuro sona, nakoso ɛyɛ wɔ nwo kyɛ Nyameɛ.”

34Na Yesu buale bɛ kyɛ, “Aso nna ɛmɔ mmeraa ne anu yeɛ bahyerɛ ye kyɛ, ‘Ngane kyɛ, ɛmɔte nyameɛ mɔ?’ 35Na sɛ ɔfrɛle bɛ bɔ Nyameɛ dwirɛ ne wale bɛ berɛ ne nyameɛ mɔ, bɔ ebie ngora nzɛkye Ahyerɛlɛ ne a, 36né nzu ati yeɛ bɔ Baba ne ayɛ ye krongron, ná wasoma ye maa wawa wiase ne, ɛmɔkã ye nwo dwirɛ kyɛ, ‘Ahã musue dwirɛ,’ ofikyɛ ngane kyɛ, ‘Nyameɛ Awa ne ole me?’ 37Na sɛ nna me Baba nnwumaa yeɛ meyɔ hɔ a, ye de nnɛma ɛmɔde me bedi. 38Na sɛ meyɔ, ná ɛmɔnne me benni po a, nnwumaa ne de odi kyɛ ɛmɔde bedi, amaa ɔnate so ɛmɔanwu ye, ná ɛmɔale bali kyɛ Baba ne ɔte me nu, na me koso nde Baba ne nu.” 39#Yoh 7.30; Luk 4.30 Na bɛbɔle mmɔden bieku kyɛ bɛkɔhye ye ɔ, nakoso onyane ye nwo tetele fili bɛ sa nu hɔle.

40Na Yesu pɛle asue Yɔɔdan hɔle ye si dɔ bieku, nekaa bɔ Yohane lili moa bɔle asu ne, na ɔtenane berɛ. 41Na mmenia pee bɛwale ye berɛ, na bɛhane kyɛ, “Yohane anyɔ nzɛngyerɛnneɛ biala de, nakoso edwirɛ biala bɔ Yohane hã fale biaa he nwo ne, ɔte nahorɛ.” 42Na mmenia pee belele ye belili wɔ berɛ.

Currently Selected:

Yohane 10: EBP

Highlight

Copy