Luka 24

Yesu shitee

(Mateo 28.1-10; Marko 16.1-8; Yohane 20.1-10)

1Shi otsi lɛ klɛŋklɛŋ gbi lɛ nɔ leebi maaŋkpa lɛ amɛba bu lɛ he, ni amɛhiɛ tsofaikɛŋmai ni amɛsaa amɛto lɛ kɛba. 2Amɛna akɛ akoklo tɛ lɛ kɛje bu lɛ naa; 3ni be ni amɛbote mli lɛ, amɛnaaa Nuŋtsɔ Yesu gbonyo lɛ. 4Be ni amɛfee yaa yɛ enɛ hewɔ lɛ, naa, hii enyɔ badamɔ amɛmasɛi, ni amɛwo atadei kaŋkaŋi. 5Shi be ni amɛsheɔ gbeyei ni amɛmamɔ amɛhiɛ shi lɛ, hii lɛ kɛɛ amɛ akɛ, “Mɛɛba nyɛtaoɔ hiɛkãalɔ lɛ yɛ gbohii ateŋ? 6Ebɛ biɛ; ete shi! Nyɛkaia bɔ ni ekɛɛ nyɛ be ni eyɔɔ Galilea lolo lɛ, 7#Mat 17.22, 23; Mar 8.31; 9.31; Luk 9.22; 18.31-33 akɛ, ‘Ja aŋɔ Gbɔmɔ Bi lɛ awo eshafeelɔi adɛŋ; ni asɛŋ lɛ ni gbi ni ji etɛ̃ lɛ ete shi ekoŋŋ.’ ” 8Ni amɛkai ewiemɔi lɛ, 9ni amɛku amɛsɛɛ kɛjɛ bu lɛ naa, ni amɛyagba mɛi nyɔŋma kɛ ekome lɛ kɛ mɛi ni eshwɛ lɛ nii nɛɛ fɛɛ. 10#Luk 8.2, 3 Maria Magdalena kɛ Yohana kɛ Yakobo nyɛ Maria kɛ yei ni eshwɛ ni fata amɛhe lɛ ji mɛi ni bagba bɔfoi lɛ nii nɛɛ. 11Ni nɛkɛ wiemɔi nɛɛ fee tamɔ kwashiai asane yɛ amɛhiɛ, ni amɛheee amɛyeee. 12[Shi Petro te shi ni esha foi kɛtee bu lɛ he; ni be ni ekoto shi ekwɛ mli lɛ, enaaa nɔ ko nɔ ko akɛ ja klala lɛ kɛkɛ. Ni eje jɛi etee ewe, ni enaa kpɛ ehe yɛ nɔ ni eba lɛ hewɔ].

Shisharamɔ kɛ Emao yaa

(Marko 16.12-13)

13Ni nakai gbi lɛ nɔ nɔŋŋ lɛ amɛteŋ mɛi enyɔ yiŋ kɛmiiya akrowa ko ni kɛ Yerusalɛm jekɛmɔ aaafee shitoi kpawo ni atsɛɔ lɛ Emao lɛ. 14Ni amɛmiigbagbaa nibii ni eba nɛɛ fɛɛ ahe saji yɛ amɛteŋ. 15#Mat 18.20 Ni be ni amɛgbagbaa saji lɛ ni amɛtaoɔ mli lɛ, Yesu diɛŋtsɛ babɛŋkɛ amɛ, ni ekɛ amɛ nyiɛ; 16shi aŋamɔ amɛhiŋmɛii ni amɛkayoo lɛ. 17Ni ebi amɛ akɛ, “Mɛɛ saji nyɛgbaa yɛ gbɛ lɛ nɔ lɛ?” Ni amɛwa amɛdamɔ shi kɛ amɛhiɛ mɔbɔmɔbɔ. 18Ni amɛteŋ mɔ kome ni atsɛɔ lɛ Kleopa lɛ to he ni ekɛɛ lɛ akɛ, “Ani okome pɛ ji gbɔ yɛ Yerusalɛm ni leee saji ni eba jɛi yɛ bei nɛɛ amli lɛ?” 19#Mat 21.11 Ni ebi amɛ akɛ, “Mɛɛ saji ni?” Ni amɛkɛɛ lɛ akɛ, “Yesu Nazarenyo lɛ ni ji gbalɔ ni yɔɔ hewalɛ yɛ nitsumɔ kɛ wiemɔ mli yɛ Nyɔŋmɔ kɛ maŋ lɛ fɛɛ hiɛ lɛ he saji lɛ; 20kɛ bɔ ni wɔsɔfonukpai lɛ kɛ wɔmaŋ onukpai lɛ kɛ lɛ hã ni abu lɛ gbele fɔ, ni amɛsɛŋ lɛ lɛ. 21#Bɔf 1.6 Shi wɔ lɛ wɔhiɛ kã nɔ akɛ kulɛ lɛ ji mɔ ni baakpɔ̃ Israel lɛ; ni enɛ fɛɛ sɛɛ lɛ ŋmɛnɛ ji gbii etɛ̃ ni afee nii nɛɛ. 22#Luk 24.1-11 Shi asaŋ wɔteŋ yei komɛi hu hã wɔnaa kpɛ wɔhe, ejaakɛ amɛtee bu lɛ he mra mli, 23ni be ni amɛnaaa egbonyo lɛ, amɛba ni amɛbakɛɛ akɛ bɔfoi komɛi hu jie amɛhe kpo amɛtsɔ̃ɔ amɛ ni amɛkɛɛ akɛ ehiɛ kã. 24#Luk 24.12; Yoh 20.3-10 Ni mɛi ni kɛ wɔ yɔɔ lɛ ateŋ mɛi komɛi tee bu lɛ he, ni amɛyana tamɔ bɔ ni yei lɛ kɛɛ amɛ lɛ nɔŋŋ; shi lɛ ni amɛnaaa.” 25Kɛkɛ ni ekɛɛ amɛ akɛ, “O kwashiai ni nyɛyɔɔ shɔ̃ɔ yɛ nyɛtsui mli kɛ nii fɛɛ ni gbalɔi lɛ gba lɛ hemɔkɛyeli. 26Ani jeee sa esa akɛ Kristo lɛ ana nɛkɛ amanehului nɛɛ ni ebote enunyam lɛ mli?” 27#Deut 18.15 Ni ebɔ̃i kɛjɛ Mose kɛ Gbalɔi lɛ fɛɛ nɔ, ni etsɔ̃ɔ amɛ nibii ni yɔɔ Ŋmalɛi lɛ fɛɛ mli yɛ ehe lɛ ashishi. 28Ni amɛbɛŋkɛ akrowa ni amɛyaa mli lɛ; ni efee tamɔ nɔ ni eeya ehiɛgbɛ. 29Ni amɛnyɛ enɔ amɛkɛɛ, “Okɛ wɔ ahi shi, ejaakɛ je miina ni eshɛ hiɛbulɛ etã.” Ni etee mli ni ekɛ amɛ yahi shi. 30#Luk 22.19 Ni eba mli akɛ, be ni ekɛ amɛ tara niyenii ahe lɛ, ekɔ aboloo lɛ ni ejɔɔ nɔ, ni ekumɔ mli ni ekɛhã amɛ; 31kɛkɛ ni amɛhiŋmɛi gbele ni amɛyoo lɛ, ni elaaje yɛ amɛhiɛ. 32Ni amɛkɛɛkɛɛ amɛhe akɛ, “Ani nɔ ko etaaa wɔmli be ni ekɛ wɔ wieɔ yɛ gbɛ lɛ nɔ ni etsɔ̃ɔ wɔ Ŋmalɛi lɛ amli lɛ?” 33Ni amɛte shi yɛ nakai ŋmɛlɛtswaa lɛ nɔ nɔŋŋ ni amɛku amɛsɛɛ kɛba Yerusalɛm, ni amɛbana mɛi nyɔŋma kɛ ekome lɛ kɛ mɛi ni kɛ amɛ yɔɔ lɛ ni amɛbua amɛhe naa; 34#1 Kor 15.4, 5 amɛmiikɛɛ akɛ, “Eyɛ mli akɛ Nuŋtsɔ lɛ ete shi, ni ejie ehe kpo etsɔ̃ɔ Simon.” 35Ni amɛ hu amɛgba nɔ ni ba yɛ gbɛ lɛ nɔ lɛ kɛ bɔ ni fee ni amɛyoo lɛ yɛ abolookuumɔ lɛ mli lɛ.

Yesu jie ehe kpo etsɔ̃ɔ kaselɔi lɛ

(Mateo 28.16-20; Marko 16.14-18; Yohane 20.19-23; Bɔfoi 1.6-8)

36Ni be ni amɛwieɔ nii nɛɛ ahe lɛ, Yesu diɛŋtsɛ badamɔ amɛteŋ ni ekɛɛ amɛ akɛ, “Hejɔlɛ ahã nyɛ!” 37#Mat 14.26 Shi amɛhɛle shi ni amɛshe gbeyei, amɛsusu akɛ mumɔ ko amɛnaa lɛ. 38Ni ekɛɛ amɛ akɛ, “Mɛɛba nyɛjijaa, ni mɛɛ hewɔ hu ni ŋwanejee teɔ shi yɛ nyɛtsuii amli? 39Nyɛkwɛa miniji kɛ minaji [ni nyɛaana akɛ] mi diɛŋtsɛ ni; nyɛtaa mihe nyɛkwɛa; shi mumɔ bɛ heloo kɛ wui, tamɔ bɔ ni nyɛnaa akɛ miyɔɔ nɛɛ.” 40[Ni be ni ewie nɛkɛ lɛ, ekɛ eniji kɛ enaji tsɔ̃ɔ amɛ.] 41Shi be ni amɛheee amɛyeee lolo yɛ miishɛɛ hewɔ ni amɛhiɛ efee amɛ yaa lɛ, ekɛɛ amɛ akɛ, “Nyɛyɛ nɔ ko ni ayeɔ yɛ biɛ lo?” 42#Yoh 21.10 Ni amɛhã lɛ loo kuku ni ashi, 43ni ehe, ni eye yɛ amɛhiɛ. 44#Luk 9.22; 18.31-33; 24.27 Ni ekɛɛ amɛ akɛ, “Enɛɛmɛi ji miwiemɔi ni mikɛ nyɛ wie be ni mikɛ nyɛ yɔɔ lolo lɛ, akɛ ja nibii fɛɛ ni aŋma yɛ Mose mla lɛ kɛ Gbalɔi lɛ kɛ Lalai lɛ amli yɛ mihe lɛ na ba mli.” 45Kɛkɛ lɛ egbele amɛjwɛŋmɔ naa, koni amɛna Ŋmalɛi lɛ anaa. 46Ni ekɛɛ amɛ akɛ, “Nɛkɛ aŋma, ni nɛkɛ esa akɛ Kristo lɛ ana amanehulu ni ete shi kɛjɛ gbohii ateŋ yɛ gbi ni ji etɛ̃ lɛ nɔ; 47ni ashiɛ tsuitsakemɔ kɛ eshaifaa yɛ egbɛi lɛ mli atsɔ̃ɔ maji fɛɛ, ni abɔ̃i kɛjɛ Yerusalɛm. 48#Yoh 15.26; 16.7; Bɔf 1.4 Ni nyɛ ji nɛkɛ nii nɛɛ ahe odasefoi. 49#Bɔf 1.4 Ni naa, miiha miTsɛ shiwoo lɛ aba nyɛnɔ; shi nyɛ lɛ nyɛhia shi yɛ Yerusalɛm maŋ lɛŋ kɛyashi beyinɔ ni aaajɛ ŋwɛi awo nyɛ hewalɛ.”

Yesu ŋwɛiyaa

(Marko 16.19-20; Bɔfoi 1.9-11)

50Ni eŋɔ amɛ kɛje kpo kɛtee Betania masɛi, ni ehole eniji anɔ ni ejɔɔ amɛ. 51Ni eba mli akɛ, be ni ejɔɔ amɛ lɛ, ekɛ amɛ gbala mli, ni awo lɛ kɛtee ŋwɛi. 52Ni amɛja lɛ, ni amɛku amɛsɛɛ kɛtee Yerusalɛm kɛ miishɛɛ pii; 53ni amɛyɛ Sɔlemɔ we lɛ daa nɛɛ, ni amɛhiɛ Nyɔŋmɔ yijiemɔ kɛ lɛ jɔɔmɔ.

Currently Selected:

Luka 24: NEGAB

Highlight

Copy